Tudtua Kasi ed Sika so Kikioli?

“Wala naani kioli ed bilay.”​—GAWA 24:15.

1. Akin a say ipapatey et ompatnag ya agnapaliisan?

 “DIAD sayan mundo et talagan agnapaliisan so ipapatey tan saray buis.” Sayan komento, ya insulat na Amerikanon estadista a si Benjamin Franklin nen 1789, so binidbir na arum bilang matudion ideya. Balet, dakel a totoo so mansasaol nipaakar ed panagbuis. No nipaakar ed ipapatey, saya so talagan agnapaliisan. Agtayo itan napaliisan diad dilin biskeg tayo, tan talagan onsabi itan ed sikatayo. Say Sheol, a kaslakan a lubok na katooan, so mantutultuloy a mangaakmon ed bilay na totoon pinabpabli tayo. (Uliran 27:20) Balet nodnonoten pa so sakey a makapaligliwan ilalo.

2, 3. (a) Akin a walaray agla makaeksperiensya na ipapatey? (b) Anto so konsideraen tayo ed sayan artikulo?

² Itatarya na Salitay Dios so seguradon ilalo nipaakar ed kikioli, a nabilay lamet iray inaatey. Aliwa iyan kugkugip, tan anggapo so puersa ed uniberso a makaamper ed panumpal nen Jehova ed sayan ilalo. Balet, agnamomoria na dakel a totoo a walaray agla makaeksperiensya na ipapatey. Akin? Lapud agla manbayag et wala so agnabilang a “baleg ya ulop” a makaliktar ed “baleg ya irap.” (Apocalipsis 7:9, 10, 14) Sikara so mantultuloy a manbilay ya andi-anggaan. Kanian, agda la naeksperiensya so ipapatey. Niarum ni, ‘naekal la naani so ipapatey.’​—1 Corinto 15:26.

³ Nakaukolan a segsegurado itayo nipaakar ed kikioli a singa met si apostol Pablo, ya oniay imbaga to: “Wala naani kioli ed bilay na saray matunong tan agmatunong.” (Gawa 24:15) Konsideraen tayo natan so taloran tepet nipaakar ed kikioli. Unona, akin a seguradon nagawa so kikioli? Komadua, panon kan naligliwa ed ilalon kikioli? Komatlo, panon a mangapekta iyan ilalo ed paraan na kabibilay mo natan?

Seguradon Nagawa so Kikioli

4. Panon a say kikioli et makanan kabiangan na gagala nen Jehova?

⁴ Wala so pigaran rason no akin a seguradon nagawa so kikioli. Manuna ed amin, saya so makanan kabiangan na gagala nen Jehova. Tandaan a sinagyat nen Satanas so katooan pian mankasalanan, a walaan na agnapaliisan a pansumpalan, salanti say ipapatey. Kanian, oniay imbaga nen Jesus nipaakar ed si Satanas: “Sikato so akapatey nanlapu ed gapo.” (Juan 8:44) Balet, insipan nen Jehova a say “bii,” odino singa-asawa ton organisasyon ed tawen, so mamawala na sakey a “bini” a manmekmek ed ulo na “daan ya uleg,” a sigpot lan pakaderalan nen Satanas. (Genesis 3:1-6, 15; Apocalipsis 12:9, 10; 20:10)  Diad kalkalnan impangiparungtal nen Jehova ed gagala to nipaakar ed Mesianikon Bini, apatnagan a say Bini et agto lambengat deralen si Satanas. Onia so ibabaga na Salitay Dios: “Lapu ed saya pinmanengneng so Anak na Dios a maneral na saray gawa na Diablo.” (1 Juan 3:8) Say ipapatey ya epekto na kasalanan ya atawir tayo ed si Adan so manunaan ed saray gawa nen Satanas a panganggaen, odino deralen nen Jehova diad panamegley nen Jesu-Kristo. Nipaakar ed saya, importantin tuloy so dondon bagat nen Jesus tan say kikioli.​—Gawa 2:22-24; Roma 6:23.

