No Anto so Nagawa Sano Onsabi si Kristo

“MAKAPATALAGNAW A GULO ED SÃO PAULO.” Ontan so impaneskribe na magasin a Veja ed apat-agew ya organisadon krimen nen Mayo 2006, a satan so “sigpot ya amakapuy” ed sankabalegan tan sankayamanan a syudad ed Brazil. Manga 150 a popolis, kriminal, tan ordinaryon mibabaley so inatey legan na “masulok a 100 oras a makapatalagnaw a gulo.”

Say mabetbet a paulon-balita diad amin lawarin parte na dalin et say karawalan. Mapatnag ya ag-iya napatunda na saray totoon manuley. Say mundo tayo et magmamaliw lan makapataktakot a panayaman. Nayarin nadidismaya kayo lapud anggan iner so laen yo, amayamay iray mauges a balita. Balet, asingger lay panaon na pananguman.

Imbangat nen Jesus iray papatumbok to ya ipikasi ran onsabi so Panarian na Dios tan nagawa so linawa to, “unong ed tawen, ontan met ed dalin.” (Mateo 6:9, 10) Sayan Panarian et sakey a gobierno, a say tinuro na Dios a man-ari et si Jesu-Kristo. Solbaren na saya so amin a problema na katooan. Balet, pian napasimbalo na Panarian na Dios so dalin, kaukolan nin salatan na uley nen Kristo iray uley na totoo. Sayan mismo so nagawa sano onsabi si Kristo.

Mareen a Pananguman?

Kasin mareen a manpasakop iray bansa ed uley nen Kristo? Ebatan itan na say nipasingawey ed si apostol Juan. Oniay insalaysay to: “Anengneng ko so ayep [say mapolitikan sistema na mundo], tan saray arari ed dalin, tan saray ehersito da, ya atiptipon pian bakalen da [si Jesus a] wala ya akayurong ed saman so kabayo, tan say ehersito to.” (Apocalipsis 19:19) Anto so nagawa ed saray arari na dalin ed sayan bakal? Inkuan na Biblia a say Ari a nilanaan nen Jehova so ‘mamuyak ed sikara ed lewet a balatyang, ya ibalsak to ra a mekmeken a singa pomapalba.’ (Salmo 2:9) Sigpot lan nabuybuyak so mapolitikan sistema. Say Panarian na Dios so ‘mamuyak tan mangupot naani ed saraya ya amin a panarian [na too], et sikato so mansiansia lawas.’​—Daniel 2:44.

Anto balet so nagawa ed saray totoon onsusumpa ed Panarian na Dios? ‘Sano ompayawar la so Katawan tayo a Jesus a manlapu ed tawen ya iba to so saray angheles na pakayari to dia ed mandarlang ya apoy,’ sikatoy nilitrato bilang sakey a ‘mangiter na panamales ed saray agmikabat ed Dios tan dia ed saray ag-ontulok ed ebanghelyo.’ (2 Tesalonica 1:7, 8) “Say marelmeng  napegpeg a manlapu ed dalin, tan saray liputan nabagot ira ed sikato,” kuan na Uliran 2:22.

Nipaakar ed isabi nen Kristo, oniay inkuan na Biblia: “Nia, [sikato so] onla dia ya ulopen na saray lurem; tan amin a mata sikato so nanengneng da.” (Apocalipsis 1:7) Sikato so agnanengneng na totoo ed literal a kamataan da. Nanlapula’d intokotok nen Jesus ed tawen, sikatoy sakey lan espiritun persona “a manaayam ed sakey a liwawa ya agnaasinggeran; a sikato so agnanengneng na anggan siopa ed saray totoo, et sikato so agnayari a nengnengen.”​—1 Timoteo 6:16.

Agla kaukolan a magmaliw a too si Jesus pian ‘nanengneng’ na saray manaayam diad dalin, no panon ya agkinaukolan nen Jehova so manpanengneng sanen indapo to so Samploran Bakbak ed saray Ehipsio diad panaon nen Moises. Diad saman a panaon et anisia iray totoo a si Jehova so nanlapuan na saray bakbak, tan apaskar iran mamidbir ed pakapanyari to. (Exodo 12:31) Mipadpara, sano onkiwas lay Kristo bilang Manangipaakseb na Dios, saray mauges so napaskar a ‘makanengneng,’ odino makatebek a si Jesus so uusaren na Dios pian ukomen ira. Naamtaan itan na totoo lapud sikara so apasakbayan la. On, ‘amin a mata et nanengneng da si Jesus, tan saray amin a kailalakan ed dalin et mandageyem ira naani lapu ed sikato.’​—Apocalipsis 1:7.

