Onaaligwas Ira ed Espiritual Anggaman Ubanan la

‘Saraman so nitanem ed loob na abung nen Jehova et manbunga ni ran siansia ed inkamasiken da.’​—SALMO 92:13, 14.

1, 2. (a) Panon so mabetbet a panedeskribe ed inkatatken? (b) Anto so insipan na Kasulatan nipaakar ed saray epekto na kasalanan nen Adan?

 INKATATKEN​—antoy ipapanonot ed sikayo na satan a balikas? Kumanet lan baog? Makapuy lan layag? Mankalog laran pueg? Odino arum nin pakapatnagan na “saray mauges ya agew” a malinlinew ya adeskribe diad Eclesiastes 12:1-7? No ontan, importantin nonoten a say deskripsion diad Eclesiastes kapitulo 12 et nipaakar ed itatatken, a satan et aliwan orihinal a gagala na Manamalsa, si Jehova a Dios, noagta epekto itan ed laman na too sanen nankasalanan si Adan.​—Roma 5:12.

² Aliwan sakey a samba so mismon itatatken, lapud say pantultuloy a pambilay et mankaukolan na ilabas na saray taon. Diad tua, say ibaleg tan itatken et maabig a kabiangan na inkagawa na amin a mabilay a bengatla. Saray nanenengneng tayo a makapuy ya epekto na kasalanan tan ag-inkayadyari ed loob na anem libo lan taon et magano lan naandi, tan panggayagaan la na amin a matulok a totoo so bilay, unong ya ontan so orihinal a gagala, ya anggapoy naliknan ot-ot na itatatken tan ipapatey. (Genesis 1:28; Apocalipsis 21:4, 5) Diad satan a panaon, “say manaayam agto naani ikuan, Mabeblay ak.” (Isaias 33:24) Saray mamasiken tan akukulaw so ompawil ed saray agew na “kaugawan” da, tan say laman da et magmaliw a “tadtariwa nen say laman na ugaw.” (Job 33:25) Balet, kaleganan ni, kaukolan a mipuligesgesan so amin a too ed kasalanan ya atawir ed si Adan. Ingen ta nagugunggonaan iray lingkor nen Jehova ed nikadkaduman paraan legay itatatken da.

3. Panon a ‘manbubunga nin siansia iray Kristiano ed inkamasiken da’?

³ Papaseguroan itayo na Salita na Dios a ‘saraman so nitanem ed loob na abung nen Jehova et manbunga ni ran siansia ed inkamasiken da.’ (Salmo 92:13, 14) Diad piguratibon panagsalita, indatak na salmista so manunan katuaan a saray matoor a lingkor na Dios so makapantultuloy ya ombaleg, ombulaslas, tan onaligwas ed espiritual, anggaman onkakapuy ira ed pisikal. Paneknekan iya na dakel ya ehemplo ed Biblia tan ed modernon panaon tayo.

“Agla Onaalis”

4. Panon ya impatnag na akulaw lan propetesan Ana so debosyon to ed Dios, tan panon a sikatoy atumangan?

⁴ Konsideraen pa si Ana a propetesa nen inmunan siglo. Sikatoy 84 años la, ingen ta “agla onaalis ed templo a manlilingkor ed labi tan agew pati panag-ayunal tan pikakasi.” Lapud say ama to et aliwan Levita a “poli nen Aser,” sikato so agmakapan-ayam diad mismon templo. Kanian isipen pa so pirmin impansagpot to pian inagew-agew a makakar ed templo, manlapud kabuasan  ya anggad labi a panaglingkor! Lapu ed sayan debosyon to et daakan a tumang so agamoran to. Sikatoy apribilehyoan a makaimaton ed impangawit nen Jose tan Maria ed ugaw nin Jesus diad templo pian ipresenta ed si Jehova unong ed Ganggan. Kanengneng nen Ana ed si Jesus, sikatoy “akisalamat ed Dios, [tan] nansalita nipaakar ed ugaw ed saray amin a manaalagar na karondon na Jerusalem.”​—Lucas 2:22-24, 36-38; Numeros 18:6, 7.

