Abuloyan Yo so Salitay Dios a Mangigiya ed Saray Kurang Yo

“Say salitam sikato so sakey a silewan ya onkana ed saray salisalik, tan sakey a liwawa ya onkana ed basbas ko.”​—SALMO 119:105.

1, 2. Akin ya agnaromog na maslak a totoo so tuan kareenan tan liket?

 WALA kasi so nanonotan yon inkagawa ya impaigiya kayo ed arum? Nayarin asingger kayo la ed laen yo balet agyo amta no iner lay likoan yo. Odino nayarin abalang kayo la tan nakaukolan yon umanen so direksion yo. Dinanman ed saratan a kipapasen, agta makabat so panumbok ed direksion na sakey a mikabisado ed satan a lugar? Sikato so makatulong pian makasabi kayo ed laen yo.

² Diad loob na nilibo lan taon, karaklan ed saray totoo so manasalin mangitonton ed kurang da, ya ag-ira papaigiya ed Dios. Lapud agda labay so paigiya ed Dios, saray ag-ayadyarin totoo so abalang la. Agdan balot naromog so dalan a mamaarap ed tuan kareenan tan liket. Akin ya agda naromog itan? Oniay imbaga nen propeta Jeremias, masulok lan 2,500 taon so apalabas: “O Jehova, amtak a say dalan na too anggapo ed sikato lanlamang; aliwa a wala ed too a manakar a mangitonton ed saray kurang to.” (Jeremias 10:23) Siopaman a manasalin mangitonton ed dilin kurang to, ya agto awaten so tulong na arum et seguradon nadismaya. On, nakaukolan a paigiya so katooan!

3. Akin a sankakualipikadoan si Jehova a Dios a mangiter na direksion ed katooan, tan anto so insipan to?

³ Si Jehova a Dios so sankakualipikadoan a mangiter ed satan a direksion. Akin? Lapud sikato lambengat so mas makatalos ed inkagawa na totoo. Tan amta to no panon a nisuawi tan abalang so katooan. Amta to met no anto so nakaukolan pian natonton da lamet so dugan dalan. Niarum ni, bilang Manamalsa et lawas amta nen Jehova no anto so sankaabigan parad sikatayo. (Isaias 48:17) Kanian, sigpot itayon makapanmatalek ed sipan to a nisulat ed Salmo 32:8: “Bilinen taka tan ibangat taka ed dalan a nepeg mo a laen: simbawaen taka a sinenengneng so matak ed sika.” Makapanseguro itayo ya itarya nen Jehova so sankaabigan a direksion. Balet panon so pangigigiya to ed sikatayo?

4, 5. Panon itayon niwanwan na salita na Dios?

⁴ Oniay impikasi na salmista ed si Jehova: “Say salitam sikato so sakey a silewan ya onkana ed saray salisalik, tan sakey a liwawa ya onkana ed basbas ko.” (Salmo 119:105) Naromog iray salita tan panonot na Dios dia ed Biblia, tan makatulong iratan pian natalonaan tayo iray babeng a nayarin naabet tayo ed dalan a pankukurangan tayo. On, sano manbasa itayo na Biblia tan paigiya itayo ed satan, personal tayon naeksperiensya so indeskribe na Isaias 30:21: “Saray layag mo makadngel ira naani na sakey a salita ed beneg mo, a kuan to, Saya so dalan, ondalan kayo ed sikato.”

⁵ Balet, imanoen pa so ipapabitar na Salmo 119:105 a duaran mansiglaotan ya usar na Salitay Dios. Unona, onkana itan bilang silew ed sali tayo. Sano nipaarap itayo ed inagew-agew iran problema, saray prinsipyo a nabasa ed Biblia so nepeg a mangigiya ed saray kundang tayo ta pian makabat iray desisyon tayo tan napaliisan tayo iray patit na sayan mundo. Komadua, saray panonot na Dios so manliwawa ed basbas tayo, a natulongan itayon mandesisyon unong ed ilalo tayon manbilay ya andi-anggaan diad paraiso ya insipan na Dios. Lapud maliwliwawa so dalanen tayo, nibiig tayo no kasin maong odino mauges iray pansumpalan na sakey a kurang. (Roma 14:21; 1 Timoteo 6:9; Apocalipsis 22:12) Imanoen tayo pan maong no panon a say salita na  Dios a nabasa ed Biblia so onkanan silewan ed sali tayo tan liwawa ed basbas tayo.

