Saray Maedad La so Bendisyon ed Saray Kalangweran

“[Anggad sano] masiken ak la tan ubanan la so ulok, O Dios, agmo ak ikaindan, angga ed nipanengneng ko so biskeg mo ed onsublay a kailalakan, tan say pangipanengneng ko na pakayarim ed balang sakey ya onsabi.”​—SALMO 71:18.

1, 2. Anto so nepeg a namoria na saray maedad lan lingkor na Dios, tan anto so aralen tayo natan?

 SAKEY a Kristianon matatken ed Sagur ya Aprika so binmisita ed sakey a masiken lan alanaan ya agi tan tinepetan to, “Komusta kayo la?” Inmebat so agi, “Nia, sarag ko ni ombatik, onkitkit, onlugtot, tan onlukso,” a sasalien ton imari iratan legan ton ibabalikas. “Balet, agko sarag so ontekkiab,” so intuloy to. Atalosan na samay binmisita ed sikato so labay ton ibaga. ‘Labalabay kon gawaen so sarag kon gawaen, balet say agko sarag, agko gawaen.’ Saman a binmisita et masulok to lan 80 años natan, tan naiiliwan to so panagpaelek tan say katooran na samay alanaan ya agi.

² Say maridios iran kalidad ya ipapatnag na sakey a maedad la so walaan na manbayag ya epekto ed bilay na arum. Siempre, ag-automatikon niwala so kakabatan tan saray kalidad a singa ed si Kristo legan ya ontatatken. (Eclesiastes 4:13) Oniay imbaga na Biblia: “Say ulo ya ubanan so korona na karakpan sano naromog itan ed dalan na inkatunong.” (Uliran 16:31, NW) Sikayoran maedad la, kasin namomoria yo so baleg a nagugunggona na arum ed saray salita tan kakikiwas yo? Konsideraen pa so pigaran alimbawa ed Biblia a mangipanengneng no panon a saray maedad la et peteg a bendisyon ed saray malangwer ni.

Pananisia a Walaan na Manbayag ya Epekto

3. Anto so epekto na impanmatoor nen Noe ed amin a toon mabilay natan?

³ Say pananisia tan inkamatoor nen Noe so walaan na saray gunggona, ya anggad natan et  pinanabangan ni. Ngalngali lan 600 so taon nen Noe sanen nampaalagey na biong, nantipon na ayayep, tan nampulong ed totoo. (Genesis 7:6; 2 Pedro 2:5) Lapud walaan na takot ed Dios si Noe, sikato tan say pamilya to so akaliktar ed baleg a Delap, tan nagmaliw ya inmunan ateng na amin a totoon manaayam ed dalin natan. Tua a nambilay si Noe sanen andurukey ni so bilay na totoo. Balet anggan sanen masiken lan maong, sikatoy nansiansian matoor, tan nanresulta itan ed makanakana iran bendisyon. Diad anton paraan?

4. Panon a nagugunggonaan iray lingkor na Dios natan ed impanmatoor nen Noe?

⁴ Ngalngalin 800 la so taon nen Noe sanen ginapoan nen Nimrod ya impaalagey so tori na Babel bilang isusumpa ed ganggan nen Jehova a ‘makmakan so dalin.’ (Genesis 9:1; 11:1-9) Balet, ag-akibiang si Noe ed impanrebelde nen Nimrod. Kanian, maseguron agnauman so lenguahe to sanen awetwet so lenguahe na saramay nanrebelde. Say pananisia tan inkamatoor nen Noe, ya apatnagan aliwa labat diad inmasiken to noagta diad interon andukey a bilay to, so talagan alay abig ya aligen na amin a lingkor na Dios antokaman so edad da.​—Hebreos 11:7.

Say Impluensya Ra Diad Pamilya Ra

5, 6. (a) Anto so ingganggan nen Jehova ed si Abraham a gawaen to sanen 75 años to? (b) Panon so inkiwas nen Abraham ed ganggan na Dios?

