Manmatoor ed si Kristo tan ed Matoor ya Aripen To

“Sikatoy ipasen [na Katawan] to’d amin a wala ed sikato.”​—MATEO 24:45-47.

1, 2. (a) Diad Biblia, siopa so Lider tayo? (b) Anto so mangipabitar ed aktibon pangidadaulo nen Kristo diad Kristianon kongregasyon?

 “AGKAYO met patatawag na ‘pangulo,’ ta saksakey so pangulo yo a si Kristo.” (Mateo 23:10, Maung a Balita) Diad sarayan salita et impabitar nen Jesus ed saray patumbok to ya anggapo so too diad dalin a nayarin magmaliw a pangulo odino lider da. Say saksakey a lider da et walad tawen, salanti, si Jesu-Kristo, a sikatoy angipabtangan na Dios ed sayan posisyon. “Sikato so binangon [nen Jehova] ed saray inaatey, tan . . . inyan to ya ulo ed saray lapag a bengatla a nipaakar ed iglesia, saya sikato so laman to.”​—Efeso 1:20-23.

² Lapud si Kristo so “ulo ed saray lapag a bengatla” nipaakar ed Kristianon kongregasyon, walay autoridad to ed amin a nagagawa diad kongregasyon. Nanenengneng to so amin a nagagawa ed loob na kongregasyon. Uusisaen ton maong so espiritual a kipapasen na kada grupo na saray Kristiano, odino kongregasyon. Nen mansampot lay inmunan siglo C.E., saya so nipabitar diad puyan a niiter ed si apostol Juan. Aminliman imbaga nen Jesus ed pitoran kongregasyon ya amta to iray gawa ra, saray maabig a kalidad da, tan saray kaleteyan da kanian sinimbawa tan pinaseseg to ira nipaakar ed satan. (Apocalipsis 2:2, 9, 13, 19; 3:1, 8, 15) Napanisiaan tayo ya amta met nen Kristo so espiritual a kipapasen na arum niran kongregasyon ed Asia Minor, Palestina, Sirya, Babilonia, Gresya, Italya, tan ed inerman a pasen. (Gawa 1:8) Komusta met natan?

Sakey a Matoor ya Aripen

3. Akin a matukoy a niyaliling si Kristo bilang sakey ya ulo tan say kongregasyon to bilang sakey a laman?

³ Kayari na inkioli to tan sakbay na insegep to  ed tawen a kawalaan nen Ama to, oniay imbaga nen Jesus ed saray babangatan to: “Amin a pakauley niiter ed siak ed tawen tan dia ed dalin.” Insan inyarum to: “Nia, wala ak a naynay ed sikayo, ya angga ed kasampotan na mundo.” (Mateo 28:18-20) Sikato so nantultuloy a tinmulong tan aktibon angidaulo ed sikara. Diad saray sulat nen apostol Pablo ed saray Kristiano ed Efeso tan Colosas, inyaliling to so Kristianon kongregasyon diad sakey a “laman,” tan si Kristo so Ulo na satan. (Efeso 1:22, 23; Colosas 1:18) Inkuan na The Cambridge Bible for Schools and Colleges a sayan piguratibon salita so “aglambengat mangipapabitar ed kaimportantian na pikasakey ed Ulo, noagta ipapabitar met na satan ya ididirehi na Ulo iray membro. Sikara so pinagka-instrumento to.” Siopan grupo so uusaren nen Kristo a pinagka-instrumento manlapu la nen sikatoy nitrono bilang ari ed Panarian nen 1914?​—Daniel 7:13, 14.

4. Unong ed propesiya nen Malaquias, anto so aromogan nen Jehova tan si Kristo Jesus sanen sinmabi ira a mangusisa ed espiritual a templo?