5, 6. Diad antoran paraan a dakel a maedad la natan so walaan na awawey a singa si Ana?

⁵ Dakel a maedad la ed limog tayo natan so mipadpara ed si Ana diad regular ya iyaatendi ra ed pantitipon, masimoon a pampipikasi ra parad iyaligwas na tuan panagdayew, tan agnapokpokan a pilalek dan mangipulong na maong a balita. Oniay inkuan na sakey ya 80 años lan agi a regular a miaaral a kaibay akulaw to: “Niyugali mi la so miaral. Anggapo lay arum a pasen a labay min laen. No iner so kawalaan na totoo na Dios, labay mi a wadman kami. Diman et anggapoy paga mi.” Agaylan makapaseseg ya ehemplo parad amin!​—Hebreos 10:24, 25.

⁶ “No walay antokaman ya aktibidad nipaakar ed espiritual tan sarag koy mibiang, labay kon gawaen itan.” Ontan so prinsipyo nen Jean, a sakey a Kristianon balo a masulok lan 80 años. “Tua a walaray panaon a maermen ak, balet agla kaukolan a manermen met iray kalimog ko,” so inkuan to ni. Maliwliwawa iray mata to legan ton ibabalikas so liket to ed ibibisita ed arum a pasen pian makapibiang ed saray aktibidad a makapabiskeg ed espiritual. Diad agano nin impanbiahe to, oniay inkuan to ed saray kakaiba to: “Agko la labay so manpaspasyar; mas labay koy manpulong!” Anggaman agkabisado nen Jean so lenguahe ed lugar a nila ra, asagyat to so interes na totoo ed mensahe na Biblia. Nilikud ed satan, sikatoy pigay taon lan manlilingkor ed sakey a kongregasyon a mankaukolan na tulong, anggaman kakaukolanen ditan so panaral na balon lenguahe tan pambiahe na sakey oras kapagno onlan miaral.

Pansiansiaen ya Aktibo so Nonot

7. Anggaman masiken lay Moises, panon ton imbalikas so pilalek ton ombulaslas so relasyon to ed Dios?

⁷ Nagamoran so eksperiensya ed bilay diad ilalabas na panaon. (Job 12:12) Balet ta aliwan automatiko so iyaligwas ed espiritual legan ya ontatatken. Kanian, imbes a mandependi lambengat ed wala lan pikakabat ya agamoran diad apalabas, saray matoor a lingkor na Dios so manggunaet ya “onlalo ed bangat” legay ilalabas na panaon. (Uliran 9:9) Si Moises et 80 años la sanen pinabtangan nen Jehova na kimey. (Exodo 7:7) Diad panaon to, say ontan a karukey na edad et mapatnag ya ipapasen lan nikaduma, ta oniay insulat to: “Pitomplo a taon so dukey na pambilay mi, odino nisengeg ed kaksilan walomplo a taon.” (Salmo 90:10) Siansia ni, agbalot inisip nen Moises a sikatoy masiken lan maong pian makaaral. Kayari na pigaran dekadan impanlingkor to ed Dios tan impakawalaan to na dakel a pribilehyo tan ambelat iran responsabilidad, oniay inkerew to ed si Jehova: “Ipaimanom pa ed siak so saray dalan mo, pian napikabkabatan ta ka.” (Exodo 33:13) On, pilalek lawas nen Moises ya ombulaslas so relasyon to ed si Jehova.

8. Panon a pinansiansia nen Daniel ya aktibo so nonot to anggaman masulok to lan 90 años, tan antoray resulta?

⁸ Si propeta Daniel, a maseguron masulok to lan 90 años ed saman, so siansia nin maseet a manguusisa tan mandadalepdep ed masanton sulsulat. Say atalosan to diad impanaral to ed “saray libro”​—a posiblin kabiangan iray libro a Levitico, Isaias, Jeremias, Oseas, tan Amos​—so amakiwas ed sikato pian masimoon a manpikasi ed si Jehova. (Daniel 9:1, 2) Naebatan itan a pikakasi panamegley na nipuyan ya impormasyon nipaakar ed isabi na Mesias tan ed arapen na puron panagdayew.​—Daniel 9:20-27.

