“Katawan, Akin ya Anggapo Lambengat so Ginawam?”

SARATAN so imbaga nen Papa Benedict XVI, sanen binisita to nen Mayo 28, 2006 so datin panangipangawan a kampo ed Auschwitz, Poland. Oniay intuloy to kasabi to ed lugar ya amateyan na saray Nazi ed nilasus libon Judio tan ed saray arum ni: “Dakdakel a tepet so onsebang ed nonot mo ed sayan pasen! Agmo napaliisay ontepet na: Iner so kawalaan na Dios ed saraman a panaon? Akin ya anggapo lambengat so ginawa to? Panon ton nitepel iyan pinasyan panamatey, sayan impanalo na kaugsan? . . . Nepeg ya ag-itayo ontutunda a mapaabeba balet ta magunaet ya oney-ey ed Dios: Kiwas ka! Agmo lilingwanan so katooan a palsam!”

Say diskurso na papa so amawala na nankakapigan reaksion. Naimano na arum a walaray detalyin ginagalan agsinaglawi na papa, a singa say isusumpa ed saray Judio ya angitonton ed karuksaan ya agawa diad Auschwitz. Say interpretasyon na arum ed saray salita to et labay to labat a sapawan so kerew nen Papa John Paul II nipaakar ed kaperdona na saray kasalanan na simbaan. Inkuan na Katolikon dyurnalista a si Filippo Gentiloni: “Say mas makatunongan balet et sanen intepet ed dakel iran komentarista so mairap a tepet nipaakar ed kawalaan na Dios​—tepet ya anggapoy ebat​—say kinerew dan nawalaay ebat et say mas mainomay a tepet a: Kawalaan nen Pius XII ed saman?” Say tutukoyen na saray komentarista et say aglabat inyese-esel nen Papa Pius XII legan na Holocaust (palanit ya impamatey ed saray Judio).

Say Holocaust tan say amin niran turobos a panamatey na rasa ya agawa’d interon awaran na too so mamapaneknek a ‘say too et walaan na pakayari a pankaugsan na sananey a too.’ (Eclesiastes 8:9) Niarum ni, agpa ibabaliwala na Manamalsa na too iratan a pirmin makapakebbiew a bengatla. Imparungtal to iray rason to diad Biblia no akin ya iyaabuloy toy kaugsan. Papaseguroan to itayo met ya agto alingwanan so katooan. Diad tua et asingger lan mangangga so panaon ya inyabuloy na Dios a panguley na too ed inkasikato. (Jeremias 10:23) Labay mo ta a nagkalalon naamtaan no antoy gagala na Dios parad sikatayo? Maliket iray Tasi nen Jehova ya ontulong ed sikan naebatan manlapud Biblia iray tepet ya akawetwetan nen Papa Benedict XVI.

[Picture Credit Line ed pahina 32]

Oświęcim Museum