Akin a Kaukolan Tayo so Mantitipon?

SI Christine so biglan tinaynan na masiken to kayari na 20 taon lan panamaley da. Bukbukor to lay amabaleg ed waloran ananak to, a pitoran lalaki tan sakey a bii. Say edad da et 7 anggad 18. “Natan et siak lan bukor so manggagawa ed amin ya importante iran dedesisyonan,” so inkuan to. “Nabebelatan ak lan maong ed responsabilidad ko tan wala komon so ontulong tan mangiwanwan ed siak.” Iner so akaromogan toy nakaukolan a tulong?

“Saray Makristianon pantitipon et makanakana ed pananisia mi bilang sankapamilyaan,” so inkuan nen Christine. “Diad saray pantitipon et nagagamoran mi so panamaseseg na saray kakaaro tan panangigiya na Salitay Dios. Say regular ya iyaatendi mi ed saray pantitipon so akatulong ed sikami diad amin ya importantin aspekto na bilay mi bilang pamilya.”

Diad sarayan ‘maatap a panaon,’ amin tayo so makaeksperiensya na nanduruman subok. (2 Timoteo 3:1) Singa si Christine, nayarin ipasen yo met iray pantitipon na saray Tasi nen Jehova bilang makanakana ed pananisia yo, sakey ya importantin kabiangan na panagdayew yo ed si Jehova. Maseguro a say limaran pantitipon na kongregasyon ed kada simba so mamapaelet ed panangaro yo ed Dios, mamapabiskeg ed ilalo yo ed arapen, tan mangitatarya ed sikayo na nibase’d-Biblia a panangigiya no panon a talonaan iray subok.

Balet, wala iramay agmakapipiaral a naynay. Sikara so abanalan la kayari sanagew, tan singano naiirapan la ran manpales insan manbiahe a paonla ed pantitipon. Arum met so agmakakaatendin naynay lapud eskedyul da ed trabaho. No atendian da so amin a pantitipon, nayarin melag so nasueldo ra odino nayari ni ingen a naekal ira ed trabaho. Wala met iray agmiaral lapud iisipen dan mas makapaliket ni so onla ed sakey a klase na panligliwaan nen say pilimog da ed kongregasyon.

Anto sirin iray importantin rason no akin a kaukolan tayon atendian so amin a Makristianon pantitipon? Anto so nagawaan yo met pian magmaliw a makapabiskeg iray pantitipon? Pian naebatan irayan tepet, usisaen tayo so maaron imbitasyon nen Jesus a nisulat ed Mateo 11:28-30. Oniay imbaga to: “Dago kayo’d siak, amin yon nasasagpotan tan nabebelatan, et ikdan ta kayoy pampainawa. Ala yoy pakok ed sikayo, tan manaral kayo’d siak; ta mauyamo ak tan mapaabeba ak a puso; et naromog yoy inawa nipaakar ed saray kamarerwa yo. Ta say pakok mainomay, tan anlemew so awit ko.”

“Dago Kayo’d Siak”

Imbaga nen Jesus a: “Dago kayo’d siak.” Say sakey a paraan pian nipatnag tayon aawaten tayo iyan imbitasyon et say  regular ya iyatendi ed saray pantitipon. Wala so maabig a rason pian onatendi, lapud diad sakey ya inkagawa et oniay imbaga nen Jesus: “No iner so kawalaan na duara ono talora a nantitipon nisengeg ed ngaran ko, siak wala ak ed nanleleetan da.”​—Mateo 18:20.

Nen inmunan siglo, si Jesus so personal ya angimbita ed nanduruman totoo pian ontumbok ed sikato. Sikara so inikdan to na pankanawnawan makapiulop a maapit ed sikato, tan arum so tampol ya angawat ed satan. (Mateo 4:18-22) Balet, saray arum so ag-angawat ed satan lapud mas nilabay da so mananap na materyal iran bengatla. (Marcos 10:21, 22; Lucas 9:57-62) Ingen, oniay impaseguro nen Jesus ed saramay tinmumbok ed sikato: “Sikayo agyo ak pinili, balet pinili ta kayo.”​—Juan 15:16.

Kayari na impatey tan inkioli nen Kristo, sikato so agla akaiba na saray babangatan to. Balet, sikato so wala nin siansia ed sikara diad pantalos ya inwanwan to so kimey da tan inimatonan toy inkiwas da ed simbawa to. Alimbawa, 70 taon kayari na inkioli to et sinimbawa tan pinaseseg nen Jesus so pitoran kongregasyon diad Asia Minor. Napatnagan ed saray komento to so pikabat ton maong ed maabig iran kalidad tan kakapuyan na saray indibidual ed saratan a kongregasyon.​—Apocalipsis 2:1–3:22.

