No Akin a Magano lan Manampot so Amin a Kairapan

“Say Dampay, ayadyari so gawa to.”​—DEUTERONOMIO 32:4.

1, 2. (a) Akin a papablien mo so ilalon pambilay ya andi-anggaan? (b) Anto so rason no akin a dakel so agmanisia ed Dios a walaan na alay abig iran sipan ed arapen?

 PANLILIKETAN mo kasin nodnonoten so nipaakar ed bilay diad Paraiso? Nayarin ililitratom so inkasika a manliliber ed sayan alay dakep a planeta tan manaaral nipaakar ed dakerakel tan nanduruman mabilay a bengatla. Odino nayarin iisipen mo so liket ed pikimey ed arum a mangasikaso tan ontulong a mamasimbalo ed sayan interon planeta pian magmaliw a singa parki. Odino nayarin nononoten mo met iray nabayuboan mon dunong ed art, arkitektura, musika, odino arum niran gegemtan ya agmo nagawaan natan diad sayan okupadon bilay. Antokaman ed saratan so nononoten mo, talagan papablien mo so ilalo a tatawagen na Biblia a ‘peteg a bilay’​—say bilay ya inggagala nen Jehova parad sikatayo, say pambilay ya andi-anggaan.​—1 Timoteo 6:19.

² Agta makapaliket tan mablin pribilehyo so panginabang ed sayan ilalo a nibase’d-Biblia dia ed arum a totoo? Balet, dakel so agmangawat ed sayan ilalo. Ipapasen da itan bilang gawagaway-isip odino kugkugip labat na totoon mainomay a napalikdo. Nayari ni ingen ya ag-ira manisia ed Dios ya angisipan ed andi-anggaan a bilay diad Paraiso. Akin? Parad arum, say mabetbet a mangaamper et say tatawagen a problema nipaakar ed kaugsan. Panisiaan da a no wala so Dios tan sikatoy makapanyarin-amin tan maaro, anggapo komon so kaugsan tan kairapan ed mundo. Ikakatunongan da ya anggapo so Dios a mangiyabuloy ed kiwala na kaugsan, odino no bilang ta walay Dios, sikato so aliwan makapanyarin-amin odino anggapoy pibabali to ed sikatayo. Parad arum et makakombinse iyan klase na panagkatunongan. On, talagan masilib si Satanas diad pamubulag to ed isip na totoo.​—2 Corinto 4:4.

3. Natulongan tayo so totoo a mangebat ed anton mairap a tepet, tan akin a wala itayo ed nikadkaduman kipapasen pian natulongan tayo ira?

³ Bilang Tasi nen Jehova, wala itayo ed nikadkaduman kipapasen pian tulongan iramay totoon napapalikdo nen Satanas tan ed kakabatan na sayan mundo. (1 Corinto 1:20; 3:19) Natatalosan tayo no akin a dakel so agmanisia ed saray sipan na Biblia. On, ta agda kabat no siopa si Jehova. Agda met amta so ngaran to odino say kabaliksan na satan, tan daiset odino anggapo so amta ra nipaakar ed saray kalidad to odino ed panusumpal to ed saray sipan to. Apribilehyoan itayo lapud  walaan itayo na ontan a pikakabat. Panapanaon et makagunggona so panrepaso tayo ed no panon tayon natulongan iramay totoon “abilungetan so kalakal” da pian naromog da so ebat ed sakey ed saray sankairapan a tepet na totoo, “Akin ya aabuloyan na Dios so kaugsan tan kairapan?” (Efeso 4:18) Unona, konsideraen tayo no panon tayon niletneg so maabig a pangigapoan pian niiter so makapnek ya ebat. Insan singbaten tayo no panon a napatnagan iray kalidad nen Jehova diad paraan na panresolbe to ed problema nipaakar ed kaugsan.

Anapen so Dugan Paraan na Kakaebat

4, 5. Anto so nakaukolan tayo nin gawaen sano walay mangitepet no akin ya aabuloyan na Dios so kaugsan? Ipaliwawa.