5. Akin a say kikioli so mangigloria ed ngaran nen Jehova?

⁵ Determinado si Jehova a mangigloria ed sagradon ngaran to. Pinauges nen Satanas so ngaran na Dios tan walaray katilaan ya inyalibansa to. Tinilaan to si Adan tan Eva sanen imbaga ton ‘ag-ira ompatey’ no kanen da so bungan insebel na Dios. (Genesis 2:16, 17; 3:4) Manlapu la’d saman et ontan a katilaan so ikakayat nen Satanas, a singa say palson bangat a walay kamarerwan manbilay sano ompatey so laman. Balet, diad panamegley na kikioli et iwalwal nen Jehova iratan ya amin a katilaan. Maminpinsan ton paneknekan a sikato lambengat so Manamasiansia tan Manangipawil na bilay.

6, 7. Anto so liknaan nen Jehova nipaakar ed pamaoli ed saray totoo, tan panon tayon naseguro ya ontan so liknaan to?

⁶ Pilalek nen Jehova a gawaen so pamaoli ed bilay. Ipapabitar na Biblia so liknaan nen Jehova nipaakar ed saya. Singa bilang, konsideraen pa irayan apuyanan a salita nen matoor a Job: “No say sakey a too ompatey; ombilay ta lamet? Amin iray agew na pibabakal [“paskaran a panagsagpot,” NW] to alagden ko, angga ed say kabulos ko onsabi. Ontawag ka, et onebat ak ed sika: manpilalek ka ed gawa na saray limam.” (Job 14:14, 15) Anto so labay ya ibaga na sarayan salita?

⁷ Amta nen Job a diad ipatey to et sikato so kaukolan a manalagar na panaon legan a naugip ed patey. Satan a panaon so impasen to bilang “paskaran a panagsagpot,” sakey a panaon a sikatoy kapilitan a manalagar anggad nibulos. Parad si Job et seguradon nagawa itan a kibulos, tan onsabi so pakainawaan to. Akin? Lapud amta to so liknaan nen Jehova. Si Jehova so ‘manpipilalek’ a nanengneng lamet so matoor a lingkor to. On, pilalek na Dios a bilayen lamet so amin a matunong ya indibidual. Iter met nen Jehova ed arum so pankanawnawan manbilay na andi-anggaan diad Paraiso ed dalin. (Lucas 23:43; Juan 5:28, 29) Lapud linawa na Dios a nasumpal iyan gagala to, wala kasi so makaamper ed sikato?

8. Panon a “pinaletan” nen Jehova so ilalo tayo ed arapen?

⁸ Segsegurado so ilalo tayo ed arapen lapud inkioli nen Jesus. Sanen nampaliwawa si Pablo diad Atenas, oniay inyabawag to: “Tinandaan [na Dios] so sakey ya agew a sikato so pangukom to naani ed mundo unong ed katunongan, ed panamegley na saman a laki a tinandaan to; a sikato so pinaletan to ed saray amin, a sikato so pinaoli to ed bilay a nanlapu ed saray inatey.” (Gawa 17:31) Arum ed saray ondedengel ed si Pablo so nanludlurey ed sikato sanen nadngel da so nipaakar ed kikioli. Balet, walaray nagmaliw a mananisia. Nayarin asagyat so imano ra ed inkasegurado na sayan ilalo. Sanen pinaoli nen Jehova si Jesus, ginawa To so makapakelkelaw ed amin a milagro. Binilay to so Anak to bilang makapanyarin espiritu. (1 Pedro 3:18) Say kipapasen na apaolin Jesus so mas atagey ni ingen nen say kipapasen to sakbay a nagmaliw a too. Lapud sikatoy agla ompatey tan onkokomadua ed si Jehova ed pakayari, nagawaan la nen Jesus so alay abig iran ipapagawa ed sikato nen Ama to. Si Jesus so usaren nen Jehova a manggawa ed arum niran panamaoli, balanglan bilay diad tawen odino diad dalin. Oniay imbaga nen Jesus: “Siak so kiolian, tan say bilay.” (Juan 5:25; 11:25) Diad impamaoli to ed Anak to, pinaletan odino ginarantiyaan nen Jehova iratan ya ilalo parad amin a matoor.