Antis a nipawil so tuan kareenan tan inkaaligwas diad dalin, kaukolan nin naderal iray marelmeng tan naekal iray mauges a pananguley. Gawaen itan nen Kristo. Kayari na satan et sigpot to lan kontrolen so amin a pakurang diad dalin, tan nagawa la iray makatantandan pananguman.

Say Panangipawil a Pakagunggonaan

Sinaglawi nen apostol Pedro so nipaakar ed “kipawil na ami’y ganagana a sinalita na Dios ed sangi na saray masantos a propeta a nambilay nanlapud gapo.” (Gawa 3:21) Laktipen na sayan kipawil so panamasimbalon nagawa diad dalin legan na uley nen Kristo. Si Isaias, a nambilay nen komawalon siglo B.C.E., so kabiangan ed saray propetan akisalitaan na Dios nipaakar ed “kipawil na ami’y ganagana” diad dalin. Impasakbay to a si Jesu-Kristo, a “Prinsipe na Kareenan,” so mangipawil na kareenan ed dalin. Nipaakar ed uley nen Kristo, oniay nipasakbay ed propesiya nen Isaias: “Ed ibaleg na pananguley to tan kareenan anggapo naani anggaan.” (Isaias 9:6, 7) Ibangat nen Jesus iray totoo diad dalin nipaakar ed daladalan na kareenan. Saramay manaayam ed dalin et “manliket ira a dili ed inkadaakan na kareenan.”​—Salmo 37:11.

Anto so nagawa ed kairapay-bilay tan eras sano manuuley lay Kristo? Oniay inkuan nen Isaias: “Dia ed saya a palandey si Jehova na saray ehersito manggawa naani ed saray amin a baley na sakey a liket ed saray mataba a bengatla, sakey a liket na saray alak ed tapew na saray bolirek, saray mataba a bengatla a napno na utek, tan saray alak ed tapew na saray bolirek napaitneng ira.” (Isaias 25:6) Tan oniay inkanta na salmista: “Wala so daakan ya ilik ed tapew na dalin ed tapew na toktok na saray palandey.” (Salmo 72:16) Niarum ni, oniay nabasa tayo nipaakar ed saray manaayam ed dalin: “Ipaalagey da naani so saray abung, tan manayam ira naani; et mantanem ira naani na saray ubas, tan mangan ira naani ed saray bunga ra. Sikara ag-ira naani mangipaalagey, et sananey so manayam; ag ira naani mantanem et sananey naani mangan. Ta singa saray agew na sakey a kiew ontan ira naani so saray agew na baley ko, et saray pinilik manliket ira naani a maando ed saray gawa na saray lima ra.”​—Isaias 65:21, 22.

Impasakbay met nen Isaias a naandi la so sakit tan ipapatey. Oniay inkuan na Dios diad panamegley nen Isaias: “Satan la nilukas so saray mata na bulag, tan say layag na saray telek nibuang naani. Satan la manlukso so piley a singa sakey ya ulsa, tan say dila na emel mankanta naani.” (Isaias 35:5, 6) Insan “say manaayam agto naani ikuan, Mabeblay ak.” (Isaias 33:24) Say Dios ‘akmonen to so patey ed ando lan ando; et say Katawan a Jehova punasen to naani so saray lua ya onagus ed saray amin a lupa.’​—Isaias 25:8.

 Komusta balet so amin ya inaatey a “wala ed saray lubok”? (Juan 5:28, 29) Oniay impropesiya nen Isaias: “Saray inaatey mo ombilay ira. . . . Onalagey ira.” (Isaias 26:19) On, saramay naugip ed patey so napaoli ed bilay!

“Say Dios so Tronom ed Ando lan Ando”

Diad isabi nen Kristo, say planetan Dalin so nagnap a napapawil ed datin kipapasen to. Satan so napasimbalo a magmaliw a marakdakep a paraiso, tan say katooan so mankakasakey ed panagdayew ed tuan Dios. Kasin makaseguro itayo ya ontalonay Jesu-Kristo ed pangekal to na karelmengan diad dalin tan ed pamawala to na inkatunong?

Nodnonoten pa so lapuan na pakayari tan autoridad a niiter ed si Jesus. Nipaakar ed Anak, oniay inkuan na Biblia: “Say Dios so tronom ed ando lan ando, tan say setro na kaptekan so setro na panarian mo. Inarom so katunongan, tan binusol mo so kaugsan.” (Hebreos 1:8, 9, NW) Say trono nen Jesus, salanti, say betang odino autoridad to, so nanlapu ed si Jehova. Say Dios so Angiletneg tan Angiter ed satan a trono. Kanian amin a klase na problema et nayarian nen Jesus a resolbien.

