No Panon a Dinmeen so Kanonotan nen Ana

SAKEY a matoor a bii so angikasil na boses to diad pikakasi ton mangidadalangirang ed si Jehova. Alikna ton sikatoy singa inagwat na Dios manlapud dabok, ya asalatan na liket so paneermen to.

Say ngaran na sayan bii et Ana. Anto so sengegay makatantandan impanguman na liknaan to? Akin a sikato so nagmaliw a malikeliket? Panon itayon nagunggonaan ed eksperiensya to? Pian naamtaan tayo iray ebat ed sarayan tepet, konsideraen tayo so istorya na bilay nen Ana.

Sakey a Pamilya a Namproblema

Si Ana so sakey ed duaran asawa nen Elcana, sakey a Levita a manaayam diad teritorya na Efraim. (1 Samuel 1:1, 2a; 1 Awaran 6:33, 34) Anggaman agkabiangan na orihinal a gagala na Dios ed katooan so pangasawa na pigara, naabuloyan itan ed Mosaikon Ganggan tan walaray uksoyan nipaakar ed satan. Say pamilya nen Elcana so mandadayew ed si Jehova, balet singa ed agawa ed pamilya to, say pakawalaan na duaran asawa so mabetbet a pansengegan na kolkol.

Si Ana et agmakaanak, balet ta si Penina, say sakey nin asawa nen Elcana, so walaan na pigaran anak, tan sikato so nagmaliw a kakompetensya nen Ana.​—1 Samuel 1:2b.

Diad limog na saray Israelitan bibii, say agpakaanak so impasen a kababaingan tan pakapatnagan ni ingen na ag-inkamakanepegan ed arap na Dios. Balet anggapo so pakapatnagan a say agpakaanak nen Ana et ebidensya a sikatoy ag-inabobonan na Dios. Ingen, si Ana so agniligliwa nen Penina, noagta inkana to so pakasarag ton mananak pian pakapuyen so liknaan na kakompetensya ton si Ana.

Diad Tinaon ya Impanbaroy da ed Santuaryo nen Jehova

Anggaman ed sarayan problema, tinaon a manbabaroy so pamilya nen Elcana pian mangiyapay ira na bagat diad santuaryo nen Jehova ed Siloh. * Manaakar ira na manga 60 kilometro no paonla tan pasempet ira. Sarayan pankanawnawa so mair-irap parad si Ana lapud dakel so betang nen Penina tan say ananak to ed bagat a pandurungoan, bangta sakey labat so niiiter ed si Ana. Inanamot nen Penina iratan a pankanawnawa pian pasyodoten si Ana, a didismayaen ton maong lapud singa ‘sinaraan la nen Jehova so eges’ to. Tinaon a nagagawa iyan makapagonigon a kipapasen, a naynay a panaakisan tan agpakakapanganan nen Ana. Sarayan impanbaroy da so nepeg komon a makapaliket ed sikato, balet ta nagmaliw a makapaermen. Siansia, agbalot sinmaew si Ana ed impanbaroy da diad santuaryo nen Jehova.​—1 Samuel 1:3-7.

Atebek yo kasi so maong ya alimbawa nen Ana parad sikatayo? Sano maneermen kayo, panon so ikikiwas yo? Kasin iyarawi yoy inkasikayo tan agkayo la milimog ed saray agagi? Aliwan ontan so ginawa nen Ana. Inyugali to so pilimog ed saray mandadayew ed si Jehova. Kanian anggano  makapagonigon iray kipapasen, nepeg ya ontan met so gawaen tayo.​—Salmo 26:12; 122:1; Uliran 18:1; Hebreos 10:24, 25.

Nanggunaetan nen Elcana a ligliwaen si Ana tan impaibesngaw to so nalilikna na asawa to. “Akin et mannangis ka? Tan akin et agka mangan? Tan akin et say pusom manermen?” so intepet nen Elcana. “Agak ta magmaong ed sika nen say samploran anak a lalaki?” (1 Samuel 1:8) Nayarin ag-amta nen Elcana so maruksan gagawaen nen Penina, kanian mas nilabay la nen Ana ya itepel so pakakasakitay liknaan to, imbes a manreklamo. Antokaman so kipapasen, nanggunaetan na maespiritual ya Ana so manpikasi ed si Jehova pian ondeen so kanonotan to.

