Mapaabeban Manpasakop ed Saray Maaron Managpastol

“Ontulo’kayo ed saray wala a manuley ed sikayo, tan pauleyan kayo ed sikara.”​—HEBREOS 13:17.

1, 2. Antoran teksto ed Biblia so mangipabitar a si Jehova tan si Jesus et maaron Pastol?

 SI Jehova a Dios tan say Anak ton si Jesu-Kristo et maaro iran Pastol. Oniay impropesiya nen Isaias: “Nia, say Katawan a Jehova onsabi a singa sakey a makapanyari, tan manuley naani taklay to nipaakar ed sikato. . . . Pankabkaben to naani so ayep to a singa sakey a pastol, tiponen to naani so saray kordero ed taklay to, tan awiten to ra ed pagew to, tan guyoren to a makalna naani so saray walaan na kilaw.”​—Isaias 40:10, 11.

² Sayan propesiya nipaakar ed panangipawil so primeron asumpal nen 537 B.C.E. sanen pinmawil ed Juda so nakdaan na saray Judio. (2 Awaran 36:22, 23) Asumpal lamet itan nen 1919 sanen imbulos na Babaleg a Ciro, a si Jesu-Kristo, iray alanaan a nakdaan manlapud “Babilonia a Baleg.” (Apocalipsis 18:2; Isaias 44:28) Sikato so “taklay” nen Jehova ya uusaren Ton manguley, a titiponen tan papastolan to iray karnero tekep na matamoy a panangasikaso. Oniay imbaga nen Jesus a mismo: “Siak so maong a pastol, et kabat ko so saray kayarian ko [a karnerok], tan saray kayarian ko kabat da ak.”​—Juan 10:14.

3. Panon a napatnagan so maaron panangiyansakit nen Jehova diad pidedeneng to ed saray karnero to?

³ Idadanet na propesiya ed Isaias 40:10, 11 so matamoy a panagpastol nen Jehova ed totoo to. (Salmo 23:1-6) Legan na mangaraldalin a ministeryo to, impatnag met nen Jesus so matamoy a panangiyansakit ed saray babangatan to tan ed saray totoo diad inkalapagan. (Mateo 11:28-30; Marcos 6:34) Kagula nen Jehova tan si Jesus so maruksan awawey na saray managpastol odino lider na Israel, ya anggapoy-baing ya amaulyan tan anganamot ed saray pulok da. (Ezequiel 34:2-10; Mateo 23:3, 4, 15) Oniay insipan nen Jehova: “Ilaban ko sirin naani so pulok ko, et aliwa la ra naani a sakey a samsam; et ukomen ko naani so karnero tan karnero. Et paalageyen ko naani so sakey a pastol ed sikara, et pakanen to ra naani, a sikato si aripen ko a David; pakanen to ra naani, tan sikato naani so pastol da.” (Ezequiel 34:22, 23) Diad sayan panaon na anggaan, si Jesu-Kristo, say Babaleg a David, so “sakey a pastol” a tinuro nen Jehova a manguley ed amin a lingkor To diad dalin, salanti, saray alanaan-na-espiritun Kristiano tan say “arum a karnero.”​—Juan 10:16.

 Saray Langkap na Tawen Parad Kongregasyon

4, 5. (a) Anton mablin langkap so inter nen Jehova ed totoo to diad dalin? (b) Anton langkap so intarya nen Jesus parad kongregasyon?

⁴ Diad impanuro To ed “sakey a pastol,” a si Jesu-Kristo, pian manguley ed saray lingkor To diad dalin, angiter si Jehova na mablin langkap ed Kristianon kongregasyon. Sayan langkap ya inter na mangatatawen a Lider so nipropesiya ed Isaias 55:4: “Nia, sikato so inter ko a nipaakar a tasi ed saray baley a pangulo tan managganggan ed saray baley.” Saray alanaan a Kristiano tan saray membro na “baleg ya ulop” so natitipon manlapud amin a nasyon, tribu, balbaley, tan pansasalita. (Apocalipsis 5:9, 10; 7:9) Tugyopen da so sakey ya internasyonal a kongregasyon, “sakey a pulok,” ya idadaulo na “saksakey a pastol,” si Kristo Jesus.

