Tepetepet na Saray Manbabasa

Pigara ed kada malinis ya ayayep so inloob nen Noe diad biong​—kasin sampipito odino sampipiton paris?

Kasumpal ya impaalagey nen Noe so biong, inkuan nen Jehova ed sikato: “Loob ka ed biong a pati amin ya abung mo; ta sika so akanengnengan ko na inkatunong ed arap ko dia ed saya a kapolian. Mangala ka na sampipito ed amin a malinis ya ayep, say kalakian tan kabatyan to: tan dia ed saray aliwa a malinis ya ayep, sanderwa, say kalakian tan say kabatyan to.” (Genesis 7:1, 2) Walaray pigaran patalos, a singa say The New English Bible, The New Jerusalem Bible, tan Tanakh​—The Holy Scriptures, ya angipatalos ed orihinal a Hebreo bilang “pitoran paris.”

Diad Hebreon lenguahe, say balikas a “sampipito” et literal a nabasan “pitora pitora.” Balet, say panangulit na numero odino bilang diad Hebreon lenguahe et agmankabaliksan a saray bilang et panaruman. Singa bilang, deneskribe na 2 Samuel 21:20 so “sakey a laki a baleg ya inalageyan, a walaan ed balang lima na anem ira a gamet, tan ed balang sali anem a gamet.” Diad Hebreo, say bilang ya “anem” et naulit. Balet, agkabaliksan na saya a samay alan et walaan na anemiran paris a gamet (odino, 12) ed balang lima tan balang sali to. Say impangulit so mangipapabitar labat ya anemira so gamet ed balang lima tan balang sali.

Nipaakar ed panangulit na saray bilang, antoray totontonen ed gramatika diad Hebreon lenguahe? Diad panisingbat ed Genesis 7:2, 9, onia so inkuan na Introductory Hebrew Method and Manual nen Wiliam R. Harper: “Mabetbet ya uuliten iray salita ta pian nibalikas so bilang na kada grupo.” Diad Hebrew Grammar (Second English Edition) nen Gesenius, inkuanto: “Say bilang na kada grupo et ibabalikas . . . panamegley na pangulit ed bilang.” Sinalambit na satan bilang alimbawa so Genesis 7:9, 15 a naulit so bilang a ‘duara’ tan 2 Samuel 21:20 a naulit so bilang ya “anem.”

Kanian, say “pitora pitora” ed Genesis 7:2 et agto labay ya ibagan pitoran paris, odino 14, no panon a say “sanderwa” diad Genesis 7:9, 15 et agmankabaliksan na duaran paris, odino apatira. Diad saratan a bersikulo, say impangulit ed bilang so pakapatnagan labat na bilang na kada grupo​—aliwan impanaruman na saray bilang. Kanian, say inloob ed biong a malinis ya ayayep et “sampipito,” bangta “sanderwa” labat ed saray agmalinis.

Anto met balet so kabaliksan na “say kalakian tan say kabatyan to” a katumbokan na balikas a “sampipito ed amin a malinis ya ayep” ed Genesis 7:2? Satan so amalbengan na arum a say niganggan ed si Noe ya iloob to et pitoran paris ed kada malinis a klase na ayep. Diad tua, say malinis ya ayayep so inliktar aliwan para labat ed pamarakel. Ibabaga ed sikatayo na Genesis 8:20 a sanen pinmaway la ed biong si Noe, sikatoy “angipaalagey na sakey a panagbagatan a nipaakar ed Jehova; tan angalaan to so amin a malinis ya ayep, tan saray amin a malinis a manok ya atap, et angiyapay na poolan a bagbagat ed tapew na panagbagatan.” Lapud ta walay koma-piton malinis a klase ya ayep, akapangiyapay si Noe na bagat ya ayep tan say taloran paris ya atilak et parad pamarakel na poli na saratan diad dalin.