⁴ Sano walay mangitepet no akin ya aabuloyan na Dios so kairapan, panon itayon onebat? Nayarin ipaliwawa tayon tampol itan diad detalyadon paraan, ya onggapo itayo ed agawa diad hardin na Eden. Maabig itan a paraan diad arum a kipapasen. Balet, wala niray nepeg a gawaen sakbay na satan. Nakaukolan a walay maabig a pangigapoan. (Uliran 25:11; Colosas 4:6) Konsideraen tayo so taloran makatulong a punto pian natulongan tayo so sakey a too sakbay tayon ebatan so tepet.

⁵ Unona, sano nagogonigon so too nipaakar ed ikakasmak na kaugsan ed mundo, nayarin sikato odino saray pinabli to ed bilay so apektado na kaugsan. Makabat sirin no ipatnag tayo nin unona so peteg a pililikna. Oniay insimbawa nen apostol Pablo ed saray Kristiano: ‘Minangis kayo ed saray mannanangis.’ (Roma 12:15) Say pangipanengneng na empatya, odino ‘panangabagey,’ so nayarin mamakiwas ed too. (1 Pedro 3:8) No nalikas to a sikatayoy mangiyaansakit ed sikato, sikato so mas ondengel ed ibaga tayo.

6, 7. Akin a matukoy labat a komendaan so masimoon a too ya amalesa na aralem a tepet a mangogonigon ed sikato?

⁶ Komadua, komendaan tayo so masimoon a too diad impangitepet to ed satan. Iisipen na arum a totoo ya anggapo lay pananisia odino respeto ra ed Dios sano ontan a tepet so pampapagaan da. Nayari ni ingen ya ontan so imbaga ed sikara na sakey a pari odino pastor. Balet, aliwa met ya ontan so motibo ra ed pantetepet da. Diad tua et ontan met iray intepet na saray matoor a totoo ed panaon na Biblia. Alimbawa, oniay intepet na salmistan David: “Akin et manayam ka ed arawi, O Jehova? Akin et onsanib ka ed panaon na gonigon?” (Salmo 10:1) Ontan met, oniay intepet nen propetan Habacuc: “Jehova, panon kabayag so itawag ko, et agmo ak naani talinengen? Mantagleey ak ed sika lapu ed duksa, et agka mangilaban. Akin et ipatnag mo ed siak so inkauges, tan onnengneng ka na ag-onkanepegan? Ta say kabagbag tan kaduksa wala ed arap ko; et wala so kolkol, tan say siblangan onalagey.”​—Habacuc 1:2, 3.

⁷ Sarayan matoor a lalaki so walaan na aralem a panagrespeto ed Dios. Kasin abaat ira sanen pinalesa da iratan a tepet a mangogonigon ed sikara? Andi. Saratan a seryoson tepet da so impaisulat ni ingen nen Jehova diad Salita to. Natan, say too a napapagaan a maong ed ikakasmak na kaugsan so diad tua et naeerasan ed espiritual, ya aanapen to iray ebat a nitarya lambengat na Biblia. Tandaan, kinomendaan nen Jesus iramay naeerasan ed espiritual, odino “sinononot ed espiritual a pankaukolan da.” (Mateo 5:3, NW) Agaylan pribilehyo so panulong ed sikara pian nagamoran da so liket ya insipan nen Jesus!

8. Antoran makapawetwet a bangat so angitonton ed impanisia na totoo a say Dios so pansesengegan na kairapan, tan panon tayo iran natulongan?

⁸ Komatlo, nakaukolan tayon tulongan so too ta pian natalosan to ya aliwan say Dios so pansesengegan na kaugsan a kasmak lan tuloy ed mundo. Dakel a totoo so nibabangat a say Dios so manuuley ed sayan mundon pambibilayan tayo, a denesidi to la ed gapo so amin a nagawa ed sikatayo, tan sikato so walaan na agnipaliwawa odino ag-amta iran rason no akin ya itatarok toy irap ed katooan. Palson amin irayan bangat. Saraya so agmamapagalang ed Dios lapud sikatoy nililitrato a pansesengegay kaugsan tan kairapan ed mundo. Kanian nepeg tayon usaren so Salitay Dios pian ipetek iratan a lingon sisiaen. (2 Timoteo 3:16) Aliwan si Jehova so manuuley ed sayan mauges a sistema na bengabengatla, noagta  si Satanas a Diablo. (1 Juan 5:19) Ag-inggeter nen Jehova so nagawa ed saray intelihentin pinalsa to; inikdan to na kawayangan tan pankanawnawa so kada sakey a manpili, balanglan maong odino mauges, duga odino aliwa. (Deuteronomio 30:19) Tan si Jehova so agbalot pansengegan na kaugsan; kabusol to so kaugsan tan iyaansakit to iramay maniirap.​—Job 34:10; Uliran 6:16-19; 1 Pedro 5:7.

