Saray Anghel​—No Anto so Gagawaen Da Parad Katooan

“Kayari na sarayan bengatla, anengneng ko so sananey ya anghel ya inmakseb a nanlapu ed tawen, a wala so baleg a pakauley to . . . Tan tinmawag ed boses a mabiskeg a kuanto, Naplag, naplag so Babilonia a Baleg.”​—APOCALIPSIS 18:1, 2.

1, 2. Anto so pakapatnagan ya uusaren nen Jehova iray anghel pian nagawa so linawa to?

 SANEN nibantak diad isla na Patmos so masiken lan apostol Juan, sikato so akanengneng na mapropetiko iran pasingawey. “Diad panamegley na inkipuyan” et anengneng to iray makapasagyat ya ebento, a sikato so niwala ed “agew na Katawan.” Satan ya agew so ginmapo ed inkitrono nen Jesu-Kristo nen 1914 tan mantultuloy anggad sampot na Sanlibon Taon ya Uley to.​—Apocalipsis 1:10, NW.

² Sayan puyan so agdirektan inter nen Jehova ed si apostol Juan. Wala so inusar ton sakey a paralanan. Oniay inkuan na Apocalipsis 1:1: “Say puyan nen Jesu-Kristo ya initer na Dios ed sikato, pian ipakaba’to ed saray ariripen to, salanti saray bengatlan nakaukolan da so nagawa a magano: tan impawi’to tan impaliwawa to ed panamegley na anghel to ed aripen to a Juan.” Diad panamegley nen Jesus, inusar nen Jehova so sakey ya anghel pian nipasabi ed si Juan iray makapakelaw a bengatla nipaakar ed “agew na Katawan.” Diad sakey a pasingawey et “anengneng [met nen Juan] so sananey ya anghel ya inmakseb a nanlapu ed tawen, a wala so baleg a pakauley to.” Anto so gawaen na sayan anghel? Sikato so “tinmawag ed boses a mabiskeg a kuanto, Naplag, naplag so Babilonia a Baleg.” (Apocalipsis 18:1, 2) Sayan mabiskeg ya anghel so apribilehyoan a mangiyabawag ed pakaderal na Babilonia a Baleg, say sankamundoan ya empiryo na palson relihyon. Anggapo so panduaruwa sirin ed panguusar nen Jehova ed saray anghel diad importantin paraan pian nagawa so linawa to. Sakbay tayon usisaen ed detalyadon paraan so betang na saray anghel diad gagala na Dios tan no anto so gagawaen da parad sikatayo, konsideraen tayo ni no panon a niwala irayan espiritun pinalsa.

Panon a Niwala Iray Anghel?

3. Anto so lingon iisipen na dakel a totoo nipaakar ed saray anghel?

³ Manisia so minilyon a totoo natan a wala iray anghel. Balet lingo so iisipen na dakel a totoo nipaakar ed sikara tan no iner so nanlapuan da. Alimbawa, iisipen na arum a relihyoson totoo a sano ompatey so inad-aro ra et sikato so alaen na Dios ed tawen tan magmaliw ya anghel. Ontan kasi so ibabangat na Salitay Dios nipaakar ed inkapalsa, inkiwala, tan inkigagalaan na saray anghel?

