Aaligen Mo Kasi si Jehova Diad Panangasikasom ed Arum?

“IMATALEK yo ya amin ed [Dios] so kapagaan yo; ta sikato asikasoen to kayo.” (1 Pedro 5:7) Agaylan maad-aron panamaseseg! Iyaansakit nen Jehova so balang sakey ed totoo to. Tan maligen so liknaan tayo diad panangampopo to.

Ontan met so nepeg a bayuboan tan ipatnag tayon panangasikaso ed arum. Balet, lapud ag-itayo ayadyari, walaray nepeg tayon panalwaran pian lawas duga so paraan na panangipanengneng tayoy personal ya interes ed arum. Antis tayon pantongtongan iratan, imanoen tayo ni iray pigaran paraan na panangasikaso nen Jehova ed totoo to.

Inyilustra nen salmistan David so panangasikaso nen Jehova diad impangusar to ed sakey a pastol: “Si Jehova so managpastol ed siak; agak naani onkulang. Parukolen toak ed malambot ira a pastolan: itonton toak ed abay na saray mareen a danudanum. Pasimbaloen to so kamarerwak; . . . On, anggan manakar ak ed lawak na anino na patey, agak la ontakot ed mauges: ta sika wala ka ya ibak.”​—Salmo 23:1-4.

Lapud si David et sakey a pastol, amta to no antoray nalalanor ed panangasikaso na pulok. Sasalimbengan na pastol iray karnero manlapud managbingkas ya ayayep a singa say leon, atap ya aso, odino uso. Agto papaulyan a nabuybuyak so pulok, aanapen to iray abalang a karnero, aampopoen to iray naksawan, tan aasikasoen to ray mansasakit tan asugatan. Inagew-agew toran papainumen. Balet agkabaliksan na saya a kokontrolen na pastol so kada galaw na karnero. Bulos ira ingen ta asalimbengan ira.

Ontan so panangasikaso nen Jehova ed totoo to. Oniay impaliwawa nen apostol Pedro: ‘Natatalima kayo ed pakayari Dios.’ Diad saya, say terminon “natatalima” et literal a mankabaliksan na “tuloytuloy a babantayan.” (1 Pedro 1:5) Lapud peteg itayon iyaansakit nen Jehova, sikatayoy lawas ton babantayan tan naynay ya akaparaan ya ontulong no onkerew itayo. Balet, pinalsa itayo nen Jehova a walaan na kawayangan a mandesisyon, kanian agto pibabalian so amin a kiwas tan desisyon tayo. Natan, panon tayon naalig si Jehova ed saya?

Aligen so Dios ed Panangasikaso ed Ananak Yo

“Saray ugugaw sikara so sakey a tawir [“manlapud si,” NW] Jehova.” Kanian nepeg a salimbengan tan asikasoen ira na saray ateng. (Salmo 127:3) Nayarin nalalanor ed saya so panagyat ed saray ananak a mangibalikas ed no antoy walad nonot tan liknaan da, insan ikonsidera iratan diad pidedeneng ed sikara. No kontrolen na atateng so kada galaw na ananak da, ya agdan balot ikonsidera no antoy panlabayan da, singa lara’d satan sakey a pastol ya insiplat so panangasikaso to ed saray karnero. Anggapoy pastol ya ontan so pantrato to ed pulok to tan anggan si Jehova et agto itayo met papastolan ed ontan a paraan.

