Say Panaanap ed Susto Iran Ebat

Panon kon naasikaso so bunigas ko?

Antoy nayarin gawaen ko pian magmaliw a maliket so bilay na pamilyak?

Antoy gawaen ko pian agak naandian na trabaho?

KASIN wala ed saratan a tepet so nitepet mo la? Kasin akaromog ka la na praktikal ya ebat a talagan epektibo? Kada taon et ngalngalin 2,000 a nanduruman libro, a mangiyoopresi na simbawa nipaakar ed saraya tan arum niran importantin tema, so nipapalapag. Diad Britanya lambengat et ngalngali 80 milyon pound (manga 150 milyon a dolyar, U.S.) so tinaon a gagastosen na saray managbasa pian manaliw na saray libron mangiyoopresi na simbawa ed no panon a natalonaan iray problema ed bilay. Diad Estados Unidos et onaabot ed 600 milyon a dolyar so tinaon a napanlalakoan ed saray libron makatulong ed dili. Seguradon agmo bukbukor so manaanap na maong a simbawa no panon so pambilay ed inagew-agew.

Nipaakar ed simbawa a naromog ed amayamay a libro, oniay inkuan na sakey ya autor: “Dakel a balon libro so manguulit lambengat ed walan nisulat la.” On, maslak ed saray simbawan naromog ed sarayan libro so inalig labat ed samay kakabatan a nisulat ed sakey ed saray sankadaanan lan libro ed mundo. Sayan libro so sankalaknaban a nibubunog ed sankamundoan. Nipatalos la so intero odino kabiangan na saya ed ngalngalin 2,400 a lenguahe. Diad ami-amin et masulok a 4.6 bilyon lan kopya so niimprinta ed interon mundo. Sayan libro et anggapoy arum noag say Biblia.

Oniay malinlinew ya inkuan na Biblia: “Amin a sulat ya impuyan na Dios sikato met so maabig a pakaaralan, pakasumalan, pakasimbawaan, tan pakapanontonan a sikato so wala ed katunongan.” (2 Timoteo 3:16) On, say Biblia so ag-insulat bilang sakey labat a manual pian natulongan so dili. Say manunan gagala na satan et iparungtal so linawa na Dios parad katooan. Anggaman ontan, dakel so ibabaga na Biblia no panon a natalonaan iray problema a kaslakan lan kidudungetan na katooan, tan makapanilalo iramay mabulos a paiwanwan ed satan a naaralan da no panon dan nagunggonaan so inkasikara. (Isaias 48:17, 18) Say pangiyaplika ed praktikal a simbawa na satan so lawas epektibo, antokaman so rasa, kultura, odino edukasyon na sakey a too. Konsideraen pa so ontumbok ya artikulo tan desidien mo no kasin praktikal so ibabaga na Biblia ed saray teman nipaakar ed bunigas, pamilya, tan trabaho.