⁴ Impasakbay na propesiya ed Malaquias a say tuan “Katawan” a si Jehova, ya inulop na ‘igaganggan to ed sipan,’ say nitronon Anak ton si Kristo Jesus, so onsabin mangukom tan mangusisa ed “templo,” odino say espiritual ya abung a pandadayewan ed Sikato. Say “panaon” na ‘impangukom ed abung na Dios,’ so mapatnag ya agawa nen 1918. * (Malaquias 3:1; 1 Pedro 4:17) Sinurin maong iramay mangibabagan irerepresenta ra so Dios tan say tuan panagdayew ed sikato diad dalin. Nipulisay iray relihyon na Kakristianoan, a pigapigay siglo lan mangibabangat ed saray doktrinan mamapabanday ed Dios tan akibiang ed palanit a panagpatey nen Guerra Mundial I. Sakey a matoor a nakdaan na saray Kristianon alanaan na espiritu so asali, apino ed singa-apoy a subok, naabobonan, tan nagmaliw ira a ‘managbagat ed si Jehova na saray bagat ed inkatunong.’​—Malaquias 3:3.

5. Mitunosan ed propesiya nen Jesus nipaakar ed ‘isasabi’ to, siopa so apaneknekan ton matoor ya aripen?

⁵ Mitunosan ed propesiya nen Malaquias, akatulong so tugyop na tanda ya inter nen Jesus ed saray babangatan to pian nibiig da so panaon na ‘isasabi to tan say anggaan na mundo’ ya angilaktip ed pakabidbiran na sakey a grupon “aripen.” Oniay inkuan nen Jesus: “Siopa sirin so matoor tan makabat ya aripen, a sikato’y impasen na katawan to a mangimaton ed sankaabungan to, a mangiter ed sikara na tagano ed panaon a kinepeg to? Mapalar so satan ya aripen, a sikatoy nasabian na katawan to ya ontay gagawaen to. Tua kuan ko ed sikayo, a sikatoy ipasen to’d amin a wala ed sikato.” (Mateo 24:3, 45-47) Sanen ‘sinmabi’ si Jesus nen 1918 pian mangusisa ed “aripen,” apaneknekan ton sayan nakdaan na matoor iran babangatan ya alanaan na espiritu so mangitatarya na espiritual a ‘tagano ed manepeg a panaon’ diad panamegley na sayan magasin a nipalapag manlapu la nen 1879, tan ontan met ed arum niran publikasyon a nibase’d Biblia. Sikara so inawat to bilang say grupon pinagka-instrumento, odino “aripen” to, tan nen 1919 et inmatalek to ed sikara so panangasikaso ed amin a kaykayarian to diad dalin.

Panangasikaso ed Kaykayarian nen Kristo Diad Dalin

6, 7. (a) Anto ni so arum ya impanawag nen Jesus ed matoor ya “aripen” to? (b) Anto so labay ya ibaga nen Jesus sanen inusar to so salitan “managpaga”?

⁶ Pigara nin bulan antis ya inter nen Jesus so propesiya to nipaakar ed tanda na kiwawala to, pati say kiwala na “aripen” a mangirepresenta ed sikato diad dalin, tinawag to iyan “aripen” diad arum a termino pian niparungtal iray responsabilidad da. Oniay imbaga nen Jesus: “Siopa sirin so managpaga a napanmatalkan tan makalakal, ya iyan na Katawan to a manbantay ed sankaabungan to, pian sano kanepegan to iter to ed sikara so nabebetangan dan tagano? Dia ed tua, ikuan ko ed sikayo, a sikato so igaton ton manbantay ed amin a kayarian to.”​—Lucas 12:42, 44.

⁷ Diad sayan teksto et say aripen so atawag a managpaga, sakey a salitan nipatalos manlapud Griegon termino a mankabaliksan na “say manangasikaso ed sankaabungan odino kayarian.” Sayan grupon managpaga so aliwa lambengat a sakey a grupo na saray iskolar a mangipapaliwawa  ed makapainteres iran punto na Biblia. Nilikud ed pangitatarya ra na makapabunigas ya espiritual a tagano ed “panaon a kinepeg to,” say “matoor a managpaga” so aturon mangimaton ed interon ulop na saray katambayan nen Kristo tan apabtangan a mangasikaso ed saray kongregasyon nen Kristo tan saray kimey da diad dalin, “amin a kayarian to.” Anto iray kabiangan ed saya?