4. Anto so ibabaga ed sikatayo na Kasulatan nipaakar ed nanlapuan na saray anghel?

⁴ Say anghel a sankatageyan ed pakayari tan autoridad, say manunaan ya anghel, so tinawag a Miguel ya arkanghel. (Judas 9) Sayan arkanghel et si Jesu-Kristo. (1 Tesalonica 4:16) Nensaman a panaon sanen inggagala nen Jehova so pagmaliw a Manamalsa, say inmuna-unan pinalsa to et say anghel ya Anak to. (Apocalipsis 3:14) Kayari na satan, diad panamegley na panguloan ya Anak to et pinalsa nen Jehova so arum niran espiritun pinalsa. (Colosas 1:15-17) Sanen tinukoy nen Jehova irayan pinalsa ton anghel bilang ananak to, oniay intepet to ed patriarkan si Job: “Iner so kawalaan mo sanen inggaton ko so saray panangipaletnegan ed dalin? Ipaliwawam, no walaan ka na pakatalos. . . . Siopa so angigaton na panukong a bato to, sanen saray bitewen ed kabuasan nankanta ra a bansag, tan amin iray anak na Dios inmeyag ira lapu ed liket?” (Job 38:4, 6, 7) Malinew, saray anghel et pinalsa na Dios, tan abayag la ran niwala sakbay a niwala so too.

5. Panon a naorganisa iray anghel?

 ⁵ “Say Dios aliwan Dios na kolkol, noag kareenan,” so inkuan na 1 Corinto 14:33. Unong ed saya, inorganisa nen Jehova iray espiritun ananak to ed taloran manunan grupo: (1) saray serapin, a manlilingkor ed liber na trono na Dios, so mangiyaabawag ed kasantosan to, tan pansiasiansiaen dan malinis ed espiritual so totoo to; (2) saray kerubin, a mangitatandoro ed inkasoberano nen Jehova; tan (3) arum niran anghel a manggagawa na linawa to. (Salmo 103:20; Isaias 6:1-3; Ezequiel 10:3-5; Daniel 7:10) Anto so arum a gagawaen na sarayan dakdakel ya espiritun pinalsa parad totoo?​—Apocalipsis 5:11.

Anton Betang so Susumpalen na Saray Anghel?

6. Panon ya inusar nen Jehova iray kerubin diad hardin na Eden?

⁶ Say primeron impanukoy ed saray espiritun pinalsa et diad Genesis 3:24, ya oniay nabasa tayo: ‘Pinapaway [nen Jehova] so too; tan impasen to ed bukig na tanamanan na Eden iray kerubin, tan say dalang na sakey a kampilan a manpawilpawil, a mangasikaso na dalan na kiew na bilay.’ Binantayan na sarayan kerubin so hardin na Eden pian aglan balot makaloob si Adan tan Eva ed satan a datin ayaman da. Agawa iman diad kagapo na awaran na too. Anto so betang a susumpalen na saray anghel manlapu la’d saman?

7. Anto so ipapabitar na kabaliksan na saray salita ed orihinal a lenguahe parad “anghel” nipaakar ed betang a susumpalen na saray anghel?

⁷ Saray anghel so sinalambit ed Biblia a ngalngali 400 a danay. Say Hebreo tan Griego iran salita parad “anghel” so nipatalos a “mensahero.” Saray anghel sirin so manlilingkor ed Dios bilang manangipasabi na mensahe to ed katooan. Unong ed inmunan duaran parapo na sayan artikulo, inusar to so sakey ya anghel a mangipasabi na mensahe to ed si apostol Juan.

8, 9. (a) Anto so epekto na imbisita na sakey ya anghel ed si Manoa tan say asawa to? (b) Anto so naaralan na atateng ed imbisita na anghel ed si Manoa?

⁸ Saray anghel so inusar met pian ontulong tan mamaseseg ed saray lingkor na Dios diad dalin. Alimbawa, diad panaon na Uko-ukom ed Israel, pipirawaten a maong nen Manoa tan say agmakaanak ya asawa to so nawalaan na ilalak. Imbaki nen Jehova so anghel to pian ipakabat ed asawa nen Manoa a sikatoy nawalaan na sakey ya anak a laki. Oniay ibabaga ed sikatayo na salaysay: “Nia, manlukon ka, tan mangiana’ka na sakey a laki: et anggapo so pangiskis ya onlabas ed ulo to: ta say ugaw sikato naani Nazareo ed Dios a manlapu ed eges: et igapo to naani ya ilaban so Israel ed lima na saray Filisteo.”​—Uko-ukom 13:1-5.

