Nawalaan Kay Ilalo Diad Magonigon a Mundo

“SARAY ordinaryon totoo so mas makayari la natan nen say kapiganman a manggawa na maabig parad publiko tan manresolbe ed kaslakan iran problema.” Ontan so imbalikas na datin presidente na Estados Unidos a si Bill Clinton legan na sakey a komperensya ed Ottawa, Canada, nen Marso 2006. Imbaga to ya ondarakel iray indibidual ed sankamundoan a mabulos a mangiiter na tulong manlapu nen walay agawan tsunami nen 2004 tan positibon inkuan to a say mundo et wala la natan ed “panaon na agnaparaan a pantutulongan na saray totoo ed sankamundoan.”

Nailaloan tayo kasi a saray kalamidad so mamakiwas ed saray totoo ed inerman a pasen a mandampot ed magmaong ya arapen? Kasin say “agnaparaan a pantutulongan” et malet a basiyan pian ilaloan so kiwala na tuan kareenan tan magnayon a kaligenan diad arapen?

Say Lapuan na Tuan Ilalo

Say abaybayag lan pansasagpot na katooan ed loob na masulok ya anem libo lan taon so pakapatnagan a mabetbet a didismayaen na  totoo so balang sakey. Kanian makatunongan so isisimbawa ed sikatayo na impuyan a Kasulatan: “Agyo iyan so panmatalek yo ed saray priprinsipe, nisay dia ed anak na too, a dia ed sikato anggapo so tulong.” (Salmo 146:3) No say panilaloan tayo et saray organisasyon, materyal a bengabengatla, tan ug-ugagep na sayan mundo, sikatayoy nadismaya lambengat. Akin? Lapud “say mundo mangangga, tan saray penel to.”​—1 Juan 2:17.

Balet, diad inlabas na dakel a siglo et say Dios so lawas a napan-ilaloan na saray matunong a totoo. Sikatoy tinukoy ed Biblia bilang “ilalo na Israel [nensaman] tan “ilalo na saray atateng [na Israel],” tan dakel niran balikas a sikato so pangipapapegan na ilalo, talek, tan kompiyansa. (Jeremias 14:8; 17:13; 50:7) On, papasesegen itayo na Kasulatan a ‘manilalo ed si Jehova.’​—Salmo 27:14, NW.

Oniay ibabaga ed sikatayo na Uliran 3:5, 6: “Manmatale’ka ed Jehova ed simoon a pusom, tan agka onsaral ed tapew na dili a pakatalos mo: Dia ed saray amin a dalan mo sikato so bidbiren mo, et sikato itonton to so saray basbas mo.” Dakel so rason mo pian sigpot kan manmatalek ed satan a sipan lapud si Jehova a Dios et agmanguuman, napanpiyaan, tan lawas ton totooren so salita to. (Malaquias 3:6; Santiago 1:17) Labay to so sankaabigan parad sika, tan no talinengen mon naynay so ibabaga to diad Salita to, say Biblia, sikay matalonan igiya na satan diad sayan makapataktakot a panaon.​—Isaias 48:17, 18.

Siopaman a sigpot-puson ontumbok ed panangiwanwan na Dios et makapanmatalek ed sayan sipan: “Agka antakot, ta wala ak ed sika, agka napagaan, ta siak so Dios mo; pabiskegen ta ka naani; on, tulongan ta ka: on, ampayaen ta ka ed nikawanan a lima na inkatunong ko.” (Isaias 41:10) Amin a peteg a mangaaro ed si Jehova so naligliwan tuloy no masimoon dan ipikasi tan dalepdepen iyan panamaseguro, lapud ontulong itan ed sikara pian natalonaan da iray kairapan tan kapagaan.

Imanoen pa si Andrea, a sakey a Tasi nen Jehova tan walaan na duaran anak. Inkuan to: “Say panagpikasi ed si Jehova tan say panagdalepdep ed saray sipan to so amabiskeg ed siak a nawalaan lamet na ilalo sano walaray pakakaaburidoan ko ed bilay ko. No nononoten ko a wadtan lawas si Jehova ed bilay ko, magmainomay koy mansiansia a maligen.”

