Niwalwal so Lapuan na Kaugsan!

NEN unonan siglo, amayamay a Judio so manatalaran ed isabi na insipan a Mesias. (Juan 6:14) Sanen sinmabi Jesus, sikatoy angiter na ligliwa tan impaliwawa to so Salita na Dios. Sikatoy amaabig na saray mansasakit, amakan na saray narasan, amatunda na bagyo tan amakalma na dayat, amilay ni ingen na inaatey. (Mateo 8:26; 14:14-21; 15:30, 31; Marcos 5:38-43) Intongtong to met iray bilibilin nen Jehova tan imparungtal toy sipan ya andi-anggaan a bilay. (Juan 3:34) Diad saray imbaga tan ginawa to, sigpot ton pinaneknekan a sikato so Mesias, say mangibulos ed katooan manlapud kasalanan tan amin a mauges ya epekto na satan.

Say iilaloan a manunaan komon a mangabrasa tan ondengel ed si Jesus, tan maliket a mangawat ed saray ganggan to, et saray Judion lider na relihyon. Balet aliwan ontan so agawa. Ta sikatoy binusol, pinasegsegang, tan nankokomplotan dan impapatey!​—Marcos 14:1; 15:1-3, 10-15.

Manepeg labat a kinastigo nen Jesus irayan mauuges a totoo. (Mateo 23:33-35) Balet, binidbir ton wala ni arum a natetel ed inkauges da. Oniay inkuan to ed sikara: “Sikayo kien kayo na ama yo a Diablo, et saray kalikaliktan nen ama yo sikato so labay yo a gawaen. Sikato so akapatey nanlapu ed gapo, tan agtinmalindeg ed katuaan, ta anggapo ed sikato so katuaan. Bangno mansalita na tila, mansalita nipaakar ed kayarian to, ta sikato matila, tan ama na tila.” (Juan 8:44) Sirin, anggaman binidbir nen Jesus a nayarian na totoo so manggawa na kaugsan, impabitar to a say talagan lapuan na satan et si Satanas a Diablo.

Sanen inkuan nen Jesus a si Satanas so “agtinmalindeg ed katuaan,” inwalwal to a sayan espiritun pinalsa et datin matoor a lingkor na Dios balet ta agnansiansian ontan. Akin a nanrebelde si Satanas ed si Jehova? Lapud pinaulyanan ton ontubo ed liknaan to so alablabas a panangipasen ed dili anggad punton pinirawat to lay dayew a parad Dios lambengat. *​—Mateo 4:8, 9.

Diad hardin na Eden et apatnagan so inkarebelde nen Satanas sanen pinalikdo to si Eva a mangan na sebel a prutas. Lapud si Satanas so nanlapuan na unona-unan tila tan pinauges to si Jehova, ginawa toy inkasikato ya “ama na tila.” Sakey ni, diad impanagyat to ed si Adan tan Eva ya onsugnar, ginawa to ran makasalanan, a diad kaunoran et nanresulta ed impatey da tan say amin a magmaliw ya ilalak da. Pinagmaliw met sirin nen Satanas so inkasikato a ‘managpatey,’ say makapataktakot ed amin a managpatey!​—Genesis 3:1-6; Roma 5:12.

Akasabi ni ingen ed saray espiritun pinalsa so mauges ya impluensya nen Satanas, ta sinagyat to met so arum ya anghel a manrebelde. (2 Pedro 2:4) Singa si Satanas, naninteres met ed katooan irayan mauges ya espiritu. Balet, say naninteresan da et say seksual a pirelasyon ed sikara, a saya et mabanbanday, tan nanresulta ed kaugsan tan baleg a deral.