⁹ Say asawa nen Manoa so angiyanak a siansia na sakey a laki, si Samson, a nagmaliw a bantog ed awaran na Biblia. (Uko-ukom 13:24) Sakbay a nianak so ugaw, kinerew nen Manoa ya ompawil ed sikara so anghel pian paibangat ira no panon dan pabalegen so ugaw. Oniay inkerew nen Manoa: “Antoy nepeg a gawaen na ugaw? Anton klase na bilay so pambilay to?” Inulit na anghel nen Jehova iray bilin to ed asawa nen Manoa. (Uko-ukom 13:6-14, MB) Diad saman et apaseseg a maong si Manoa! Natan, saray totoo so agla bibisitaen na saray anghel, balet singa si Manoa, nayarian na atateng so makagamor na panamilin nen Jehova diad pangipapasal da ed ananak da.​—Efeso 6:4.

10, 11. (a) Anto so reaksion nen Eliseo tan say aripen to sanen pinaliberan ira na armada na Sirya? (b) Panon itayon nagunggonaan no morekdeken tayo iyan agawa?

 ¹⁰ Wala so makapasagyat ya alimbawa na impanulong na anghel ed panaon nen propeta Eliseo. Si Eliseo so manaayam nensaman ed Dothan, sakey a syudad ed Israel. Sakey ya agew sanen abangon ya asakbay so aripen nen Eliseo tan tinmandag ed paway, anengneng to a say syudad so apaliberan na saray kabayo tan karwahe ed pibabakal. Imbaki na ari na Sirya so sakey a mabiskeg a puersa militar to a mangerel ed si Eliseo. Anto so reaksion na aripen nen Eliseo? Lapud takot, a nayarin atalagnaw ni, oniay inkelyaw to: “Abagey, katawan ko! Panon so gawaen tayo?” Parad sikato et anggapo la so nagawaan da. Balet onia so ebat nen Eliseo: “Agka antakot; ta saray wala ed sikatayo sikara so dakdakel nen saray wala ed sikara.” Anto so labay ton ibaga?​—2 Arari 6:11-16.

¹¹ Amta nen Eliseo a wala so dakel ya anghel ya ontulong ed sikato. Balet, anggapo ed saman so nanengneng na aripen to. Kanian, “si Eliseo akikasi, tan inkuan to, Jehova, pikasik ed sika, lukasan mo so saray mata to, pian makanengneng. Et si Jehova nilukasan to so saray mata na tobonbalo a laki; et anengneng to: et, nia, say palandey napno ed saray kabayo tan saray luganan ya apoy ed liberliber nen Eliseo.” (2 Arari 6:17) Insan anengneng a siansia na aripen so dakerakel ya anghel. Natan, diad panamegley na espiritual a pakatalos et natebek tayo met ya amin ya anghel, ya iwawanwan nen Jehova tan si Kristo, so ontutulong tan manasalimbeng ed totoo nen Jehova.

Say Impanulong na Saray Anghel Sanen Wadiad Dalin si Kristo

12. Anton tulong so naawat nen Maria manlapud si anghel Gabriel?

¹² Nodnonoten pa so tulong a naawat na Judion birhen a si Maria sanen nadngel to iyan balita: “Ilukon mo tan ‘yanak mo so sakey ya anak a laki et tawagen mo so ngaran to a Jesus.” Sakbay a sayan makapaliket a mensahe et ibaga nen anghel Gabriel, ya imbaki na Dios, onia so inkuan to: “Agka antakot, Maria, ta akaromog ka na pamalangkap ed Dios.” (Lucas 1:26, 27, 30, 31) Agaylan makapaseseg tan makapabiskeg ed si Maria irayan salita ya angipaseguro ed sikato na panangabobon na Dios!