8, 9. Antoran “kayarian’ so nimatalek ed panangasikaso na aripen?

⁸ Kabiangan ed saray responsabilidad na aripen so pangasikaso ed saray pasilidad ya uusaren na saray patumbok nen Kristo pian manumpal ed kimkimey da bilang Kristiano. Aasikasoen da iray hedkuarter tan saray sangan opisina na saray Tasi nen Jehova, ontan met ed saray pasen a pandadayewan da​—saray Kingdom Hall tan Assembly Hall​—diad sankamundoan. Mas importante ni, aasikasoen met na aripen iray programan makapabiskeg ed espiritual, salanti, say panagaral ed Biblia diad saray sinimban pantitipon tan saray asamblea tan kombension. Diad sarayan pantitipon, nipapasabi so impormasyon nipaakar ed kasumpalan na saray propesiya na Biblia tan say nipanpanaon a panangidirehi no panon ya iyaplika iray prinsipyo na Biblia ed inagew-agew a panagbilay.

⁹ Kalaktip met ed saray responsabilidad na managpaga so pangasikaso ed sankaimportantian a kimey a panangipulong ed “saya ya ebanghelyo na panarian” tan ed ‘panaggawa na babangatan ed amin a nasyon.’ Diad sayan panaon na anggaan, lalanoren na satan so pangibangat ed totoo a mangunor ed amin ya ingganggan nen Kristo, say Ulo na kongregasyon. (Mateo 24:14; 28:19, 20; Apocalipsis 12:17) Sayan panangipulong tan panagbangat a kimey so amawala na “baleg ya ulop” na saray matoor a kakaiba na alanaan a nakdaan. Sarayan “mabli a bengatla na saray amin a nasyon” so maseguron kabiangan ed saray mablin “kayarian” nen Kristo ya aasikasoen na matoor ya aripen.​—Apocalipsis 7:9; Aggeo 2:7.

Say Mangirerepresentan Mananguley ya Ulop

10. Nen inmunan siglo, anton ulop so apabtangan a manggawa na saray desisyon, tan anto so epekto na satan ed saray kongregasyon?

¹⁰ Mapatnag a say ambelat a responsabilidad na matoor ya aripen et say panggawa na dakel a desisyon. Diad inmuunan Kristianon kongregasyon, saray apostol tan mamatatken ed Jerusalem so angirepresenta ed aripen a klase, a sikara so nanggawa na saray desisyon parad interon Kristianon kongregasyon. (Gawa 15:1, 2) Saray desisyon na sayan inmunan-siglon mananguley ya ulop so impasabi ed saray kongregasyon panamegley na saray sulat tan ombiabiahen manangilaman. Saray inmuunan Kristiano so malikeliket ya angawat ed sayan malinew a panangidirehi, tan say mabulos ya impikoopera ra ed mananguley ya ulop so lalon amawala na deen tan pankakasakey.​—Gawa 15:22-31; 16:4, 5; Filipos 2:2.

11. Siopa so uusaren nen Kristo natan pian iwanwan so kongregasyon to, tan panon tayon moriaen iyan grupo na saray alanaan a Kristiano?

¹¹ Singa met ed saray Kristiano nensaman,  wala natan so melag a grupo na saray manangasikaso ya alanaan na espiritu, a manugyop ed Mananguley ya Ulop na saray patumbok nen Kristo diad dalin. Diad panamegley na ‘kawanan a lima’ to a mangisisimbolo ed pakapanyari to, si Kristo, ya Ulo na kongregasyon, so mangiwawanwan ed sarayan matoor a lalaki legan dan aasikasoen so kimey ed Panarian. (Apocalipsis 1:16, 20) Diad istorya na bilay to, oniay insulat nen Albert Schroeder, ya abayag a membro na Mananguley ya Ulop tan agano ni labat ya asumpal so mangaraldalin a bilay to: “Kada Mierkoles et manmimiting so Mananguley ya Ulop, a lulukasan da itan ed pikakasi tan onkekerew ira na panangidirehi na espiritu nen Jehova. Seseguroen da a mitunosan ed Salitay Dios, say Biblia, so paraan na pangasikaso ra ed kada sakey a pamaakaran tan desisyon a gawaen da.” * Makapanmatalek itayo ed sarayan matoor ya alanaan a Kristiano. Nipaakar ed sikara et nepeg tayon tuloken so bilin nen apostol Pablo: “Ontulo’kayo ed saray wala a manuley ed sikayo, tan pauleyan kayo ed sikara: ta manbabantay ira lapu ed saray kamarerwa yo.”​—Hebreos 13:17.

