Istorya na Bilay

Say Panaggaway-Babangatan so Manunan Angimpluensya ed Bilay Ko

Unong ed salaysay nen Lynette Peters

Sinmabi laray sundalo a mangi-ibakwit ed sikami. Samay maong a mamaltog et wala la’d toktok na bilding. Akakebkeb la’d karikaan iray arum a sundalo, ya akapatuyong laray paltog da. Diad saman a kabuasan na Simba, siak tan saray kaibak a misionaryo so nanggunaet a mansiansian kalmado legan ya aapuraen mi’ makalugan ed samay manaalagar a helikopter. Kabekta, wala kami la’d tagey. Insan kayari samploran minuto, maligen kami lan akalugan ed sakey a barko na saray sundalo, a tampol a binmuat manlapud baybay.

DIAD kaimbuasan, akabatan mi a binomba na saray rebelde imay nanamotan min hotel ed samay labin sakey. Say pigay taon lan panggugulo ed Sierra Leone so nansumpal ed malaknab a guerra. Amin iray dayo, pati sikami, so apaskar ya ontaynan a tampol ed bansa. Pian nipaliwawak no akin a nidunget ak ed ontan a situasyon, iyistoryak pa’d sikayo so manlapud gapo.

Binmaleg ak ed British Guiana, a kabkabat bilang Guyana manlapu la nen 1966. Say impanugaw ko diman nen dekaday 1950 so andiay-problema tan malikeliket. Importantin maong so edukasyon parad saray atateng, tan iilaloan iray kalangweran a nawalaan na atagey iran grado ed eskuelaan. Nanonotan ko imay sakey ya empleyado ed bangko ya oniay aminsan ya intepet to ed si tatay ko, “Akin et panggagastosan mon maong so paneeskuela na ananak mo?” Onia so inyebat nen Tatay, “Say sankaabigan ya edukasyon labat so mangipaseguro ed iyasenso ra.” Diad saman a panaon et inisip ton say sankaabigan ya edukasyon so nepeg a gamoran diad saray bantog ya eskuelaan. Balet, agmanbayag et manguman itan a panmoria to.

 Nen 11-años ak, si Nanay ko so impaiyaralan na Biblia ed saray Tasi nen Jehova. Sikato so binmisita ed Kingdom Hall, a kaiba so sakey a kaabay mi. Say nadngel da ed saman a labi so angombinse ed sikaran dua a nalmo da lay katuaan. Insan imbaga nen nanay ko ed sakey nin kaabay mi so nipaakar ed samay nadngel to. Ag-abayag et sikara lan talo so iyaaralan na Biblia na saray misionaryo a di Daphne Harry (diad saginonor et Baird) tan Rose Cuffie. Agni asabi so sakey taon, si Nanay tan saramay duaran kakaaro to so nampabautismo la. Limay taon kayari na saman, inmekal si tatay ko ed relihyon to a Sabatista, tan abautismoan bilang sakey a Tasi nen Jehova.

Sanen ugugaw kami ni, nanliketan ko tan say duaran yugtan kon bibii​—bilang papanguloan ed samploran sanaagi​—so mabetbet ya iyaakar mi ed ayaman na saray misionaryo a di Daphne tan Rose. Diad saratan a pankanawnawa, dinmengel kami ed saray eksperiensya ra ed panagpulong. Napatnagan ed sarayan misionaryo so liket da ed makulikulin impangasikaso ra ed espiritual a pankaabigan na arum. Say ehemplo ra so anagyat ed siak pian pilaleken so manmisionaryo.

Anto balet so akatulong ed siak pian niyapasakey koy nonot ko ed sigpot-panaon a ministeryo anggaman say pinonot na amin a kakanayon ko tan kaeskuelak et say italona ed karera da? Dakel iray makapaayat a pankanawnawa​—sarag koy manaral na abogasya, musika, medisina, odino arum ni. Balet, say maabig ya ehemplo na saray ateng ko so angiter ed siak na nakaukolan a panangigiya. Inyaplika ra ed bilay da so katuaan, maseet iran nanaral na Biblia, tan inusar da so biskeg tan panaon da pian tulongan so arum a makaaral nipaakar ed si Jehova. * Niarum ni, mabetbet dan iimbitaan iray sigpot-panaon a ministro diad abung mi. Say inkaliket tan inkapnek na sarayan agagi so amabiskeg ed pilalek kon iyuna ed bilay ko so panaggaway-babangatan a kimey.

