Saray Demonyo​—Panon Tayo Iran Naresistian?

“Nonot yo met iray anghel ya agnansiansia’d sakop na kanepegan tan kipapasen da; ingen tinaynan day panaayaman da. Say Dios binalor to ra na andi-anggaan a gulonggulong diad aralem tan ambilunget a pasen, a diman da aalagdey pakadusa ra no agew na ukom.”​—JUDAS 6, Maung a Balita.

1, 2. Antoran tepet so onlesa nipaakar ed si Satanas a Diablo tan saray demonyo?

 “MANDANGKA kayo, manbantay kayo,” so impasakbay nen apostol Pedro. “Ta say kabusol yo, say diablo, wala ed kaliberliber yo a singa omoang a leon a mananap na buagen to.” (1 Pedro 5:8) Nipaakar ed saray demonyo, oniay inkuan nen apostol Pablo: “Agko labay komon a minabang kayo ed saray demonyo. Agyo nayarian so oninum ed kopa na Katawan, tan say kopa na saray demonyo: agyo nayari minabang ed dulang na Katawan, tan say dulang na saray demonyo.”​—1 Corinto 10:20, 21.

² Balet, siopa si Satanas a Diablo tan saray demonyo? Panon tan kapigan so inkiwala ra? Kasin pinalsa ira na Dios? Panon kabiskeg so impluensya ra ed totoo? No wala so pandepensa tayo sumpad sikara, anto itan?

Panon so Inkiwala nen Satanas tan Saray Demonyo?

3. Panon a nagmaliw a Satanas a Diablo so sakey ya anghel na Dios?

³ Diad kagapo na awaran na too, legan a wala ra’d hardin na Eden, nagmaliw a rebelyoso so sakey ya anghel na Dios. Akin? Lapud agto nankontento ed betang to ed mangatatawen ya organisasyon nen Jehova. Sanen apalsa si Adan tan Eva, anengneng to so pankanawnawa a tangguyoren ira pian sikato so tuloken tan pandayewan da imbes a say tuan Dios. Diad impanrebelde na sayan anghel ed Dios tan diad impanagyat to ed inmunan sanasawa a mankasalanan, pinagmaliw toy inkasikato a Satanas a Diablo. Diad kaunoran et alanor so arum ya anghel ed impanrebelde to. Panon?​—Genesis 3:1-6; Roma 5:12; Apocalipsis 12:9.

4. Anto so ginawa na saray matungangan anghel sakbay na Delap ed panaon nen Noe?

⁴ Ibabaga ed sikatayo na impuyan a Kasulatan a sakbay na baleg a Delap ed panaon nen Noe,  walaray anghel ya awalaan na agmanepeg a pilalek ed saray bibii diad dalin. Lapud lingon gagala ra, ‘ninengneng na saray [mangatatawen a] lalaki ya anak na Dios iray mararakep a bibii ya anak na totoo; et inala da ra ya asawa so amin ya apili ra,’ so inkuan na Biblia. Aliwan manepeg irayan impanasawa, tan angkakabaleg so nagmaliw ya ilalak da a tinawag a Nefilim. (Genesis 6:2-4) Kanian saray anghel a tinmunganga ed Dios so akinonong ed impanrebelde nen Satanas sumpad si Jehova.

5. Anto so agawa ed saray rebelden anghel sanen intarok nen Jehova so kadederal panamegley na baleg a Delap?

⁵ Sanen intarok nen Jehova so Delap ed katooan, atawtaw iray Nefilim tan saray totoon kainaan da. Apaskar iray rebelden anghel a lukposen so toon-laman da tan pinmawil ira ed ayaman na espiritu. Balet, agla ra akapawil ed “sakop na kanepegan tan kipapasen da” a kaiba na Dios. Imbes, sikaray nipukok ed ‘ambilbilunget a kipapasen’ ed espiritual a tatawagey Tartaro.​—Judas 6; 2 Pedro 2:4, NW.