Say Insipan nen Ana

Saray bagat a pandurungoan so kakanen diad santuaryo nen Jehova. Kapaway to ed pananganan, si Ana so linman nampikasi ed Dios. (1 Samuel 1:9, 10) Onia so inyey-ey to: “O Jehova na saray ehersito, no tua a nengnengen mo so kaermenan na aripen mo a bii, tan nonoten mo ak, tan agmo lingwanan so aripen mo a bii, noag ingen mangiter ka ed aripen mo na sakey ya anak a laki, sirin sikato so iter ko ed Jehova ed saray amin ya agew na bilay to tan anggapo so pangiskis ya onlabas ed ulo to.”​—1 Samuel 1:11.

Espisipiko so pikakasi nen Ana. Sikatoy kinmerew na sakey ya anak a laki tan insipan to a saya so idedika to ed si Jehova bilang legay-bilay a Nazareo. (Numeros 6:1-5) Satan a sipan so kinaukolan ya abobonan ni na asawa to, ingen ta apatnagan ed saray kiwas nen Elcana diad saginonor ya inabobonan to itan a sipan na pinabli ton asawa.​—Numeros 30:6-8.

Lapud paraan na impanpikasi nen Ana, inisip na Atagey a Saserdoten si Eli ya abuek si Ana. Mitimiti iray bibil to, balet agtanton natalosan so ibabaga to, lapud mansasalita si Ana manlapud puso to. On, masimsimoon so impanpikasi to. (1 Samuel 1:12-14) Isipen pa no anto so alikna nen Ana sanen sikatoy pinabaingan nen Eli, ya imbaga ton abuek! Ingen, si Ana so marespeton inmebat ed atagey a saserdote. Sanen amoria nen Eli a manpipikasi si Ana “dia ed daakan a sinagem [to] tan inkasagyat [to],” onia so imbaga to: “Say Dios na Israel yabobon to komon so kerew mo.” (1 Samuel 1:15-17) Kayari na satan, si Ana so linma ya angan, tan “say lupa to [et] aliwa lan maermen.”​—1 Samuel 1:18.

Anto so naaralan tayo ed sayan amin? Sano manpipikasi itayo ed si Jehova nipaakar ed saray kapagaan tayo, sarag tayon ipaamta ed sikato no anto so nalilikna tayo tan say impapuso iran kerew tayo. No anggapo lay nagawaan tayo pian resolbien so problema, ipalima tayo la itan ed sikato. Saya so sankaabigan lan gawaen.​—Uliran 3:5, 6.

Kayari na masimoon a pampikasi na saray lingkor nen Jehova, seguradon ondeen so kanonotan da a singa si Ana. Nipaakar ed pikakasi, oniay insulat nen apostol Pablo: “Agkayo mapaga ed antokaman; noag dia ed ganagana lapu ed pikakasi tan pikekerew a tekep na pisasalamat nipakabat komon ed Dios so saray kerew yo. Tan say deen na Dios, a talonaan ton amin a pakatalos, bantayan to so kapusoan yo tan saray nonot yo ed Kristo Jesus.” (Filipos 4:6, 7) Sano ipaawit tayo ed si Jehova so pakabebelatan tayo, nepeg tayon ipalima la itan ed sikato. Insan singa si Ana, agtayo la alablabas a manaburido.​—Salmo 55:22.

Sakey ya Anak ya Impabayes ed si Jehova

Kinmiwas so Dios diad biang nen Ana, kanian sikato so nanlukon tan angiyanak na sakey a laki. (1 Samuel 1:19, 20) Sakey iya ed pigaran inkagawa a nisulat diad Biblia a say Dios so mismon angimaneobra ed kianak na sakey a magmaliw a lingkor to. Say ilalak nen Elcana tan Ana a si Samuel so magmaliw a propeta nen Jehova, a nawalaan na importantin betang ed kiletneg na pananguley ed Israel.

Anggan uga-ugaw ni si Samuel et maseguron imbangat la ed sikato nen Ana so nipaakar ed si Jehova. Balet alingwanan to kasi so insipan to? Andin balot! “Angga ed say ugaw napakso; et insan sikato so yakar ko, pian ompatnag ed Jehova, tan diman manayam lawas,” so inkuan to. Sanen apakso si Samuel, a nayarin taloy taon to la odino onsulok ni, sikato so inawit nen Ana diad santuaryo nen Jehova, unong ed insipan to.​—1 Samuel 1:21-24; 2 Awaran 31:16.

