Tepetepet na Saray Manbabasa

Kasin gagarantiyaan na Uliran 22:6 a no sustoy inkibangat na Kristianon ananak et agda la ibeneg si Jehova?

Oniay nabasa ed satan a bersikulo: “Ibangat mo so anak ed dalan a nepeg to a laen, tan anggan sano masiken la ag-onarawi ed sikato.” Singa ed say impamikewet ed malangwer a sanga a mangapekta ed uhas to leleg ton ombabaleg, ontan met a say dugan panangipasal ed ananak et baleg so nagawaan to pian mantultuloy iran manlingkor ed si Jehova anggad itatken da. Amta na saray atateng a mankaukolan itan na dakel a panaon tan sagpot. Pian napagmaliw da sirin a Kristianon babangatan iray anak da, nepeg da ran bilinen, ipetek, pasesegen, disiplinaen, tan panengnengan na maabig ya ehemplo. Nepeg a mantultuloy tan maad-aro ran gawaen iratan ed dakel a taon.

Balet, no say anak et tinmundan manlingkor ed si Jehova, kasin kabaliksan to la itan a kinmulang so atateng? Diad arum iran kipapasen, nayarin agnansagpotan a maong na atateng a pabalegen so ananak da unong ed panagdisiplina tan panametek nen Jehova. (Efeso 6:4) Diad biek a dapag, aggagarantiyaan na satan a proverbio a no sustoy inkibangat na ananak et magmaliw la ran matoor ed Dios. Agnamoldi na atateng so ananak ed antokaman a panlabayan da. Walay kawayangan na ugugaw ya ananak a mandesisyon a singa saray adulto, tan diad kaunoran et sikara lanlamang a bukor so manpili na bilay a labay da. (Deuteronomio 30:15, 16, 19) Anggano pinasyay pansagpot na atateng, walaray ananak a magmamaliw ya aliwan matoor, a singa si Solomon ya angisulat ed bersikulo a pantotongtongan tayo. Anggan si Jehova et awalaan na ananak ya agnansiansian matoor.

Kanian, aglabay ya ibaga na sayan kasulatan a diad amin lan kipapasen et “ag-onarawi” so anak, noagta diad maslak a kipapasen et ontan so resulta. Seguradon makapaseseg iya ed saray atateng! Napabiskeg iray atateng diad pakaamtan maabig so pansumpalan na masimoon a panggugunaet dan ibangat ed ananak da so dalan nen Jehova. Lapud importante so betang tan baleg so impluensya ra, napaseseg iran seryosoen da so obligasyon da.​—Deuteronomio 6:6, 7.

Anggano ontundan manlingkor so ananak ed si Jehova, saray atateng a nampelengan dan imbangat so ananak da so makapanilalo a nasabi panaon et manpataoli ira a siansia. Mabisbiskeg so katuaan na Biblia, tan agmainomay a nalingwanan iray panangipasal na atateng.​—Salmo 19:7.