“Sakey a Silewan ya Onkana ed Saray Salisalik”

6. Diad antoran kipapasen ya onkanan silew ed sali tayo so salita na Dios?

⁶ Manggagawa itayo na saray desisyon diad agew-agew. Arum iran desisyon so nayarin agtanton ambelat, balet nayarin panapanaon a nipapaarap itayo ed kipapasen a manubok ed moralidad tayo, inkamatua tayo, odino neutral a talindeg tayo. Pian natalonaan tayo iratan a subok, nepeg a ‘saray pakalikna tayo et ipasal tayon mangibiig ed maong tan mauges.’ (Hebreos 5:14) Diad igamor tayo na suston pikakabat ed Salitay Dios tan pakawalaan na pakatalos ed saray prinsipyo na satan, nipasal tayo so konsiensia tayo pian makapanggawa itayo na saray desisyon a makapaliket ed si Jehova.​—Uliran 3:21.

7. Deskribien pa so sakey a situasyon a posiblin labayen na sakey a Kristiano so miulop ed saray agmananisian katrabahoan.

⁷ Konsideraen pa so sakey ya alimbawa. Kasin sakey kan wala la’d edad a magunaet a mamapaliket ed si Jehova? (Uliran 27:11) No ontan, nakomendaan ka. Balet isipen pa ya arum ed saray katrabahoan mo et angiyopresin mangilibre ed sika a manbantay ed sakey a pagalaw. Labalabay da kan kaiba ed trabaho tan labay da ka met a nakaulop ed panliliket da kayari na trabaho. Nayarin say pakanengneng mo ed sikara et aliwa met iran mauges, tan wala ni ingen iray maabig a prinsipyo ra. Anto so gawaen mo? Wala kasi so kapeligroan ed pangawat ed satan ya imbitasyon? Panon a makatulong ed sika so Salitay Dios pian makapanggawa ka na suston desisyon ed sayan pamaakaran?

8. Antoran Makasulatan a prinsipyo so makatulong pian makapankatunongan itayo nipaakar ed pipiulop?

⁸ Konsideraen pa so pigaran Makasulatan a prinsipyo. Say primero a nayarin nanonotan et say ibabaga na 1 Corinto 15:33: “Saray mauges a kaulop deralen da so saray maong ya ug-ugali.” Kasin say itumbok ed sayan prinsipyo et mankabaliksan a sigpot yo lan paliisan iray agmananisia? Andi so ebat na Biblia ed satan. Diad tua, impabitar a mismo nen apostol Pablo so maaron panangikonsidera ed “ami’ ganagana ed amin day totoo,” pati saray agmananisia. (1 Corinto 9:22) Say pagmaliw a Kristiano et mangilalanor ed pangipatnag na interes ed arum​—pati ed saramay agtayo kapananisiaan. (Roma 10:13-15) On, panon tayon natumbok so simbawan “manggawa itayo na maabig ed saray amin” no isian tayo so inkasikatayo manlapud totoo a nayarin mankaukolan na tulong tayo?​—Galacia 6:10.

