Iyapay Iray Bagat a Makapaliket ed Dios

“SAY bilay so nanlapu ed ipapatey​—ontan so papanisiaan na saray Aztec nensaman, a malaklaknab ya angagamil na panagbagat na too diad interon Mesoamerica,” so kuan na libron The Mighty Aztecs. “Legay ibibiskeg na empiryo,” so intuloy na libro, “say dala lambengat tan dakel nin dala so inkana pian ombiskeg so kompiyansa na totoo ed satan.” Unong ed sananey nin reperensya, say bilang na toon imbagat na saray Aztec et inmabot ed 20,000 ed kada taon.

Diad interon awaran, saray totoo so mangiyaapay na nanduruman klase na bagat ed dirios da lapud takot tan agpakaseguro odino lapud pakakakonsiensia tan panagbabawi. Diad biek a dapag, ipapabitar na Biblia a walaray panagbagat ya inyuksoy na makapanyarin-amin a Dios a Jehova. Kanian, oniay matukoy ya itepet: Antoran bagat so makapaliket ed Dios? Tan kasin saray apay tan bagat et kabiangan ni ed panagdayew natan?

Saray Apay tan Bagat a Kabiangan ed Tuan Panagdayew

Sanen nagmaliw a nasyon so Israel, angiter si Jehova na malinew iran ganggan no panon so pandayew da ed sikato, tan kalaktip ed satan so panangiyapay tan panangibagat. (Numeros, kapitulo 28 tan 29) Arum ed saray iyaapay et bungabunga na dalin; arum so manbabagat na ayayep a singa saray baka, karnero, malapati, tan palekpek. (Levitico 1:3, 5, 10, 14; 23:10-18; Numeros 15:1-7; 28:7) Walaray interon apay a sigpot a popoolan ed apoy. (Exodo 29:38-42) Wala met so pandurungoan iran bagat parad Dios, a diad saratan et nayarin mangan iramay angiyapay.​—Levitico 19:5-8.

Amin ya apay tan bagat ya insaklang ed Dios unong ed Mosaikon Ganggan so paraan na panangidayew ed Dios tan panamidbir ed sikato bilang Soberano ed uniberso. Diad panamegley na saratan a bagat, impatnag na saray Israelita so pisasalamat da ed si Jehova lapud panamendisyon tan pananalimbeng to, ontan met ed panamerdona to ed saray kasalanan da. Sikara so mayamyaman ya abendisyonan sanen matoor dan sinumpal iray kakaukolanen nen Jehova.​—Uliran 3:9, 10.

Say sankaimportantian ed si Jehova et say awawey na saramay mangiyaapay na saray bagat. Oniay inkuan nen Jehova diad panamegley na propeta ton si Oseas: “Say kaabigan so pilalek ko, ya aliwa a say bagat; tan say pikakabat ed Dios a magmaong nen saray bagat a napoolan.”  (Oseas 6:6) Kanian, sano onkasipa so totoo manlapud tuan panagdayew tan agamilen da so malukak a kondukta tan mamaagus ira na dala na saray andiay-kasalanan, anggapoy kakanaan na saray bagat ya iyaapay da ed si Jehova. Oniay imbaga nen Jehova ed nasyon na Israel diad panamegley nen Isaias: “Anto ta ed siak so karaklan na saray bagat yo? . . . Wala ed siak so masarag ed saray bagat a pinoolan a karkarnero, tan say taba na saray pinataba ya ayep; et agak manliket ed dala na saray baka, ni saray kordero, ni saray kanding.”​—Isaias 1:11.

‘Agko Ingganggan Itan a Gawaen Da’

Midumaan a tuloy ed saray Israelita, saray Canaanita so angibagat ed ananak da dia ed dirios da, pati ed Amonitan dios a tinawag a Molec, a kabkabat a Milcom odino Moloc. (1 Arari 11:5, 7, 33; Gawa 7:43) Oniay inkuan na Halley’s Bible Handbook: “Diad panagdayew na saray Canaanita, inagamil day seksual ya imoralidad diad arapan na dirios da bilang relihyoson ritual; tan imbagat da iray panguloan ya anak da ed saratan met a dirios.”

Aliketan kasi si Jehova a Dios ed saratan a panagbagat? Seguradon andi. Sanen onloob laray Israelita ed dalin na Canaan, oniay ingganggan nen Jehova ed sikara a nisulat diad Levitico 20:2, 3: “Ikuan mo naani ed saray anak na Israel, Say siopaman a kabiangan na saray anak na Israel, odino dia ed saray sankaili a miaayam ed Israel a mangiter na ilalak to ed kinen Moloc: napapatey naani; saray totoo ed dalin tupaken da naani na batobato. Ipasen ko met naani lupak a sumpa ed satan a too tan sikato so isian ko naani ed nanleleetan na saray totoo to; lapud angiter na ilalak to ed Moloc, mandumsis na santuaryok, tan manmudmora na masanto a ngaran ko.”