9. Panon a pinekderan na salaysay na Biblia a seguradon nagawa so kioli?

⁹ Walaray akaimaton ed impamaoli ed bilay nensaman tan nisulat iratan ed Salitay Dios.  Nisulat ed Biblia iray detalyadon deskripsion na waloran impamaoli ed totoo diad dalin. Sarayan milagro so ag-insekreto noagta maparungtal ya agawa, a mabetbet a naimatonan na totoo. Pinaoli nen Jesus si Lazaro, ya apat-agew lan inatey, diad imaton na dakel a maneermen, a seguradon kaiba ed saratan iray kapamilyaan, kakaaro, tan kakaabay di Lazaro. Saya so mapuersan tuloy ya ebidensya a si Jesus so imbaki na Dios kanian ag-itan balot imburi na saray relihyoson kabusol nen Jesus. Imbes, implano ran pateyen si Jesus tan si Lazaro! (Juan 11:17-44, 53; 12:9-11) On, makapanmatalek itayo a seguradon nagawa so kioli. Impaisulat na Dios iray agawan impamaoli nensaman ta pian naligliwa itayo tan napabiskeg so pananisia tayo.

Naligliwa Ka ed Ilalon Kikioli

10. Anto so makatulong ta pian naligliwa itayo ed saray salaysay na Biblia nipaakar ed kikioli?

¹⁰ Kasin pipirawaten mo so naligliwa sano nipapaarap ka la ed ipapatey? Segurado a makaligliwa iray salaysay na Biblia nipaakar ed kikioli. No basaen, dalepdepen, tan ilitratom ed kanonotan mo iray ebento ed saratan a salaysay, lalon magmaliw a tudtua ed sika so ilalon kikioli. (Roma 15:4) Aliwa irayan istorya labat. Peteg ya agawa iratan ed tuan totoo a singa sikatayo, a nambilay ed peteg a panaon tan pasen. Singbaten tayon antikey so sakey ya alimbawa​—say primeron impamaoli a nisulat diad Biblia.

11, 12. (a) Anto so makapasinagem ya agawa ed balon bii diad Zarepta, tan panon so inkiwas to ed primero? (b) Deskribien pa no anto so makapakelaw ya impagawa nen Jehova ed si propeta Elias parad say balon bii.

¹¹ Ilitrato pa ed kanonotan so agawa. Diad loob na pigaran simba, si propeta Elias et pinarawes tan nanayam ed silir ed tagey na abung na sakey a balon bii diad Zarepta. Makapasinagem iman a panaon lapud say lugar da et asabian na kelang tan eras, tan dakel so ompapatey. Inusar la nen Jehova si Elias a manggawa na sakey a milagron walaay manbayag ya epekto ta pian tumangan so pananisia na sayan mapaabeban balo. Diad saman et sikato tan say malangwer nin anak ton laki so magano lan naerasan, lapud say akeran abasto ra et parad sakey labat lan panangan. Kanian, si Elias so inikdan na Dios na pakayarin manggawa na milagro ta pian ag-iran balot naupotan na abaston arina tan larak. Balet, walay makapaermen ya agawa ed saman a balo. Nansakit so anak to, tan agnambayag et inatey. Agaylan makapasinagem itan parad sayan balo!  Mair-irap la lanti ed sikato so manbilay ya andian na biskeg tan suporta na sakey ya asawan laki, insan inatey ni so alenleneg ya anak to. Lapud pirmin paneermen to, tinetel to ni ingen si Elias tan say Dios a Jehova! Anto so gawaen na propeta?

