Nia! Makapakelaw so Liwawa!

NO ASALI yo la so nankarkarapkap diad ambilbilunget a dalan, amta yo a talagan makapadismaya itan. Agaylan nainawaan kayo ed pakanengneng yoy liwawa! Maseguron nidunget kayo met la ed sakey a situasyon a singano wala kayo ed kabilungetan. Nayarin agawa itan sanen agkayo makalmo na solusyon ed problema yo. Kabekta et akaromog kayo na paraan, a singano akanengneng kayoy liwawa. On, makapaliket ya eksperiensya so pakapaway ed sakey a mairap a situasyon tan pakaromog na solusyon, a singa itan pakanengneng na liwawa legan a mankarkarapkap diad kabilungetan.

Nen inmunan siglo, maslak a totoo so walad espiritual a kabilungetan. Oniay insulat nen apostol Pedro ed saramay angibeneg ed datin sisisiaen da tan angawat ed Inkakristiano: “[Say Dios] so anawag ed sikayo’d kabilungetan tan angiyakar ed sikayo’d makapakelaw a liwawa to.” (1 Pedro 2:9, Maung a Balita) Ipapasen da a singa ra pinmaway ed pasen ya ambilbilunget insan linmoob ed pasen a maliwliwawa. Niyaliling met so kipapasen da ed sakey a datin manbukbukor ya andian lay ilalo insan nikamang ed pamilyan walaay maligen ya arapen.​—Efeso 2:1, 12.

“Inkaindan Mo so Akauna ya Arom”

Aromog na saray inmunan Kristiano so “katuaan,” say tuan pananisia na Kristiano. (Juan 18:37) Anengneng da so makapakelaw a liwawa na katuaan tan anguman so kipapasen da manlapud espiritual a kabilungetan a nagmaliw ya onsisinag a liwawa. Balet diad inlabas na panaon et naandi so entusiasmo tan inkaseseg na arum a Kristiano. Alimbawa, sanen mansamposampot la so inmunan siglo, walay seryoson problema a linmesa diad kongregasyon ed Efeso. Impaamta na apaolin si Jesu-Kristo no anto itan, a kuan to: “Wala so isumpak ed sika, ta inkaindan mo so akauna ya arom. Pakanonoten mo sirin no iner so naplagan mo, tan magbabawi ka, tan gawam so saray manunaan a gawa.” (Apocalipsis 2:4, 5) Kinaukolan na saray Kristiano ed Efeso a pabilayen so panangaro ra ed Dios tan ed katuaan.

Balet komusta itayo? Nanggayagaan tayo met so impakanengneng na liwawa, salanti, say impakapikabat ed makapakelaw a katuaan na Salitay Dios. Naaro tayo so katuaan. Balet, nayarin ombetel so panangaro tayo ed katuaan lapud saray kairapan a kaslakan lan nasasagmak na katooan. Nayarin pansengegan met iray problema a nagagawa lambengat diad ‘sarayan kaunoran ya agew.’ Manbibilay itayo la ed sakey a mundo a pakapatnagan na ‘maatap a panaon’ tan napno na totoon ‘maaro ed lamalaman da, maaro na pilak, managpasirayew, atagey a linawa, maayew, matulay ed kaatengan da, malamang, tan aliwan masimpit.’ (2 Timoteo 3:1, 2) Lapud impluensya ra, nayarin naandi so seseg tayo tan ombetel so panangaro tayo ed si Jehova.

No abalang tayo so akauna ya aro tayo, kaukolan tayon ‘nodnonoten so inkaplagan tayo tan magbabawi itayo.’ Kaukolan itayon ompawil ed datin kipapasen tayo ed espiritual. Sakey ni, agtayo papaulyanan ya ombetel so panamabli tayo ed katuaan. Agaylan importante sirin a pansiansiaen tayo so positibo tan maliket ya awawey tan lawas tayon pabilayen so panangaro tayo ed Dios tan ed katuaan!

 ‘Say Katuaan a Mangibulos ed Sikatayo’

Makapakelaw so liwawa na katuaan a manlalapud Biblia lapud eebatan na satan iray importantin tepet ya abayag lan manwewetwet ed katooan. Saratan a tepet et: Akin a wadia itayo? Anto so gagala na bilay? Akin a nagagawa so kaugsan? Kasin wala so biek-a-bilay? Sikatayo so liliwawaan nen Jehova panamegley na alay-abig iran bangat na Biblia. Agta pisalsalamatan tayo iratan? Komon ta agtayon balot ibabaliwala iray nanaaralan tayo!