6. Panon a papalikdoen na saray demonyo so totoo?

⁶ Sanen saray marelmeng ya anghel et naandi la ed “sakop na kanepegan tan kipapasen da,” nagmaliw la ran dedemonyo a kakaiba nen Satanas tan susuportaan da iray mauges a pilalek to. Manlapud saman a panaon a manpatuloy, anggapo lay pakayari na saray demonyo a magmaliw a too. Balet, sarag dan ayaten iray lalaki tan bibii a mibiang ed nambabangil a nengneng na agmanepeg iran agamil ed sekso. Aktibo met iray demonyo a mamapalikdo ed katooan panamegley na espiritismo, a kabiangan ed satan so panangagamil na mahiko, salamangka, ontan met iray espiritista. (Deuteronomio 18:10-13; 2 Awaran 33:6) Say pansumpalan na saray demonyo et mipadpara ed Diablo, salanti, andi-anggaan a kadederal. (Mateo 25:41; Apocalipsis 20:10) Balet, legan ya agni agawa itan, sikaray kaukolan tayon labanan tan resistian. Nepeg tayon amtaen no panon kabiskeg si Satanas tan no panon so italona tayo ed panresisti ed sikato tan ed saray demonyo to.

Panon Kabiskeg si Satanas?

7. Panon ya iimpluensyaan nen Satanas so mundo?

⁷ Si Satanas so abayag lan mamapauges ed si Jehova. (Uliran 27:11) Tan iimpluensyaan to so karaklan a totoo. “Say sankamundoan mandukdukol ed kaugsan,” kuan na 1 Juan 5:19. Satan so rason no akin ya ayarian na Diablo a tuksoen si Jesus diad impangiyopresi to ed sikato na pakauley tan gloria ed “amin a panarian ed mundo.” (Lucas 4:5-7) Nipaakar ed si Satanas, oniay inkuan nen apostol Pablo: “Anggan say ebanghelyo tayo asakbongan ni, asakbongan ed saray nabalang. Et dia ed saramay say dios na sayan panaon binulag to so kaisipan da lapud agpanisia, pian say silew na ebanghelyo na gloria nen Kristo a sikato so talintao na Dios, agkomon onsinag ed sikara.” (2 Corinto 4:3, 4) Si Satanas so “matila, tan ama na tila,” balet sikatoy mankunkunwari ya “anghel na liwawa.” (Juan 8:44; 2 Corinto 11:14) Uusaren to so pakapanyari to tan saray metodo to pian bulagen so kaisipan na saray manuley ed mundo tan saray uuleyan da. Papalikdoen to so katooan panamegley na lingon impormasyon tan relihyoson is-istorya tan katilaan.

8. Anto so ipapabitar na Biblia nipaakar ed impluensya nen Satanas?

⁸ Apatnagan so pakayari tan impluensya nen Satanas diad panaon nen propetan Daniel, manga 2,500 taon lay apalabas. Sanen imbaki nen Jehova so sakey ya anghel to a mangipasabi na mensahen mamaseseg ed si Daniel, sinabat itan na sakey ya espiritun “prinsipe na panarian na Persia.” Apugeran so matoor ya anghel ed loob na 21 agew ya anggad sinmabi “si Micael a sakey ed saray [manunan] prinsipe” pian ontulong ed sikato. Satan met a salaysay so analambit ed say demonyon “prinsipe na Gresya.” (Daniel 10:12, 13, 20) Tan diad Apocalipsis 13:1, 2 et nilitrato si Satanas bilang “say dragon” ya angiter ed mapolitikan atap ya ayep na “pakapanyari to, tan say trono to, tan say baleg a pakauley.”