9, 10. Anto so ginawa na arum pian mansiansian aktibo so nonot da?

⁹ Singa si Moises tan Daniel, napansiansia tayo met ya aktibo so nonot tayo no say naynay tayon nonoten et saray maespiritual a bengatla legan a nasarag tayo. Dakel lay manggagawa na  ontan. Si Worth, a sakey a Kristianon matatken a masulok lan 80 años, so manggugunaet a mangamta ed sankabaloan iran espiritual ya impormasyon ya itatarya na “matoor tan makabat ya aripen.” (Mateo 24:45) Oniay inkuan to: “Talagan pinabpablik so katuaan, tan panlikliketan ko so pakakanengneng no panon a mantultuloy ya onliliwawa so katuaan. (Uliran 4:18) Ontan met, apaneknekan nen Fred, a masulok lan 60 a taon a manlilingkor a sigpot-panaon, a makapabiskeg ed espiritual so pangitongtong toy nipaakar ed Biblia ed saray kapananisiaan. “Kaukolan kon pansiansiaen a mabilay so Biblia ed nonot ko,” so inkuan to. “No napansiansiam a mabilay so Biblia, salanti, napagmaliw mon makabkabaliksan, tan no nitunos mo iray naaaralan mo diad ‘uliran na maabig iran salita,’ agmo lambengat naaralan so sinansakey a katuaan, noagta nanengneng mo met no panon karakep so dugarugan inkauksoy na kada sakey ed saratan.”​—2 Timoteo 1:13.

¹⁰ Aliwan rason so inkatatken pian agkayo la makaaral na balo tan mairap iran bengatla. Walaray manedad la na masulok a 60, 70, tan 80 ni ingen ya akaaral nin manbasa tan mansulat odino akaaral na balo iran lenguahe. Ginawa itan na arum a Tasi nen Jehova lapud labay dan ninabang so maong a balita diad saray totoon nandurumay nasyonalidad da. (Marcos 13:10) Alimbawa, si Harry tan say akulaw to et ngalngali la ra man-70 sanen denesidi ray manlingkor ed teritoryan Portuges. “Aksobien mi a talagan mairap so antokaman a kimey ed bilay no maedad ka la,” kuan nen Harry. Balet, lapud impansagpot tan impantultuloy da, sikaray makapangiyaaral la na Biblia diad lenguahen Portuges. Diad loob na dakel lan taon et si Harry so napapabtangan met a manpaliwawa ed distriton kombension diad balon lenguahe to.

11. Akin a nodnonoten iray nagagawaan na saray matoor a maedad la?

¹¹ Siempre, aliwan amin et makasarag a manggawa ed saratan a mairap a kimey lapud bunigas tan kipapasen da. No ontan, akin a konsideraen ni so nagagawaan na arum a maedad la? Aglabay ya ibaga na saya a pareparehon bengatla so nepeg a dampoten na amin. Imbes, mitunosan itan ed prinsipyo na sulat nen apostol Pablo ed saray Hebreon Kristiano nipaakar ed matoor iran manangasikaso ed kongregasyon: “Motektek yo no anto so asumpalan na impanbilay da, alig yo so pananisia ra.” (Hebreos 13:7) Sano motekteken tayo iratan ya inkaseseg da, napaseseg itayon mangalig ed mabiskeg a pananisia a mamapakiwas ed saray maedad la diad panlilingkor da ed Dios. Insalaysay nen Harry, ya 87 años la natan, no antoy mamapakiwas ed sikato, a kuanto: “Labay kon usaren ed sankaabigan so nakekeraan a taon ko pian magmaliw ak a mausa-usar anggad nayarian ko diad panaglingkor ed si Jehova.” Si Fred, ya asalambit met niman, so napepenek a maong ed panusumpal toy kimey to ed Bethel. Inkuan to: “Kaukolan mon anapen so sankaabigan a paraan a pakapanlingkor ed si Jehova tan mantultuloy ed satan.”

Matoor Anggaman Manguuman Iray Kipapasen

12, 13. Panon ya impatnag nen Barzillai so maridios a debosyon anggaman anguman lay kipapasen to?

