Papablien nen Jehova so Katutulok Yo

“Ana’ko, onkabat ka, tan paliketen mo so pusok.”​—ULIRAN 27:11.

1. Anton espiritu so kasmak la natan ed mundo?

 KASMAK la ed mundo natan so espiritu na inka-independente tan katutunganga. Impaliwawa nen apostol Pablo so rason no akin ya ontan so kipapasen, sanen sinulat to iray Kristiano ed Efeso: ‘Nanakar kayo nensaman a panaon unong ed akaugalian na sayan mundo, unong ed pangulo na pakayari dagem, na espiritu a natan manggawa ed saray anak na kasusumpa.’ (Efeso 2:1, 2) On, si Satanas a Diablo, a ‘pangulo na pakayari na dagem,’ so nayarin nibaga yo, a sikatoy mangiyaalibansa na espiritu na katutunganga diad interon mundo. Ontan so ginawa to nen inmunan siglo, tan lalon panggugunaetan to itan a gawaen manlapu la’d nen sikatoy nibasileng manlapud tawen sanen nagawa lay Guerra Mundial I.​—Apocalipsis 12:9.

2, 3. Akin a tuloken tayo si Jehova?

² Anggaman ontan, bilang Kristiano et amta tayon si Jehova a Dios so makanepegan na impapuson katutulok tayo lapud sikato so Amalsa ed sikatayo, Mananustuni na bilay tayo, maaron Soberano, tan say Manangilaban tayo. (Salmo 148:5, 6; Gawa 4:24; Colosas 1:13; Apocalipsis 4:11) Amta na saray Israelita ed panaon nen Moises a si Jehova so Manangiter-bilay da tan Manangiliktar da. Kanian, oniay imbaga nen Moises ed sikara: “Nepeg yo sirin ya unoren a gawaen so unong na ingganggan nen Jehova a Dios yo ed sikayo.” (Deuteronomio 5:32) On, si Jehova so nepeg dan tuloken. Balet, agnambayag et sikara so nagmaliw a matunganga ed Soberano ra.

³ Kaunongan kaimportante so itulok ed Amalsa na uniberso? Oniay aminsan ya imbaga na Dios ed si Arin Saul panamegley nen propetan Samuel: “Say panangunor sikato so magmaong nen say bagat.” (1 Samuel 15:22, 23) Akin ya ontan?

No Panon a ‘Magmaong so Panangunor nen Saray Bagat’

4. Diad anton pantalos a walay niiter tayo ed si Jehova?

⁴ Bilang Manamalsa, si Jehova so makankayarian ed amin a materyal a bengatla a walad sikatayo. No ontan sirin, wala ni kasi so nayarian tayon iter ed sikato? On, walay mabmablin bengatla a niiter tayo ed sikato. Anto itan? Naromog tayo so ebat ed onggendan a bilin: ‘Ana’ko, onkabat ka, tan paliketen mo so pusok, pian naebatan ko so mamabalaw ed siak.’ (Uliran 27:11) Say katutulok tayo sirin so mablin bengatla a niiter tayo ed Dios. Anggaman nanduruma so kipapasen tayo, say mauges ya akusasyon nen Satanas,  salanti, saray totoo so agmanmatoor ed Dios sano nasubok ira, so nayarian tayon ebatan diad pagmaliw tayon matulok. Agaylan pribilehyo itan!

5. Anto so liknaan na Manamalsa sano ontunganga iray totoo? Iyilustra.

⁵ Interesado so Dios ed saray desisyon a gawaen tayo. Sikato so naapektoan no ag-itayo ontulok ed sikato. Panon? Sikato so nasakitan sano walay siopaman ya agmakabat so ikiwas to. (Salmo 78:40, 41) Bilang ilustrasyon, anto kasi so nalikna na mangiyaansakit a doktor no say pasyente ton walaay diabetes et agmangunor ed inrekomenda ed sikaton kanen to, tan siansia nin mamangan na insebel ed sikato? Mipadpara ed satan, makaseguro itayo a nasakitan met si Jehova sano ag-ontulok ed sikato iray totoo, lapud amta to la iray mauges a pansumpalan na pangibaliwala ed ibabaga ton nepeg tayon gawaen pian manbilay.