 Apanoy Kaugsan so Dalin

Oniay ibabaga na Biblia: “Et agawa a sanen ginmapo so totoo ya ondarakel . . . tan nianak ed sikara so bibii ya anak, ya anengneng na saray lalaki ya anak na Dios so bibii ya anak na saray totoo a mararakep ira, et inala da ra ya asawa ra so amin ya apili ra.” (Genesis 6:1, 2) Siopa irayan “anak na Dios” ey? Aliwa irayan totoo, noagta espiritun pinalsa. (Job 1:6; 2:1) Panon tayon amta? On ta 1,500 lan taon a mangaasawa tan miaasawa so katooan balet ta agmet itan nagmaliw ya isyu. Kanian, malinlinew a sanen nipaimano so impiakdol na ‘lalakin anak na Dios’ a nansulong na laman na too, ed inaala ran ‘bibii ya anak na totoo,’ say natutukoy et sakey a bengatlan aliwan normal tan diad saman labat agawa.

Apekderan ed saray nagmaliw ya ilalak da, a tinawag a Nefilim, a say ginawa ra et aliwan normal. Sarayan mistison too tan anghel et nagmaliw a higante. Sikara met so ari-ari diad dalin. Diad tua, say terminon “alan” odino Nefilim et mankabaliksan na “Manangitumba,” odino “saramay manangibuang ed arum.” Sarayan bubusangel so nideskribe a “mabibiskeg . . . a totoo nen una a panaon, lalaki ra a nibanbantog.”​—Genesis 6:4.

Pinaloor na sarayan Nefilim tan say kaamaan da so kaugsan. Oniay inkuan na Genesis 6:11: “Say dalin met inmuges nen saman ed arap na Dios . . . napno nensaman na karawalan.” On, inalig met na saray katooan so inkabayolenti tan inkauges na saraman a balon sabi.

Akin et mabisbiskeg so mauges ya impluensya na saray Nefilim tan say kaamaan da ed saray totoo? On, ta titiraen da ray totoo ed saray kakapuyan tan pilpilalek da. Antoy resulta ey? “Amin a laman pinauges to so kagagawa to ed dalin.” Diad saginonor, dineral nen Jehova itan a mundo panamegley na sankamundoan a Delap. Say inkera to labat et say matunong a Noe tan say pamilya to. (Genesis 6:5, 12-22) Sarayan anghel balet et impawil da lamet so espiritun laman da, balet ta kababaing lara. Lapud nipabpaabeba ira diad impagmaliw dan demonyo, agda la tinundaan a kinalaban so Dios tan saray matunong tan matoor ya angheles to. Ompatnag a nanlapu la’d saman et sinebelan la na Dios irayan mauuges ya anghel a mansulong na lamay too. (Judas 6) Balet, siansia nin makmaksil so impluensya ra ed katooan.

Niwalwal no Siopa Imay Mauges!

Diad 1 Juan 5:19 et niparungtal so kalaknab na mauges ya impluensya nen Satanas. Inkuan na satan: “Say sankamundoan mandokdokol ed [“pakayari na,” NW] kaugsan.” Imamaneobra na Diablo iray kipapasen pian lalon manirap iray totoo. Diad tua, sikatoy mas mamapasya natan a manggawa na kaugsan nen say nensaman. Akin? Lapud sanen niletneg so Panarian na Dios nen 1914 et sikatoy pinaekal ed tawen kaiba iray demonyo to. Tan nipaakar ed satan et oniay impasakbay na Biblia: “Kasi lara so dalin . . . , ta say diablo inmakseb ed sikayo, a wala ed baleg a sanok to, ya amta to a daiset la so panaon to.” (Apocalipsis 12:7-12) Panon ya iimpluensyaan nen Satanas so katooan natan?

Say manunan paraan nen Satanas et say pangisusugsog to na sakey ya awawey a mangimaneobra ed kakikiwas tan panagnonot na totoo. Kanian, diad Efeso 2:2 et tinawag so Diablo a “pangulo na pakayari dagem, na espiritu [odino, ugali na karaklan] a natan manggawa ed saray anak na kasusumpa.” Say ipapaseseg na  sayan denidemonyon “dagem,” et say panagsumlang ed Dios tan ed saray estandarte to, imbes a say itakot ed sikato tan say panggawa na maabig. Ilalagyat tan papalooren sirin nen Satanas tan saray demonyo to iray kaugsan a gagawaen na totoo.