¹² Agbinaat nen Elias so balon bii lapud saray intetel to. Imbes, oniay imbaga to: “Iter mo ed siak so anak mo.” Inawit nen Elias so inatey ya ugaw diad silir to, tan sikatoy aminpigan nampikasi ya ombilay komon so ugaw. Diad saman et kinmiwas si Jehova! Isipen pa so panlikliket nen Elias sanen anengneng to so ugaw a linminawa, tan inmurikat to iray mata to, a mabilabilay iratan. Inawit nen Elias so ugaw ed ina to tan oniay imbaga to: “Nengnengen mo, say anak mo mabilay.” Agnadeskribe so liket na balon bii, ya oniay imbaga to: “Natan amtak a sika so laki na Dios, tan say salita nen Jehova dia ed sangim sikato so tua.” (1 Arari 17:8-24) Lalon binmiskeg so pananisia to ed si Jehova tan ed ibabaki To.

13. Akin a makapaligliwa ed sikatayo natan so salaysay nipaakar ed impamaoli nen Elias ed anak na balon bii?

¹³ Makaligliwan tuloy so pandalepdep ed sayan salaysay. Agaylan mabitar a sarasarag nen Jehova a daegen so kabusol tayo, salanti, say ipapatey! Isipen pa met so panaon sano sayan panlikliket na balon bii et nalikna met la na dakerakel a totoo diad inkalapagan a pamaoli ed saray inaatey! Wala met so pirmin liket diad tawen legan a panliliketan nen Jehova ya iwanwan so Anak to a mamaoli ed saray inaatey diad sankamundoan. (Juan 5:28, 29) Wala kasi pinabpabli yon naandi ed bilay? Agaylan makapaliket a naamtaan a nayarian nen Jehova a bilayen iray inaatey!

Say Ilalom tan Say Kabibilay Mo Natan

14. Panon a mangapekta ed bilay mo so ilalon kikioli?

¹⁴ Panon a mangapekta so ilalon kikioli ed paraan na kabibilay mo natan? Napabiskeg ka ed sayan ilalo sano nipaarap ka ed saray kairapan, problema, panamasegsegang, odino kapeligroan. Labay nen Satanas a napagyaw ka ed ipapatey, a mabulos mo lan isalat so katooran mo ed anggapoy kakanaan a sipan ya inkaligen. Tandaan so imbaga nen Satanas ed si Jehova: “Amin a say too wala ed sikato iter to nipaakar ed bilay to.” (Job 2:4) Sanen imbaga itan nen Satanas, amin a too so dederalan to, pati sika. Tua kasi ya ontunda ka lan manlingkor ed Dios sano nipaarap ka ed kapeligroan? No morekdeken mo so ilalon kikioli, lalon ombiskeg so determinasyon mon mantultuloy a manggawa na linawa na Ama tayo ed tawen.

15. Panon itayon naligliwa ed saray salita nen Jesus ed Mateo 10:28 no nipaarap itayo ed kapeligroan?

¹⁵ Oniay imbaga nen Jesus: “Agyo takotan so saray mamatey na laman, ya agda met nayarian  a pateyen so kamarerwa: takotan yo ingen so samay makayarin mamatey na laman tan say kamarerwa ed impierno [“Gehenna,” NW].” (Mateo 10:28) Nepeg ya agtayo ontakot ed si Satanas odino ed saray totoon uusaren to. Tua, arum so nayarin walaan na pakayarin mamasakit, odino mamatey ni ingen. Balet, temporaryo labat iratan a nagawaan da. Nayarian nen Jehova ya ipawil so antokaman a naandi ed saray matoor a lingkor to, anggan say pamaoli ed sikara. Si Jehova lambengat so manepeg tayon takotan, pati say aralem a panangigalang tan respeto tayo. Sikato labat so walaan na pakayarin mamaandi na bilay tan ed amin ya ilalo ed arapen, a nayarian ton deralen so laman tan kamarerwa diad Gehenna. Balet, makapaliket ta aliwan ontan so labay nen Jehova a nagawa ed sika. (2 Pedro 3:9) Lapud kikioli, sikatayo ran lingkor na Dios so lawas walaan na seguradon ilalo. Manbilay itayo na andi-anggaan diad arapen no manmatoor itayo, tan anggapo so nagawaan nen Satanas tan saramay ontutumbok ed sikato.​—Salmo 118:6; Hebreos 13:6.