Abautismoan ak sanen 15-años ko. Kapangraduar ko ed haiskul, linmoob ak la ed sigpot-panaon a panagministeryo bilang payunir. Si Philomena, a mantratrabaho ed ospital, so sankaunaan ya atulongan kon mangidedika ed bilay to tan nampabautismo. Makakaliket ak a makanengneng ed sikato ya aaroen to si Jehova, a lalon amabiskeg ed pilalek kon mantultuloy ed sigpot-panaon a ministeryo. Ag-abayag kayari na satan, naopresian ak na mas marakep a trabaho diad gobierno, a pantratrabahoan ko bilang sekretarya. Agko itan inawat, tan mas pinilik so mantultuloy a payunir.

Manaayam ak nin siansia ed abung mi, tan saray misionaryo so naynay ya ombibisita ed sikami. Nanliketan kon maong so dinmengel ed saray eksperiensya ra! Amin iratan so amabiskeg ed pilalek kon magmaliw a misionaryo, anggano singa imposible itan. Diad saman a panaon tan anggad natan et nibabaki iray misionaryo ed Guyana. Sakey ya agew nen 1969, siak so asurprisa  ed impakaawat ko na imbitasyon a manaral ed Watchtower Bible School of Gilead diad Brooklyn, New York.

Nibaki ak ed Teritoryan Agko Inilaloan

Walay 54 ya estudyante a nanlapud 21 a bansa diad koma-48 a klase na Gilead. Labinpito kamin mamarikit. Anggano 37 taon lay apalabas, siansia nin malinlinew ed kanonotan ko iman a limay bulan. Dakdakel so naaralan mi​—aliwa labat a nipaakar ed katuaan ed Biblia, noagta ontan met ed makanakana iran suhestion tan simbawa parad bilay na saray magmaliw a misionaryo. Singa bilang, naaralan ko so ontumbok ed panangidirehi, magmaliw ya asimbang nipaakar ed saray uson panangawes tan panag-ayos, tan say pantultuloy anggaman mairap iray kipapasen.

Naynay ya impurek na saray ateng ko so regular a pipiaral. Siopaman a mansakit-sakitan pian agmakapiaral ed Simba so agmet makapambantay ed pantogtog na piano odino konsierto diad ontumbok a labi. Balet, walay panaon legan na panaaral ko ed Gilead ya agko inatendian iray miting. Aminsan a labi Biernes, sinalik so manbaraan ed si Don tan Dolores Adams, a sanasawan Bethelite a piluluganan kon onla’d miting. Imbagak ya agaylay karakel na asainmin tan report mi! Kanian panon ko nin naatendian so Teokratikon Eskuelaan Parad Ministeryo tan Pantitipon Parad Panagserbi? Kayari impanimbawa nen Brother Adams ed siak, inkuan to: “Paigiya ka ed konsiensiam.” Inawat ko so simbawa to tan akiaral ak ed saman a labi tan diad saray tinmumbok nin aral. Diad dakel lan taon, likud labat ed sankairapan a kipapasen, agko inabuloyan so antokaman a bengatla a mangamper ed iyatendik ed Makristiano iran pantitipon.

Nen mamegpegley lay kurso mi, pantotongtongan mi la no iner so pangibakian ed sikami. Naynay kon sankanonot a nibaki ak ed Guyana, a ditan et kakkaukolan so tulong ed panagpulong a kimey. Isipen pa labat so impakabiglak sanen naamtaan kon agak la diman ompawil. Imbes, siak so nibaki ed Sierra Leone, diad Sagur ya Aprika. Misalsalamat ak ed si Jehova lapud agamoran kon siansia so pilalek kon manmisionaryo ed arawi’d ayaman mi!

