Sakey ya Uma ya ‘Amputi la Parad Panagani’
Sakey ya Uma ya ‘Amputi la Parad Panagani’
Diad mamaamianen a ketegan na Abalaten Amerika, wadtan so Guajira Peninsula. Wala itan ed amianen na Columbia tan amianen-sagur na Venezuela. Say pakakairapan labat ed sayan medyo desierton lugar et ampetapetang so agew tan mataltalag so uran, a say temperatura et onaabot ed 43 degrees Celcius. Anggaman ontan, saray totoo dia so makimey tan saray daralusan da so mabunga. Lapud tuloy-tuloy a mapalnan siplog na dagem manlapud dayat tan apasakey a direksion na dagem manlapud amianen-bukig, naaanosan na totoo so manayam dia, tan panliliketan na saray bisita iray makapasagyat a kaliberliber tan mararakep a baybay.
SAYA so lugar na saray Wayuu Indian, a ngalngalin 305,000 so populasyon da, tan 135,000 ed sikara so manaayam ed Colombia. Sayan tribu so abaybayag lan wadtan antis a nanayam ditan iray Kastila.
Say manunan anapan na saray Wayuu et panagkomponi na ayayep tan panagdalus. Wala met iray managsigay tan minenegosyo ed kabangibang iran bansa. Saray bibii et marundunong a man-inaramey na makolor iran abel, tan saray produkto ra so labalabay a saliwen na saray turista.
Saray Wayuu so kabkabat ed inkasimoon tan inkamaparawes da. Balet ta manbibilay met ira ed “saray panaon a maatap.” (2 Timoteo 3:1) Kairapay-bilay so sakey ed saray manunan problema ra, a pansesengegan itan na arum niran problema, a singa say agpakabasa tan agpakasulat, pakakaerasan na ugugaw, kakulangan na patambalan, tan diad arum a pasen et saray delinkuentin kalangweran.
Saray relihyon na Kakristianoan so pigapigay taon lan mangibabaki na saray misionaryo ed limog na saray Wayuu. Bilang resulta, karaklan ed saray eskuelaan a pangipapasalan ed saray managbangat tan saray dormitoryon eskuelaan et kontrolado na relihyon. Inawat na dakel a Wayuu iray ipapasen dan kustombre na Kristiano, a singa say panagdayew ed imahen tan panagbinyag ed ugaw, balet ta agda impulisay iray sisisiaen tan ritual a nanlapu ed abangonan dan alamat tan an-anito.
Diad inkalapagan, saray Wayuu et matakot ed Dios tan interesado ed saray katuaan ed Biblia ya ibabangat na saray Tasi nen Jehova. Diad inmuuna iran taon ed dekada na 1980, wala labat so pitoran Wayuu a Tasi ed Guajira, a talora ed sikara so manaayam ed kabisera a Ríohacha. Nilikud ed saray Tasi a tubo ditan, wala so 20 nin manangipalapag a mangipupulong na maong a balita na Panarian ed Español.
Mensahe ed Dili ran Lenguahe
Agtanto makapansalita na Español so karaklan a Wayuu a manaayam ed Ríohacha, ta say talagan lenguahe ra et Wayuunaiki. Diad gapo et aliwan mabunga ditan so panangipulong ed mensahe na Panarian, lapud sarayan tribu et ambaing a miarap ed saray arijunas, say tawag da ed saray aliwan-Wayuu. Sano mankabkaabungan iray Tasi, maslak a Wayuu so mitongtong ed dili ran salita, aliwan diad Español. Kanian, onla la iray Tasi ed onsublay ya abung.
Balet nen mansamposampot so 1994, sakey a grupo na saray espisyal payunir, odino sigpot-panaon a ministro, so imbaki na sangan opisina na saray Tasi nen Jehova ed Colombia pian manlingkor diad Kongregasyon na Ríohacha. Saray payunir so nampabangat na Wayuunaiki ed sakey a Tasin Wayuu. Kayarin impatlep na saray payunir so pigaran simplin presentasyon, inusar da iratan ed teritorya ra tan naimano ran tampol so baleg ya angumanan na reaksion na saray nakakatongtong da. Anggaman agmakapansalita na diretson Wayuunaiki iray payunir, saray unabung so naliliketan tan nikekelawan, tan madengedengel ira, a no maminsan et ganado iran mitongtong ni diad daiset ya amta ran Español!