13. Panon so impanulong na saray anghel ed si Jesus?

¹³ Sakey nin alimbawa na impanulong na anghel et sanen niresistian nen Jesus so amitlon impanukso nen Satanas ed sikato diad kalawakan. Ibabaga ed sikatayo na salaysay a kayari na saratan ya impanubok ed si Jesus, sikato so “tinaynan na Diablo; et nia, saray angheles sinmabi ra tan nanlingkor ira ed sikato.” (Mateo 4:1-11) Wala so mipadparan agawa ed samay labi sakbay na impatey nen Jesus. Lapud nagogonigon a liknaan nen Jesus, sikato so tinmalimukor tan nampikasi, a kuanto: “Ama, no labay mo, yarawim so saya  a kopa ed siak; anggaman ontan aliwa a say linawak noag say linawam so nasumpal. Et pinmatnag ed sikato so sakey ya anghel a nanlapu ed tawen, ya amabiskeg ed sikato.” (Lucas 22:42, 43) Balet panon so panutulong ed sikatayo natan na saray anghel?

Say Panutulong na Saray Anghel Diad Panaon Tayo

14. Anton panamasegsegang so kinaukolan a sungdoan na saray Tasi nen Jehova ed panaon tayo, tan anto so resulta?

¹⁴ Sano kokonsideraen tayo so modernon awaran na panagpulong a kimey na saray Tasi nen Jehova, agta napatnagan tayo so ebidensya na pananulong na saray anghel? Alimbawa, asungdoan na totoo nen Jehova so maruksan panangataki na Nazismo diad Alemanya tan Bukig ya Europa sakbay tan kaleganan na Guerra Mundial II (1939-45). Diad silong na pananguley na Katolikon Fasista ed Italya, España, tan Portugal, kinaukolan a sungdoan na totoo nen Jehova so abayag ya impamasegsegang ed sikara. Tan diad dakel a dekada et sinungdoan da met so impamasegsegang na datin Unyon Sobyet tan saray uuleyan ton nasyon. Sakey nin alimbawa et say panamasegsegang a sinungdoan na saray Tasi nen Jehova diad pigaran bansa ed Aprika. * Diad agano niran panaon et sinagmak na saray lingkor nen Jehova so maruksan panamasegsegang diad bansa na Georgia. Gagawaen nen Satanas so anggaay nayarian to pian patundaen so kimey na saray Tasi nen Jehova. Balet, bilang sakey ya organisasyon et akapansungdo ira ed ontan ya isusumpa tan inmaligwas ni ira ingen. Tinmalona ira lapud pananalimbeng na saray anghel.​—Salmo 34:7; Daniel 3:28; 6:22.

15, 16. Panon so panutulong na saray anghel ed saray Tasi nen Jehova ed sankamundoan a ministeryo ra?

¹⁵ Ipapapuso na saray Tasi nen Jehova so ganggan ya ipulong da ed sankamundoan so maong a balita na Panarian na Dios tan manggawa ira na babangatan diad pangibangat day katuaan na  Biblia ed saray interesado a walad nanduruman pasen. (Mateo 28:19, 20) Balet, amta ra ya agda nagawaan iyan ganggan no anggapo so tulong na saray anghel. Kanian, lawas makapabiskeg ed sikara so nisulat ed Apocalipsis 14:6, 7. Onia so nabasa tayo: “Anengneng ko [apostol Juan] so sananey ya anghel a mantektekkiab dia ed pegley na tawen, a wala ed sikato so andi angga a maabig a balita pian sikato so ipulong to ed saray manaayam dia ed dalin, tan diad balang nasyon tan poli tan salita tan baley; Et kuanto ed baleg a boses: Takotan yo so Dios, tan iter yo ed sikato so gloria: ta say oras na pangukom to sinmabi la; tan igalang yo so nanggawa ed tawen tan dalin tan say dayat tan saray subol na saray danum.”

¹⁶ Ipapabitar na sarayan salita a saray anghel et ontutulong tan mangiwawanwan ed malaknab a panag-ebanghelyon kimey na saray Tasi nen Jehova diad sankamundoan. Uusaren nen Jehova iray anghel to pian niwanwan iray interesadon totoo a makapitongtong ed saray Tasi to. Igigiya met na saray anghel iray Tasi pian naanap da iray makanepegan. Saya so mangipaliwawa no akin a dakerakel so ontan a peteg ya agawa, ya aliwan nibanbana labat. Singa bilang, diad eksakton panaon et nakatongtong na sakey a Tasi nen Jehova so sakey a too a nidudunget ed problema tan mankakkaukolan na espiritual a tulong.