Dakel so Nepeg nin Aralen

“Marakerakep!” Onia so matukotukoy a pangideskribek ed Sierra Leone nen kasabik ditan lapud dakel iray pukdol tan palpalandey tan saray dayat. Ingen, say peteg a mamaparakep ed sayan bansa ed Sagur ya Aprika et saray manaayam ditan, a say panangaro tan panangasi ra so mangipapalikna ed saray sankaili ya aabrasaen ira. Baleg a tulong iya pian natalonaan na saray balon misionaryo so pakakailiw da. Labalabay na saray taga-Sierra Leone a pantongtongan so nipaakar ed saray kustombre tan kultura ra tan nagkalautlan labalabay dan tulongan iray sankaili pian nakabisado so Krio, say lenguahe na satan a bansa.

Dakel iray malinew a diparan na saray totoon mansasalitay Krio. Singa bilang, samay panangibaga ran, “Bakes so mantanem, gorilya so mangan,” et mankabaliksan ya aliwan naynay a say angitanem so minanabang ed nansagpotan to. Saya so matukotukoy a maneskribe ed ag-inkahustisya a kasmak ed mundo!​—Isaias 65:22.

Makapaliket so kimey a panagpulong tan panaggaway-babangatan. Matalag so pakaromog ed toon ag-interesado ed Biblia. Diad inlabas na taotaon, saray misionaryo tan abayag laran lingkor nen Jehova so tinmulong ed saray totoo​—malangwer  tan matatken​—pian naawat da so katuaan, antokaman so kipapasen na panagbilay tan tribun nanlapuan da.

Si Erla St. Hill, a sankaunaan a kaibak a misionaryo, so makulikuli. Say inkaseet ton mankimey ed ayaman mi ran misionaryo so onkokomadua labat ed inkaseseg to ed ministeryo. Tinulongan to ak a natalosan so kaimportantian na dakel a pamaakaran, singa say pikabkabat ed saray kakaabay, ibisita ed saray mansasakit ya agagi tan interesado, tan say iyakar ed lamay odino ponpon na inaatey no posible. Impurek to met ed siak so kaimportantian na isamar tan pangomustan magano ed saray agagin manaayam ed teritoryan nampulongan mi antis kamin onsempet. Diad impanggawa ed saraya, tampol ya awalaan ak na kainaan, agagin lalaki tan bibii, tan kakaaro, tan nagmaliw a pinagka-ayaman ko so teritoryan angibakian ed siak.​—Marcos 10:29, 30.

Pinaelet ko met so pikakaarok ed saray maomaong a misionaryon kakaibak. Kabiangan ed sikara imay akaibak ed kuarto a si Adna Byrd, a nanmisionaryo ed Sierra Leone ed baetan na 1978 tan 1981, tan si Cheryl Ferguson, a kakuartoan ko ed masulok lan 24 taon.

Say Guerra-Sibil tan Arum Niran Subok

Nen 1997, manga sakey bulan kayari na impangidedika ed saray balon pasilidad na sanga diad Sierra Leone, apaskar kamin ontaynan ed bansa lapud guerra, a singa asalambit ed gapo na sayan artikulo. Anem taon antis na satan, apaseseg kami ed pananisian impatnag na saray Tasi a taga-Liberia a binmatik ed Sierra Leone pian natakasan so guerra ed Liberia. Say arum so sinmabin kalimalima. Anggaman mairap so situasyon, inagew-agew iran akibiang ed ministeryo. Talagan makapatenyeg-liknaan so pakanengneng ed panangaro ra ed si Jehova tan ed totoo.

Natan ta sikamin mismo so takas ed bansan Guinea lapud guerra, inalig mi so ehemplo na saray agagin taga-Liberia tan nantultuloy kamin nanmatalek ed si Jehova tan inyuna mi so intereses na Panarian. Sakey taon ed saginonor, akapawil kami ed Sierra Leone, balet kalabas na pitoy bulan, tinmerak lamet so guerra kanian kaukolan mi so man-ibakwit lamet ed Guinea.