‘Amputi la Parad Panagani’
Inyaliling nen apostol Pablo so kimey na saray Kristiano a panaggaway-babangatan dia ed panagdalus, kanian mainomay itan a natalosan na saray Wayuu lapud ontan so maslak ya anapan da. (1 Corinto 3:5-9) Diad piguratibon pantalos, say uma na Wayuu et ‘amputi-puti la parad panagani.’—Juan 4:35.
Si Neil, a sakey a Wayuu Indian a manaayam ed Manaure, so nianak a walaay deperensya. Tetetelen nen Neil so Dios kanian sikatoy maer-ermen tan sinali to ni ingen so manbikkel. Wala so sakey a Tasi a makakakar ed nanduruman baley lapud trabaho to. Legan na saman et inanamot toy pankanawnawan manpulong ed kabkaabungan, tan akatongtong to si Neil nipaakar ed Panarian nen Jehova. Si Neil et 14 años labat. Lapud atebek na saman a Tasi ya interesadoy Neil, sikatoy inyaralan to na Biblia. Malikeliket si Neil sanen naaralan to a maaron Dios si Jehova, tan amoria to ya aliwan say Dios so mamapairap ed sikato. Atenyeg a maong so liknaan to sanen abasa to so sipan na Dios a mangaraldalin a paraiso, a ditan et anggapo lay sakit!—Isaias 33:24; Mateo 6:9, 10.
Kaleganan na saman, say pamilya di Neil so akapiirangan ed arum a pamilya. Pian naseguro a naprotektaan so pamilya ra, saray kakanayon nen Neil so nanggawa na pigaran ritual na tribu ra. Oniay nanonotan nen Neil: “Diad gapo et natatakot kon itongtong ed pamilyak so balon pananisiak, nagkalalo la ed saray respetadon mamasiken ed pamilya mi.” Sinmanok iray ateng nen Neil sanen naamtaan da ya agto la awaten iray sisiaen a sumlang ed Biblia nisay mangagamil na saray kustombren nipaakar ed espiritismo. Diad saginonor et nanayam si Neil diad Ríohacha tan ginmapon akilimog ed kongregasyon diman. Diad kaunoran et sikatoy abautismoan. Nen 1993 et sikatoy aturon ministeryal a lingkor, tan kayari na taloy taon et nagmaliw a regular payunir. Insan nen 1997, sikatoy aturo bilang matatken ed kongregasyon. Nen taon 2000, pinalaknab toy ministeryo, tan nagmaliw ya espisyal payunir.
Imanoen pa met so eksperiensya nen Teresa, a sakey a Wayuu ya impaiyaralan na Biblia ed saray Tasi nen Jehova. Sikatoy babalawen na lakin kaamong to a si Daniel, a sikato ni ingen so kakabilen to, pati say taloran ananak da. Anggaman diad saginonor et inmabobon si Daniel a manaral na Biblia a kaiba nen Teresa, sikatoy mabetbet a miiinuman ed saray kabarkada to, a no maminsan et anggad apatira odino limaran agew. Inmirap so bilay na pamilya ra lapud satan. Ingen, si Teresa so matoor a nantultuloy ed panaaral toy Biblia tan ed iyaatendi to ed Makristiano iran pantitipon. Lapud saya et atebek nen Daniel so kaimportantian na panagaral na Biblia. Balet, sakey ed saray anak da so aksidentin aluyakan na manlelwag a lamaw kanian inatey. Maer-ermen si Teresa ed impakaandi na anak to. Nilikud ed satan et sikatoy dedesdesen na kakaaro tan kakaabay da a manggawa na agmakasulatan iran kustombre nipaakar ed panagponpon.
Diad satan a makapasubok a panaon, sikaray tinulongan tan niligliwa na saray Tasi ed asingger a kongregasyon. Kayari na ponpon, sikaray nantultuloy a dinalaw tan niligliwa na saray Tasin mansasalitay Wayuunaiki. Sanen naimano nen Daniel iyan panangipatnag na Makristianon aro, sikatoy apakiwas pian paaligwasen so espiritualidad to. Tinundaan to lay manbuanges tan agto la kakabilen si Teresa. Nankasal met la ra, tan si Daniel et nananap na trabaho pian nalegpet toy pamilya to. Inmaligwas so espiritualidad da tan abautismoan ira nen 2003. Pareho ran walaan na pigaran iyaaralan ed Biblia. Tan lapud maabig ya impantasi nen Teresa ed pamilya to, saray kakanayon to natan so ondengel la sano ondalaw iray Tasi. Say sakey a lakin kaanakan nen Daniel et agbautismado lan manangipalapag, tan duaran bibiin kaanakan to so papaiyaralan la ed Biblia tan onaatendi la ed saray pantitipon na kongregasyon. Say ayro nen Teresa, ya inateyan met na anak a laki lapud aksidente, tan say pamilya to so mangipapatnag met la na interes ed panagaral na Biblia.