9. Anton simbawa na Biblia so makatulong pian magmaliw itayon balanse ed pisisiglaotan tayo ed saray katrabahoan tayo?

⁹ Balet, wala so mabitar a pandumaan na pagmaliw a makaaro ed sakey a katrabahoan tan say pagmaliw a maapit a kaulop to. Onaplika dia so sananey nin Makasulatan a prinsipyo. Oniay impasakbay nen apostol Pablo ed saray Kristiano: “Agkayo nepeg a mikasakey ed saray aliwan mananisia.” (2 Corinto 6:14, Maung a Balita) Anto so kabaliksan na salitan “agkayo nepeg a mikasakey”? Sarayan salita so impatalos  na arum a bersion na Biblia ya “agka mimumuyong,” “agmo sasalien ya aligen so gagawaen da,” odino “itunda so agmanepeg a pirerelasyon.” Kapigan nibaga ya agla manepeg so pipiulop ed sakey a katrabahoan, tan magmamaliw la itan a pikakasakey ed saray agmananisia? Say Salitay Dios, say Biblia, so mangiwanwan ed kurang yo ed sayan kipapasen.

10. (a) Panon so impamili nen Jesus ed saray kaulop to? (b) Antoran tepet so makatulong ed sakey a too pian makapandesisyon na maabig nipaakar ed saray pilien ton kaulop?

¹⁰ Nodnonoten pa so ehemplo nen Jesus, a manlapu la’d impamalsa ed totoo et sikara so pinabpabli to. (Uliran 8:31) Sanen wadiad dalin, sikato so maapit ya akikaaro ed saray patumbok to. (Juan 13:1) ‘Apabli’ to ni ingen so sakey a toon maseseg ed Ganggan balet ta masuyat a magmaliw a babangatan. (Marcos 10:17-22, NW) Ingen, impabitar met nen Jesus iray limitasyon nipaakar ed panagpili na maapit iran kaulop. Sikato so ag-akikaaro ed saray totoon ag-interesadon manggawa na linawa nen Ama to. Diad sakey ya inkagawa et oniay imbaga nen Jesus: “Sikayo so kakaarok, no gawaen yo so saray bengatla ya ingganggan ko ed sikayo.” (Juan 15:14) On, nayarin makaaro ka ed sakey a katrabahoan mo, balet oniay itepet mo ed dilim: ‘Mabulos kasi iyan too a manggawa ed igaganggan nen Jesus? Labay to kasin aralen so nipaakar ed si Jehova, say ingganggan nen Jesus a dayewen tayo? Kasin saray estandarte to ed moral et mipadpara ed siak bilang Kristiano?’ (Mateo 4:10) No itotongtong mo ed saray katrabahoan mo so nipaakar ed sarayan estandarte na Biblia tan no kombinsien mo ira a mangiyaplika ed saratan, napatnagan mo iray ebat ed sarayan tepet.

11. Mangiter na pigaran situasyon a nepeg a nigiya na salitay Dios iray kurang tayo.

¹¹ Wala ni so dakel iran situasyon ya onkanan silewan ed sali tayo so salitay Dios. Alimbawa, nayarin sakey a Kristianon andiay anapan so naopresian na trabaho a kakkaukolan to. Balet, say eskedyul na trabaho et mangalay dakel ya oras tan biskeg, insan no awaten to itan et agto naatendian so pigaran Makristianon pantitipon tan agto la makapibiang ed arum niran aktibidades a misiglaotan ed tuan panagdayew. (Salmo 37:25) Say sakey nin Kristiano so nayarin natutukson manbantay na saray panligliwaan a malinew a manusumlang ed saray prinsipyo na Biblia. (Efeso 4:17-19) Nayarin say arum met et mainomay a naopendi ed ag-inkayadyari na saray  kapananisiaan. (Colosas 3:13) Diad amin na sarayan kipapasen, nepeg ya abuloyan tayo so Salitay Dios a magmaliw a silew ed salisali tayo. On, diad panumbok ed saray prinsipyo na Biblia, natalonaan tayo so antokaman a subok ed bilay. Say Salitay Dios et “maabig a pakaaralan, pakasumalan, pakasimbawaan, tan pakapanontonan a sikato so wala ed katunongan.”​—2 Timoteo 3:16.