Ag-abayag, nipaamta ed sikami a samay sakey ed saray manlalaban a grupo so nanayam ed ayaman mi ran misionaryo diad Kissy tan tinatakew tan dinederal da so amin a kaykayarian mi. Imbes a panermenan mi itan, misalsalamat kami ta mabilay kami ni. Dagdaiset labat lay atilak a kaykayarian mi, balet atalonaan mi iman a mairap a kipapasen.

 Kayari na mikaduan impan-ibakwit mi, siak tan say kakuartoan kon si Cheryl so nansiansia ed Guinea. Kabaliksan na saya a kaukolan min aralen so lenguahen Pranses. Arum ed saray kaibak a misionaryo so tampol a manguusar ed saray naaral da, ya agda pakakadismayaan iray lingo ra. Diad biang ko balet, agko labay so nalingo kanian mansalita ak labat na Pranses no talagan kapilitan. Balet lalon makapadismaya iman. Kinaukolan kon naynay a panonotan so inkasiak no akin a wadman ak ed Guinea​—salanti, pian tulongan so arum a nakabat si Jehova.

Kalkalna et inmaligwas ak lapud impanaral ko, indengel ko ed saray maong a mansalita na saman a lenguahe, tan diad inkerew ko na tulong ed saray ugugaw ed kongregasyon, a prangkan mansalita. Insan, walaray ag-inilaloan a nipanpanaon a tulong manlapud organisasyon nen Jehova. Nanlapu la nen Setyembre 2001, say Ministeryo Tayo ed Panarian so angitarya na saray suhestion ed panangipresenta na saray magasin bilang kaaruman ed saray paraan na panangiyopresi na saray libro tan brosyur ed saray totoon nandurumay relihyon da. Mas matalek ak natan a manpulong anggano agak ni marlas a mansalita a singa ed dilin lenguahek.

Lapud nanlapu ak ed baleg a pamilya, mainomay parad siak so makapiamong ed dakel a totoo, a walay panaon ya anggad 17 kami ed ayaman na misionaryo. Legan na 37 taon ko ed panmimisionaryo, masulok a 100 ya arum nin misionaryo so akaamong ko. Talagan pribilehyo so pakapikabat ed dakel a totoo, a nandurumaan so personalidad da, balet ta walaan na saksakey a gagala! Tan agaylan liket so pagmaliw a kakimeyan na Dios tan say pakanengneng ed saray totoo a mangaawat ed katuaan na Biblia!​—1 Corinto 3:9.

Diad inlabas na saray taon, dakel iran importantin ebento ed bilay na kapamilyaan ko so agko naatendian, singa say impankasal na maslak ed saray yugtan kon lalaki tan bibii. Tan agko met napinenengnengan iray kakaanakan ko anggaman naynay kon pipirawaten itan. Tuan sakripisyo itan parad siak tan diad pamilyak, a mabulbulos ya amaseseg ed siak a mansiansia ed panagmisionaryo.

Ingen, antokaman iray asaew ko diad abung mi, saratan so apanggayagaan ko diad impanlingkor ko bilang misionaryo. Anggano mas nilabay koy mansiansian marikit, dakel so ananak ko ed espiritual, ya aliwa labat a saramay inyaralan ko na Biblia noagta ontan met ed saramay nagmaliw a kaarok. Niarum ni, anengneng ko iray anak da a binmaleg, angasawa, tan akiasawa tan impabangon da ed dilin ananak da so katuaan. Diad arum ed sikara, a singa siak, say panaggaway-babangatan so manunan angimpluensya met ed bilay da.

[Paimano ed leksab]

[Saray mapa ed pahina 15]

(Parad aktual a format, nengnengen so publikasyon)

Nibaki ak ed Sierra Leone, diad Sagur ya Aprika

GUINEA

SIERRA LEONE

[Litrato ed pahina 13]

Say duaran yugtan kon bibii, a kaibak a mabetbet ya akilimog ed saray misionaryo nen dekaday 1950

[Litrato ed pahina 14]

Kaibak iray kaparak ya estudyante ed koma-48 a klase na Gilead

[Litrato ed pahina 16]

Say impangidedika ed saray pasilidad na sanga diad Sierra Leone