Si Jesus so siansia nin interesadon tuloy ed kada babangatan to. Oniay insipan to: “Nia, wala ak a naynay ed sikayo, ya angga ed kasampotan na mundo.” (Mateo 28:20) Manbibilay tayo la natan ed panaon na anggaan, kanian nakaukolan tayo lay onkiwas unong ed imbitasyon nen Jesus ya ontumbok ed sikato. Say sakey a paraan pian nagawaan itan et say regular ya iyatendi ed saray pantitipon. Labay nen Jesus a sikatayoy ondengel tan ‘nabangatan ed sikato’ diad panamegley na nibase’d-Biblia iran panagaral tan paliwawa a naynay a nipaparungtal diad saray pantitipon. (Efeso 4:20, 21) Kasin onkikiwas kayo ed imbitasyon nen Jesus a: “Dago kayo’d siak”?

“Amin Yon Nasasagpotan tan Nabebelatan”

Say sakey ya importantin rason no akin ya atendian iray Makristianon pantitipon et sikatayoy makaawat ditan na panamaseseg. (Hebreos 10:24, 25) Dakel ed sikatayo so seguradon “nasasagpotan tan nabebelatan” ed nanduruma iran paraan. Nayarin nabebelatan kayo la ed personal iran problema, a singa diad bunigas. Diad saray Makristianon pantitipon et makapanpapasesegan itayo. (Roma 1:11, 12) Singa bilang, narengel yo iray komenton makapabiskeg ed espiritual, napanonotan kayo ed ilalo yon nibase ed Biblia, tan nanengneng yo so pananisia na arum a mansusungdo ed saray subok. Amin iraya so makatulong pian natalonaan yo iray problema tan nawalaan kayoy asimbang a panmoria ed saratan.

Konsideraen pa so imbaga na sakey a Kristianon bii a nalilimitaan lay iyatendi to lapud graben sakit. “Walaray panaon a siak so nakaukolan a manpaospital lapud sakit ko,” so insalaysay to. “Medyo nairapan ak ya onatendi ed saray pantitipon kayarik a manpaospital, balet diad pantitipon so sankaabigan a pasen parad siak. Say inka-maabrasa tan panangaro na agagi so mamapaliket ed siak, tan say panangibangat tan panangiwanwan nen Jehova tan si Jesus so mangiiter na kabaliksan ed bilay ko.”

“Say Pakok Mainomay, tan Anlemew so Awit Ko”

Imanoen met ed sayan susurien tayon bersikulo so imbaga nen Jesus: “Manaral kayo’d siak.” Diad panaral tayo nipaakar ed si Jesus, magmaliw itayon babangatan to, tan awiten tayo so pako to sano idedika tayoy bilay tayo ed Dios tan nabautismoan itayo. (Mateo 28:19, 20) Say regular a pibibiang ed saray pantitipon so makanakana pian makapansiansia itayon babangatan nen Jesus. Akin? Lapud diad saray Makristianon pantitipon so pakaaralan tayo nipaakar ed si Jesus, saray bangat, tan paraan to.

Anton awit so labay ya ipasakbat ed sikatayo nen Kristo? Satan met imay awit a sinakbat to, salanti, say pribilehyon manggawa na linawa na Dios. (Juan 4:34; 15:8) Nakaukolan so pansagpot ta pian nagawaan tayo iray ganggan na Dios, balet sayan pako et aliwan ambelbelat. Magmaliw labat itan ya ambelat no awiten tayo itan ed dilin biskeg tayo. Balet, no manpikasi itayo tan kerewen  tayo so espiritu na Dios tan awaten tayo so espiritual a tagano a nipaparungtal diad saray pantitipon, nagamoran tayo so inter na Dios a “biskeg ya alabas ni nen say gendat.” (2 Corinto 4:7, NW) No manparaan tan mibiang itayo ed saray pantitipon, lalon ombiskeg so panangaro tayo ed si Jehova. Tan sano napapakiwas itayo lapud aro, saray ganggan na Dios et “aliwa ran ambelat.”​—1 Juan 5:3.

