Kasin Nepeg Tayon Takotan so Isabi nen Kristo?

ANTO so iisipen yo a nagawa diad isabi nen Jesu-Kristo? Kasin ipapasen yo a nagawa la ed satan so kaukom, kaderal, tan kadusa na katooan? Odino iilaloan yo a naandi la ed satan so amin a problema tayo? Kasin nepeg tayon takotan so isabi nen Kristo? Odino nepeg tayon talaranan itan?

Oniay ibabaga na Biblia nipaakar ed isabi nen Kristo: “Nia, [sikatoy] onla dia ya ulopen na saray lurem; tan amin a mata sikato so nanengneng da, . . . et saray amin a kailalakan ed dalin mandageyem ira naani lapu ed sikato.” (Apocalipsis 1:7) Tutukoyen na saya so nipaakar ed isabi nen Jesus diad arapen pian tumangan to iray matunong tan dusaen to iray mauges.

Si apostol Juan so nantalaran ed isabi nen Kristo, imbes a tinakotan to itan. Kayari ton naawat so puyan nipaakar ed isabi nen Kristo tan say kabaliksan na satan parad dalin, oniay masimoon ya impikasi to: “Gala, Katawan a Jesus.” (Apocalipsis 22:20) Balet, akin a ‘mandageyem so amin a kailalakan ed dalin lapu ed sikato’? Diad anton paraan a sikato so nanengneng na “amin a mata”? Anto so nagawa sano onsabi si Kristo? Panon itayon nagunggonaan natan no panisiaan tayo itan? Sarayan tepet so ebatan na ontumbok ya artikulo.