6. Anto so makatulong ta pian magmaliw itayon matulok ed Dios?

⁶ Anto so makatulong ed kada sakey ed sikatayo ta pian magmaliw itayon matulok? Nepeg tayon kerewen ed Dios so “sakey a matulok a puso,” a singa say kinerew nen Arin Solomon. Kinerew to so ontan a klase na puso ta pian “natebek to so maong tan mauges,” ya akatulong itan pian sikatoy makapandesisyon nipaakar ed hudisyal iran pamaakaran na saray kapara ton Israelita. (1 Arari 3:9, NW) Nakaukolan tayo so “sakey a matulok a puso” ta pian natebek tayo so maong tan mauges ed mundon kasmak so espiritu na katutunganga. Intarya ed sikatayo na Dios so Salita to, saray katulongan ed panagaral na Biblia, saray Makristianon pantitipon, tan say maasikaso iran mamatatken ed kongregasyon ta pian nabayuboan tayo so “matulok a puso.” Kasin aanamoten tayon maong iratan a maaron probisyon?

7. Akin a mas indanet nen Jehova so katutulok nen say antokaman iran bagat?

⁷ Nipaakar ed saya, nodnonoten pa ya imparungtal nen Jehova ed saray totoo to nensaman a say katutulok so mas importante nen saray bagat ya ayep. (Uliran 21:3, 27; Oseas 6:6; Mateo 12:7) Akin ya ontan, anta ingganggan nen Jehova iray totoo to a mangiyapay na saray bagat? Bueno, anto kasi so motibo na samay mangiyaapay na bagat? Gagawaen to kasi itan ta pian napaliket to so Dios? Odino tutumboken to lambengat so sakey a ritual? No say talagan pipilaleken na sakey a managdayew et say pamaliket to ed Dios, nepeg ton maalwar ya unoren so amin a ganggan na Dios. Agnakaukolan na Dios iray ibabagat ya ayep, balet say katutulok tayo so importantin bengatla a niiter tayo ed sikato.

Sakey a Mangipapasakbay ya Alimbawa

8. Akin ya impulisay na Dios si Saul bilang ari?

⁸ Say salaysay na Biblia nipaakar ed si Arin Saul so mangidadanet ed kaimportantian na katutulok. Diad gapo, si Saul et mapaabeba tan masimpit a manuley, a ‘melmelag so pakanengneng to’d dili to.’ Balet sinmabi panaon, say inkamapaatagey tan palson panagkatunongan so angimpluensya ed saray desisyon to. (1 Samuel 10:21, 22; 15:17) Diad aminsan ya inkagawa, si Saul so mibakal la ed saray Filisteo. Balet, imbaga nen Samuel a sikatoy alagaren ton mangiyapay ed saray bagat ed si Jehova tan mangitarya na kaaruman iran panangiwanwan. Balet, ag-akasabin tampol si Samuel unong ed inilaloan nen Saul, kanian saray totoo so ginmapo lan manbubuyak. Sanen anengneng itan nen Saul, “inyapay to so bagat a poolan.” Ag-apaliket si Jehova ed satan. Sanen sinmabin siansia si Samuel, inkatunongan na ari so intunganga to, ya imbaga ton naatrasado si Samuel kanian sikato so ‘apasootan’ a mangiyapay na bagat a popoolan pian nagamoran da so panangabobon nen Jehova. Parad si Arin Saul, mas importante ni so pangiyapay ed satan a bagat nen say pangunor ed niganggan ed sikato ya alagaren to si Samuel a mangiyapay ed satan a bagat. Oniay imbaga nen Samuel ed si Saul: “Nanggawa ka na kabaglan; agmo inunor so ganggan nen Jehova a Dios mo, ya ingganggan to ed sika.” Lapud tinmunganga si Saul, inekal nen Jehova ed sikato so inkaari.​—1 Samuel 10:8; 13:5-13.

