Say Pirawat nen Adryana

WALAY pirawat nen Adryana, sakey ya anem-taon ya ugaw a bii a taga-Tulsa, Oklahoma, E.U.A. Mipadpara itan ed samay pilalek nen salmistan David ya angikanta na onia: “Sakey a pamaakaran so kinerew ko ed Jehova, a sikato so anapen ko: salanti pakapanayam ko komon ed abung nen Jehova, ed amin ya agew a pambilay ko, a mangamayo na karakpan nen Jehova, tan manbalita ed templo to.”​—Salmo 27:4.

Sanen anemiran bulan ni labat nen Adryana, asukayan a sikatoy walaan na neuroblastoma, sakey ya agnatambal a tumor ya ontutubo ed saray parte na nervous system. Aparalisa so duaran sali to lapud sayan graben sakit. Niremedyoan na saray doktor so sakit to panamegley na aminpigan operasyon tan sakey taon ya impan-chemotherapy.

Say tatay nen Adryana, a say relihyon to et miduma ed si asawa to tan ed si Adryana, so angontak na sakey ya ahensia tan kinerew to ed sikaran napasyar komon na anak to so sakey a bantog a pasyaran na ugugaw. Antis a niiter iman a kerew, si Adryana so ininterbio na ahensia. Imbalikas toy pisasalamat to lapud maabig a ginawa ra, balet imbaga to ed sikara a mas labay to so ombisita ed Bethel, say sentro na sankamundoan a kimey na saray Tasi nen Jehova diad New York. Sanen naamtaan to so nipaakar ed samay kerew nen tatay to, si Adryana so nampikasi ed si Jehova a sikatoy ikdan To komon na pankanawnawan makapasyar ed Bethel. Anggano diad unaan et inisip na ahensia ya aliwan maong parad ugugaw so Bethel, inmabuloy ira lanlamang ed kerew to sanen agla sinmuppiat si tatay to.

Kanian, si Adryana so inibaan nen nanay to, say atsi to, tan sakey a kaaro to, a linma’d New York pian ombisita ed Bethel ed sankaunaan a pankanawnawa. Onia so inkuan nen Adryana: “Inebatan ak nen Jehova. Amtak ya abrasaen to kami ed Bethel. Anengneng ko no panon a gagawaen iray libro, magasin, tan Biblia. Mas balibali ni iya nen say anggan dinan a pasyaran.”

Talagan si Adryana so ‘angamayo ed karakpan nen Jehova’ tan inap-apresya to so kikukurang na pinagkasentro na saray kimey na saray Tasi nen Jehova natan. Pasyar kayo met ed Bethel. Nilikud ni ed sankamundoan a hedkuarter na saray Tasi nen Jehova ed New York, wala met iray sangan opisina ed nanduruman parte na mundo.