Makapabiskeg na Pananisia so Edukasyon na Biblia

“AGAYLAN pribilehyo a nausar so apalabas a limaran bulan pian lalon namotektek so kanonotan na Manamalsa tayo tan naaralan ya aligen so panmoria to ed saray bengabengatla!” so inkuan na sakey ya estudyante ya angirepresenta ed koma-122 a klase na Watchtower Bible School of Gilead diad agew na impangraduar da. Say agew na Marso 10, 2007 et seguradon agnalingwanan na sarayan 56 ya estudyante a magano lan manmisionaryo diad 26 a bansa a pangibakian ed sikara.

Maligsan inabrasa nen Theodore Jaracz, a sakey a membro na Mananguley ya Ulop, so 6,205 ya inmatendi, insan inkuan to: “Segsegurado kami a diad inyatendi yo ed sayan programa ed pangraduar et napabiskeg so espiritualidad tan pananisia yo.” Insan to nantutumbokan ya imparungtal so apatiran espiker a mangiter ed saray estudyante na nipanpanaon a panamaseseg tan simbawa a nibase ed Biblia pian natulongan iran ontalona ed asainmin da bilang misionaryo.

Apaseseg a Mamabiskeg ed Pananisia na Arum

Impaliwawa nen Leon Weaver, sakey a membro na Komite na Sanga ed Estados Unidos, so teman “Mantultuloy a Manggawa na Maabig.” Impanonot to ed saray estudyante ya akapangusar la ra na aberids a 13 a taon ed sigpot-panaon a serbisyo diad pangiwawakawak da ed edukasyon na Biblia a makapabiskeg na pananisia. Inkuan to: “Sakey iyan maabig a gawa lapud nalalanor ed saya so panangiliktar ed bilay na saray totoo, tan nagkalalo ni, sakey iyan maabig a gawa lapud itatandoro na saya so Ama tayo ed tawen, si Jehova.” Insan pinaseseg nen Brother Weaver iray estudyante a mantultuloy a “mantanem nipaakar ed espiritu” tan ‘ag-onkekesaw ed panggawa na maabig.’​—Galacia 6:8, 9.

Si David Splane, a sakey a membro na Mananguley ya Ulop, so angitarya na praktikal iran panonot diad impamalaknab to ed teman “Gawa Yo lan Tampol so Sankaabigan Yo.” Impaseseg nen Brother Splane ed saray balon misionaryo a diad gapo ni labat na asainmin da et gawaen da lay sankaabigan da. Inkuan to: “Mansiansia kayon positibo. Agkayon tampol mannononot na negatibo ed arum. Imis kayo. Agkayo magmamaliw a makritiko. Magmaliw kayon mapaabeba, tan respeto yoray agagin sabien yo.” Insan to inyarum: “Kaepas yo ed eroplano, gawa yo lan tampol so sankaabigan yo, tan komon ta bendisyonan nen Jehova iray alay dakep a kasalian yo legan yon uusaren iratan ed pangipasabi ed totoo na “maong a balita na sankaabigan.”​—Isaias 52:7.

 “Sakey a Tawir a Segsegurado” so teman impaliwawa na instruktor na Gilead a si Lawrence Bowen. Impanonot nen Brother Bowen ed saray estudyante a say inggapo na Eskuelaan na Gilead ed panaon na Guerra Mundial II et niletneg ed sigpot ya impanmatalek a nasumpal iray propesiya ed Salita nen Jehova. (Hebreos 11:1; Apocalipsis 17:8) Manlapu la’d saman, say Gilead so mangiiter ed saray estudyante na pankanawnawa pian lalon napabiskeg so pananisia ra. Say mabiskeg a pananisia so mamakiwas ed saray nangraduar a mansiansian maseseg ed panangiyabawag ed katuaan.

Impaliwawa na sakey nin instruktor na Gilead a si Mark Noumair so sananey nin makapainteres a tema: “Walay Nanonotan Kon Kaparpara Yo.” Impaimano to so ehemplo nen propetan Eliseo ya angipatnag na pananisia tan inkakpel diad impanumpal to ed asainmin  to. Oniay inkomento nen Brother Noumair a base ed 1 Arari 19:21: “Akaparaan si Eliseo a manggawa na saray pananguman ed bilay to, segundaryo labat ed sikato iray dilin pankaabigan to, tan inyabawag to so gagala nen Jehova.” Kinomendaan to iray nangraduar lapud impatnag da so ontan met ya awawey tan pinaseseg toran mantultuloy a mangipatnag ed satan diad balon asainmin da.