9. Anto so pigaran uusaren ya intarya na “matoor tan makabat ya aripen” ta pian natulongan so totoon makatalos no akin ya aabuloyan nen Jehova so kairapan?

⁹ Sano nigapo yo ed ontan so tongtongan, namoria yo a say katongtong yo et labay to lan amtaen so rason no akin ya aabuloyan na Dios so kairapan. Pian natulongan kayo, walaray pigaran uusaren ya intarya na “matoor tan makabat ya aripen.” (Mateo 24:45-47) Singa bilang, diad “Maridios a Katutulok” a Distriton Kombension nen 2005/06 et impaway so tract ya apauloan na Magano lan Manampot so Amin a Kairapan! No sayan tract et nipatalos ed lenguahe yo, akin ta no kabisadoen yo so lugan na satan? Mipadpara, say libron Anto so Peteg ya Ibabangat na Biblia?, a nipatalos la natan ed 157 a lenguahe, so angitarya na sakey a kapitulo parad sayan importantin tepet. Usar yon maong irayan literatura. Saraya so malinew a mangisasalaysay ed saray Makasulatan ya awaran nipaakar ed isyu na sankatalbaan ya inkasoberano a linmesa diad Eden tan no akin ya onman so paraan na impanresolbe nen Jehova ed satan ya isyu. Tandaan met a legan yon sisingbaten iyan tema, ipaparungtal yo ed dumerengel yo so sankaimportantian a pikakabat. Saya so pikakabat nipaakar ed si Jehova tan ed alay abig iran kalidad to.

Iyapasakey ed Saray Kalidad nen Jehova

10. Anto so agnatalosan na dakel a totoo nipaakar ed impangiyabuloy na Dios ed kairapan, tan anton pikakabat so makatulong ed sikara?

¹⁰ Legan yon tutulongan so totoo a makatalos no akin ya aabuloyan nen Jehova so totoo a manuley ed inkasikaran dili diad pangiimpluensya nen Satanas, salien ya itongtong ed sikara iray  alay abig a kalidad nen Jehova. Amta na dakel a totoo a say Dios et makapanyari, tan naynay dan narengel a sikato so Dios a Makapanyarin-amin. Balet, nayarin agda natalosan no akin ya agto uusaren so mabiskeg a pakapanyari to pian panganggaen lan tampol so ag-inkahustisya tan kairapan. Nayarin agda natatalosan so arum niran kalidad nen Jehova, a singa say kasantosan, inkahustisya, kakabatan, tan aro. Ipapatnag nen Jehova irayan kalidad diad naspot tan asimbang a paraan. Kanian onia so imbaga na Biblia: “Ayadyari so gawa to.” (Deuteronomio 32:4) Panon yon nipabitar irayan kalidad sano ebatan yo iray tepet a mabetbet ya onlesa nipaakar ed sayan isyu? Konsideraen tayo so pigaran alimbawa.

11, 12. (a) Akin ya aliwan posiblin perdonaen labat la so impankasalanan nen Adan tan Eva? (b) Akin ya ag-abuloyan nen Jehova a mansiansia so kasalanan ed andi-anggaan?

¹¹ Agnayari kasi a diad saman et pinerdona la komon nen Jehova si Adan tan Eva? Aliwan posible ed sayan kipapasen so panamerdona. On, ta bilang ayadyarin totoo, ginagala nen Adan tan Eva ya ipulisay so inkasoberano nen Jehova tan say inunor da et si Satanas. Agla pankelawan no akin ya anggapo so napatnagan a panagbabawi ed sarayan nanrebelde. Balet, sano itepet na totoo no akin ya agpinerdona nen Jehova iramay nanrebelde, say peteg a nononoten da et no akin ya aglabat inyabeba nen Jehova so estandarte to tan inabuloyan to labat komon a nagawa so kasalanan tan impanrebelde. Say ebat ed saya so maapit a misiglaotan ed sakey a kalidad ya importante ed si Jehova, salanti, say kasantosan to.​—Exodo 28:36; 39:30.