Say Makapadinayew a Betang na Saray Anghel ed Magano lan Arapen

17. Anto so agawa ed saray Asiryano sanen sikaray inataki na sakey ya anghel?

¹⁷ Nilikud ed panlilingkor da bilang mensahero tan manamabiskeg ed saray mandadayew ed si Jehova, wala so sakey nin gawaen na saray anghel. Nensaman et impaakseb da iray panangukom na Dios. Alimbawa, nen koma-walon siglo B.C.E., say Jerusalem so napepeligro lapud dakerakel ya armada na saray sundalon Asiryano. Panon so inkiwas nen Jehova? Oniay inkuan to: “Yagel ko so saya a syudad pian sikato so ilaban ko, nipaakar ed dili a kakanaan ko, tan nipaakar ed kakanaan na aripen ko a David.” Isasalaysay ed sikatayo na Biblia no anto so agawa: “Agawa ed saman a labi, a say anghel nen Jehova pinmaway, tan kinabil to dia ed pakalso na saray Asirya so sanlasus walomplo tan limanlibo: et sanen saray lalaki binmangon ira ya asaksakbay ed kabuasan, nia, saraya sikara ya amin so inatey a laman.” (2 Arari 19:34, 35) On, agbalot naparaan na pakayari na anggan dakel ya armada na too so biskeg na sakey lambengat ya anghel!

18, 19. Anton makapadinayew a betang so sumpalen na saray anghel diad magano lan arapen, tan panon a naapektoan ed satan so katooan?

¹⁸ Magano lan usaren na Dios so puersa na saray anghel pian mangipaakseb na panangukom to. Maganggano la, si Jesus so onsabi “ya iba to so saray angheles na pakayari to, a dia ed mandarlang ya apoy.” Say misyon da et ‘iter da so panamales ed saray agmikabat ed Dios, tan dia ed saray ag-ontulok ed ebanghelyo na Katawan tayon Jesus.’ (2 Tesalonica 1:7, 8) Agayla so epekto na sayan gawaen da parad katooan! Naderal iramay agmangawat ed maong a balita na Panarian na Dios a niyaabawag la natan ed sankadalinan. Balet, nasalimbengan iramay manaanap ed si Jehova, ed inkatunong, tan kauyamoan, a ‘niyamot ira ed agew na sanok to.’​—Sofonias 2:3.

¹⁹ Misalsalamat itayo ta uusaren nen Jehova iray makapanyarin angheles to pian tulongan tan pabiskegen iray mandadayew ed sikato diad dalin. Makapaligliwan naamtaan no anto so betang na saray anghel diad gagala na Dios, lapud wala iray anghel a nanrebelde ed si Jehova tan uuleyan la ra nen Satanas. Singbaten ed ontumbok ya artikulo iray kundang a gawaen na saray tuan Kristiano ta pian naprotektaan day inkasikara sumpad mabiskeg ya impluensya nen Satanas a Diablo tan saray demonyo to.

[Paimano ed Leksab]

Anto so Naaralan Yo?

• Panon a niwala iray anghel?

• Panon a nausar iray anghel diad panaon na Biblia?

• Anto so ipaparungtal na Apocalipsis 14:6, 7 nipaakar ed gagawaen na saray anghel natan?

• Anton makapadinayew a betang so sumpalen na saray anghel diad magano lan arapen?

[Tepetepet Parad Panagaral]

[Litrato ed pahina 22]

Si Manoa tan say asawa to so pinabiskeg na sakey ya anghel

[Litrato ed pahina 23]

‘Saray walad sikatayo so dakdakel nen say walad sikara’