Anggaman singa agnapanisiaan a nagawaan itan na arum ya Israelita a kinmasipa ed tuan panagdayew, inalig da so demonikon panangibagat ed ananak da ed palson dirios. Nipaakar ed saya, oniay kuan na Salmo 106:35-38: “Nilaok ira ed leeleet na saray nasyon, tan inalig da so gawagawa ra, tan sikara nanlingkor ira ed saray taltalintao a pikakasian da: a sikara nensaman so sakey a kalot ed sikara. On, imbagat da so saray anak da a lalaki tan bibii ed saray demonyo, tan pinatoro ra so andi-kasalanan a dala, salanti, say dala na saray anak da a lalaki tan bibii, a sikara so imbagat da ed saray taltalintao a pikakasian na Canaan; et say dalin atilolan na dala.”

Pian ibalikas to so panggula to ed sayan kagagawa, oniay imbaga nen Jehova ed panamegley nen propeta ton Jeremias nipaakar ed ananak na Juda: “Nanggawa na sakey a kaugsan iray totoo ed Juda. Inyan da’d dalem na templok iray karimdimlak a talintaoy dirios da, kanian dinutakan da. Diad Patar na Hinnom nanggawa ray altar a tatawagey Tofet, a diay nampoolan da’d saray imbabagat dan anak da. Agko ingganggan a gawaen da’ya odino sinmebang ed kanonotan koy onia.”​—Jeremias 7:30, 31, MB.

Naandi so panangabobon na Dios ed nasyon na Israel lapud  inagamil da so ontan iran makapadimlan panagbagat. Diad kaunoran et aderal so Jerusalem, say kabiseran syudad na Israel, tan saray totoo ditan et adakep ed Babilonia. (Jeremias 7:32-34) Malinew sirin a say panagbagat na too et ag-ingganggan na Dios tan agkabiangan ed malinis a panagdayew ed sikato. Nanlapud demonyo so antokaman a klase na panagbagat na too, tan ipupulisay na saray tuan managdayew ed Dios so antokaman a misiglaotan ed satan.

Say Dondon Bagat nen Kristo Jesus

Balet, nayarin oniay itepet na arum, ‘Akin sirin a kabiangan ed Ganggan nen Jehova ed saray Israelita so panangibagat na ayayep?’ Sayan mismon tepet so kinonsidera nen apostol Pablo tan oniay ebat to: “Anto sirin so kakanaan na ganggan? Niarum lapu ed saray kasusunggay, angga ed ag-isabi na ilalo a sikato so akagawaan na sipan. . . . Kanian say ganggan sikato so managbangat ed sikatayo pian itarok to itayo ed Kristo.” (Galacia 3:19-24) Saray bagat ya ayayep diad silong na Mosaikon Ganggan so angilitrato ed babaleg a bagat ya intarya nen Jehova parad katooan, salanti, say bagat na Anak to, si Jesu-Kristo. Tinukoy nen Jesus iyan maaron ginawa na Ama to sanen oniay inkuan to: “Ontan lay impangaro na Dios ed mundo, ya inter to so bogbogtong ya Anak to, pian siopaman a manisia ed sikato agnatawtaw, noag ingen wala so bilay ton andi-anggaan.”​—Juan 3:16.

Lapud panangaro nen Jesus ed Dios tan katooan, mabulos ton inyapay so ayadyarin bilay to bilang dondon ed saray ilalak nen Adan. (Roma 5:12, 15) Oniay inkuan nen Jesus: ‘Say Anak na too so agdia linma a panlingkoran, noag say manlingkor, tan iter toy bilay to a panondon ed amayamay.’ (Mateo 20:28) Anggapo so too diad dalin a makapangibulos ed kapara ton totoo manlapud panangaripen na kasalanan tan ipapatey, ya angilakoan ed sikara sanen nankasalanan si Adan. (Salmo 49:7, 8) Kanian, insalaysay nen Pablo ya “aliwa met a diad panamegley na dala na saray kanding tan saray kilaw na baka, noag lapu ed talonggaring na dala to a dili, linmoob [si Jesus] ya aminpinsan nipaakar ed andi-anggaan, ed masanto a pasen ya agamoran to so maando ya inkarondon.” (Hebreos 9:12) Sanen inawat na Dios so dala ya imbagat nen Jesus, “binural to so inkipuger ya onsumpa ed sikatayo,” salanti, inekal nen Jehova so Ganggan a sipanan, pati saray kakaukolanen ya apay tan bagat, pian ipagamor to so ‘langkap ya andi-bayar na Dios, say bilay ya andi-angga.’​—Colosas 2:14; Roma 6:23.