⁵ Say impluensya na saray maedad la ed pananisia na saray kapamilyaan da so napatnagan ed bilay na saray patriarka kayari nen Noe. Si Abraham et 75 años la sanen oniay inkuan ed sikato na Dios: “Paway ka dia ed dalin mo, tan onarawi ka ed saray kakanayon mo, taynan ka ed abung nen amam ta onla ka ya angga ed sakey a dalin ya iturok ed sika. Tan dia ed sika so panggawaan ko na sakey a baleg a nasyon, tan papalaren ta ka.”​—Genesis 12:1, 2.

⁶ Isipen pa a sikay niganggan a taynanan so ayaman mo, kakaarom, bansan nianakan mo, tan say maligen a kipapasen na kapamilyaan mo tan sikay onla ed dalin ya agmo amta. Ontan a mismo so niganggan ed si Abraham. Sikatoy “sinmipot unong na imbaga nen Jehova ed sikato,” tan diad interon bilay to et sikatoy nanayam ed saray tolda bilang sankaili tan alis-alis diad dalin na Canaan. (Genesis 12:4; Hebreos 11:8, 9) Imbaga nen Jehova ed si Abraham a sikatoy magmaliw a “sakey a baleg a nasyon,” balet sikatoy abaybayag lan inatey antis a dinmakel so ilalak to. Say akulaw ton si Sara so awalaan lambengat na saksakey ya anak, si Isaac, diad kayari na agangganon impanayam nen Abraham ed dalin ya insipan, diad loob labat na 25 a taon. (Genesis 21:2, 5) Balet si Abraham et agkinmesaw tan agpinmawil ed syudad a nanlapuan to. Agaylan alimbawa na pananisia tan panagtepel!

7. Antoy epekto na impantepel nen Abraham ed ilalak ton si Isaac, tan panon ya agunggonaan ed satan so katooan?

⁷ Say impantepel nen Abraham so walaan na mabiskeg ya epekto ed ilalak ton si Isaac, ya angusar ed interon bilay to a 180 a taon bilang sankaili ed dalin na Canaan. Say impantepel nen Isaac so nibase ed pananisia ed sipan na Dios​—say pananisia ya impurek ed sikato na maedad lan atateng to tan diad saginonor et pinekderan na mismon salita nen Jehova ed sikato. (Genesis 26:2-5) Makanakana so impanmatoor nen Isaac diad impakasumpal na sipan nen Jehova a manlapu ed pamilya nen Abraham so “ilalak,” odino bini, a pakabendisyonan na amin a katooan. Kayari na nilasus a taon, si Jesu-Kristo, a manunan kabiangan na satan a bini, so angilukas na dalan pian makapipulangan ed Dios so amin a mangagamil na pananisia ed sikato tan makapambilay ira ed andi-anggaan.​—Galacia 3:16; Juan 3:16.

8. Panon ya impatnag nen Jacob so mabiskeg a pananisia, tan antoy epekto na satan?

⁸ Si Isaac met so tinmulong ed ilalak ton si Jacob a nawalaan na mabiskeg a pananisia pian makapanmatoor anggad inmasiken to. Si Jacob et 97 años la sanen akipuligesgesan a sanlabi ed sakey ya anghel pian pabendisyonan. (Genesis 32:24-28) Sakbay na impatey to diad edad a 147, sikatoy akatipon na magenap a kasil pian napapalar so kada sakey ed 12 ilalak to. (Genesis 47:28) Saray mapropetikon salita a sinalambit to, ya akasulat natan diad Genesis 49:1-28, so talagan tinmua tan peles a nasusumpal.

9. Panon a makaimpluensya iray maespiritual a maedad la ed saray kapamilyaan da?

 ⁹ Malinew a saray maedad la a matoor a manlilingkor ed Dios so maabig a makaimpluensya ed saray kapamilyaan da. Say panangibangat da manlapud Kasulatan ya atekepan na panamilin unong ed eksperiensya ra tan say alimbawa na impantepel da so baleg a makatulong ed sakey a kalangweran pian sikatoy ombaleg a walaan na mabiskeg a pananisia. (Uliran 22:6) Nepeg ya agmelmelagen na saray maedad la so maabig a pakaimpluensya ra ed saray kapamilyaan da.