¹² Piganlasus a danay so impangidanet na Biblia ed kasantosan nen Jehova. Balet, makapaermen ta pigpigaran totoo ed sayan marelmeng a mundo so makaamta ed sayan kalidad. Si Jehova so malinis, maralus, tan biig manlapud amin a kasalanan. (Isaias 6:3; 59:2) Nipaakar ed kasalanan, inyuksoy to so paraan pian nasakbongan tan naandi itan, balet agto itan abuloyan a mansiansia ed andi-anggaan. No abuloyan nen Jehova a niwala so kasalanan diad andi-anggaan, anggapo lay ilalo tayo ed arapen. (Uliran 14:12) Balet diad nigeter a panaon nen Jehova et ipawil to so amin a pinalsa diad kasantosan. Segurado itan lapud linawa itan na Masanton Dios.

13, 14. Akin ya agdineral a tampol nen Jehova iray nanrebelde ed Eden?

¹³ Agnayari kasi a diad saman et dineral la komon a tampol nen Jehova iramay nanrebelde ed Eden tan sikatoy amalsa lamet? Seguradon walay pakayari ton manggawa ed satan, tan magano to lan usaren itan pian deralen so amin a mauges. Nayarin oniay itepet na arum, ‘Akin ya agto la ginawa itan nensaman sanen taltalora ni so nankasalanan diad uniberso? Agta naamper la komon so inkayat na kasalanan, pati say amin a paniirap ed mundo? Akin ya aliwa lan ontan so ginawa nen Jehova? Oniay imbaga na Deuteronomio 32:4: “Kaptekan so saray amin a dalan to.” Importantin tuloy ed si Jehova so inkahustisya. Diad tua, “si Jehova aroen to so kaalasan” odino inkahustisya. (Salmo 37:28) Lapud panangaro to ed inkahustisya, agto dineral a tampol iray rebelde diad Eden. Akin?

¹⁴ Say impanrebelde nen Satanas so amalesa na sakey a tepet nipaakar ed kanepegan na Dios a manuley. Lapud inkahustisya nen Jehova, nakaukolan a naebatan so angat nen Satanas unong ed inkahustisya. Agnaebatan itan ya angat no dineral ton tampol iray nanrebelde, anggaman manepeg itan ed sikara. Nayarin mangiter itan na kaaruman ya ebidensya ed sankatageyan a pakapanyari nen Jehova, balet aliwan say pakapanyari to so nakuekuestion. Niarum ni, imparungtal la nen Jehova so gagala to ed si Adan tan Eva. Sikara so manilalak tan panoen da so dalin, patuloken da itan, tan uleyan da so amin nin pinalsa diad dalin. (Genesis 1:28) No dineral lan tampol nen Jehova si Adan tan Eva, say inyabawag ton gagala nipaakar ed totoo so magmaliw ya andian na kabaliksan. Say inkahustisya nen Jehova so agbalot mangiyabuloy ed ontan a pansumpalan, lapud lawas nasumpal so gagala to.​—Isaias 55:10, 11.

15, 16. Sano isusuheri na totoo so arum iran “solusyon” nipaakar ed angat ya apalesa ed Eden, panon tayo iran natulongan?

¹⁵ Wala ni kasi ed uniberso so mas makabat nen  si Jehova a makaresolbe ed impanrebelde? Nayarin isuheri na arum a totoo iray dilin “solusyon” da nipaakar ed agawan impanrebelde ed Eden. Balet, agta ipapatnag da ed satan a singa mas maong ni iray paraan da pian naresolbe so isyu? Anggaman aliwan makapuy so motibo ra ed panggagawa ra ed satan, andian ira na pakatalos nipaakar ed si Jehova tan ed makapakelkelaw a kakabatan to. Sanen sinulat nen apostol Pablo iray Kristiano diad Roma, inusisa ton maong so nipaakar ed kakabatan na Dios, pati say “sagradon sekreto” nipaakar ed gagala nen Jehova a mangikana ed Mesianikon Panarian pian narondon so matoor a katooan tan napasantos so ngaran To. Anto so alikna nen Pablo nipaakar ed kakabatan na Dios ya angigagala ed satan? Oniay impanampot na apostol ed sulat to: “Dia ed saksakey a Dios a makabat, lapu ed Jesu-Kristo, dia ed sikato so gloria ya andi-anggaan. Ontan pa komon.”​—Roma 11:25, NW; 16:25-27.