9. Panon ya impatnag nen Saul so aminpigan intunganga to ed Dios?

 ⁹ Aderya kasi so ari ed saman ya eksperiensya to? Andi! Diad saginonor, ingganggan nen Jehova si Saul a sigpot ton deralen so nasyon na Amalekitas, ya inmunan angataki ed Israel. Nepeg ya anggapoy ikera nen Saul, anggan saray ayayep a kokomponien da. Sikato so tinmulok ed ‘impangabil to labat ed saray Amalekita, manlapu ed Havila angga ed Shur.’ Sanen sikato so nila nen Samuel, manlikliket so ari ed impanbiktorya to tan kuan to: “Bendito ka komon ed Jehova: sinumpal ko so ganggan nen Jehova.” Ingen, ag-inunor nen Saul tan saray totoo to so malinew iran instruksion ed sikara, lapud agda pinatey si Arin Agag tan saray “kamaongan ed saray karnero tan ed saray baka, tan. . . saray pinataba, tan saray kordero, tan amin a maong.” Inkatunongan nen Arin Saul so intunganga to, ya imbaga ton: ‘Say baley kinawanan to so sankamaongan ed saray karnero tan ed saray baka, ya ibagat ed Jehova a Dios mo.’​—1 Samuel 15:1-15.

10. Anton leksion so naaralan komon nen Saul?

¹⁰ Diad saman, oniay imbaga nen Samuel ed si Saul: “Walaan kasi si Jehova na baleg a liket dia ed bagbagat a poolan tan bagbagat, singa say panangunor ed boses nen Jehova? Nia, say panangunor sikato so magmaong nen say bagat, tan say pangimatlek, nen say taba na saray karnero a kalakian.” (1 Samuel 15:22) Lapud mapekder ya ingganggan nen Jehova a nepeg a deralen iratan ya ayayep, ag-iratan manepeg ya ibagat.

Magmaliw a Matulok ed Amin a Bengatla

11, 12. (a) Anto so panmoria nen Jehova ed saray sagpot tayon mamaliket ed sikato diad panagdayew tayo? (b) Panon a napalikdo na sakey ya indibidual so inkasikato sano isipen ton nagagawaan to so linawa na Dios anta diad tua et sikatoy ontutunganga?

¹¹ Alay panliket nen Jehova no nanenengneng to iray matoor a lingkor to a manmamatoor anggaman napapasegsegang ira, iyaabawag da so Panarian anggaman ag-interesado so dakel a totoo, tan onaatendi ira ed saray Makristianon pantitipon anggaman nadedetdetan ira ed panag-anap na pambilay! Makapaliket ed sikato no ipatnag tayo so katutulok tayo ed saratan ya importantin aspekto na panagdayew tayo! Mabmabli ed si Jehova iray sagpot tayo ed pandadayew ed sikato sano gagawaen tayo iratan tekep na panangaro. Nayarin agnaiimano na totoo iray pansasagpot tayo, balet naiimano na Dios so impapuso iran apay tayo tan nonodnonoten to iratan.​—Mateo 6:4.

¹² Balet, ta pian magmaliw itayon makapaliket ed Dios, nepeg a matulok itayo ed amin ya aspekto na bilay tayo. Agtayon balot papalikdoen so inkasikatayo diad panisip a nayari so onkasipa ed saray kakaukolanen na Dios daput no mandadayew itayo ed sikato ed arum ya aspekto  na bilay tayo. Alimbawa, nayarin papalikdoen na sakey a too so inkasikato sano isipen ton sikatoy agnadusa anggano manggawa na imoralidad odino arum niran ambelat a kasalanan daput no sikato so maseseg ed arum iran aspekto na panagdayew. Agayla itan a kalilingoan!​—Galacia 6:7, 8.

