Anggapo Ta Lay Nagawaan Nipaakar ed Kaugsan?

Sakey a mausisan ugaw so anokdok ed sakey a bengatla​—a pasabog manaya​—tan manlapud la’d saman et sikatoy abulag tan apukol. Sakey ya ina so angitilak tan angiyamot ed kapangiyanak to diad sakey ya abunton a basura ed gilig na dalan. Sakey a sinisantin empleyado so amawil ed datin pantratrabahoan to, pinapaltog toy amin ya anengneng to, insan to insublay so inkasikato. Sakey a lakin respetado so seksual a mangaabuso ed saray ugugaw ya agbalot makalaban.

MAKAPAERMEN ta ordinaryo labat la natan iray ontan a balita nipaakar ed kaugsan. Balet say mas makapaermen et wala niray mas grabe nen saratan, salanti, saray balita nipaakar ed turobos ya impamatey ed sakey a rasa odino tribu, tan say terorismo. Lapud saray agawa ed koma-20 a siglo a grabe la ed inkauges, oniay inkuan na sakey a palapagan nen 1995: “Saya et siglo nen Satanas. Natan ni labat agawa a saray totoo et marundunong tan napnapgaan a mamatey ed minilyon a totoo nisesengeg ed rasa, relihyon, odino kipapasen na panagbilay.”

Nilikud ni ed satan et dudutakan na katooan so dagem tan dalin, uupoten daray yaman to, tan ngalngali da la nasimot so amayamay a klase na ayep. Sarag kasi na katooan a daegen so amin na sarayan kaugsan diad ontan et magmaliw a mas maabig tan mas maligen a pasen iyan mundo? Odino no gawaen da itan et singa ra labat mangaamper na daluyon? Oniay inkuan na sakey a propesor a dakdakel lay insulat to nipaakar ed kaugsan: “Nampelengan kon maong ya umanen so mundo, pian paaligwasen so mundo. Balet, anggapoy nanenengneng kon panguumanan na satan.” Nayarin ontan met so naliliknam.

Sayan mundo et niyaliling ed sakey a barkon manlalayag ed kadayatan a lalon ompipiligro tan makapataktakot ed kada agew. Anggapoy malabay a mamaarap ed satan a direksion, balet ta dire-diretso lan onsusuba so barko ed makmaksil a bagyo. Agla napatunda, anggano pinasya lay pangakabig ed satan.

Walay kontribusyon na ag-inkaperpekto na too ed iderenden na kaugsan. (Roma 3:23) Balet, ompatnag a say inkagrabe tan inkalaknab la na kaugsan et agnagawaan na totoo lambengat. Posibli kasin walay mabisbiskeg tan mauge-uges a puersan agnanengneng a mangimamaneobra ed katooan? No wala, anto kasi itan, tan panon tayon naprotektaan so inkasikatayo? Naebatan irayan tepet ed ontumbok ya artikulo.

[Picture Credit Line ed pahina 3]

© Heldur Netocny/Panos Pictures