Ipatnag so Manepeg a Respeto ed Matoor ya Aripen

12, 13. Anto iray Makasulatan a rason no akin ya ipatnag so respeto ed aripen a klase?

¹² Say manunan rason no akin ya ipatnag tayo so manepeg a respeto ed matoor ya aripen a klase et lapud panangipatnag itan na respeto ed Katawan, si Jesu-Kristo. Oniay insulat nen Pablo ed saray alanaan: “Say atawag anta bulos, sikato so aripen nen Kristo. Sikayo asaliw kayo ed sakey a bili.” (1 Corinto 7:22, 23; Efeso 6:6) Kanian, sano matoor itayon manpasakop ed panangidirehi na matoor ya aripen tan say Mananguley ya Ulop to, sikatayo so manpapasakop ed si Kristo, say Katawan na aripen. Say pangipanengneng tayo na manepeg a respeto ed pinagka-instrumento nen Kristo ya uusaren ton mangasikaso ed saray kayarian to diad dalin et sakey a paraan pian niyabawag odino ‘nipatua tayo a si Jesu-Kristo so Katawan, a kidayewan na Dios ya Ama.’​—Filipos 2:11.

¹³ Say sakey nin Makasulatan a rason no akin ya ipatnag so respeto ed matoor ya aripen a tugyopen na alanaan iran Kristiano et sikara so piguratibon tinukoy bilang sakey a “templo” a panaayaman nen Jehova panamegley na “espiritu.” Lapud ontan so kipapasen da, sikara so ‘masanto.’ (1 Corinto 3:16, 17; Efeso 2:19-22) Sayan masanton grupo, ya adeskribe bilang templo, so angimatalekan nen Jesus ed saray kayarian to diad dalin. Kabaliksan na satan a sikara so walaan na autoridad tan responsabilidad ed loob na Kristianon kongregasyon a nipabtang labat ed sikara bilang grupon aripen. Lapud saya, ipapasen na amin a membro na kongregasyon a sagradon responsabilidad so panumbok tan panuporta ed panangidirehi na matoor ya aripen tan say Mananguley ya Ulop to. On, ipapasen na “arum a karnero” a peteg a pribilehyo so panuporta ed aripen a klase, a mangaasikaso ed saray intereses na Katawan da.​—Juan 10:16.

Matoor a Suportaan Iray Alanaan

14. Unong ed propesiya nen Isaias, panon so panutumbok na arum a karnero ed saray alanaan ya aripen a klase, tan panon so panlilingkor da bilang “agbabayaran a trabahador”?

¹⁴ Nipasakbay ed propesiya nen Isaias so mapaabeban panagpasakop na arum a karnero ed saray alanaan a membro na espiritual ya Israel: “Onia so kuan nen Jehova, say gawa [“agbabayaran a trabahador,” NW] na Ehipto, tan say lako na Etiopia, tan Saba, totoo ya atagey, onla ra naani ed sika, tan sikara naani kayarian mo: ontumbok ira naani ed sika; onsabi ra naani a sigugulong-gulong; et mangigalang ira naani ed sika, mikasi ra naani ed sika, a kuan da, Tua a wala ed sika so Dios; et anggapo la so sananey a Dios.” (Isaias 45:14) Diad simbolikon paraan, say arum a karnero natan so ontutumbok ed panangiwanwan tan panangidaulo na saray alanaan ya aripen a klase tan say Mananguley ya Ulop. Bilang “saray agbabayaran a trabahador,” say arum a karnero so mabulos a manguusar ed biskeg tan kaykayarian da pian nasuportaan so sankamundoan  a panagpulong a kimey ya impabtang nen Kristo ed saray alanaan a patumbok to diad dalin.​—Gawa 1:8; Apocalipsis 12:17.