“Alwaran Moy Pusom”

Say sakey a klase na sayan “dagem” et say salot a pornograpiya, a liingen toy agmanepeg iran seksual a pilalek tan gawaen ton makapaayat iray aliwan normal a kagagawa. (1 Tesalonica 4:3-5) Say panag-rape, inkasadista, gang rape, pisesekso ed ayep, tan seksual a panag-abuso ed saray ugugaw et pigara labat ed saray teman papapawayen na pornograpiya a makapaliket. Anggan saramay aliwan ontan kagrabe iran klase na pornograpiya et makapaadik tan apektaan to iramay manbantay, onnengneng odino manbasa ed saratan. Gawaen to ran managsiim tan nailuam ed masekreton panagbantay na saray kabandayan. * Sakey iyan kaugsan a maneral ed relasyon ed kaparan too tan ed Dios. Ipapatnag na pornograpiya so mabanbanday a panagnonot na saramay demonyon mangilalagyat ed satan​—saramay rebelde a sani nen antis na Delap ed panaon nen Noe a ginmapoy agmanepeg a seksual a pilalek da.

Kanian onia so bilin na makabat a toon si Solomon: “[“Alwaran,” NW] mo so pusom ed amin a seet; ta manlapu ed sikato so saray agus na bilay.” (Uliran 4:23) Diad sakey a paraan, niyaplikam iya no protektaan moy pusom ed tukson pornograpiya. Nayarin kaukolan ed satan ya iyalis moy channel na TV odino erepen moy kompyuter sano walay omparungtal a makapaayat ed sekso. Tan importante a gawaen mon tampol itan tekep na determinasyon! Ipasen mon sakey kan sundalo ya onlilikir ed balan impunting ed pusom. Puntirya tan labay a deralen nen Satanas so pusom, say mamapakiwas ed sika tan lapuan na amin a pilpilalek mo.

Kaukolan mo met a bantayan so pusom pian agto naaro so inkabayolenti, lapud amta na Diablo a ‘say labalabay toy karamsakan [odino inkabayolenti] et gulaen [nen Jehova].’ (Salmo 11:5) Agla kaukolan nen Satanas a gawaen ka nin bayolenti pian busolen ka na Dios. Sugsugan to ka labat a mangaro ed satan. Agpankelawan a dakdakel iray palabas tan babasaen a bayolenti tan alaokan na mahiko. Talagan anggano abayag lan inatey iramay Nefilim et mabilabilay ni so ug-ugali tan kagagawa ra! Natan, kasin ipapatnag mon papaliisan mo ray patit nen Satanas sano mamipili kay bantayan odino basaen?​—2 Corinto 2:11.

 No Panon a Nalabanan so Mauges ya Impluensya nen Satanas

Nayarin ompatnag ya alay irap a taloen iray mauges a puersa. Ipapabitar na Biblia a saramay manggugunaet a mamaliket ed Dios et “onsumpa . . . ed saray mauges ya espiritu,” nilikud ni ed pilaban da ed dili ran ag-inkaperpekto. Pian manalo itayo tan naala tayoy pabor na Dios, kaukolan ya awaten tan usaren tayoray amin a tulong ya iiter to.​—Efeso 6:12; Roma 7:21-25.

Kabiangan ed saratan a tulong so masanton espiritu na Dios, say sankabiskegan a puersa ed uniberso. Oniay insulat nen apostol Pablo ed saray Kristiano nen inmunan siglo: “Inawa’tayo, aliwan say espiritu na mundo, noag say espiritu a manlapu ed Dios.” (1 Corinto 2:12) Saramay iwawanwan na espiritu na Dios et aroen da so aaroen na Dios tan busolen da iray bubusolen to. (Amos 5:15) Panon balet a makaawat na masanton espiritu so sakey? Manuna et diad panamegley na pikakasi, panagaral na Biblia lapud say Biblian mismo et produkto na masanton espiritu, tan say pilimog ed saramay peteg a mangaaro ed Dios.​—Lucas 11:13; 2 Timoteo 3:16; Hebreos 10:24, 25.