13. No bukbukor tayo, panon a nasubok so katutulok tayo ed si Jehova?

¹³ Unong ed satan, oniay nayarin itepet tayo, ‘Kasin uunoren ko si Jehova ed inagew-agew iran aktibidad ko, anggan diad saray pribadon pamaakaran?’ Oniay imbaga nen Jesus: “Say matoor ed dagdaiset, matoor met ed dakel: et say agmatunong ed dagdaiset, aliwa met a matunong ed dakel.” (Lucas 16:10) Kasin ‘mankukurang itayo tekep na katooran ed puso tayo’ anggan wala itayo ed ‘loob na abung tayo,’ ya anggapo so makakanengneng? (Salmo 101:2, NW) On, anggan sano wala itayo ed loob na abung tayo, nayarin nasubok so katooran tayo. Diad dakel a daldalin a kaslakan labat lan kagawaan ed loob na abung so kompyuter, walaray imoral a nenengnengen ditan a mainomay a nalukasan. Nensaman, saratan a nenengnengen so naromog labat ed saray pasen na imoral a panagligliwaan. Kasin tutuloken tayo iray salita nen Jesus a: “Balang sakey ya onlimgis ed sakey a bii ed pangagum to, akilawanan la ed sikato diad puso to”? On, kasin papaliisan tayo so anggan say ilimgis labat ed saray imoral a nenengnengen? (Mateo 5:28; Job 31:1, 9, 10; Salmo 119:37; Uliran 6:24, 25; Efeso 5:3-5) Komusta met iray marawal a babantayan ed telebisyon? Kasin mipadpara ed Dios so panmoria tayo, a ‘gugulaen na kamarerwa to so karamsakan’? (Salmo 11:5) Komusta met so alabas a kakainum na alak anggano bukbukor tayo? Kokondenaen na Biblia so panagbuanges, balet ipapasakbay met na satan ed saray Kristiano ya agda iyuugali so oninum na “dakel ya alak.”​—Tito 2:3; Lucas 21:34, 35; 1 Timoteo 3:3.

14. Anto so pigaran paraan a nipatnag tayo so katutulok tayo ed Dios nipaakar ed kuarta?

¹⁴ Say sakey nin aspekto a nakaukolan so panalwar et say nipaakar ed kuarta. Alimbawa, kasin mibibiang itayo ed saray negosyon mangiiter na pankanawnawa ya onyaman a tampol balet ta wala lay napatnagan a panagsaol? Kasin natutukso itayon mangagamil na ilegal iran paraan pian napaliisan so pambayar na buis? Odino, maalwar tayon tutuloken so ganggan a “bayaran yo so nabebetangan da ya amin: say buis dia ed akanbetang na buis”?​—Roma 13:7.

Katutulok Lapud Aro

15. Akin ya uunoren tayo iray ganggan nen Jehova?

¹⁵ Nabendisyonan itayo no tuloken tayo iray ganggan na Dios. Alimbawa, napaliisan tayo iray sakit no ag-itayo mansigarilyo, manbilay itayon walaan na atagey ya estandarte ed moral, tan respetoen tayo so inkasagrado na dala. Niarum ni, no manbilay itayo unong ed katuaan na Biblia diad arum ya aspekto na bilay, nagunggonaan itayo ed panagbilay tayo, ed relasyon tayo ed kapara tayon totoo, odino ed saray kapamilya tayo. (Isaias 48:17) Antokaman ed saratan a gunggona et matukoy a nipasen a bendisyon, a mamaneknek ed inkaepektibo na saray ganggan na Dios. Balet, say manunan rason no akin a tutuloken tayo si Jehova et sikatoy aaroen tayo. Aliwan sinisiblet so rason tayo no akin a manlilingkor itayo ed Dios. (Job 1:9-11; 2:4, 5) Inter na Dios ed sikatayo so kawayangan a manpili no siopa so labay tayon unoren. Uunoren tayo si Jehova lapud labay tayon paliketen tan lapud pilalek tayon gawaen so maptek.​—Roma 6:16, 17; 1 Juan 5:3.