15. Panon ya impasakbay na propesiya ed Isaias 61:5, 6 so maapit a pantutulongan na arum a karnero tan say espiritual ya Israel?

¹⁵ Say arum a karnero so maliket tan maapresyan manlilingkor ed si Jehova diad silong na panangasikaso na aripen a klase tan say Mananguley ya Ulop to. Bibidbiren da iray alanaan bilang saray membro na “Israel na Dios.” (Galacia 6:16) Bilang saray piguratibon “sankaili” a kaiba na espiritual ya Israel, maliket ira a manlilingkor bilang ‘managbaka’ tan ‘manangimaton ed kaubasan’ diad silong na panangiwanwan na saray alanaan, ‘saray saserdote nen Jehova’ tan ‘saray katambayan na Dios.’ (Isaias 61:5, 6) Sikara so maseseg a mibibiang ed panangipulong ed sayan maong a balita na Panarian tan ed panaggawa na babangatan manlapud amin a nasyon. Sikara so sigpot-puson onsusuporta ed aripen a klase diad panagpastol tan panangasikaso ed saray balo nin membro na kongregasyon.

16. Anto so mamapakiwas ed arum a karnero pian matoor dan suportaan so matoor tan makabat ya aripen?

¹⁶ Bibidbiren na arum a karnero a natutumangan iran maong lapud maseet ya itatarya na matoor ya aripen so nipanpanaon ya espiritual a tagano parad sikara. Mapaabeba ran bibidbiren a no anggapo so matoor tan makabat ya aripen et daiset odino anggapo so amta ra nipaakar ed mabli iran katuaan na Biblia, a singa say inkasoberano nen Jehova, say kapasantos na ngaran to, say Panarian, saray balon katawenan tan balon dalin, say kamarerwa, kipapasen na inaatey, tan no siopa si Jehova, say Anak to, tan no anto so masanton espiritu. Lapud pisalsalamat tan katooran da, maaron susuportaan na arum a karnero iray alanaan ya “agagi” nen Kristo diad dalin legan na sayan panaon na anggaan.​—Mateo 25:40.

17. Anto so denesidi na Mananguley ya Ulop a nakaukolan a gawaen, tan anto so konsideraen ed ontumbok ya artikulo?

¹⁷ Lapud ondaraiset la ray alanaan natan, agda personal a napilimogan so amin a kongregasyon pian naseguro ra so pakaasikaso ed saray kayarian nen Kristo. Kanian, tuturoen na Mananguley ya Ulop iray lalakin kabiangan na arum a karnero pian mangasikaso ed saray sangan opisina, distrito, sirkito, tan saray kongregasyon na saray Tasi nen Jehova. Kasin say awawey tayo ed sarayan managpastol ya iwawanwan nen Kristo so mangapekta ed katooran tayo ed si Kristo tan ed matoor ya aripen to? Naebatan iya diad ontumbok ya artikulo.

[Saray paimano ed leksab]

Bilang Panrepaso

• Siopa so Lider tayo, tan anto so mangipatnag ya amta to iray nagagawa ed loob na kongregasyon?

• Sanen asuri so “templo,” siopa so aromog ya onkikiwas a matoor ya aripen, tan antoran kayarian so nimatalek ed sikara?

• Antoray Makasulatan a rason no akin a matoor tayon suportaan so matoor ya aripen?

[Tepetepet Parad Panagaral]

[Saray litrato ed pahina 23]

Kabiangan ed saray “kayarian” ya aasikasoen na “managpaga” iray pasilidad, saray programan makapabiskeg ed espiritual, tan say panagpulong a kimey

[Litrato ed pahina 25]

Onsusuporta iray membro na arum a karnero ed matoor ya aripen a klase diad maseseg a panagpulong da