Kayari na inkioli nen Jesus, oniay inkuan to ed saray babangatan to: “Amin a pakauley niiter ed siak ed tawen tan dia ed dalin.” (Mateo 28:18) “Wala ra ed silong na pakauley to so saray angheles, tan pakauley tan pakayari,” so kuan na 1 Pedro 3:22. Anggapo so pakayari odino pakauley ya ontalona ed isumpa ra ed si Jesus. Anggapo so makaamper ed sikato ed pangitarok toy magnayon a gunggona ed katooan.

Panon a Mangapekta ed Totoo so Isabi nen Kristo?

Oniay insulat nen apostol Pablo ed saray taga-Tesalonica: “Nodnonoten mi ya andi-tunda so gawa yo ed pananisia tan sagpot yo ed aro tan anos yo ed ilalo ed Katawan tayon Jesu-Kristo, ed arap na Dios tan Ama tayo.” (1 Tesalonica 1:3) Binidbir nen Pablo a say mabungan kimey tan panagsungdo et nisengeg ed ilalo ed si Jesu-Kristo. Kabiangan ed satan ya ilalo so pananisia ed isabi nen Kristo tan ed kipawil ya asingsingger lan gawaen na satan. Sayan ilalo so mamabiskeg ed saray tuan Kristiano, odino ontulong ed sikaran makapansungdo, anggaman ed mair-irap iran kipapasen.

Imanoen pa so alimbawa nen Carlos, a manaayam ed São Paulo, Brazil. Nen Agosto 2003, naamtaan to a walay kanser to. Manlapud saman et sikato so aminwalo lan inoperaan, a walaan iratan na makapaot-ot tan makapakapuy iran epekto. Ingen, sikato so nantultuloy a mamapaseseg ed arum. Singa bilang, legan a manpupulong diad karsada ed arap na baleg ya ospital, walay akabat to a Tasi met nen Jehova, a say masiken to et manpapa-chemotherapy. Lapud naeksperiensya la nen Carlos iray makapagonigon ya epekto na kanser, ayarian to a pasesegen tan ligliwaen imay sanasawa. Kayari na impantongtong da, inkuan na sanasawa a sikaray apabiskeg a tuloy. Peteg a naeksperiensya nen Carlos so katuaan na saray salita nen Pablo: “[Say Dios] . . . so manligliwa ed sikatayo ed amin a panermenan tayo, pian nayarian tayon ligliwaen so saray wala ed bengatlan panermenan, ed samay ligliwa a diad sikatayon dili, impanligliwa na Dios.”​—2 Corinto 1:4.

Anto so amabiskeg ed si Carlos pian nitultuloy to a napabiskeg met so arum anggaman walay sakit to? Say ilalo ed isabi nen Kristo tan ed amin a gawaen na satan so amakiwas ed sikato a mantultuloy a “manggawa na maabig.”​—Galacia 6:9.

Konsideraen pa met so kipapasen nen Samuel, a say yugtan ton laki et pinaltog a 50 metro labat so kaarawi to ed abung na ama ra. Samploran bala so kinmena ed laman na agi to. Waloy oras ya agda inekal so bangkay ed gilig na dalan legan ya iimbestigaan na polis so krimen. Say agawa ed saman ya agew et agbalot nalingwanan nen Samuel. Anggaman ontan, sikato so apabiskeg ed ilalo ya amin a mauges diad dalin et ekalen la nen Kristo tan kayari na satan et say matunong ya uley so mamendisyon ed katooan. Mabetbet a nononoten nen Samuel a nalakap to so napaolin agi to diad Paraiso ed dalin.​—Gawa 24:15.

 Anto so Nepeg Mon Gawaen?

Talagan naligliwa ka lapud nailaloan mon onsabi si Kristo tan amtam no anto so gawaen na satan. Seguradon solbaren nen Jesu-Kristo so amin a manunan lapuan na saray problema na too tan saray kaugsan a mamapairap ed sikatayo.

Anto so nepeg mon gawaen pian napanggayagaan mo iray bendisyon ya ipagamor na uley nen Kristo ed katooan? Gapoan mo la so maseet a panagaral ed Salitay Dios, say Biblia. Oniay inkuan nen Jesus diad pikakasi to ed Ama to: “Saya sikato so andi-anggaan a bilay, a naamtaan da ka a saksakey a tuan Dios, tan saman so imbakim, salanti [si] Jesu-Kristo.” (Juan 17:3) Panggunaetan mon usisaen no anto so ibabangat na Biblia. Maliket iray Tasi nen Jehova ed lugar yo ya ontulong ed sikan manaral ed saya. Sika so iimbitaan mi a mitongtong ed sikara odino nayarian moy mansulat ed saray manangipalapag na sayan magasin.

[Saray litrato ed pahina 7]

Diad isabi nen Kristo, say dalin so nagnap a napapawil ed datin kipapasen to

[Credit Line]

Walad loob a litrato, say background lambengat: Rhino and Lion Park, Gauteng, South Africa