Tepetepet na Saray Manbabasa

Kasin walaan na sali imay uleg ya akitongtong ed si Eva?

Onia so nabasa ed Genesis 3:14 ya imbaga nen Jehova a Dios ed samay uleg ya amalikdo ed si Eva diman ed hardin na Eden: “Nisengeg ed ginawam ya, nisamba ka a nagkalalo nen saray amin ya ayep ya amo, tan nagkalalo nen saray amin ya ayep ya atap na uma; manilas ka ed eges mo, tan say dabok so buagen mo ed saray amin ya agew a pambilay mo.” Agsinalambit na Biblia no kasin samay uleg a nausar a mamalikdo ed si Eva et datin walaan na sali insan naandi iratan. Anggano ontan so nayarin pangipasen na arum ed samay balikas ed Genesis 3:14, agtayo balet nepeg ya isipen a walaan na sali imay uleg antis na impangisamba ed satan. Akin?

Lapud say talagan manunan angipaarapan nen Jehova na panangukom to et si Satanas​—say agnanengneng ya espiritu ya angusar ed satan ya abeban klase na ayep. Say Biblia so manideskribe ed si Satanas bilang say “ama na tila” tan say “daan ya uleg.” Sayan duaran balikas so mapatnag a manutukoy ed impangusar nen Satanas na sakey a nanengneng ya ayep, a sakey ya uleg, bilang pinagkasangiyan to pian tangguyoren si Eva ya onsunggay ed ganggan na Dios.​—Juan 8:44; Apocalipsis 20:2.

Pinalsa na Dios iray uleg, tan mapatnag a nginaranan nen Adan iratan antis nin pinalikdo nen Satanas si Eva panamegley na uleg. Agnepeg a tetelen imay agmakapanisip ya uleg ya akitongtong ed si Eva lapud agto amta a sikato so uusaren nen Satanas. Agto met amta so nipaakar ed impangukom na Dios ed saramay tinmunganga.

Akin sirin et sinalambit na Dios so nipaakar ed abeban kipapasen na samay uleg? Say kakikiwas na uleg ed dati lan ayaman to, a manilas-ilas ed eges to tan ipaway-paway toy dila to, a singano mandildil na dabok, so matukoy a mangisisimbolo ed niyabeban kipapasen nen Satanas. Dati et sikato so walaan na atagey a posisyon bilang sakey ed saray anghel na Dios, balet natan et sikato so niiyan ed abebbeban kipapasen a tinukoy na Biblia bilang Tartaro.​—2 Pedro 2:4, NW.

Niarum ni, no panon a nasugat na sakey a literal ya uleg so mukor na sakey a too, diad niyabeban kipapasen nen Satanas et ‘sugaten to so mukor’ na “ilalak,” odino bini, na Dios. (Genesis 3:15) Say manunan kabiangan na satan a bini et apaneknekan a si Jesu-Kristo, a temporaryon pinairap na saray manangilaman nen Satanas. Balet, nasabi panaon et say ulo na simbolikon uleg so mekmeken nen Kristo tan saray apaolin alanaan a Kristianon kakaiba to. (Roma 16:20) Kanian, say impangisamba na Dios ed samay uleg et matukoy a mangililitrato ed inkiyabeba tan sigpot lan pakaderal na agnanengneng a “daan ya uleg,” si Satanas a Diablo.