“Sakey a Liwawa ya Onkana ed Basbas Ko”

12. Panon ya onkanan liwawa ed basbas tayo so salitay Dios?

¹² Idadanet met na Salmo 119:105 a say salita na Dios so mangiter na liwawa ed basbas tayo, a nasindagan na satan so dalanen tayo. Amta tayo so direksion tayo no nipaakar ed arapen, lapud ipapaliwawa na Biblia so kabaliksan na saray makapagonigon a kipapasen na mundo tan no anto so pansumpalan. On, namomoria tayo a manbibilay itayo la ed “saray kaunoran ya agew” na sayan mauges a sistema na bengabengatla. (2 Timoteo 3:1-5) Lapud amta tayo so nagawa ed arapen, nepeg a walaan itan na aralem ya epekto ed kabibilay tayo natan. Oniay insulat nen apostol Pedro: “Diad inengneng a saraya ya amin a bengatla naderal ira naani, anton nengneng na inkatoo so nepeg yon pagmaliwan ed amin a masantos a panagbilay tan kasimpitan, dia ed panalagar tan pampilalek yo ed isabi agew na Dios!”​—2 Pedro 3:11, 12.

13. Lapud pankaganatan na panaon tayo, panon a nepeg a naapektoan so panagnonot tan estiloy-kabibilay tayo?

¹³ Nepeg a napatnagan ed panagnonot tan estiloy-kabibilay tayo so mabiskeg a kombiksion tayo a ‘say mundo et mangangga tan saray penel to.’ (1 Juan 2:17) Say pangiyaplika ed saray totontonen ed Biblia so ontulong pian makagawa itayo na makabat iran desisyon nipaakar ed saray kalat tayo ed arapen. Alimbawa, oniay imbaga nen Jesus: “Anapen yo nin unona so panarian, tan say inkatunong to; et amin iraya a bengatla niarum ira ed sikayo.” (Mateo 6:33) Nakomendaan a maong so dakel a kalangweran natan lapud ipapatnag da so pananisia ed saray salita nen Jesus diad iloloob da ed sigpot-panaon a ministeryo! Say arum​—pati saray sankapamilyaan​—so namboluntaryon nanayam ed saray lugar a kakkaukolan iray manangipalapag na Panarian.

14. Panon a pinalaknab na sakey a Kristianon pamilya so ministeryo ra?

¹⁴ Konsideraen pa so sakey a Kristianon pamilya, a walaay apatiran membro. Taga-Estados Unidos ira tan inmalis ira ed Dominican  Republic ta pian ontulong ed sakey a kongregasyon diad sakey a baley a walaan na 50,000 a populasyon. Say kongregasyon so tugyopen na ngalngalin 130 a manangipalapag na Panarian. Ingen, diad Memoryal na impatey nen Kristo nen Abril 12, 2006 et walay 1,300 ya inmatendi! Say uma ed satan a pasen et “amputi la ran maparaan ed panagani” kanian kayari na limay bulan labat et sayan sankapamilyaan so awalaan na dagup a 30 ya iyaaralan ed Biblia. (Juan 4:35) Oniay insalaysay na ama: “Say kongregasyon so walaan na 30 ya agagi ya inmalis dia pian ontulong. Manga 20 so nanlapud Estados Unidos, bangta say arum et nanlapud Bahamas, Canada, España, Italya, tan New Zealand. Sanen sinmabi ira, sikara so magunaet ya akibiang ed ministeryo tan walaan itan na baleg ya epekto ed inkaseseg na saray agagi.”

15. Antoran bendisyon so nanggayagaan yo la diad impangiyuna yo ed intereses na Panarian?

¹⁵ Nayarin dakel so agmakayarin onalis ed arum a lugar pian makapanlingkor ira diad kawalaay babaleg a pankaukolan. Balet, saramay nasarag da, odino naiyarunsa ray kipapasen da pian bulos iran makatulong, so maseguron makaeksperiensya ed dakel a bendisyon diad pibiang da ed sayan aspekto na ministeryo. Tan anggan iner so panlingkoran yo, agyo sasaewen so liket a nalikna yo sano manlingkor kayo ed si Jehova tekep na amin a biskeg yo. No iyuna yo ed bilay so intereses na Panarian, isisipan nen Jehova ya ‘ikalbo to naani ed sikayo so bendisyon, ya anggapo naani so pasen a makasarag a mangawat ed satan.’​—Malaquias 3:10.