9. Siopara so pilalabanan na saray Kristiano?

⁹ Agpankelawan sirin no akin ya oniay insulat nen apostol Pablo: “Ag-itayo mitulot ed laman tan dala, noag ingen onsumpa itayo ed  saray manunaan, onsumpa ed saray pakayari, onsumpa ed saray manuley ed mundo na sayan kabilungetan, sumpa ed saray mauges ya espiritu ed pasen a mangatatawen.” (Efeso 6:12) Anggad natan, saray puersa na demonyo a kokontrolen nen Satanas a Diablo so agnanengneng a mangiimpluensya ed saray manuley a totoo tan ed katooan, a sasagyaten da ran manggawa na agnadeskribe iran panagpalanit ed saray tribu, terorismo, tan panagpatey. Natan et usisaen tayo no panon so italona tayon manresisti ed sarayan makapanyarin espiritun puersa.

Anto so Pandepensa Tayo?

10, 11. Panon tayon naresistian si Satanas tan saray demonyo to?

¹⁰ Agtayo naresistian si Satanas tan saray demonyo to diad dilin biskeg tayo, balanglan diad pisikal odino mental. Oniay insimbawa ed sikatayo nen Pablo: “Ombiskeg kayo komon ed Katawan, tan dia ed biskeg na pakayari to.” On, kaukolan tayoy onkerew na proteksion ed Dios. Inkuan ni nen Pablo: “Isulong yo so sankabukel a kinlong na Dios, pian nayarian yo so ontalindeg ya onsumpa ed saray pangalot na Diablo . . . Alaen yo so sankabukel a kinlong na Dios, pian nayarian yo so mitalindegan ed mauges ya agew, tan, sano agawa yo la iyan amin, wala kayo a sitatalindeg.”​—Efeso 6:10, 11, 13.

¹¹ Amiduan pinaseseg nen Pablo iray kapara ton Kristiano ya isulong da so “sankabukel a kinlong na Dios.” Ipapatnag na say salitan “sankabukel,” odino kompleto, ya agtayo naresistian iray panangataki na demonyo no nankadua so puso tayo. Kanian, anto iray importantin kabiangan na espiritual a kinlong a kakkaukolan natan na saray Kristiano ta pian naresistian da iray demonyo?

Panon so ‘Pakatalindeg’ Tayo?

12. Panon a say katuaan so nibalkes na saray Kristiano ed awak da?

¹² Oniay impaliwawa nen Pablo: “Talindeg kayo sirin, balkesan yo so awak yo na katuaan, tan ikawes yo so kinlong [na pagew] na kaptekan.” (Efeso 6:14) Duaran kabiangan so tinukoy dia, say balkes tan say kinlong na pagew. Kaukolan ya eletan na sakey a sundalo so balkes to ta pian naprotektaan so awak (tapi, kayarian, tan puton) to tan pian nalibit to so ambelat ya espada to. Mipadpara, nakaukolan tayon ibalkes a malet so katuaan na Biblia, a singa panangibaga, ta pian makapambilay itayo a mitunosan ed katuaan. Kasin walay eskedyul tayo ya inagew-agew a panagbasa na Biblia? Kasin kaiba ed ontan a panagbasa so interon pamilya tayo? Kasin inagew-agew tayon kokonsideraen so teksto-ed-agew bilang pamilya? Niarum ni, kasin aamtaen tan uusaren tayo iray sankabaloan ya eksplinasyon a walad saray publikasyon ya ipaparaan na “matoor tan makabat ya aripen”? (Mateo 24:45) No gagawaen tayo itan, manggugunaet itayon mangiyaplika ed simbawa nen Pablo. Wala met iray video tan DVD tayo a makapangitarya na Makasulatan a panangiwanwan. Say malet a pamemben ed Kasulatan so makatulong ed sikatayo ed panggawa na makabat iran desisyon tan nipaliis itayo manlapud lingon kurang.