Saray Bagat tan Apay Diad Espiritual a Paraan

Lapud aliwa lan kabiangan ed tuan panagdayew iray bagat tan apay ya ayayep, wala ni kasi so arum a klase na bagat a kakaukolanen ed sikatayo natan? On, wala. Si Jesu-Kristo so masakripisyon nambilay diad impanlingkor to ed Dios tan diad saginonor et inyapay to so bilay to parad katooan. Kanian, oniay inyabawag to: “No say siopaman a too et labay toy ontumbok ed siak benegan toy dili ya inkasikato, et alaen toy krus to, tan tumboken to ak.” (Mateo 16:24) Kabaliksan na saya a say toon malabay a magmaliw a patumbok nen Jesus et nepeg a manggawa na pigaran panagsakripisyo. Anto iratan?

Sakey ed saray sakripisyo a gawaen na sakey a tuan patumbok nen Kristo et sikatoy agla manbilay parad inkasikaton dili, noagta manbilay pian gawaen so linawa na Dios. Unaen to ni so panggaway linawa na Dios antis na personal a panlabayan tan pilpilalek to. Imanoen pa so  impangideskribe ed satan nen apostol Pablo: “Pikasik ed sikayo, agagi, lapu ed saray panangasi Dios, ya ipatnag yo so saray laman yo a mabilay a bagat, masantos, makapaliket ed Dios, ta sikato so maespiritu a lingkor yo. Tan agkayo miaabobon unong ed sayan mundo: noag ingen manguman kayo lapu ed kapasimbalo na kanonotan yo, pian nasali yo no anto so maong, tan makapaliket, tan nasnaspot a linawa na Dios.”​—Roma 12:1, 2.

Niarum ni, ipapabitar na Biblia a saray gagawaen tayo natan pian idayew si Jehova et ipapasen a bagat ya iyaapay ed sikato. Inusar nen propeta Oseas iray salitan “saray baka a kalakian so bagat na saray bibil mi,” a mangipapabitar ed panmoria na Dios ed panangidayew na saray bibil tayo bilang sakey ed saray sankaabigan a bagat. (Oseas 14:2) Pinaseseg nen apostol Pablo iray Hebreon Kristiano: “Mangisaklang itayo ed Dios a naynay na bagat a panangidayew, salanti, say bunga na saray bibil a mangiwakawak na ngaran to.” (Hebreos 13:15) Natan, okupadon naynay iray Tasi nen Jehova diad panangipulong ed maong a balita tan panaggawa na babangatan ed amin a nasyon. (Mateo 24:14; 28:19, 20) Diad sankamundoan et mangiyaapay ira na saray bagat na panangidayew ed Dios diad agew tan labi.​—Apocalipsis 7:15.

Nilikud ed panagpulong, say panggawa na maabig ed arum so kabiangan ed saray bagat a makapaliket ed Dios. “Agyo lingwanan so panaggawa na maabig tan say pannanabang,” so insimbawa nen Pablo, “ta say Dios napaliket a maong ed sarayan bagat.” (Hebreos 13:16) Diad tua, pian makapaliket ed Dios iray bagat na panangidayew, saramay mangiyaapay so nepeg a mangipatnag na maong a kondukta. Oniay insimbawa nen Pablo: “Gawa yoy anggaay nayarian yon manbilay unong ed maong a balitan nipaakar ed Kristo.”​—Filipos 1:27, MB; Isaias 52:11.

Singa met nensaman, amin a gagawaen tayo a panangibagat parad tuan panagdayew so mamaliket a maong ed sikatayo tan pakagamoran tayo na saray bendisyon nen Jehova. Gawaen tayo sirin so anggaay nayarian tayo pian iyapay iray bagat a makapalikliket ed Dios!

[Litrato ed pahina 18]

“Saray anak da a lalaki tan bibii, . . . so imbagat da ed saray taltalintao a pikakasian na Canaan”

[Saray litrato ed pahina 20]

Diad pangipupulong da ed maong a balita tan itutulong da ed arum ed nanduruman paraan, saray tuan Kristiano so mangiyaapay na saray bagat a makapaliket ed Dios