Gamoran so Gunggona ed Panangigiya nen Jehova

16. Panon itayon nagunggonaan no paigiya itayo ed salita na Dios?

¹⁶ Unong ed naaralan tayo, say salita nen Jehova so mangigiya ed sikatayo diad duaran mansiglaotan a paraan. Unona, onkana itan bilang silewan ed salisali tayo. Ontulong itan pian makapankurang itayo ed dugan direksion tan nigiya itayo sano manggawa itayo na saray desisyon.Tan liwawaan na satan so basbas tayo, ta pian malinew tayon nanengneng so arapen tayo. Bilang resulta, ontulong itan ed sikatayo pian natumbok tayo so insimbawa nen Pedro: “Balkesan yo so saray banel na kanonotan yo, mandangka kayo tan manilalo kayo a nagnap ed pamalangkap a nitarok ed sikayo no ompatnag si Jesu-Kristo.”​—1 Pedro 1:13.

17. Panon itayon natulongan na panagaral na Biblia pian natumbok tayo so panangidirehi na Dios?

¹⁷ Anggapo so duaruwa ya itatarya nen Jehova so panangigiya. Balet say tepet et, Kasin tutumboken yo itan? Pian natalosan yo no anton direksion so iiter nen Jehova, pampelengan yo a basaen so sakey a parte na Biblia diad kada agew. Dalepdepen yo so babasaen yo, tebeken so linawa nen Jehova ed saray pamaakaran, tan isipen so nanduruman paraan a niyaplika yo itan ed bilay yo. (1 Timoteo 4:15) Insan usaren so ‘pakayari yon mankatunongan’ sano manggawa kayo na personal iran desisyon.​—Roma 12:1, NW.

18. Sano paigiya itayo ed Salitay Dios, antoran bendisyon so nagamoran tayo?

¹⁸ No paigiya tayo ed saray prinsipyon nabasa ed Salitay Dios, saratan so manliwawa ed sikatayo tan mangiter na nakaukolan tayon panangigiya sano manggagawa itayo na saray desisyon nipaakar ed manepeg a pankurangan tayo. Makapanmatalek itayo a saray nisulat a salita nen Jehova et “gawaen to a makalakal so andi-amta.” (Salmo 19:7) Sano paigiya itayo ed Biblia, nawalaan itayo na malinis a konsiensia tan inkapnek lapud amta tayon napapaliket tayo si Jehova. (1 Timoteo 1:18, 19) No abuloyan tayo so salita na Dios a mangigiya ed saray kurang tayo ed kada agew, tumangan itayo nen Jehova na bilay ya andi-anggaan.​—Juan 17:3.

Kasin Natandaan Yo?

• Akin ya importantin abuloyan si Jehova a Dios a mangigiya ed saray kurang tayo?

• Diad anton paraan ya onkanan silewan ed sali tayo so salita na Dios?

• Panon ya onkanan liwawa ed basbas tayo so salita na Dios?

• Panon itayon natulongan na panagaral na Biblia pian natumbok tayo so panangidirehi na Dios?

[Tepetepet Parad Panagaral]

[Litrato ed pahina 15]

Kapigan nibaga ya agla makabat so pipiulop ed sakey ya agmananisia?

[Litrato ed pahina 16]

Saray maapit a kaulop nen Jesus et saramay manggagawa na linawa nen Jehova

[Saray litrato ed pahina 17]

Kasin napatnagan ed estilo na kabibilay tayo ya iyuuna tayo so intereses na Panarian?