Oniay inkuan nen Jesus ed saray babangatan to: “Nakabatan yo so katuaan, et say katuaan sikayo so gawaen to a bulos.” (Juan 8:32) Lapu ed dondon bagat nen Jesus, sikatayoy posible lan nibulos ed kasalanan tan ipapatey. Ontan met, sarayan mablin katuaan so mangibubulos ed sikatayo manlapud inkaandi-kakabatan tan saray kapagaan na sayan mundon walad kabilungetan. Say maapresyan pandalepdep ed saray nanaaralan tayo so mamaelet na panangaro tayo ed si Jehova tan ed Salita to.

Oniay insulat nen apostol Pablo ed saray Kristiano ed Tesalonica: “Sanen inawat yo ed sikami so salita ya ingganggan, a salanti salita na Dios, inako yo ya aliwan singa salita na totoo, balet unong ed katuaan, say salitay Dios, a sikato met so onggawa ed sikayo a manisia.” (1 Tesalonica 2:13) Saray taga-Tesalonica so dinmengel tan ‘angawat ed salita na Dios a sililiket.’ Anggapo la ra ed “kabilungetan,” tan nagmaliw la ran ‘anak na liwawa.’ (1 Tesalonica 1:4-7; 5:4, 5) Naaralan na saraman a Kristiano a si Jehova so Manamalsa tan sikato so makapanyarin-amin, makabat, maaro, tan mapangasi. Singa met ed arum a papatumbok nen Kristo, naaralan da a si Jehova so angitarya na probisyon pian napunas iray kasalanan da panamegley na dondon bagat na Anak to, si Jesu-Kristo.​—Gawa 3:19-21.

Anggaman ag-akabatan na saray taga-Tesalonica so amin a nipaakar ed katuaan, amta ra balet so pakaromogan na pikakabat. Say impuyan a Kasulatan so makatulong ed too na Dios pian ‘anggapo so pankulangan to, a nabangatan a maong ed amin a gawan maabig.’ (2 Timoteo 3:16, 17) Akapantultuloy a nanaral iray Kristiano ed Tesalonica tan aminpiga ran naeksperiensya a talagan makapakelaw so liwawa a manlalapud Dios. Walaan ira na rason pian manliket ed amin a panaon. (1 Tesalonica 5:16) Ontan itayo met.

Sakey a Liwawa ed Basbas Tayo

Impabitar na salmista so rason no akin a makapakelaw so liwawa, sanen inkanta to: “Say salitam sikato so sakey a silewan ya onkana ed saray salisalik, tan sakey a liwawa ya onkana ed basbas ko.” (Salmo 119:105) Say pangiwawanwan ed sikatayo na Salitay Dios so ontulong ed sikatayo a natumbok so dugan direksion. Agtayo la kaukolan so napalikdo. No aralen tan iyaplika tayo so katuaan, ag-itayo ‘nipaligpalig dia tan diman tan nitektekkiab ed antokaman a dagem na bangat.’​—Efeso 4:14.

Oniay inkuan na Biblia: “Agyo iyan so panmatalek yo ed saray priprinsipe, nisay dia ed anak na too, a dia ed sikato anggapo so tulong.” Tan inkuan ni na satan: “Maliga so too a say Dios nen Jacob so tulong to, et say ilalo to wala ed Jehova a Dios to.” (Salmo 146:3, 5) Niarum ni, say panmatalek ed si Jehova so ontulong ed sikatayo pian ag-itayo ontakot tan manaburido. Oniay insulat nen apostol Pablo: “Agkayo mapaga ed antokaman; noag dia ed ganagana lapu ed pikakasi tan pikekerew a tekep na pisasalamat nipakabat komon ed Dios so saray kerew yo. Tan say deen na Dios, a talonaan ton amin a pakatalos, bantayan to so kapusoan yo tan saray nonot yo ed Kristo Jesus.” (Filipos 4:6, 7) Peteg a mangunggona ed sikatayo so panangigiya na liwawa na Salitay Dios.