Espiritual a Tagano ed Wayuunaiki
Nen 1998 et nipaway ed lenguahen Wayuunaiki so bokletan Enjoy Life on Earth Forever! * Mausausar iyan bokleta diad panagtanem na bukel na katuaan ed lawak na Wayuu tan diad panangiyaral ed Biblia. Nen 2003 et walaray impasal ya agagi pian mangipatalos na saray publikasyon na saray Tasi nen Jehova ed Wayuunaiki. Lapud impansagpot na sayan grupo na saray managpatalos a walad Ríohacha, wala niray arum a brosyur a nipatalos, ya akatulong ed inyaligwas ed espiritual na saray babangatan a mansasalitay Wayuunaiki.
Manlapu la nen 2001, arum a parte ed programa na distriton kombension so nipapatalos la ed Wayuunaiki. Saray iyaaralan ed Biblia so apaseseg ed espiritual sanen nadngel da so programa ed dilin lenguahe ra. Tatalaranan da so panaon a saray draman nibase’d Biblia so ipresenta met la ed Wayuunaiki.
Sakey a Mabunan Uma
Say Uribia et sakey a baley a walad amianen-bukig na Ríohacha, a manga 100 kilometro kaarawi. Walay 16 a manangipalapag na Panarian diad Kongregasyon na Uribia Wayuu, a maslak ed sikara et pirmin mansasagpot pian napulongan iray Indian a manaayam ed kaumaan. Oniay inkuan na sakey ed saray matatken ed kongregasyon nipaakar ed impanpulong da ditan: “Dinalaw mi iray simpok ed loob na rantso, a manga labindua so kaabungan a walaan na abebbeba iran atep tan angkekelag a bintana. Diad arapan na kada abung et walay siroman ya inatepan na yotojolo, say pinagkapukel na sengeg na kaktus. Saratan so manproprotekta ed saray pamilya tan bibisita ed ampetapetang ya agew. Malikeliket kami lapud dakel so interesadon maong, kanian inyuksoy mi so ompawil ditan pian gapoan iray panangiyaral ed Biblia. Kapawil mi, naimano mi a dakel iray agmakabasa tan agmakasulat. Imbaga ra ed sikami a wala ditan so eskuelaan ya agla uusaren lapud kinmulang so pundo. Samay mangaasikaso ed satan et inabuloyan to kamin mangusar ed sakey ed saray kuarto pian pambangatan mi ed panagbasa tan panagsulat, ontan met ed saray panangiyaral ed Biblia. Anemiran Wayuu so akaaral a manbasa tan mansulat, tan sikaray onaaligwas ed panaaral da na Biblia. Atenyeg so liknaan mi ed impatnag dan apresasyon, kanian inyarunsa mi iray pantitipon diad loob na rantso.”
Walaray Tasi ya aliwan tubo diman a nanaral na Wayuunaiki, tan pabpablien a tuloy so itutulong da. Natan et wala lay waloran kongregasyon tan duaran grupo diad Guajira Peninsula a manguusar ed sayan lenguahe.
Mapatpatnag a bebendisyonan nen Jehova irayan pansasagpot. Segurado a dakel niray nagawaan ed panangipulong ed maong a balita diad limog na saray Wayuu. Tan nailaloan ya onaligwas ni diad arapen sano magmaliw lan Kristianon babangatan iramay sinononot ed espiritual a pankaukolan da. Komon ta mangibaki ni si Jehova na dakel a ministro a mankimey ed sayan uma, ya ‘amputi la parad panagani.’—Mateo 9:37, 38.
[Paimano ed leksab]
^ par. 18 Impalapag na saray Tasi nen Jehova.
[Saray mapa ed pahina 16]
(Parad aktual a format, nengnengen so publikasyon)
VENEZUELA
COLOMBIA
LA GUAJIRA
Manaure
Ríohacha
Uribia
[Picture Credit Line ed pahina 16]
Simpok na saray Wayuu: Victor Englebert