⁵ Inter met nen Jesus so sakey a mablin langkap ed kongregasyon to diad dalin. Intarya to iray matoor a katulongan ton managpastol, a diad pangaalig da ed si Jehova tan si Jesus et matamoy dan aasikasoen so pulok. Sinaglawi nen apostol Pablo iyan maaron langkap diad sulat to ed saray Kristianon taga-Efeso. Oniay insulat to: “‘Sanen sikatoy sinmegep ed tagey, inawit to iray adakep; inter to iray langkap a totoo,’ . . . Saray arum et inter to ira bilang apostoles, saray arum et propeta, saray arum et ebanghelisador, saray arum et managpastol tan managbangat, pian nipawil ed uksoy iray masantos, nipaakar ed kimey ed panagministeryo, a pakapabiskegan na laman nen Kristo.”​—Efeso 4:8, 11, 12, NW.

6. Panon a nilitrato ed Apocalipsis 1:16, 20 iray alanaan a manangasikaso a kabiangan na saray ulop na mamatatken, tan anto so nibaga nipaakar ed saray aturon mamatatken a kabiangan na arum a karnero?

⁶ Sarayan “langkap a totoo” et saray manangasikaso, odino mamatatken, a tinuro nen Jehova tan say Anak to diad panamegley na masanton espiritu, pian matamoy a manpastol ed saray karnero. (Gawa 20:28, 29) Nensaman, sarayan manangasikaso et tugyopen na saray alanaan a Kristianon lalaki. Diad Apocalipsis 1:16, 20, saramay nanlingkor bilang kabiangan na ulop na mamatatken diad alanaan a kongregasyon so nisimbolo bilang saray “bitewen” odino “angheles” a walad kawanan a lima nen Kristo, salanti, sikara so walad panangontrol to. Balet, diad sayan panaon na anggaan, ya ondaraiset la iray alanaan a manangasikaso a wadiad dalin, say karaklan ed Kristianon mamatatken ed saray kongregasyon et kabiangan na arum a karnero. Lapud saraya so tinuro na saray manangilaman na Mananguley ya Ulop ya iwawanwan na masanton espiritu, sikara met so nibaga a walad kawanan a lima (odino, walad silong na panangidirehi) na Maabig a Pastol, si Jesu-Kristo. (Isaias 61:5, 6) Lapud sarayan mamatatken ed kongregasyon et manpapasakop ed si Kristo, say Ulo na kongregasyon, nepeg a mikoopera itayon maong ed sikara.​—Colosas 1:18.

 Ontulok tan Manpasakop

7. Anto so insimbawa nen apostol Pablo nipaakar ed awawey tayo ed saray Kristianon manangasikaso?

⁷ Iilaloan na saray mangatatawen a Pastol tayo, si Jehova a Dios tan si Jesu-Kristo, a tuloken tan pampasakopan tayo iray managpastol a walad silong nen Kristo, lapud sikara so naikdan na responsablin betang diad loob na kongregasyon. (1 Pedro 5:5) Oniay nipuyan ya isulat nen apostol Pablo: “Nonot yo so saray manuley ed sikayo, a sikara so nansalita ed sikayo na salitay Dios; tan motektek yo no anto so asumpalan na impanbilay da, alig yo so pananisia’ra. Ontulo’kayo ed saray wala a manuley ed sikayo, tan pauleyan kayo ed sikara: ta manbabantay ira lapu ed saray kamarerwa yo, a singa sikara so mangiter naani pipalinewan: pian sikato ya so gawaen da a sigagayaga, tan aliwa a sieermen: ta saya agmakapaabig ed sikayo.”​—Hebreos 13:7, 17.