13. Panon tayon naprotektaan so piguratibon puso tayo?

¹³ Say literal a kinlong na pagew so manprotekta ed puso tan arum niran importantin parte na laman na sundalo. Naprotektaan na Kristiano so piguratibon puso to, salanti, say akindalem ya inkatoo to, no bayuboan to so panangaro ed inkatunong na Dios tan no tumboken to iray matunong ya estandarte nen Jehova. Say piguratibon kinlong na pagew so manprotekta ed sikatayo pian agtayo leglemewen so Salitay Dios. Sano ‘gugulaen tayo so mauges, tan aaroen tayo so  maong,’ niyarawi tayo iray sali tayo manlapud “saray mauges a dalan.”​—Amos 5:15; Salmo 119:101.

14. Anto so kabaliksan na ‘saray sali tayo et asapinan parad pangiparaan ed ebanghelyo na kareenan’?

¹⁴ Saray sali na Romanon sundalo et kaslakan ya akasulong na malet a sandalyas a matukoy parad andukey a panmartsa diad nilasus milya iran karsada diad interon empiryo na Roma. Diad sikatayo iran Kristiano, anto so kabaliksan na balikas a ‘saray sali et asapinan parad pangiparaan ed ebanghelyo na kareenan’? (Efeso 6:15) Mankabaliksan itan a sikatayoy akaparaan ya onkiwas, salanti, akaparaan a manginabang ed ebanghelyo na Panarian diad amin a matukoy a pankanawnawa. (Roma 10:13-15) Say pagmaliw tayon aktibo ed panagpulong et manalimbeng ed sikatayo sumpad saray “pangalot” nen Satanas.​—Efeso 6:11.

15. (a) Anto so mangipabitar ya importantin tuloy so baleg a kinlong na pananisia? (b) Anto iray “mandarlang a gayang” a nayarin makaderal ed pananisia tayo?

¹⁵ Oniay impangituloy nen Pablo: ‘Nagkalalo et egnaan yo so [baleg a] kinlong na pananisia, a sikato so nayarin pangerep yo naani ed saray amin a mandarlang a gayang na mauges.’ (Efeso 6:16) Say simbawan egnaan so baleg a kinlong na pananisia so ginapoan diad panamegley na balikas a “nagkalalo,” a mangipatnag ya importantin tuloy itan. Nepeg a mabisbiskeg so pananisia tayo. Singa say baleg a kinlong a panamper, say pananisia tayo so manalimbeng ed sikatayo manlapud saray “mandarlang a gayang” nen Satanas. Anto so irerepresenta na saratan natan? Nayarin saray makapasakit a panag-insulto, makaderal a tilatila, tan aliwan-puron katuaan ya ikakayat na saray kakabusol tan apostata a manggugunaet a mamakapuy ed pananisia tayo. Sarayan “gayang” so nayarin manukoy met ed saray  tukson magmaliw a materyalistiko, a sengegan lay pangiyapasakey tayo’d nonot tayo ed pansaliw na nambabangil a produkto tan managyat ni ingen ed sikatayo a mipalyagan ed saramay naimpluensyaan la ed mapangtan estiloy-kabibilay. Nayarin mangipupundar ira na angkakabaleg tan mararakep ya ayaman tan luluganan odino ipapangta da iray ankablin alahas da tan saray uson kawekawes da. Antokaman so gagawaen na arum, nepeg tayon pabiskegen so pananisia tayo pian nasamper tayo irayan “mandarlang a gayang.” Panon tayon napabiskeg so pananisia tayo tan napansiansia ya ontan?​—1 Pedro 3:3-5; 1 Juan 2:15-17.

16. Anto so makatulong ed sikatayo pian nawalaan itayo na mabiskeg a pananisia?

¹⁶ No regular so personal a panagaral tayo na Biblia tan masimoon itayon manpipikasi, sikatayo so napaapit ed Dios. Nayarian tayon ipikasi ed si Jehova a pabiskegen to so pananisia tayo insan tekepan tayo itan na manepeg iran gawa. Alimbawa, kasin manpaparaan itayon maong parad sinimban Panagaral ed Panag-Bantayan pian makaebat itayo? Ombiskeg so pananisia tayo no aralen tayo so Biblia tan saray publikasyon a nibase’d Biblia.​—Hebreos 10:38, 39; 11:6.