Say Impluensya Ra ed Saray Kapananisiaan Da

10. Anto so ‘imbilin nen Jose nipaakar ed saray pukepukel to,’ tan antoy epekto na satan?

¹⁰ Saray maedad la so maabig met ya impluensya ed saray kapananisiaan da. Anggaman masiken lay Jose, ya ilalak nen Jacob, say simplin ginawa to a pakapatnagan na pananisia to so awalaan na baleg ya epekto ed minilyon a tuan managdayew a nambilay kayari to. Sikatoy mantaon na 110 sanen “angiter na bilin nipaakar ed saray pukepukel to,” salanti, nepeg ya awiten iratan na saray Israelita sano ompaway la ra ed Ehipto. (Hebreos 11:22; Genesis 50:25) Satan a bilin so angiter na mas masnag ya ilalo ed Israel, a sikaray apaseguroan a nibulos ira manlapud dakel a taon na maruksan impangaripen ed sikara kayari impatey nen Jose.

11. Panon ya akaimpluensya so masiken lan Moises ed si Josue?

¹¹ Sakey si Moises ed saramay apabiskeg ed impangipatnag nen Jose na pananisia to. Sanen 80 años la nen Moises, sikatoy apribilehyoan a mangawit ed saray pukel nen Jose sanen pinmaway la ra ed Ehipto. (Exodo 13:19) Akabkabat to met ed saman si Josue, a mas malangwer nen sikato. Diad tinmumbok ya 40 taon, si Josue so nanlingkor bilang katambayan nen Moises. (Numeros 11:28) Sikatoy kaiba nen Moises sanen tinmatdang ed Palandey Sinai, tan inalagar toy Moises anggad sanen linmasur ya awit to iray tapyas na bato a Panamintuan. (Exodo 24:12-18; 32:15-17) Agaylan karakel a simbawa tan kakabatan so naawat nen Josue manlapud sakey ya eksperiensyado tan masiken lan Moises!

12. Panon a nagmaliw a maabig ya impluensya si Josue ed nasyon na Israel legan a sikatoy mabilay?

¹² Insan si Josue so amaseseg ed interon nasyon na Israel leleg na impanbilay to. Oniay ibabaga ed sikatayo na Uko-ukom 2:7: “Say baley nanlingkor ed si Jehova ed amin na saray agew nen Josue, tan ed amin na saray agew na saray mamasiken a nambilay ed kayari nen Josue, ya anengneng da so amin a baleg a gawa nen Jehova a ginawa to nipaakar ed Israel.” Balet, sanen inatey lay Josue tan saray mamasiken, ginmapo so 300-taon a peryodo na agpakapandesisyon na Israel ed baetan na tua tan palson panagdayew, ya angga ed saray agew nen propetan Samuel.

‘Agawa so Inkatunong’ Lapud si Samuel

13. Antoy ginawa nen Samuel pian ‘nagawa so inkatunong’?

¹³ Ag-ibabaga na Biblia no pigaray taon nen Samuel sanen inatey, balet saray ebento ed libro na Unonan Samuel et agawa ed loob na 102 a taon, tan naimatonan nen Samuel so maslak ed saratan. Ibabaga ed sikatayo na Hebreos 11:32, 33 a saray maptek ya ukom tan propeta et “nanggawa ra na katunongan.” Peteg a naimpluensyaan  nen Samuel so arum ed saray kapanaonan to pian paliisan odino tundaan da la so panggaway mauges. (1 Samuel 7:2-4) Panon? Diad impanmatoor to ed si Jehova ed interon bilay to. (1 Samuel 12:2-5) Sikatoy makpel ni ingen ya amaat ed sakey ya ari. (1 Samuel 15:16-29) Ontan met, pinaneknekan nen Samuel, a ‘masiken tan ubanan la,’ a sikatoy napanuliranan ed panangipikasi ed arum. Inkuan to ya ‘arawi pa komon a sikatoy mankasalanan sumpa ed Jehova diad itunda ton mikasi’ nipaakar ed saray kaparan ton Israelita.​—1 Samuel 12:2, 23.