Oniay inaksobi nen Mariko: * “Abaybayag a say bungay sangik ed ananak ko et ‘Oniay gawam’ tan ‘Agmo tan gagawaen.’ Say amtak et obligasyon ko  itan bilang ateng. Agko ra anggan kokomendaan, tan agkon balot nibaga a talagan akapitalosan ak ed sikara.” Nakatongtong na anak a bii nen Mariko iray kakaaro to ed telepono na mabayag, balet no si nanay to et andi. “Insan ko amoriay baleg a deperensya,” so inkuan ni nen Mariko. “No mitongtong so ana’ko ed kakaaro to, walaray ibabalikas ton pakapatnagay pipakna to ed liknaan da, a singa say ‘Talanti’ odino ‘Anggan siak met.’ Ginapoan kon inusar iratan a balikas pian naalak so liknaan na ana’ko, tan agnambayag et ombabayag tan ombabali-bali lay tongtongan mi.” Ipapabitar na saya so kaimportantian na maabig a komunikasyon, a diad kaslakan et makapambagaan so sakey tan sakey na liknaan, ya aliwan samay sakey labat.

Kaukolan a nipabesngaw na atateng so liknaan tan pilpilalek na ananak da, balet nepeg a natalosan na ugugaw no akin a say panangasikaso na atateng et sakey a proteksion. Sisimbawaen na Biblia iray ugugaw a tuloken da iray ateng da; insan to imbaga so rason: “Ta makapaabig ed sika tan makapambilay ka na andukey dia ed tapew na dalin.” (Efeso 6:1, 3) Saray ananak a talagan kombinsido a makagunggona so pampasakop et mas mainomay day ontulok.

Diad Panangasikaso ed Pulok nen Jehova

Napatnagan diad loob na Kristianon kongregasyon so maaron panangasikaso nen Jehova. Bilang Ulo na kongregasyon, iwawanwan nen Jesu-Kristo iray mamatatken a mangasikaso ed saray pulok to. (Juan 21:15-17) Say Griegon salita parad manangasikaso et mitukoyan ed verb a say kabaliksan to et “bantayan a maong.” Oniay ingganggan nen Pedro diad pangidadanet to no panon iyan gawaen: “Pastolan yo so saray pulok na Dios a wala ed sikayo, pampagaan yo ra ya ag-iparalan ed kabiskegan, noag dia ed kalakal a mabulos . . . aliwa a lapud mabanday a pananubo noag lapu ed ataryan kalakal. Ni say pakatawan kayo ed nimatalek a nitandad sikayo, noag ingen gawaen yoy inkasikayo a panagkauliran a tumboken na saray pulok.”​—1 Pedro 5:2, 3.

On, say kimey na saray mamatatken et mipara ed kimey na saray pastol. Nepeg a tulongan na Kristianon mamatatken iray mansasakit ed espiritual tan ipetek da ra pian niyaplika ra iray matunong ya estandarte. Responsabilidad na saray mamatatken so pangorganisa ed saray kimey na kongregasyon, salanti, panggawa na saray uksoyan parad aral tan pamasiansia ed kongregasyon a mauksoy.​—1 Corinto 14:33.

Walay kapeligroan ya ipapaimano ed sikatayo na samay asalambit iran salita nen Pedro, salanti, say pagmaliw na saray mamatatken a “pakatawan” ed kongregasyon. Ompipiing la ed satan a kapeligroan so sakey a matatken sano sikatoy manggagawa la na agmet nakaukolan iran totontonen. Alimbawa, lapud masyadon panseseryoso na sakey a matatken ed  obligasyon ton protektaan so pulok, nayarin nalabas to laingen so panprotekta to. Singa bilang, diad sakey a kongregasyon ed sakey a bansa ed bukig et nanggawa na saray totontonen iray mamatatken no panon so pambanoan ed Kingdom Hall​—a singa say no siopa so nepeg ya unonan mansalita​—lapud panisiaan dan makatulong iratan ed kareenan na kongregasyon. Anggaman segurado a maong so motibo ra, kasin aaligen na saratan a mamatatken so paraan na panangasikaso nen Jehova ed totoo to? Matukotukoy ya oniay kanonotan nen apostol Pablo: “Aliwan say uleyan mi pananisia yo, noag ingen mananulong kami ed liket yo; ta lapu ed pananisia sialagey kayo.” (2 Corinto 1:24) Panmamatalkan nen Jehova iray totoo to.