17. Panon tayon naawat so “pamulaw na kilalaban”?

¹⁷ Sinampotan nen Pablo so impaneskribe to ed espiritual a kinlong diad onian simbawa: “Alaen yo so pamulaw na kilalaban, tan say kampilan na espiritu, a sikato so salitay Dios.” (Efeso 6:17) Say pamulaw odino helmet so manprotekta ed ulo tan utek na sundalo, a satan so manunan ikakana ed panggaway desisyon. Mipadpara, say ilalo tayo bilang Kristiano so manprotekta ed panagnonot tayo. (1 Tesalonica 5:8) Imbes ya isentro tayoy nonot tayo ed minumundo iran kalat tan materyalistiko iran pilalek, nepeg tayon iyapasakey itan diad ilalon intarya na Dios, a singa met ed ginawa nen Jesus.​—Hebreos 12:2.

18. Akin ya agtayo nepeg a paulyanan so programa tayo a regular a panagbasa na Biblia?

¹⁸ Say unor a kinlong tayo sumpad impluensya nen Satanas tan saray demonyo to et say salita, odino mensahe, na Dios a nisulat ed Biblia. Saya so sananey nin rason no akin ya agtayo nepeg a paulyanan so programa tayon regular a panagbasa ed Biblia. Say susto tan malaknab a pikakabat ed Salitay Dios so manprotekta ed sikatayo sumpad tilatila nen Satanas tan ed lingon impormasyon a gawa-gaway demonyo ontan met ed saray makaderal ya ikakayat na saray apostata.

‘Manpikasi Kayo ed Amin a Panaon’

19, 20. (a) Anto so magano lan nagawa ed si Satanas tan saray demonyo to? (b) Anto so mamabiskeg ed espiritualidad tayo?

¹⁹ Asingsingger lan naderal si Satanas, saray demonyo to, tan say mauges a mundo. Amta nen Satanas a “daiset la so panaon to.” Sikato so onsasanok tan babakalen to iramay “manguunor ed ganggan na Dios, tan wala ed sikara so impantasi nen Jesus.” (Apocalipsis 12:12, 17) Importante sirin a resistian tayo si Satanas tan saray demonyo to.

²⁰ Agaylay pisalsalamat tayo ed simbawan isulong so sankabukel a kinlong na Dios! Sinampotan nen Pablo so impaningbat to ed espiritual a kinlong diad onian simbawa: “Onkerew kayo ed espiritu ed amin a nengneng na pikakasi tan pikekerew ed amin a panaon, tan manpuyat kayo na nipaakar ed amin a kasiansiaan tan panangipikasi ed saray lapag a sasantos.” (Efeso 6:18) Say pikakasi so mamabiskeg ed espiritualidad tayo tan ontulong ed sikatayo pian mansiansia itayon alerto. Ipapuso tayo sirin iray salita nen Pablo tan mantultuloy itayon manpikasi, lapud ontulong iya ed sikatayo pian naresistian tayo si Satanas tan saray demonyo to.

Anto so Naaralan Yo?

• Panon so inkiwala nen Satanas tan saray demonyo to?

• Panon kabiskeg so Diablo?

• Anto so pandepensa tayo sumpad si Satanas tan saray demonyo to?

• Panon tayon nisulong so sankabukel a kinlong na Dios?

[Tepetepet Parad Panagaral]

[Saray litrato ed pahina 26]

‘Ninengneng na saray lalaki ya anak na Dios so bibii ya anak na totoo’

[Litrato ed pahina 28]

Sarag yo kasin bitlaen tan ipaliwawa iray anemiran kabiangan na espiritual a kinlong tayo?

[Saray litrato ed pahina 29]

Panon itayon naprotektaan manlapud si Satanas tan saray demonyo to diad pibiang tayo ed sarayan aktibidad?