¹⁶ Amta nen Pablo a si Jehova labat so ‘makabat,’ a walaan na sankatageyan a kakabatan ed uniberso. Wala kasi ed ag-ayadyarin totoo so makapanisip na magmaong nin paraan ed panresolbe ed antokaman a problema, nagkalalo la ed sankairapan ya angat ed kakabatan na Dios? Nakaukolan tayo sirin a tulongan so totoo a nawalaan met na aralem a panangigalang ed Dios a “makabat ed puso.” (Job 9:4) No magmaong so pakatalos tayo ed kakabatan nen Jehova, mas makapanmatalek itayo a sankaabigan so pangasikaso to ed saray pamaakaran.​—Uliran 3:5, 6.

Apresyaen so Manunan Kalidad nen Jehova

17. Panon a natulongan iramay nagogonigon ed impangiyabuloy na Dios ed kairapan no nawalaan ira na mas malaknab a pakatalos ed panangaro nen Jehova?

¹⁷ “Say Dios sikato so aro.” (1 Juan 4:8) Diad saratan a makapasagyat a salita, ipapabitar na Biblia so manunan kalidad nen Jehova, say kalidad a makapasagyat ed amin a kalidades to tan say makaligliwan tuloy ed saramay nagogonigon ed ikakasmak na kaugsan. Impatnag nen Jehova so aro ed amin ya aspekto diad paraan na impanresolbe to ed makaderal ya epekto na kasalanan ed saray pinalsa to. Lapud aro nen Jehova, sikato so angiter na ilalo ed makasalanan iran ilalak nen Adan tan Eva, ya intaryaan to ira na probisyon pian makaasingger ira ed Sikato tan nawalaan na naabobonan a relasyon ed Sikato. Say aro so amakiwas ed Dios a mangitarya na dondon pian sigpot a naperdona iray kasalanan tan nipawil so ayadyari tan andi-anggaan a bilay. (Juan 3:16) Tan say aro so amakiwas ed sikato a magmaliw a maanos ed katooan, ya angiter na pankanawnawa ed dakel a totoo pian ipulisay da si Satanas tan pilien da si Jehova bilang Soberano ra.​—2 Pedro 3:9.

18. Apagamoran itayo na anton aralem a pakatalos, tan anto so konsideraen ed ontumbok ya artikulo?

¹⁸ Sanen nampaliwawa so sakey a pastor ed arap na nandaragup a dumerengel pian selebraan da so petsa na makadesyang ya impangataki na saray terorista, oniay imbaga to: “Agtayo amta so rason no akin ya aabuloyan na Dios a mantultuloy so kaugsan tan kairapan.” Agaylan makapaermen itan! Balet, agta makapaliket so impakawalaan tayo na aralem a pakatalos ed sayan tema? (Deuteronomio 29:29) Tan lapud si Jehova et makabat, walaan na inkahustisya, tan maaro, amta tayo a magano to lan panganggaen so amin a kairapan. Diad tua, insipan to a gawaen to itan. (Apocalipsis 21:3, 4) Balet, komusta iramay inaatey la diad apalabas iran siglo? Anggapo la kasi so ilalo ra lapud samay paraan na impanresolbe nen Jehova ed isyu diad Eden? Wala. Lapud aro, sikato so apakiwas met a mangitarya ed sikara na ilalo panamegley na kikioli. Saya so tema ed ontumbok ya artikulo.

Panon Yon Ebatan?

• Anto so nibaga tayo ed sakey a too a mangitetepet no akin ya aabuloyan na Dios so kairapan?

• Panon a napatnagan so kasantosan tan inkahustisya nen Jehova diad impideneng to ed saray nanrebelde diad Eden?

• Akin a nepeg tayon tulongan so totoo a nawalaan na mas malaknab a pakatalos ed panangaro nen Jehova?

[Tepetepet Parad Panagaral]

[Litrato ed pahina 21]

Panggunaetan a tulongan iramay nagogonigon lapud kairapan ed mundo

[Saray litrato ed pahina 23]

Saray matoor a si David tan si Habacuc so walaan na masimoon iran tepet ed Dios