¹² Nayarin mairap ya awaten iray pananguman ed pisikal. Balet anggan walaray ontan a pananguman, nipatnag nin siansia so maridios a debosyon. Nipaakar ed saya, si Barzillai a  Galaadita so maabig ya alimbawa. Diad edad ton 80, mabulbulos ton pinarawes si David tan saray sundalo to, ya intaryaan to ra na tagano tan pan-ugipan sanen nanrebelde si Absalom. Sanen ompawil la ra di David diad Jerusalem, impatnubang ira nen Barzillai anggad Ilog Jordan. Diad saman et inopresian nen David si Barzillai a manayam ed palasyo to. Inawat kasi itan nen Barzillai? Inkuan to: “Mantaon ak ed sayan agew na walomplo: . . . Nayarian na aripen mo a tawayan no anto so kanen ko odino anto so inumen ko? Nayarian ko ta ni a denglen so boses na mankankanta a laki tan mankankanta a bii? . . . Nia, si aripen mo a Camaam; sikato komon so mibasil ed katawan ko ya ari; et gawaen mo ed sikato so isipen mo a maong.”​—2 Samuel 17:27-29; 19:31-40.

¹³ Anguman lay sirkumstansya nen Barzillai, balet ta ginawa toy anggaay nayarian to pian suportaan so ari a tinuro nen Jehova. Anggaman binidbir to ya aliwa lan singa dati so pakataway tan pakadngel to, agto iratan nanermenan. Imbes, impatnag nen Barzillai so peteg ya inkatoo to sanen mabulos ton inrekomenda a si Camaam lay pangiteran na maabig iran bengatla a niyopresi. Singa si Barzillai, dakel a maedad la natan so agmangiyuuna ed dilin pankaabigan da tan mabunbunlok ira. Gagawaen day anggaay nayarian da pian suportaan so tuan panagdayew, lapud amta ra a ‘napaliket a maong so Dios ed saratan a bagat.’ Agaylan bendisyon so pakapilimog ed saray matoor a maedad la!​—Hebreos 13:16.

14. Panon a say inkamasiken nen David so amaaralem ed kabaliksan na saray balikas diad Salmo 37:23-25?

¹⁴ Saray kipapasen met nen David so aminpigan anguman diad inlabas na saray taon, balet sikatoy lawas kombinsido ya agbalot manguuman si Jehova ed pangaasikaso to ed saray matoor a lingkor to. Sanen magano lan manampot so bilay to, sikatoy nansulat na kanta a kabkabat natan bilang Salmo 37. Isipen pa a si David so aralem a mandadalepdep legan a mantotogtog na arpa tan kakansionen to irayan salita: “Saray kundang na too nauksoy ira lapu ed Jehova; et sikato so manliket ed dalan to. Anggano natumba, agnibalsak a tuloy; ta si Jehova sampaten to ed lima to. Tobonbalo ak nensaman, et natan masiken ak la: agko nin balot anengneng a say matunong et apaulyan, nisay saray bini to mipabpayabol na nakan.” (Salmo 37:23-25) Moriaen nen Jehova a matukoy ya ilaktip ed sayan impuyan a salmo so nipaakar ed inkamasiken nen David. Agaylan amaaralem itan ed kabaliksan na sarayan impapuson salita!

15. Panon ya impatnag nen apostol Juan so maabig ya alimbawa na inkamatoor anggaman anguman la iray sirkumstansya to tan minmasiken la?

¹⁵ Si apostol Juan so sananey nin maabig ya alimbawa na inkamatoor anggaman anguman la iray sirkumstansya to tan minmasiken la. Kayari na ngalngalin 70 a taon ya impanlingkor to ed Dios, sikato so nibantak diad isla na Patmos “lapud impansalita to nipaakar ed Dios tan impantasi to ed si Jesus.” (Apocalipsis 1:9, NW) Balet ta agni asumpal so kimey to. Diad tua, amin a libro ed Biblia ya insulat nen Juan so insulat to diad unor la ran taon na bilay to. Legan a walad Patmos, nipanengneng ed sikato so makapakelkelaw a pasingawey ed Apocalipsis, a maal-alwar ton insulat. (Apocalipsis 1:1, 2) Inisip na karaklan a sikatoy imbulos manlapud inkibantak to legan na uley na Romanon Emperador a si Nerva. Diad saginonor, nen manga 98 C.E., insulat nen Juan so Ebanghelyo tan say taloran nantutumbokan a sulat ya inngaran ed sikato, a diad saman et nayarin sikatoy 90 odino 100 años la.