Say Pananisia et Manresulta ed Bulos a Pansalita

Legan a papabiskegen na sarayan magmaliw a misionaryo so pananisia ra diad panklaklase ra, inanamot da met iray sampot na simba pian ipulong ed arum so maong a balita. Lapud satan et walaray balibalin eksperiensya ra ya insalaysay tan inyakto ra ed parte na programa a nipabtang ed si Wallace Liverance, sananey nin instruktor na Gilead. Say tema ton, “Manisia Itayo, Kanian Mansalita Itayo,” et angipanonot ed saray salita nen Pablo a walad 2 Corinto 4:13.

Kayari na satan, ininterbio na duaran membro na pamilyan Bethel a si Daniel Barnes tan Charles Woody iray kaplesan tan datin misionaryo. Diad saya et nipabitar so panangasikaso tan panamendisyon nen Jehova ed saramay matoor a manlilingkor ed sikato. (Uliran 10:22; 1 Pedro 5:7) Oniay inkomento na sakey ed saratan a misionaryo: “Petepeteg a naeksperiensya min sanasawa so panangasikaso nen Jehova diad naawat min edukasyon ed Gilead. Talagan apabiskeg so pananisia mi. Importante so pananisia lapud amin a lingkor na Dios, laktip la iray misionaryo, et nidunget ed saray subok, problema, tan kapagaan.”

Itultuloy ya Ikana tan Iwakawak so Edukasyon a Makapabiskeg na Pananisia

Bilang matukotukoy a kapantokan na programa, impaliwawa nen Samuel Herd, a sakey a membro na Mananguley ya Ulop, so teman “Itultuloy Yon Pabiskegen Iray Agagi Yo.” Anto ta so gagala na edukasyon a naawat na saray estudyante? “Say gagala na satan et pian nabangatan kayo no panon yon usaren so dila yo pian nidayew si Jehova, pian nibangat iray katuaan ed saramay walad teritorya yo, tan pian pabiskegen so pananisia na sakey tan sakey,” so inkuan nen Brother Herd. Balet, pinanonotan to met iray estudyante a say dila et posible met a magmaliw a makapakapuy ed arum. (Uliran 18:21; Santiago 3:8-10) Pinaseseg to iray estudyante ya aligen day ehemplo nen Jesus diad panagsalita ra. Diad sakey ya inkagawa et talagan apabiskeg iray babangatan nen Jesus kayari ran tinmalineng ed saray salita to kanian nikuan dan: “Agta dinmalang so puso ta . . . sanen nilukasan to ed sikata so saray sulsulat?” (Lucas 24:32) Inkuan nen Brother Herd: “No makapabiskeg iray ibabaga yo, natenyeg yoy kapusoan na saray agagi ed saray akaasainan yon teritorya.”

Kayari na satan, initer ed saray nangraduar so diploma ra. Insan imbasa so sakey a sulat a mangibabalikas ed pisasalamat na interon klase. Inkuan na satan: “Ipapasen min sakey a baleg a responsabilidad so pangusar ed saray naaralan mi pian matoor a sumpalen so asainmin mi bilang misionaryo. Akaparaan kamin onla ed inerman a pasen na dalin, tan ipipikasi min manresulta komon iray sagpot mi ed maksil a kelyaw na panangidayew ed Engranden Instruktor tayo, si Jehova a Dios.” Insan tinmumbok so makmaksil a tipakan. On, apaseseg so pananisia na amin ya inmatendi ed programa na sayan impangraduar.

[Blurb ed pahina 17]

“No makapabiskeg iray ibabaga yo, natenyeg yoy kapusoan na saray agagi ed saray akaasainan yon teritorya.”

[Kahon ed pahina 15]

ESTATISKA NA KLASE

Bilang na bansa a nanlapuan: 9

Bilang na bansa ya angibakian: 26

Bilang na estudyante: 56

Aberids ya edad: 33.4

Aberids a taon ed katuaan: 16.8

Aberids a taon ed sigpot-panaon a ministeryo: 13

[Litrato ed pahina 16]

Koma-122 a Klase a Nangraduar ed Watchtower Bible School of Gilead

Diad listaan ed leksab, saray dasig so anumeroan manlapud arap anggad beneg, tan saray ngaran so akalista manlapud kawigi a manpakawanan.

(1) Howitt, R.; Smith, P.; Martinez, A.; Pozzobon, S.; Kitamura, Y.; Laud, C.(2) Fiedler, I.; Beasley, K.; Matkovich, C.; Bell, D.; Lippincott (3) Sites, W.; Andersen, A.; Toevs, L.; Fusano, G.; Rodríguez, C.; Yoo, J. (4) Sobomehin, M.; Thomas, L.; Gasson, S.; Dauba, V.; Bertaud, A.; Winn, C.; Dobrowolski, M. (5) Yoo, J.; Dauba, J.; Mixer, H.; Newton, M.; Rodríguez, F.; Mixer, N. (6) Laud, M.; Lippincott, K.; Martinez, R.; