Kasin Nanonotan Yo?

Agunggonaan kayo kasi ed impanbasa ed agano niran paway na Say Panag-Bantayan? Salien yo pan ebatan so onggendan a tepetepet:

• Anto so naaralan tayo ed ilustrasyon nen Jesus nipaakar ed mapilit a managsankaili? (Lucas 11:5-10)

Ipapabitar na sayan ilustrasyon no anto so nepeg ya awawey tayo sano manpipikasi. Nepeg a sikatayoy ag-ontutunda, odino mantultuloy ya onkerew, nagkalalo la ed masanton espiritu na Dios. (Lucas 11:11-13)​—12/15, pahina 20-2.

• Anto so leksion a naaralan tayo ed ilustrasyon nen Jesus nipaakar ed say balo tan say ukom? (Lucas 18:1-8)

Idadanet na satan a nakaukolan tayoy manpikasi. Aliwan singa samay ukom, si Jehova so matunong tan labay to itayon tulongan. Niarum ni, kaukolan a nawalaan itayoy pananisia a singa ed samay balo diad ilustrasyon.​—12/15, pahina 26-8.

• Akin a binilin nen apostol Pablo iray Kristiano ed Corinto ya “onnatnat” ira? (2 Corinto 6:11-13, NW)

Ompatnag ya arum ed sikara so andian na apresasyon ed saray kapananisiaan da, ya apegetan tan aliwan lukas so puso ra. Kaukolan itayon mansagpot pian bayuboan so masimoon ya apresasyon ed saray kapananisiaan tayo, a manggunaet tayo ni ingen a makapikaaro ed arum nin agagi.​—1/1, pahina 9-11.

• Anton panagtatak so atukoy diad Apocalipsis 7:3?

Sanen nilanaan na Dios iray Kristiano panamegley na masanton espiritu, sikaray atatakan ya inmuna. Balet say tutukoyen na Apocalipsis 7:3 et say kaunoran a panagtatak, sanen apekderan a sigpot a nanmatoor iratan ya alanaan.​—1/1, pahina 30-1.

• Anto so naaralan na atateng manlapud salaysay na Biblia nipaakar ed si Samuel?

Manuna ed amin, kaukolan dan ibangat ed ananak da so salitay Dios, a singa met ed saray ateng nen Samuel a seguradon angibangat ed sikato. Sakey ni, nepeg dan pasesegen so ananak da a gawaen dan manunaan ed bilay da so panaglingkor ed si Jehova.​—1/15, pahina 16.

• Panon tayon nipatnag a maliket itayon manaalagar ed si Jehova?

Sikatayo so ‘manaalagar ed agew nen Jehova,’ a tatalaranan tayo so pakainawaan sano deralen to la iray maruksan totoo. (2 Pedro 3:7, 12) Pirawrawat la nen Jehova a panampoten so amin a kaugsan, balet ta pupugeran to ni so inkasikato pian nisalba to iray Kristiano ed paraan a nigloria so ngaran to. Kaukolan itayon manmatalek ya amta nen Jehova so dugan panaon na ikiwas to, tan nepeg tayon tekepan itan na aktibon panangidayew ed sikato. (Salmo 71:14, 15)​—3/1, pahina 17-18.

• Pigara ed kada malinis ya ayep so inloob nen Noe ed biong, kasin sampipito odino sampipito a paris?

Niganggan si Noe a “mangala . . . na sampipito” ed kada malinis ya ayep. (Genesis 7:1, 2) Diad Hebreo, say balikas a “sampipito” et literal a nabasan “pitora pitora.” Say ontan a panangibaga et agmankabaliksan na pitoran paris, unong a nipabitar ed arum a teksto na Biblia. Mapatnag a si Noe so angala na pitora ed kada malinis ya ayep, salanti, taloran paris tan sakey nin kaaruman pian walay usaren to ed pangibagat diad saginonor. (Genesis 8:20)​—3/15, pahina 31.

• Akin a nepeg a “motekteken” na saray Kristiano so epekto na pananisia na saray mamatatken, odino saray manangidaulo?

Papasesegen itayo nen apostol Pablo a “motekteken,” odino maalwar ya imanoen, so epekto na maabig a kondukta na saray mamatatken tan aligen tayo so pananisia ra. (Hebreos 13:7) Gawaen tayo itan lapud ontan so igaganggan ed sikatayo na Salitay Dios. Ontan met, kombinsido itayo a nononoten na saray mamatatken so intereses na Panarian, pati say pankaabigan tayo.​—4/1, pahina 28.