Pukol​—Balet Magunaet a Manlingkor

SANO primero yon nanengneng si Leonardo, ompano isipen yon sikatoy aliwan sakey a komikimey ed konstruksion. Apukol so duaran lima to diad impakaaksidente to ed datin trabaho to. Anggano ontan to balet, impasya so panagkimey nen Leonardo diad sakey a proyekton ipapaalagey ed Acajutla, El Salvador, a singa nanengneng yo ed litrato.

Ta pian makapibiang ed satan ya ipapaalagey a proyekto, si Leonardo so nampagawa na dili to ran kagawaan a denesinyo to. Singa bilang, diad sakey a putan na pala et sikatoy nampagawa na suroban na kawanan a taklay to ta pian sarasarag ton suklaren iray dutak tan ikarga ed sakey a karamatilya. Lapud ta anggapoy lima to a pambenben to, sikatoy nampagawa met na malimpek a metal ed putan na karamatilya a pangisuroban toy lima to ta pian nitulak to itan. Antoy amakiwas ed sikaton mibiang ed onian proyekto?

Labay nen Leonardo so makapibiang ed panagpaalagey na Kingdom Hall, odino pasen a panagdayewan na saray Tasi nen Jehova. Dakel komon so rason to pian agla mitulongan ed konstruksion. Sikatoy sigpot-panaon ed trabaho to, pukol so lima to, tan manlilingkor ni bilang ministeryal a lingkor ed kongregasyon to. Balet, labay to met a gawaen no antoy nayarian to ta pian napanlingkoran so Dios diad kimey a panagpaalagey.

Kasin ontan met so inkagunaet mon manlingkor ed Dios? Imbes ya ibaraan la nen Leonardo so inkapukol to, inusar to so abilidad ton mannonot pian mandesinyo na dili ton kagawaan ta pian nagawaan to so kimey ya agto komon nayarian. Panlilingkoran to so Dios ed ‘interon kanonotan to.’ (Mateo 22:37, MB) Pukol man odino andi, saramay mibibiang ed panagpaalagey na saray Kingdom Hall na saray Tasi nen Jehova ed interon mundo so walaan na seseg a manboluntaryo. Naabrasa kayo ed saray pantitipon da a lukas parad amin.