 Onsinag Bilang Silesilew ed Mundo

Say sananey nin rason no akin a makapakelaw so liwawa na Salitay Dios et lapud itatarya na satan ed totoo so pankanawnawan makaawat na sankaabigan a pribilehyo. Oniay ingganggan nen Jesus ed papatumbok to: “Onla kayo . . . tan manggawa kayo na saray babangatan ed amin a nasyones, a binyagan yo ra ed ngaray Ama, tan say Anak, tan say espiritu santo: Ya ibangat yo ran mangunor na amin a bengabengatla ya ingganggan ko ed sikayo; tan nia, wala ak a naynay ed sikayo, ya angga ed kasampotan na mundo.” Antis iyan ingganggan nen Jesus, oniay inkuan to: “Amin a pakauley niiter ed siak ed tawen tan dia ed dalin.”​—Mateo 28:18-20.

Imanoen pa no siopa so ontutulong ed saray tuan Kristiano ed panangipulong na maong a balita tan panangibangat na saray katuaan ed Biblia diad saray totoo ed amin a bansa. Insipan nen Jesus a tulongan to iray papatumbok to. On, sikaray talagan tutulongan tan susuportaan to diad ministeryo ra legan dan ‘isisindag so silew da’ ed ontan a paraan tan diad arum niran “maong a gawa.” (Mateo 5:14-16) Ontutulong met iray anghel ed sayan kimey a panag-ebanghelyo. (Apocalipsis 14:6) Komusta balet si Jehova a Dios? Oniay insulat nen apostol Pablo: “Siak so angitanem, si Apolos so analog; bangbalet say Dios so amabaleg.” Agaylan pribilehyo so pagmaliw a sakey ed saray “kakimeyan na Dios”!​—1 Corinto 3:6, 9.

Isipen pa met no panon a natutumangan iray sagpot tayo ed sayan kimey ya inter na Dios. Anggapo lay mipara ed say inter na Dios a pribilehyo tayon mangisindag na liwawa a “singa silesilew dia ed mundo.” No isindag tayo so liwawa na Salitay Dios diad panagsalita tan kakikiwas tayo, nitarya tayo so peteg a makatulong ed saray matuan-impanpuson totoo. (Filipos 2:15) Tan makapanggayaga itayo legan a sikatayoy maseseg a manpupulong tan manbabangat, lapud ‘say Dios et aliwan agmatunong pian nalingwanan to so gawa tayo tan say aro ya impanengneng tayo ed ngaran to.’​—Hebreos 6:10.

‘Manaliw ka na Puyok na Matamatam’

Diad mensahe nen Jesus ed inmunan-siglon kongregasyon ed Laodicea, oniay inkuan to: “Manaliw ka ed siak na . . . puyok na matamatam a pamuyok mo na matam, pian makanengneng ka. Siak banoen tan dusaen ko so aroen ko.” (Apocalipsis 3:18, 19) Say “puyok na matamata”​—saray bangat tan pananisiplina nen Jesus​—et seguradon mamaabig ed espiritual ya inkabulag. Pian napansiansia tayo so mabiskeg ya espiritualidad tayo, nepeg tayon awaten so simbawa nen Jesus tan manpasakop itayo met ed panangiwanwan to a naromog ed Biblia. Kaukolan tayo met ya aligen so paraan na panag-isip nen Kristo tan say ehemplo to. (Filipos 2:5; 1 Pedro 2:21) Aliwan libre so puyok na matamata, lapud oniay inkuan nen Jesus: “Manaliw ka ed siak.” Say bayar na satan et say panaon tan sagpot tayo.

Sano ompaway itayo ed ambilunget a pasen tan onloob ed sakey a maliwawan silir, nakaukolan ni so panaon pian makaadapta so mata tayo. Mipadpara, nakaukolan met so panaon ed panaral na Salitay Dios ta pian nanengneng tayo so liwawa na katuaan. Nakaukolan met so panaon ed pandalepdep ed nanaaralan tayo tan no kaunongan kaimportante so katuaan. Ingen ta aliwan mabmabli so bayar na satan. Akin? Lapud makapakelaw so liwawa!

[Litrato ed pahina 14]

“Manaliw ka ed siak na . . . puyok na matamatam a pamuyok mo na matam, pian makanengneng ka”