Impanalo ed Sankatageyan a Korte na Europa a Mangaasikaso ed Kanepegay Too

INYAKSEB na Sankatageyan a Korte na Europa a Mangaasikaso ed Kanepegay Too ed Strasbourg, Pransya, nen Enero 11, 2007 so nankakasakeyan a desisyon a pabor ed saray Tasi nen Jehova ed Russia ya angisegep na kaso sumpad Russian Federation. Say desisyon so lalon amekder ed kawayangan ed relihyon na saray Tasi nen Jehova tan ed kanepegan da parad patas a bista. Nengnengen tayo pa no panon a linmesay kaso.

Walay sakey a kongregasyon na saray Tasi nen Jehova ed syudad na Chelyabinsk, Russia, a maslak a membro et emel. Say uupaan dan pandaragupan et sakey a pasilidad na eskuelaan parad antikey a kurso. Nen Simba na Abril 16, 2000, say pantitipon da so binugak na Komisyoner na Kanepegan na Too a Komisyon ed satan a rehyon tan saray kaiba ton pulis, say duara et atagey so rangko ra tan say sakey so akasibilyan. Lapud panaglabi, nagkalautla na say Komisyoner, apatunday pantitipon base ed palso tan gawagawan akusasyon, ya ilegal kuno itan. Kasabi Mayo 1, 2000 et pinultot so kontrata na panangupa.

Angisegep na kaso iray Tasi nen Jehova ed abogado na Chelyabinsk balet imbasura to so kaso. Say Konstitusyon na Russia tan say Kombension Parad Pananalimbeng ed Saray Kanepegan na Too tan Manuna Iran Kawayangan so mangipapaseguro na kawayangan na relihyon tan kawayangan a manugyop na asosasyon. Kanian nandemanda ira ed korte na distrito a tinumbokan na impangiyapila ed korte na rehyon. Antis to ’tan, nen Hulyo 30, 1999 et wala lay pananontonan ya impaakseb na korte suprema ed sananey a kaso ya “unong ed Ley na Russia nipaakar ed kawayangan na relihyon tan ed panugyop na saray asosasyon, say balikas ya ‘agpibabalian’ et kabaliksan ton agla kaukolan so permiso, odino autorisasyon na gobierno pian gawaen iray relihyoson seremonya ed saray lugar a nitarya [parad satan a gagala].” (Inyarum day aka-bracket.) Anggaman wala la iyan panumbokan, anggapoy ginawa na saray abeban korte ed saray reklamo.

Nen Disyembre 17, 2001, insegep so kaso ed Sankatageyan a Korte na Europa a Mangaasikaso ed Kanepegay Too. Agawa so bista nen Setyembre 9, 2004. Tan nirayay inaon manlapud pinal a desisyon na Korte:

“Nalmoan na Korte ya inekalan iray aplikante na kanepegan parad kawayangan na relihyon, lapud nen 16 na Abril 2000 et pinatunda na saray opisyales na gobierno so relihyoson pantitipon da.”

“Say impamugak ed relihyoson ebento a nagagawa ed lugar a legal ya inupaan parad satan a gagala so mabitabitar ya aliwan unong ed ley.”

“Naimano [na Korte] so ganggan na Korte Suprema na Russia, ya imbase’d dakel la iran kaso, a saray relihyoson pandaragup et agla mankakaukolan na antokaman ya autorisasyon, odino panamatanir ed saray walad pakauley.”

“Sirin et asumlang na say Komisyoner tan saray kakaiba to so Artikulo 9 [kawayangan na relihyon] na say Kombension lapud impamatunda ed relihyoson pantitipon na saray aplikante nen 16 na Abril 2000.”

“Nalmoan na Korte ya ag-agawaan na saray abeban korte so obligasyon da . . . a paneknekan a saray partido et abista diad paraan ya anggapoy nilabi tan patas. . . . Asumlang so Artikulo 6 [kanepegan parad andiay panaglabin bista na] say Kombension.”

Misalsalamat iray Tasi nen Jehova ed Dios lapud impanalo to ira diad Sankatageyan a Korte na Europa a Mangaasikaso ed Kanepegay Too. (Salmo 98:1) Kaunongan kalaknab so epekto na satan a desisyon na Korte? Oniay inkuan nen Joseph K. Grieboski, presidente na Institute on Religion and Public Policy: “Sakey lamet iyan makatantanda tan importante a desisyon nipaakar ed kawayangan na relihyon diad interon Europa, lapud apektaen na satan a desisyon iray kanepegan na relihyon diad amin a bansan kabiangan na Sankatageyan a Korte na Europa a Mangaasikaso ed Kanepegay Too.”