Nilikud ni ed ipaliis ed panggawa na saray totontonen ya agmakasulatan, nipatnag na maasikason mamatatken so masimoon a panangiyansakit ed arum diad agda pangibulgar ed kompidensyal ya impormasyon. Tatandaan da so pasakbay na Dios ya: “Agmo lukasan so yaamot na sananey.”​—Uliran 25:9

Inyaliling nen apostol Pablo so kongregasyon na saray alanaan a Kristiano ed laman na too: “Say Dios inuksoy to so laman . . . pian anggapo so pansisian ed laman, noag saray kabiangan wala so dili a panagpaga ra ed sakey tan sakey.” (1 Corinto 12:12, 24-26) Nepeg ya interesadon maong iray membro na Kristianon kongregasyon ed pankaabigan na sakey tan sakey.​—Filipos 2:4.

Panon a nipatnag na saray tuan Kristiano a ‘mapaga ira ed sakey tan sakey’? Nipanengneng da so panangiyansakit ed arum a membro na kongregasyon diad pangipikasi ra ed sikara tan diad panulong da ed saray mankaukolan ed praktikal a paraan. Saya so ontulong ed arum a makagawa met na kamaongan. Imanoen no panon ya atulongan si Tadataka ed ontan a maaron panangiyansakit. Sanen sikatoy abautismoan ed edad a 17, bukbukor to ed pamilya ra so manlilingkor ed si Jehova. Oniay insalaysay to: “Walay sakey a pamilya ed kongregasyon mi a naynay a mangiimbita ed siak a mangan ed sikara tan diad saray panduroypo ditan. Kinabuasan lawarin onsasamar ak ed abung da antis ak ya onla ed eskuelaan pian mibiang ed panisingbat da ed teksto na Biblia. Walaray naawat kon bilin no panon kon arapen iray problema ed eskuelaan, tan saniiba min ipipikasi iratan. Naaralan ko ed sayan pamilya so pagmaliw a matulong.” Natan et iyaaplika la nen Tadataka so naaralan to diad panlilingkor to ed sakey a sangan opisina na saray Tasi nen Jehova.

Walay imbaga nen apostol Pablo a nagkalautlan panalwaran nipaakar ed panangipanengneng na interes ed arum. Walaray binitla ton bibii a nagmaliw a ‘matongtong tan misasalet, a salitaen daray bengatla ya agda kanepegan.’ (1 Timoteo 5:13) Anggaman duga met labat so nawalaan na interes ed arum, nepeg itayon manalwar pian ag-itayo magmaliw a mibabali la ed personal iran pamaakaran da. Sakey lan pakapatnagan na satan et no ‘sasalitaen tayo la iray agtayo nepeg [komon] a salitaen’ a singa bilang et makrikritiko tayo la.

Nepeg tayon tandaan a saray Kristiano et mandurumaan no nipaakar ed panangiyarunsa ed personal iran pamaakaran, no antoy pilien dan kanen tan paraan na panagrelaks. Balang sakey so bulos a mandesidi no antoy gawaen to unong ed saray limitasyon ya inggetar na Biblia. Oniay impaseseg nen Pablo ed saray Romanon Kristiano: “Kanian ag-itayo la sirin manuukoman. . . . Tumboken tayo so saray bengatla a manggawa na kareenan, tan saray bengatla a kipaalageyan na sakey tan sakey ed sikatayo.” (Roma 14:13, 19) Say masimoon a panangiyansakit tayo ed sakey tan sakey ed kongregasyon so nepeg a nipatnag, aliwan diad pibabali ed bilay na arum, noagta diad pagmaliw tayon akaparaan ya ontulong. No onia so paraan na panangiyansakit tayo ed arum, ombulaslas so aroan tan pankakasakey ed pamilya tan kongregasyon.

[Paimano ed leksab]

[Litrato ed pahina 19]

Sagyat yoray ananak yo a mangibalikas ed no antoy walad nonot tan liknaan da panamegley na panangomenda tan empatya