 Kayari na impangiyapay day bagat ed si Jehova, si Samuel so inawit nen Ana tan Elcana ed si Eli. Maseguron sankatabin nen Ana so ugaw nin laki, sanen oniay inkuan to ed si Eli: “O, katawan ko, singa say kamarerwam mabilay, katawan ko, siak so bii a nanalagey ed abay mo dia ed mikakasi ed Jehova. Nipaakar ed saya ya ugaw akikasi ak; et si Jehova initer to ed siak so kerew ko a kinerew ko ed sikato. Kanian sikato so inyabobon [“impabayes,” NW] ko met ed Jehova; ed dukey na bilay to sikato so niabobon ed Jehova.” Diad saman sirin so inggapo na legay-bilay ya espisyal a serbisyo nen Samuel ed Dios.​—1 Samuel 1:25-28; 2:11.

Diad inlabas na panaon, si Samuel so seguradon agnilingwanan nen Ana. Oniay kuan na Kasulatan: “Si ina to sikato so inggawaan to na melag a sakbong, tan sikato so inyakar to ed sikato ed tinaon-taon, sanen ontatdang nensaman pati asawa to a mangiyapay na tinaon a bagat.” (1 Samuel 2:19) Si Ana so maseguron angipikasin naynay ed si Samuel. Diad tinaon ya imbisita to, maseguron pinaseseg to si Samuel a manmatoor legan ton susumpalen so serbisyo to ed Dios.

Diad sakey ya inkagawa, benendisyonan nen Eli iray atateng nen Samuel tan oniay inkuan to ed si Elcana: “Si Jehova sika komon so ikdan to na bini ed saya a bii ed pasen na kerew a kinerew to ed Jehova.” Unong ed saratan a salita, si Ana tan Elcana so atumangan na talora nin anak a lalaki tan duaran anak a bibii.​—1 Samuel 2:20, 21.

Agaylan abig iran alimbawa so impatnag nen Elcana tan Ana parad saray Kristianon atateng! Singa panangibaga, mabulbulos ya ipapabayes na dakel a kainaan tan kaamaan so ananak da ed si Jehova diad pamapaseseg da ed saray anak da ya onloob ed sakey a nengneng na sigpot-panaon a ministeryo ya arawi ed ayaman da. Saratan a maaron atateng so nakomendaan ed pansasakripisyo ra, tan sikara so tumangan nen Jehova.

Say Maliket a Pikakasi nen Ana

Malikeliket la so datin lepes a si Ana! Diad Biblia et matalag a nisulat iray pikakasi na bibii. Balet diad biang nen Ana et naamtaan tayo so duaran klase na pikakasi to. Diad primeron pikakasi to et imbesngaw to iray liknaan to sanen sikatoy nagogonigon tan maniirap, tan diad komadua et say maliket a pikakasi ton mangibabalikas na pisasalamat. “Say pusok manggayaga ed Jehova,” so inkuan nen Ana. Sikato so manliket lapud anggan say “lepes nananak,” tan indayew to si Jehova bilang ‘Manangitandoro tan Manangipaalagey ed duka manlapud dabok.’ On, ‘itatandoro to so mankaukolan manlapu ed panagdutakan.’​—1 Samuel 2:1-10.

Ipapabitar na apuyanan a salaysay nipaakar ed si Ana a nayarin nasakitan itayo ed ag-inkayadyari odino makapasakit a gagawaen na arum. Ingen, agtayo nepeg ya abuloyan iratan a subok a mamaandi ed liket tayo diad panaglingkor ed si Jehova. Sikato so matalonggaring a Dumerengel na pikakasi, ya eebatan to iray ey-ey na saray matoor a totoo to, a tutulongan to ira manlapud kairapan da tan papalaboan to ira na deen na kanonotan tan arum niran bendisyon.​—Salmo 22:23-26; 34:6-8; 65:2.

[Paimano ed leksab]

[Litrato ed pahina 17]

Impabayes nen Ana ed si Jehova so anak ton si Samuel