Pabiskeg Moy Ilalom ed si Jehova

Impabitar na salmista so kaimportantian na panilalo ed si Jehova, ya inkuan to: “Abalbaleg a kareenan so wala ed saray mangaro na ganggan mo: tan anggapo a balot so sengegay kigapolan da.” (Salmo 119:165) Baleg so nitulong na masimoon a panagaral ed Salitay Dios pian say nonot tan pusom so napano na saray bengatlan maabig tan makapabiskeg ed espiritual, a singa saray ‘bengatlan matua, galgalangen, matunong, malinew, nababalita a maong, masimpit, tan daydayewen.’ No panseetan mon dengelen, aralen, awaten, tan iyaplika iratan a bengatla, “say Dios na kareenan miulop-ulop ed [sika].”​—Filipos 4:8, 9.

Si John, a personal ya akaeksperiensya ed satan diad apalabas iran dekada, so angikuan: “Pian manguman so panmoriak nipaakar ed arapen, importantin naaralan ko a kaukolan koy baleg a pananguman ed personalidad tan panagnonot ko antis ak a napaapit ed ayadyari tan agnanengneng a Dios. Say alenleneg a paraan pian nawalaan ak na ontan a pisisiglaotan et say impagmaliw kon maespiritual a too. Inuman koy kanonotan ko, a say pinonot ko et say Dios tan aamtaen koy panmoria to ed saray pamaakaran diad pambabasak ed impuyan a Salita to tan dadalepdepen ko itan.”

No sikay oninum na makaparepresko tan makapangiter-bilay a danum na katuaan a naasol ed impuyan a Kasulatan, niyaplikam so epektibo tan seguradon paraan a panalona ed dakel a mauges a bengatla ya inagew-agew a nibabalita ed media. Say pangiyaplika ed ibabaga na Biblia so mamaelet met ed siglaotan na pamilyam tan makabawas na kapagaan. Niarum ni, isisipan na Dios a sikato so akaparaan a ‘mangipatnag ed biskeg to ya ontulong ed saray ayadyari so puso ra a dapit ed sikato.’ (2 Awaran 16:9) Solbaren to iray problema diad paraan ya anggapo lan balot so nepeg mon takotan.

Oniay inkuan nen Phinehas, ya akaimaton a mismo ed bakal tan palanit a panamatey:  “Naaralan kon ipiya so bilay ko ed panangasikaso nen Jehova. Lapud inyaplikak iray prinsipyo na Biblia, apaliisan ko so dakel a problema.” No talagan manmatalek ka ed si Jehova a Dios, natulongan to kan manalona ed antokaman a kairapan. (Salmo 18:29) Say melag nin ugaw a maap-apit ed atateng to et sigpot a makapanmatalek ed sikara tan maligen so liknaan to ed pudir da anggano sikatoy mansakit odino walaray pakatatakotan to. Ontan met so naliknam no magunaet kan mangawat ed imbitasyon a manilalo ed si Jehova.​—Salmo 37:34.

Say Malet a Basiyan Pian Manilalo

Oniay inkuan nen Jesu-Kristo ed saray patumbok to: “Onia . . . no mikasi kayo: Ama min wala ka ed tawen, nagalang komon so ngaran mo. Onsabi komon so panarian mo. Nagawa komon so linawam, unong ed tawen, ontan met ed dalin.” (Mateo 6:9, 10) Satan a mangatatawen a Panarian, a sakey a gobiernon uleyan nen Jesu-Kristo, so usaren na Dios pian paneknekan a Sikatoy manepeg a soberano ed interon dalin.​—Salmo 2:7-12; Daniel 7:13, 14.

Say dakdakel a tatakotan a bengatla a mangaapekta ed amin ya aspekto na bilay natan so malinew a pakapatnagan a kakkaukolan lay isalet na Dios. Makapaliket ta asingger lan nagawa itan! Si Jesu-Kristo, ya introno la na Dios bilang Mesianikon Ari, so naikdan na autoridad a mangiyalangon ed inkasoberano nen Jehova tan mamasantos ed ngaran To. (Mateo 28:18) Agmanbayag et uleyan la na Panarian so dalin pian paandien so amin a pansesengegan na takot tan kapagaan. Sinalambit na Isaias 9:6 iray pamaneknek a si Jesus et makanepegan a Manuley, a makapangibulos ed sikatayo ed saray tatakotan tayo. Alimbawa, sikato so tinawag ya “Andi-anggaan ya Ama,” “Makapakelaw a Mananimbawa,” tan “Prinsipe na Kareenan.”

