Tepetepet na Saray Manbabasa

Kapigan anampot so panagtawag ed saray Kristiano parad mangatatawen ya ilalo?

Anggapoy eksakton ebat na Biblia ed satan a tepet. Balet amta tayo a say panaglana ed saray babangatan nen Jesus parad mangatatawen ya ilalo et ginmapo nen 33 C.E. (Gawa 2:1-4) Amta tayo met a kayari impatey na saray apostol, bansag a ‘tinmubo’ iray “trigo,” salanti, saray peteg ya alanaan a Kristiano, tan saray “sisanyas,” saray peken Kristiano. (Mateo 13:24-30) Insan, diad pansamposampot na siglo na 1800, nagmaliw lamet a mabitabitar so inkaaktibo na alanaan iran Kristiano. Nen 1919 ginapoan a ginapas iray “aanien na dalin,” a kaiba ed satan so katitipon na saray unor laran kabiangan ed saray alanaan.​—Apocalipsis 14:15, 16.

Manlapud pansamposampot na siglo na 1800 anggad 1931, say akasentroan na panagpulong a kimey et say panagtipon ed saray nakekeraan a kabiangan na laman nen Kristo. Nen 1931, inawat na saray Estudyante na Biblia so imbase ed Biblia a pananawag ed sikara, saray Tasi nen Jehova. Tan diad samay Nobyembre 15, 1933, ya isyu na The Watchtower et inisip dan sayan nikadkaduman ngaran imay “denario” ya atukoy ed parabolo nen Jesus a nabasa ed Mateo 20:1-16. Abaloan dan samay 12 oras ya asalambit ed parabolo et mipetekan ed samay 12 taon manlapud 1919 anggad 1931. Pigay taon a sinisia a say panagtawag parad Panarian na tawen et anampot la nen 1931 tan saramay atawag a mitawir ed Kristo nen 1930 tan 1931 et sikara la iramay “unor.” (Mateo 20:6-8) Balet, nen 1966, walay nipresentan balon pakatalos ed satan a parabolo, tan nipalinew ya anggapoy koneksion na satan ed panampot na panawag na saray alanaan.

Nen 1935 et atalosan a say manibukel ed samay “baleg ya ulop” ya asalambit ed Apocalipsis 7:9-15 et saray “arum a karnero,” saramay Kristiano a diad dalin so ilalo ra, a natipon ed “saray kaunoran ya agew” tan bilang grupo et makaliktar ed Armagedon. (Juan 10:16; 2 Timoteo 3:1; Apocalipsis 21:3, 4) Kayari na satan a taon, niyapasakey so kimey a panaggaway babangatan ed panagtipon na baleg ya ulop. Kanian nen 1966, nagkalautlan sinisia a nen 1935 et tinmunda lay panagtawag parad tawen. Ompatnag a singa ontan lapud nen 1935  et amin lawarin nababautismoan et anisian diad dalin so ilalo ra. Manlapu la’d satan, siopaman a natawag parad mangatatawen ya ilalo et papanisiaan a kasalat na saramay alanaan a Kristianon agnansiansian matoor.

No walay alanaan a kinmasipa ed katuaan tan agnambabawi et seguradon manawag si Jehova na onsalat ed sikato. (Roma 11:17-22) Balet, maseguron aliwan dakel so agnansiansian matoor diad saramay peteg ya alanaan. Diad biek a dapag, diad inlalabas na saray panaon et walaray Kristianon abautismoan nen 1935 a tinasian na masanton espiritu a diad tawen so ilalo ra. (Roma 8:16, 17) Kanian, agtayo sirin makapangigeter na espisipikon petsa no kapigan kasi anampot so panatawag ed saray Kristiano parad mangatatawen ya ilalo.

Natan, panon tayon ipasen so sakey a toon talagan kombensido a sikatoy sakey la natan ya alanaan tan ginmapon mangan tan oninum na saray emblema ed Memoryal? Sikatoy agtayo nepeg a huhusgaan. Satan a pamaakaran et dia la’d baetan to tan si Jehova. (Roma 14:12) Balet, saray peteg ya alanaan a Kristiano et agmanaanap na espisyal ya atension. Agda papanisiaan a lapud alanaan ira et “walaan iray espisyal ya abilidad a mantalos” nen saray arum ya eksperiensyado lan kabiangan ed baleg ya ulop. Agda met papanisiaan a lapud alanaan ira et mas dakel so masanton espiritu ra nen saray kaiba ran arum a karnero; nisay maniilalo iran idumay pangipasen ed sikara odino iisipen da a lapud mibibiang ira ed saray emblema et atagtagey lara nen saray mamatatken ed kongregasyon. Mapaabeba ran tatandaan a walaray alanaan a lalaki nen inmunan siglo ya agkinmualipikan manlingkor bilang matatken odino ministeryal a lingkor. (1 Timoteo 3:1-10, 12, 13; Tito 1:5-9; Santiago 3:1) Wala ni ingen iray alanaan a Kristianon maletey so espiritualidad da. (1 Tesalonica 5:14) Tan saray bibii, anggaman alanaan ira et agnambangat ed kongregasyon.​—1 Timoteo 2:11, 12.

Kanian, panggugunaetan na saray alanaan a Kristiano tan saray kakaiba ran arum a karnero so mansiansian mabiskeg ed espiritual, a babayuboan daray bunga na espiritu tan iyaalibansa ra so kareenan ed kongregasyon. Amin a Kristiano, alanaan man odino kabiangan ed arum a karnero, so makulin mangipupulong ed maong a balita tan manggagawa na babangatan diad panangiwanwan na Mananguley ya Ulop. Maliket iray alanaan a Kristiano a manggawa ed saya anggad linawa ni nen Jehova a mansiansia ira ed dalin bilang lingkor To.