Manproproblema so karaklan a totoo diad panag-anap na pambilay, panangasikaso ed saray problema ed bunigas, tan arum nira. Balet pian natalonaan tayo iratan, ag-itayo manmamatalek ed kakabatan na too. Natulongan itayo na saray pantitipon ed kongregasyon ta pian ‘ag-itayo la manpaga,’ lapud itatarya nen Jehova iray pankaukolan tayo tan tutulongan to itayon manalona ed saray problema. (Mateo 6:25-33) On, saray Makristianon pantitipon et pakapatnagan na panangaro na Dios ed sikatayo.

“Mauyamo Ak tan Mapaabeba Ak a Puso”

Niyugali la nen Jesus so ombisita ed sinagoga, a ditan so pangipapaliwawaan ed Salitay Dios. Diad sakey ya inkagawa, inala nen Jesus so lukot nen Isaias tan binasa to: “Say espiritu na Katawan wala ed siak, ta nilanaan to ak a mangipulong na saray maong a balita ed saray duruka; imbaki to ak a mangipakabat na kawayangan ed saray arakep, tan say pangipawil na pakanengneng na saray bulag, pian ibulos ko so saray nanaaposan. Pian yabawag ko so makapaliket a taon na Katawan.” (Lucas 4:16, 18, 19) Agaylan makapaliket a narengel so impangiyaplika nen Jesus ed saratan a salita, a kuan to: “Natan ya agew asumpal ed kalayagan yo so sayan sulat”!​—Lucas 4:21.

Si Jesus, a mauyamo tan ‘manunan pastol,’ so siansia nin mangaasikaso ed espiritual a pankaabigan na saray patumbok to. (1 Pedro 5:1-4) Ididirehi to so “matoor tan makabat ya aripen” diad panuturo ra ed saray lalaki a manpastol ed saray kongregasyon na saray Tasi nen Jehova ed sankamundoan. (Mateo 24:45-47; Tito 1:5-9) Sarayan lalaki so ‘manpastol ed kongregasyon na Dios’ tekep na kauyamoan tan ipatnag da so maong ya alimbawa diad regular ya iyaatendi ed saray pantitipon. Nipatnag yo so apresasyon ed sarayan ‘langkap a lalaki’ diad iyatendi ed saray pantitipon, a ditan yo met napaseseg so arum diad iyaatendi tan pibibiang yo.​—Gawa 15:30-33; 20:28; Efeso 4:8, 11, 12, NW.

“Naromog Yoy Inawa Nipaakar ed Saray Kamarerwa Yo”

Sano onatendi kayo ed saray Makristianon pantitipon, panon yon naseguro a talagan napabiskeg kayo ed sarayan pantitipon? Sakey a paraan et say pangiyaplika ed simbawa nen Jesus: “Manlikas kayo sirin unong na narengel yo.” (Lucas 8:18) Saramay totoon nampilalek a makaaral so sigpot a nanimano ed si Jesus. Impaipaliwawa da ed sikato iray inusar ton ilustrasyon, tan bilang resulta et agamoran da so aralem a pakatalos.​—Mateo 13:10-16.

Nayarian yon aligen iratan a naeerasan ed espiritual diad aktibon idengel ed saray paliwawa ed saray pantitipon tayo. (Mateo 5:3, 6) Pian niyapasakey yo so kanonotan yo, panggunaetan yon tumboken iray punton ipapabitar na espiker. Onia iray itepet yo ed inkasikayo: ‘Panon kon niyaplika iyan impormasyon diad bilay ko? Panon ko iyan nausar pian natulongan so arum? Panon kon ipaliwawa iyan punto?’ Niarum ni, bukayen iray tekston sinalambit na espiker a mamapaneknek ed saray manunan punto to. No ontalineng kayon maong, lalo kayon napabiskeg ed saray pantitipon.

Kayari na aral, itongtong yo ed arum iray naaralan yon punto. Iyapasakey so tongtongan ed impormasyon tan no panon itan ya iyaplika. Magmaliw a makapabiskeg a tuloy iray pantitipon no walaray ontan a positibon pantotongtong.

Wala sirin iray maabig a rason tayo no akin a nakaukolan tayo so mantitipon. Repasoen yo iray gunggona a siningbat ed sayan artikulo, tan kayari na satan et tepetan yoy inkasikayo, ‘Panon so ikikiwas ko ed imbitasyon nen Jesus a: “Dago kayo’d siak”?’

[Saray litrato ed pahina 11]

Kasin saray arum ya aktibidad et mangaamper ed iyatendi yo ed saray pantitipon?