Konsideraen pa so makapasagyat a balikas ya “Andi-anggaan ya Ama.” Ipapatnag na satan a si Jesus so walaan na pakapanyari tan autoridad​—tan walaan met na pilalek​—a mangiter ed matulok a katooan na ilalon manbilay ya andi-anggaan diad dalin panamegley na mablin balor na dondon bagat to. Kabaliksan na saya a nibulos lara ed kasalanan tan ag-inkayadyari ya atawir da ed makasalanan ya inmunan too, si Adan. (Mateo 20:28; Roma 5:12; 6:23) Usaren met nen Jesus so inter na Dios ya autoridad to pian paolien ed bilay so dakel ya inaatey.​—Juan 11:25, 26.

Sanen wadiad dalin si Jesus, pinaneknekan to a sikatoy “Makapakelaw a Mananimbawa.” Lapu ed pikakabat to ed Salita na Dios tan ed malaknab a pakatalos to ed inkagawa na too, amta nen Jesus no panon a solbaren iray problema ed inagew-agew a panagbilay. Manlapu nen nitrono la ed tawen, si Kristo so mantutultuloy a “Makapakelaw a Mananimbawa,” a manlilingkor bilang manunaan a persona ya uusaren nen Jehova diad pitatalosan To ed katooan. Say simbawa nen Jesus, a nisulat ed Biblia, so lawas a makabat tan andiay pakabalawan. No aralen tan panisian mo iya, makagamor ka na bilay ya anggapo lay kapagaan tan pirmin tatakotan.

Si Jesus so tinukoy met na Isaias 9:6 bilang “Prinsipe na Kareenan.” Diad satan a betang to, magano lan usaren nen Kristo so pakapanyari to pian pagmaliwen a parepareho so amin a totoo​—diad politika, sosyedad, tan ekonomya. Panon? Diad mareen a panguley to ed katooan panamegley na Mesianikon Panarian.​—Daniel 2:44.

Sano manuuley la so Panarian, ontalona so kareenan diad sankadalinan. Akin a makaseguro ka ed saya? Say rason et nipabitar diad Isaias 11:9, ya oniay nabasa tayo: “[Saray uuleyan na Panarian] ag-ira naani mamaunong odino mamagbag dia ed amin a masanto a palandey ko; ta say dalin napano naani ed pikakabat ed Jehova, singa saray danum sakbongan da so dayat.” Diad kaunoran, amin a too ed dalin so nawalaan la na suston pikakabat ed Dios tan magmaliw laran matulok ed sikato. Agta manliket ka ed satan ya ilalo? No ontan, agmo la ipalpaleen so pangala na mabmablin “pikakabat ed Jehova.”

Nagamoran mo so makapabiskeg-pananisia tan makapangiter-bilay a kakabatan na Dios no aralen mo so peteg ya ibabangat na Biblia nipaakar ed saray nagagawa ed panaon tayo tan ed masnag ya arapen ya insipan na Biblia. Kanian pasesegen mi ka ya awaten mo so libren panangiyaral ed Biblia ya iyoopresi na saray Tasi nen Jehova ed lugar yo. Sakey iyan paraan pian naandi so takot mo tan nawalaan ka na tuan ilalo ed sayan magonigon a mundo.

 [Kahon/Saray litrato ed pahina 7]

No Akin a Mangiter na Ilalo so Panarian na Dios

Si Jesu-Kristo, ya ari na Panarian na Dios, so naikdan na pakayari tan kanepegan a manguley ed interon talba. (Mateo 28:18) Ipawil to ed dalin so nagnap tan balansin kipapasen na sisteman manusustuni ed bilay. Sikato so walaan na pakayarin mamaandi ed amin a klase na sakit. Saray makapakelaw a ginawgawa to diad dalin so paneknek a nayarian ton itarok so babaleg iran bendisyon ed arapen diad silong na uley to bilang ayadyari tan napanmatalkan ya Ari. Diad saray kalidad na Mesianikon Ari a nidatak ed leksab, dinan ed saratan so makapasagyat ed sika?

▪ Mainomay ya asinggeran.​—Marcos 10:13-16.

▪ Makatunongan tan agmanangidumaduma.​—Marcos 10:35-45.

▪ Responsable tan agto iyuuna so dilin pankaabigan to.​—Mateo 4:5-7; Lucas 6:19.

▪ Maptek tan matunong.​—Isaias 11:3-5; Juan 5:30; 8:16.

▪ Manonot, makonsidera, tan mapaabeba.​—Juan 13:3-15.

[Litrato ed pahina 4]

Say panagbasa ed Biblia tan panagdalepdep so ontulong ed sikatayo pian manilalo ed si Jehova