8. Anto so ipapaseseg nen Pablo a “motekteken” tayo, tan panon so nepeg ya ‘itulok’ tayo?

⁸ Ipapaimano ed sikatayo nen Pablo a “motekteken,” odino maalwar ya imanoen, so epekto na matoor a kondukta na saray mamatatken tan aligen tayo so pananisia ra. Niarum ni, sikatayo so sinimbawa to ya ontulok tan manpasakop ed panangidirehi na sarayan aturon lalaki. Impaliwawa na iskolar na Biblia a si R. T. France a diad orihinal a Griego, say salita dia a nipatalos ya “ontulok” et aliwan “samay kaslakan a termino parad katutulok, balet literal a mankabaliksan a ‘nakombinsi,’ salanti, mabulos a mangawat ed panangidaulo ra.” Ontutulok itayo ed saray mamatatken lapud aliwa labat ya ingganggan itan ed sikatayo na Salitay Dios noagta lapud kombinsido itayo met a nononoten da so maabig parad intereses na Panarian, pati say pankaabigan tayo. Seguradon manliket itayo no mabulos tayon awaten so panangidaulo ra.

9. Akin a nakaukolan a sikatayoy ‘manpasakop’ nilikud ed pagmaliw a matulok?

⁹ Balet, panon to no ag-itayo kombinsido a sankaabigan so impangidirehi na mamatatken ed sakey a pamaakaran? Nakaukolan so manpasakop ed onian kipapasen. Mainomay so ontulok sano malinew tan pipaknaan tayo iray bengatla, balet nipatnag tayo a talagan mapasakop itayo no agtayo ipasoot so opinyon tayo anggano agtayo tampol a natalosan so panangidirehi ra. Onian klase na panagpasakop so impatnag nen Pedro, a nagmaliw ya apostol ed saginonor.​—Lucas 5:4, 5.

Apatiran Rason no Akin a Mabulos Itayon Mikoopera

10, 11. Diad anton paraan a saray manangasikaso et ‘nansalita na salitay Dios’ ed kapara ran Kristiano nen inmunan siglo tan natan?

¹⁰ Diad Hebreos 13:7, 17 ya inaon la, inter nen apostol Pablo so apatiran rason no akin a nepeg itayon ontulok tan manpasakop ed saray Kristianon manangasikaso. Say primero et lapud ‘sasalitaen da ed sikatayo so salitay Dios.’ Nodnonoten met a saray “langkap a totoo” et inter nen Jesus ed kongregasyon pian ‘nipawil ed uksoy iray masanto.’ (Efeso 4:11, 12, NW) Nen inmunan siglo, impetek to so panag-isip tan kondukta na saray Kristiano diad panamegley na matoor iran katulongan a managpastol, ya arum ed saratan so apuyanan a mansulat ed saray kongregasyon. Inusar to iratan a manangasikaso ya aturo panamegley na espiritu pian mangiwanwan tan mamabiskeg ed saray inmuunan Kristiano.​—1 Corinto 16:15-18; 2 Timoteo 2:2; Tito 1:5.

¹¹ Natan, iwawanwan itayo nen Jesus diad panamegley na “matoor tan makabat ya aripen,” ya irerepresenta na Mananguley ya Ulop tan saray aturon mamatatken. (Mateo 24:45) Lapud respeto tayo ed ‘manunan pastol,’ si Jesu-Kristo, talinengen tayo so simbawa nen Pablo: “Pagalangan yo’ray komikimey a kaiba yo, ta sikaray pinili na Katawan tan sikaray manangiwanwan tan managsimbawa yo.”​—1 Pedro 5:4; 1 Tesalonica 5:12, MB; 1 Timoteo 5:17.