14, 15. Panon a naalig na saray maedad la natan so alimbawa nen Samuel nipaakar ed panagpikasi?

¹⁴ Amin iyan salaysay so mangipapabitar ed importantin paraan no panon a saray maedad la et maabig a makaimpluensya ed saray kapara ran lingkor nen Jehova. Anggaman nalilimitaan la ra lapud bunigas da odino arum niran sirkumstansya, nayarian na saray maedad la ya ipikasi so arum. Sikayoran maedad la, kasin papablien yo so baleg a nagawaan na pikakasi yo parad kongregasyon? Lapu ed pananisia yo ed nipaagus a dala nen Kristo, walaan kayo na maabig a talindeg ed imaton nen Jehova, tan lapu ed abayag lan pantetepel yo, say pananisia yo so awalaan na “asubok a kalidad.” (Santiago 1:3, NW; 1 Pedro 1:7) Agyon balot lilingwanan: “Say pikakasi [na] sakey a matunong a too manalonggaring na dakel ed pankimey to.”​—Santiago 5:16.

¹⁵ Kakkaukolan iray pikakasi yo pian nasuportaan so kimey na Panarian nen Jehova. Walaray agagi tayo a nipriso nisengeg ed neutral a talindeg da bilang Kristiano. Saray arum so naapektoan na saray kalamidad, guerra, tan panlalaban ed mismon bansa ra. Walaray arum met, anggan diad kongregasyon tayo, a nidudunget ed saray pakatuksoan tan isusumpa. (Mateo 10:35, 36) Anggan saramay mangidadaulo ed kimey a panagpulong tan mangaasikaso ed saray kongregasyon so mankaukolan met na pangipikasi yon naynay ed sikara. (Efeso 6:18, 19; Colosas 4:2, 3) Agaylan abig no saglawien yo ed saray pikakasi yo iray kapanisiaan tayo, a singa ginawa nen Epafras!​—Colosas 4:12.

Ibangat Yo so Onsublay a Kailalakan

16, 17. Anto so nipasakbay diad Salmo 71:18, tan panon iyan nasusumpal?

¹⁶ Saray kabiangan na “arum a karnero,” a walaan na ilalon manbilay ya andi-anggaan diad dalin, so makakaawat na makanakanan panangipasal diad pililimog da ed saray matoor a kabiangan na “melag a pulok,” salanti, saramay walaan na mangatatawen ya ilalo. (Lucas 12:32; Juan 10:16) Saya so unong ed nipasakbay diad Salmo 71:18: “[Anggad sano] masiken ak la tan ubanan la so ulok, O Dios, agmo ak ikaindan, angga ed nipanengneng ko so biskeg mo ed onsublay a kailalakan, tan say pangipanengneng ko na pakayarim ed balang sakey ya onsabi.” Saray alanaan na espiritu so magunaet a mangipapasal ed saray kakaiba ran arum a karnero parad kaaruman iran responsabilidad sakbay da ran taynanan diad kigloria ra a kaiba nen Jesu-Kristo.

¹⁷ Say kabaliksan na saray salita ed Salmo 71:18 a manutukoy ed panangibangat ed “balang sakey ya onsabi” so onaplika met ed saray arum a karnero, a makakaawat na panangibangat manlapud saray nilanaan na Dios. Saray maedad la so inikdan nen Jehova na pribilehyon mantasi nipaakar ed sikato diad saramay onkakamang natan ed tuan panagdayew. (Joel 1:2, 3) Saray arum a karnero so natutumangan lapud pakakaaral da manlapud saray alanaan tan napapakiwas iran manginabang na naaaralan da manlapud Kasulatan diad arum nin totoo a manpipilalek a manlingkor ed si Jehova.​—Apocalipsis 7:9, 10.

18, 19. (a) Anton mablin impormasyon so ninabang na dakel a maedad la ran lingkor nen Jehova? (b) Anto so nepeg ya ilaloan na saray Kristianon maedad la?