16, 17. (a) Panon ya impatnag nen Jesus so katutulok to ed Dios ya atekepan na aralem a panangaro to? (b) Panon tayon naalig si Jesus?

¹⁶ Impatnag nen Jesus so naspot ya alimbawa diad katutulok ed si Jehova lapud aralem a panangaro ed Sikato. (Juan 8:28, 29) Sanen wadiad dalin si Jesus, “inaral to so katutulok lapu ed saray bengatlan intepel to.” (Hebreos 5:8, 9) Panon? Si Jesus so “nampaabeba a nagmaliw a matulok ya anggad say ipapatey, on, say ipapatey ed krus [“panamairapan a kiew,” NW].” (Filipos 2:7, 8) Anggaman si Jesus et matulok la ed tawen, lalon asubok so katutulok to sanen wadiad dalin. Makaseguro itayo a si Jesus so  sankakualipikadoan a manlingkor bilang Atagey a Saserdote parad saray espiritual ya agagi to ontan met ed arum iran mananisian katooan.​—Hebreos 4:15; 1 Juan 2:1, 2.

¹⁷ Komusta itayo balet? Naalig tayo si Jesus no unaen tayon naynay so itulok ed linawa na Dios. (1 Pedro 2:21) Manliket itayo sano say aro tayo ed si Jehova so mamapakiwas ed sikatayon manumpal ed saray ganggan to, anggano nadedetdetan odino natutukso itayon onsunggay. (Roma 7:18-20) Lalanoren na saya so mabulos ya itulok ed panangiwanwan na saray mangidadaulo ed tuan panagdayew, anggaman ag-ira ayadyari. (Hebreos 13:17) Mabli ed imaton nen Jehova so katutulok tayo ed saray ganggan to diad pribadon kabibilay tayo.

18, 19. Anto so nagamoran tayo sano impapuso tayon tuloken so Dios?

¹⁸ Natan, say katutulok tayo ed si Jehova so nayarin mangilalanor ed pansungdo ed panamasegsegang ta pian napansiansia tayo so katooran tayo. (Gawa 5:29) Ontan met, say pangunor tayo ed ganggan nen Jehova a manpulong tan manbangat itayo so mankaukolan na panagsungdo anggad panampot na sayan sistema na bengabengatla. (Mateo 24:13, 14; 28:19, 20) Nakaukolan itayon mansungdo ta pian makapantultuloy itayon makapilimog ed saray agagi tayo, anggaman nabebelatan itayo ed saray pananesdes na mundo. Amta na maaron Dios tayo iray sagpot tayon magmaliw a matulok ed amin na saratan ya aspekto. Balet, ta pian sigpot itayon magmaliw a matulok, nakaukolan tayon daegen so makabos a laman tayo tan paliisan so mauges, legan tayon babayuboan so panamabli ed kamaongan.​—Roma 12:9.

¹⁹ Sano manlingkor itayo ed si Jehova tekep na aro tan maapresyan puso, bendisyonan to itayo lapud sikato so “mananumang ed saray mananap ed sikato.” (Hebreos 11:6) Nakaukolan iray maabig a bagbagat tan makapaliket iratan, balet say mas makapaliket ed si Jehova et say sigpot a katutulok tayo tekep na aralem a panangaro ed sikato.​—Uliran 3:1, 2.

Panon Yon Ebatan?

• Akin a nibaga tayon walay bengatlan niiter tayo ed si Jehova?

• Antoray inkalingoan nen Saul?

• Panon yon nipatnag a papanisiaan yon magmaong ni so katutulok nen say panagbagat?

• Anto so mamapakiwas ed sikayon ontulok ed si Jehova?

[Tepetepet Parad Panagaral]

[Litrato ed pahina 26]

Anto so nalikna na mangiyaansakit a doktor no ibaliwala na pasyente iray ibabaga to?

[Litrato ed pahina 28]

Akin a naandi so panangabobon nen Jehova ed si Arin Saul?

[Saray litrato ed pahina 30]

Kasin tutuloken mo iray ganggan na Dios no bukbukor mo ed abung yo?