12. Panon a saray manangasikaso et ‘manbabantay ed saray kamarerwa tayo”?

¹² Say komaduan rason no akin a mikoopera itayo ed saray Kristianon manangasikaso et sikaray ‘manbabantay ed saray kamarerwa tayo.’ No walay naimano ran awawey odino kondukta a nayarin mameligro ed espiritualidad tayo, alisto iran mangiter ed sikatayo na nakaukolan a simbawa ta pian nipetek itayo. (Galacia 6:1) Say Griegon salita a nipatalos a “manbabantay” so literal  a mankabaliksan na “ag-onuugip.” Unong ed sakey ya iskolar na Biblia, satan so “mankabaliksan na tuloytuloy a pambabantay na managpastol.” Niarum ni ed pansiasiansia ran akabantay ed espiritual a paraan, saray mamatatken so agni ingen makakaugip lapud panagpaga ra ed espiritual a kipapasen tayo. Agta nepeg itayon mabulos a mikoopera ed sarayan maaron managpastol a walad silong nen Kristo lapud gagawaen day anggaay nayarian da pian naalig so matamoy a panangasikaso nen Jesu-Kristo, say ‘sankabalgan a pastol na saray karnero’?​—Hebreos 13:20.

13. Siopa tan diad anton paraan so pipalinewan na saray manangasikaso tan say amin a Kristiano?

¹³ Say komatlon rason no akin a mabulos itayon mikoopera ed saray manangasikaso et babantayan da itayo lapud sikaray ‘mipalinewan.’ Nonodnonoten na saray mamatatken a katulongan ira a managpastol, a manlilingkor ira ed silong na mangatatawen iran Pastol, si Jehova a Dios tan si Jesu-Kristo. (Ezequiel 34:22-24) Si Jehova so Akankayarian ed saray karnero, tan ‘sinaliw to ra ed dala na Anak to.’ Saray aturon manangasikaso so mikuentaan ed si Jehova no panon so impantrato ra ed pulok To, a nepeg a tratoen diad matamoy a paraan. (Gawa 20:28, 29) Amin tayo sirin so mipalinewan ed si Jehova no panon so inkiwas tayo ed panangidirehi to. (Roma 14:10-12) Say itulok tayo ed saray aturon mamatatken so mangipatnag met ed panagpasakop tayo ed si Kristo, say Ulo na kongregasyon.​—Colosas 2:19.

14. Anto so pansengegan na ‘maermen’ a panlingkor na saray Kristianon manangasikaso, tan antoray resulta?

¹⁴ Inter nen Pablo so komapat a rason no akin a nepeg itayon mapaabeban manpasakop ed saray Kristianon managpastol. Oniay insulat to: “Pian sikato’ya so gawaen da a sigagayaga, tan aliwa a sieermen: ta saya agmakapaabig ed sikayo.” (Hebreos 13:17) Lapud seryoso iran responsabilidad da ed panagbangat, panagpastol, panangidaulo ed panagpulong a kimey, panlegpet ed pamilya ra, tan pangasikaso ed saray problema ed kongregasyon, ambelat so sasakbaten na saray Kristianon mamatatken. (2 Corinto 11:28, 29) Sano ag-itayo mikoopera ed saray managpastol, sikaray lalon nabelatan tan saya so ‘mamaermen’ ed sikara. No ag-itayo sirin naynay a mikoopera, napaermen tayo si Jehova tan agmakapaabig itan ed sikatayo. Imbes, sano ipatnag tayo so manepeg a respeto tan pikokoopera, maliket a nagawaan na saray mamatatken iray obligasyon  da, tan mamawala iya na pankakasakey tan maliket a pibibiang ed panangipulong ed Panarian.​—Roma 15:5, 6.