16. Panon a mangapekta so ilalon kikioli ed saray iletneg tayon prayuridad?

¹⁶ No petepeteg ed sikatayo so ilalon kikioli, umanen na satan so awawey tayo nipaakar ed bilay. Amta tayo a “mabilay itayo man odino ompatey itayo, kien itayo na Katawan.” (Roma 14:7, 8) Diad pangiletneg tayo ed saray prayuridad tayo, nepeg sirin ya iyaplika so simbawa nen Pablo: “Agkayo miaabobon unong ed sayan mundo: noag ingen manguman kayo lapu ed kapasimbalo na kanonotan yo, pian nasali yo no anto so maong, tan makapaliket, tan nasnaspot a linawa na Dios.” (Roma 12:2) Labay na dakel a totoo a napenek a tampol so kada pilalek, ambisyon, tan pirawrawat dan nagawa. Lapud ipapasen dan antikey labat so bilay, sikara so desperadon manggegemtan na liket, tan no walay relihyon da, seguradon ag-itan mitunosan ed “nasnaspot a linawa na Dios.”

17, 18. (a) Panon ya impabitar na Salita nen Jehova ya antikey so bilay na too, balet anto so labay na Dios parad sikatayo? (b) Akin a napakiwas itayon mangidayew ed si Jehova diad inagew-agew?

¹⁷ Tua, say bilay et antikey. ‘Satan so napaso a magano, tan ontekkiab la,’ a nayarin manga 70 odino 80 a taon. (Salmo 90:10) Maganggano so bilay na too a singa say birdin dika, anino ya onlabas, tan singa sengaw. (Salmo 103:15; 144:3, 4) Balet ag-inggagala na Dios a manbilay tayo labat na pigaran dekada, ya ombaleg tan makagamor na kakabatan tan eksperiensya, insan diad ontumbok iran dekada et onletey tan mansakit anggad ompatey. Pinalsa nen Jehova iray totoo a walaan na pilalek a manbilay na andi-anggaan. Ibabaga ed sikatayo na Biblia: “Impasen to so kaandoan ed puso ra.” (Eclesiastes 3:11) Kasin maruksa so Dios, ya iter to itan a pilalek insan agmet lanlamang nagawa? Andi, ta “say Dios sikato so aro.” (1 Juan 4:8) Diad panamegley na kikioli et ipagamor to so bilay ya andi-anggaan ed saray totoon inaatey.

¹⁸ Lapud ilalon kikioli, walaan itayo na maligen ya arapen. Nepeg ya ag-itayo bengatbengat, a dampoten tayon tampol so amin a labay tayon pagmaliwan natan. Agtayo nakaukolan ya “alabas” ya usaren iyan manpapanabos lan mundo. (1 Corinto 7:29-31; 1 Juan 2:17) Aliwan singa saramay andian na peteg ya ilalo, walaan itayo na alay abig a langkap, salanti, say pakaamta tayo a no manmatoor itayo ed si Jehova a Dios et sikato so magnayon a nidayew tayo legan tayon panggagayagaan so bilay. Idayew tayo sirin si Jehova diad inagew-agew, lapud ipapaseguro to a talagan nagawa so kikioli!

Panon Yon Ebatan?

• Anto so nepeg a liknaan tayo nipaakar ed ilalon kikioli?

• Antoray rason no akin a seguradon nagawa so ilalon kikioli?

• Panon kan naligliwa ed ilalon kikioli?

• Anto so epekto na ilalon kikioli ed paraan na kabibilay mo?

[Tepetepet Parad Panagaral]

[Litrato ed pahina 28]

Amta nen Job a pilalek nen Jehova a paolien iray matunong

[Litrato ed pahina 29]

“Nengnengen mo, say anak mo mabilay”