Say Maruksan Mundo Natan

SI María, a 64-años, so manbukbukor la ed ayaman to. Sikatoy aromog ditan ya inatey, a pinepekpek tan binikkel na alambri.

Taloran pulis so binobogbog na saray sinmanok a grupo na totoo, ya inakusaan daran nan-kidnap ed duaran menor de edad. Say duaran pulis et kinalboan da na gasolina insan da ira pinoolan. Samay sakey et akatakas.

Kayari intawag ed telepono na sakey ya agnampakabat, wala so makapabiglan asukayan. Apatiran bangkay na saray bakasyonista so akotkot diad sakey a tanamanan. Sikaray pinerengan, tan binalor so kalimaan da. Unong ed awtopsiya, sikaray inkotkot a mabilay.

Sarayan maruksan panamatey et aliwan eksena ed saray maramsak tan marawal a pelikula. Amin iratan et peteg ya agawa, a diad agano ni et nagmaliw a paulon-balita diad sakey a bansa ed Latin-Amerika. Ingen, aliwa labat a ditan so pakakagawaan na inkaruksa ed mundo natan.

Saray inkaruksa so inagew-agew lan nagagawa. Saray panagbomba, iyaataki na terorista, panagpatey, panagduksa, pampapaltogan, tan panag-rape et pigara labat a klase na saray inkaruksa. Mabetbet a nipaparungtal ed media iray mabitabitar a deskripsion na inkaruksa, balet ta dakel a totoo so agla nabibigla sano nanenengneng odino narerengel da iratan.

Nayarin oniay nononoten mo: ‘Anto lay nagagawa ed mundo natan? Kasin anggapo lan balot so panangikonsidera ed liknaan na arum pati say panagrespeto ed bilay?’ Akin et oniay kipapasen na mundon pambibilayan tayo?

Imanoen pa so 69-años a si Harry a walay sakit ton kanser. Tan say asawa to so walaan met na sakit a multiple sclerosis, balet ta mabulos ya ontutulong ed sikara iray kakaabay tan kakaaro ra. “Agko la amtay gawaen mi no anggapo irayan totoo ya ontutulong ed sikami,” kuan nen Harry. Dia ed Canada a panaayaman da, ipaparungtal na sakey ya impanaral a masulok a 50 porsiento na saray managkomponi na maedad la so ontutulong ed totoon agda kanayon. Maseguro a walaray kabat yon ordinaryo labat a totoo a lawas mapangasi tan maomaong ed kapara ran too. On, nayarian na totoo so magmaliw a maabagey tan mapangasi imbes a maruksa.

No ontan, akin a walaray nagagawan inkaruksa? Antoy mamapakiwas ed totoo a magmaliw a maruksa? Manguman ni kasi iray totoon maruksa ed kapara ran too? Naandi ni kasi so inkaruksa? No ontan panon tan kapigan?

[Picture Credit Line ed pahina 3]

Tren: CORDON PRESS