Say Pakayari na Dila

SAY karukey na dila na girafe et nasabi toy anggad 45 sentimetro, tan masigsiglat tan sarasarag ton bakbaknoten so bulobulong na kakiewan. Say belat na dila na asul a balyina et sabien toy singa kabelat na sakey ya elepanti. Nonot yo pay nakaukolan a biskeg ta pian nigalaw labat itan!

Arawdawin dalin so dila na too no nipaakar ed dukey, belat, tan biskeg. Balet, satan so mas makapanyarin tuloy. Oniay inkuan na Biblia nipaakar ed sayan melanting a parte na laman na too: “Say patey tan say bilay wala ra ed pakayari na dila.” (Uliran 18:21) On, agta aminpiga tayo lan nadngelan so nipaakar ed pakayari na dila na too a mamatey diad pamapabrika to na tilatila tan palso iran testimonya, ya akaderalan tan inateyan ni ingen na saray inosentin biktima?

Deralen met na makapasakit iran balikas so abayag lan pankakaaro. Dakel lay asakitan a liknaan lapud mainsulton pananalita. Oniay inyakis nen Job sanen sikatoy apap-pauges: “Kaunongan kabayag so pamaermen yo ed kamarerwak, tan pamuyak yo ed siak ed saray salita?” (Job 19:2) Malinlinew so impaneskribre nen babangatan a Santiago ed makaderal a pakayari na agkokontrolen a dila: “[Say] dila melmelag a kabiangan na laman, et manpasirayew ed angkakabaleg a nengneng. Nia, alay kabaleg na takel so dangatan na melag ya apoy! Et say dila sakey ya apoy.”​—Santiago 3:5, 6.

Diad biek a dapag, walay pakayari na dila a mangiter na bilay. Alimbawa, say mililikna tan maambegyan pananalita so akapangiliktar ed arum a nadedepres tan manbikkel lawari. Lapud indengel met na dakel ya adik tan kriminal ed napanmatalkan a simbawa et nilegyas ira ed ag-inilaloan ya ipatey. Talagan “kiew na bilay” so bunga na dila na sakey a matunong tan “say salita a makana so kisalita to sikato so singa saray mansanas a balitok ed iket a pilak.”​—Uliran 15:4; 25:11.

Balet, say sankaabigan a pangusaray dila et say pangidayew ed si Jehova a Dios, say pangiyabawag ed maong a balita na Panarian to, tan say pangibangat ed totoo na mabli iran katuaan a walad Biblia. Akin? On, ta inkuan nen Jesus: “Saya sikato so andi-anggaan a bilay, a naamtaan da ka a saksakey a tuan Dios, tan saman so imbakim, salanti Jesu-Kristo.”​—Juan 17:3; Mateo 24:14; 28:19, 20.