 ¹⁸ Saray maedad lan lingkor nen Jehova, namparan alanaan tan kabiangan na arum a karnero, so maabig a makapangisalaysay ed saray importantin ebento ed apalabas. On, ta wala so pigaran mabilay ni natan ya akabantay ed saray primeron impangipalabas ed “Photo-Drama of Creation.” Arum ed sikara so personal a makapikabat ed saramay agagin manangidaulo a nipriso nen 1918. Arum so akibiang ed panagbrodkas diad istasyon na radyo na Watchtower a WBBR. Dakel so makapangisalaysay ed panaon sanen indepensa ed sankatageyan iran korte iray kason mangilalanor ed relihyoson kawayangan na saray Tasi nen Jehova. Wala met iray nansiansian mapekder ed talindeg da parad tuan panagdayew a nambilay legan na uley na saray diktador. On, saray maedad la so makapangisalaysay no panon a linminew lan linminew so pakatalos nipaakar ed katuaan. Papasesegen itayo na Biblia a manaral ed sarayan maedad la a walaay dakel ya eksperiensya.​—Deuteronomio 32:7.

¹⁹ Papasesegen iray Kristianon maedad la a magmaliw iran maabig ya ehemplo ed saray kalangweran. (Tito 2:2-4) Nayarin agyo ni naiimano natan so epekto na pantetepel yo, saray pikakasi yo, tan panisimbawa yo ed arum. Ontan met di Noe, Abraham, Jose, Moises, tan arum nira a posiblin agda naimatonan so sigpot ya epekto na impanmatoor da diad saray sinmublay a kailalakan. Ingen ta walaan na baleg ya epekto so impatawir da a pananisia tan katooran, kanian ontan met so nailaloan yo.

20. Antoran bendisyon so nailaloan na saramay walaan na malet ya ilalo angga ed anggaan?

²⁰ Balanglan sikayoy makaliktar ed “baleg ya irap” odino sikayoy napaoli ed bilay, agaylan makapaliket so pakaeksperiensya ed “bilay a peteg”! (Mateo 24:21; 1 Timoteo 6:19) Isipen pa so panaon diad Sanlibon Taon ya Uley nen Kristo sano paandien la nen Jehova iray epekto na itatatken. Agtayo la nasagmak so tuloytuloy ya ikapuy na saray laman tayo, tan ombangon itayo la ed kada agew a manaligwas lan manaligwas ed pisikal​—a nawalaan tayo la na mas mabiskeg a laman, mas malinew a pakanengneng, mas maksil a pakarengel, mas marakep ya itsura! (Job 33:25; Isaias 35:5, 6) Saramay napribilehyoan a manbilay ed balon mundo na Dios so aglan balot ontatken anggano magnayon la so pambilay da. (Isaias 65:22) Kanian, pansiansiaen tayo komon a malet so ilalo tayo angga ed anggaan tan mantultuloy itayon manlingkor ed si Jehova diad interon kamarerwa tayo. Makapanmatalek itayo a sumpalen nen Jehova so amin ya insipan to tan say gawaen to et palumbasan to so antokaman ya iilaloan tayo.​—Salmo 37:4; 145:16.

Panon Yon Ebatan?

• Panon ya abendisyonan so amin a katooan diad impanmatoor na masiken lan Noe?

• Anto so epekto na pananisia na saray patriarka diad saray kailalakan da?

• Anggaman maedad la ra di Jose, Moises, Josue, tan Samuel, panon dan apabiskeg iray kapara ran managdayew?

• Anto so maabig a nipatawir na saray maedad la?

[Tepetepet Parad Panagaral]

[Litrato ed pahina 26]

Say impantepel nen Abraham so walaan na alay abig ya epekto ed si Isaac

[Litrato ed pahina 28]

Say makabat a simbawa nen Moises so amaseseg ed si Josue

[Litrato ed pahina 29]

Baleg so nagawaan na pangipikasi yo ed arum

[Litrato ed pahina 30]

Nagunggonaan iray kalangweran diad italineng da ed saray maedad la