Mas Importante ni nen say Panangipasakbay ed Tiempo

AMIN lawarin bansa et walaay diparan nipaakar ed tiempo. Alimbawa, oniay diparan na saray managlayag: Ambalangan tawen ed labi, balibali. Ambalangan tawen ed kabuasan, pakapagaan. Ipapaliwawa na saray sientista natan a say sengegan na kolor na tawen no mansirunget tan no kabuasan et saray mimila’d dagem a singara dabok tan nayari met a say pagmaliwan na tiempo et singa ed say ibabaga na diparan.

Nen panaon nen Jesus, ugali met na saray totoo ya obserbaan so katawenan tan ikdan na kabaliksan so kolor na satan. Oniay inkuan nen Jesus ed pigaran Judio: “No ngarem, kuan yo, Maong naani panaon: ta say tawen ambalanga. Tan no kabuasan, Mauges so panaon natan: ta say tawen ambalanga tan malurem. Amta yo ya ibiig so nengneng na tawen; bangbalet . . .” Bangbalet anto? Oniay mabitar ya insuldong nen Jesus: “Agyo nayari[a]n [ya] ibiig iray tanda na saray panaon.”​—Mateo 16:2, 3.

Anto irayan “tanda na saray panaon”? Saraya iramay dakerakel tan mabitabitar a pakapatnagan a si Jesus so peteg a Mesias ya imbaki na Dios. Saray ginagawa to et mabitabitar a singa say ambalbalangan tawen. Balet imbaliwala na maslak a Judio iray tandan mamapaneknek a say Mesias et sinmabi la, anta seguradon mas importante iya nen say tiempo.

Natan met et walay tanda a mas manepeg a talosan so kabaliksan to nen say kolor na tawen. Impasakbay nen Jesus a sayan alay uges a mundo et mangangga tan nasalatan na magmaong a mundo. Sikatoy analambit na piga-pigaran tanda a pakapatnagan ya asingger la iyan nagawa. Kaiba ed saratan so sankamundoan a guerra tan say eras. Imbaga nen Jesus a sano nagagawa la iraya et asingger lay pibali na Dios.​—Mateo 24:3-21.

Nanenengneng mo kasi ‘iray tanda na panaon’?