Sano awaten tan usaren mo irayan tulong na Dios, aliling to et ‘isusulong [mo la] so sankabukel a kinlong [to],’ a sikato’tan labat so seguradon proteksion ed “saray pangalot na Diablo.” (Efeso 6:11-18) Mas kakkaukolan natan ya usaren mo so amin na saratan. Akin balet ey?

Asingger lay Panampot na Kaugsan!

“Nayarin ombaleg a singa dikarika iray totoon mauges, tan onaligwas iray amin a managgaway kaugsan; anggaman ontan, sigpot so kaderal da,” so inkuan na salmista. (Salmo 92:7, Maung a Balita) On, singa met ed panaon nen Noe, sayay iga-grabe na kaugsan natan et ebidensya ya asingsingger lay pangukom na Dios ed aliwa labat lan saray mauges a katooan, noag ontan met ed si Satanas tan saray demonyo to. Ibantak ed kaaralman si Satanas tan saray demonyo to a ditan et magmaliw a singa inatey so kipapasen da insan diad kaunoran et deralen ira. (2 Timoteo 3:1-5; Apocalipsis 20:1-3, 7-10) Siopa so manggawa ed satan? Anggapo lay arum noag si Jesu-Kristo, ya oniay nabasa tayo nipaakar ed sikato: “Lapu ed saya pinmanengneng so Anak na Dios a maneral na saray gawa na Diablo.”​—1 Juan 3:8.

Pirawrawat mo la kasin naandi so kaugsan? No on, naligliwa ka sirin ed saray sipan na Biblia. Anggapo lay arum a libron mangiwawalwal ed talagan lapuan na kaugsan, si Satanas, tan anggapo met lay arum a libron mangibabaga no panon so kaderal to pati amin a kaugsan to. Papasesegen mi kan manaral na Biblia pian naprotektaan moy inkasika ed saray mauges ya impluensya nen Satanas natan tan pian nisegurom so pakapanayam mo ed sakey a mundon anggapo lay kaugsan.​—Salmo 37:9, 10.

[Saray paimano ed leksab]

[Kahon/Litrato ed pahina 6]

Alamat Iran Walay Daiset a Katuaan To

Diad sankamundoan, walaray alamat nipaakar ed saray kapalduan-dios-kapalduan-too, higante, tan baleg a delap. Alimbawa, say alamat na saray Akkad nipaakar ed si Gilgamesh et manasalambit ed sakey a delap, barko, tan saray akaliktar. Si Gilgamesh a mismo et nideskribin sakey a kapalduan-dios-kapalduan-too a masebesebeg tan nigalet ed sekso. Say alamat na saray Aztec so manasalambit met ed sakey a mundo nensaman a nanayaman na saray higante tan ed sakey a baleg a delap. Atukoy met ed alamat na saray taga-Norway so sakey a poli na saray higante tan sakey a makabat a too a manngaran na Bergelmir, a nanggawa na baleg a baloto ya akaliktaran to tan say asawa to. Pepekderan na amin na sarayan alamat so ibabaga na Biblia ya amin a too et nanlapud saramay akaliktar ed baleg a delap ya aneral ed mauges a mundo nensaman.

[Litrato]

Say langan akasulatan na alamat nipaakar ed si Gilgamesh

[Credit Line]

The University Museum, University of Pennsylvania (neg. # 22065)

[Litrato ed pahina 5]

Napatnagan ed saray totoo natan so ug-ugali na saray Nefilim

[Litrato ed pahina 7]

Pabiskegen itayo na suston kakabatan a resistian iray mauges ya impluensya