Ipatnag Tayo so Panagpasakop Tayo

15. Panon tayon nipatnag so katutulok tan panagpasakop tayo?

¹⁵ Dakel so praktikal a paraan pian makapikoopera itayo ed saray aturon manangasikaso. Pian makaadapta ed balo iran kipapasen diad teritorya, wala kasi uksoyan a ginawa na mamatatken parad pantitipon ed lawak na kimeyan, a lapud satan et nakaukolan tayon umanen so datin eskedyul tayo pian natumbok itan a balon uksoyan? Panggunaetan tayo komon a suportaan so balo iran uksoyan, a pakagamoran tayo na ag-iilaloan iran bendisyon. Kasin ombibisita ed CBS tayo so manangasikaso na serbisyo? No posible, sigpot itayon mibiang ed panagpulong ed satan a simba. Kasin naikdan itayo na betang diad Teokratikon Eskuelaan Parad Ministeryo? Pampelengan tayo komon a gawaen tan sumpalen so betang tayo. Kasin inyanunsio na manangasikaso na CBS ya onsublay lay grupo tayon manlinis ed Kingdom Hall? Komon ta sikatoy sigpot tayon suportaan, no nayarian na bunigas tan biskeg tayo. Diad dakel iran paraan nilikud ed saraya, nipatnag tayo so panagpasakop tayo ed saray lalakin tinuro nen Jehova tan say Anak ton mangasikaso ed pulok da.

16. No walay sakey a matatken ya agmakatumbok ed panangidirehi, akin ya aliwa iyan rason pian manrebelde itayo?

¹⁶ No maminsan, walay matatken a nayarin agmakatumbok ed panangidirehi na matoor ya aripen a klase tan say Mananguley ya Ulop. No sikato so mantultuloy ya ag-ontumbok ed saray uksoyan, sikato so mikuentaan ed si Jehova, “say managpastol tan manangasikaso ed saray kamarerwa [tayo].” (1 Pedro 2:25, NW) Balet antokaman so kalilingoan odino kakulangan na pigaran mamatatken, aliwa itan a rason pian agtayo la manpasakop. Agbendisyonan nen Jehova iramay ag-ontulok tan manrebelde.​—Numeros 12:1, 2, 9-11.

Bendisyonan nen Jehova Iray Mabulos a Mikoopera

17. Anto so nepeg ya awawey tayo ed saray manangasikaso ed sikatayo?

¹⁷ Amta nen Jehova a Dios ya ag-ayadyari iray lalakin tinuro to bilang manangasikaso. Balet sikara so uusaren to, tan diad panamegley na espiritu to et papastolan to so totoo to diad dalin. Petepeteg ed saray mamatatken​—pati ed sikatayon amin​—a say “sankatageyan ya inkabaleg na pakayari kien komon na Dios, ya agmanlapu ed sikatayo.” (2 Corinto 4:7) Nepeg a pisalamatan tayo sirin si Jehova lapud gagawaen to parad sikatayo panamegley na matoor iran manangasikaso, tan nepeg ya ipatnag tayo so mabulos a pikokoopera tayo.

18. Diad pampasakop ed saray manangasikaso ed sikatayo, anto so peteg a gagawaen tayo?

¹⁸ Pampepelengan na saray manangasikaso so manbilay unong ed deskripsion nen Jehova ed saray managpastol ya aturon mangasikaso ed pulok to diad sayan kaunoran iran agew, unong a nabasa ed Jeremias 3:15: “Ikdan ta kayo naani na saray pastol ya unong ed pusok, a sikara naani managano ed sikayo ed pikakabat tan pakatalos.” Talagan nakomendaan so gagawaen na saray mamatatken ed limog tayo lapud pambabangat tan panasalimbeng da ed saray karnero nen Jehova. Komon ta mantultuloy tayon ipatnag so apresasyon ed pansasagpot da diad mabulos a pikoopera, itulok, tan pampasakop tayo ed sikara. No ontan so gagawaen tayo, nipatnag tayo so apresasyon ed saray mangatatawen a Pastol tayo, si Jehova a Dios tan si Jesu-Kristo.

Bilang Panrepaso

• Panon ya impatnag nen Jehova tan si Jesu-Kristo a sikaray maaron Pastol?

• Nilikud ed katutulok, akin a nakaukolan so panagpasakop?

• Diad antoran praktikal a paraan a nipatnag tayo so panagpasakop?

[Tepetepet Parad Panagaral]

[Litrato ed pahina 27]

Manpapasakop iray Kristianon mamatatken ed panangidaulo nen Kristo

[Saray litrato ed pahina 29]

Dakel so paraan pian nipatnag tayo so panagpasakop ed saray managpastol a tinuro nen Jehova