 Agnalingwanan ya Ehemplo na Panagtepel

16. Panon a nipapatnag na arum so debosyon da ed si Jehova anggaman makapuy lay pakadngel da tan naiirapan la ran mansalita?

¹⁶ Nanduruma so nengneng tan laknab na saray limitasyon na balang sinansakey. Alimbawa, saray arum et makapuy lay pakadngel da tan naiirapan la ran mansalita. Balet ta il-iliwen da nin siansia iramay panaon a naeksperiensya ra so panangaro tan agkanepegan a panangasi na Dios. Anggaman agda la nibalikas so amin a labay dan ibaga, diad puso ra et oniay ibabaga ra ed si Jehova: “O agayla so panangarok ed ganggan mo! Sikato so dalepdep ko ed amin ya agew.” (Salmo 119:97) Kabat a mismo nen Jehova iramay ‘mannononot ed ngaran to,’ tan natetebek to so baleg a pidumaan da ed karaklan a totoo a mangibabaliwala ed saray dalan to. (Malaquias 3:16; Salmo 10:4) Agaylan makaligliwan naamtaan a panliliketan nen Jehova iray dadalepdepen na puso tayo!​—1 Awaran 28:9; Salmo 19:14.

17. Anto so nikadkaduman agawaan la na saray abayag lan manlilingkor ed si Jehova?

¹⁷ Nepeg ya agmet lingwanan a walay nikadkaduman bengatla ya agawaan na saramay matoor a manlilingkor ed si Jehova ed loob na dakel lan taon, ya ag-itan balot nagawaan ed anggan anton paraan, salanti, say agnalingwanan ya ehemplo na panagtepel. Oniay inkuan nen Jesus: “Dia ed pantepel yo natalima yo naani kamarerwa yo.” (Lucas 21:19) Importante so panagtepel pian nagamoran so bilay ya andi-anggaan. Sikayoran ‘manggagawa la na linawa na Dios’ tan siansia nin manmamatoor diad panamegley na kabibilay yo so makapanilalon mangawat ed “[kasumpalan na] sipan.”​—Hebreos 10:36.

18. (a) Anto so panliliketan nen Jehova a nanengneng nipaakar ed saray maedad la? (b) Anto so aralen tayo diad ontumbok ya artikulo?

¹⁸ Papablien nen Jehova so interon-puso a panlilingkor yo, dakel man odino daiset so nagagawaan yo. Antokaman so manguuman ed ‘akinpaway na too’ legan na itatatken to, say ‘akindalem na too’ so nayarin napasimbalo ed kada agew. (2 Corinto 4:16, 17) Segurado a papablien nen Jehova iray agawaan yo la diad apalabas, tan mas lalo a papablien to iray gagawaen yo natan parad ngaran to. (Hebreos 6:10) Diad ontumbok ya artikulo, konsideraen tayo so manbayag iran epekto na ontan ya inkamatoor.

Panon Yon Ebatan?

• Anton maabig ya alimbawa so impanengneng nen Ana ed saray maedad lan Kristiano natan?

• Akin a say inkatatken so agkaukolan a manlimita ed nagawaan na sakey?

• Panon a mantultuloy a nipatnag na saray maedad la so debosyon da ed Dios?

• Anto so panmoria nen Jehova ed panlilingkor ed sikato na saray maedad la?

[Tepetepet Parad Panagaral]

[Litrato ed pahina 23]

Atebek nen masiken lan Daniel diad “saray libro” no kaunongan kabayag so pakadestiero na Juda

[Saray litrato ed pahina 25]

Dakel a maedad la so maabig ya ehemplo ed regular ya iyaatendi ra ed pantitipon, maseseg a pampupulong da, tan magunaet a panaaral da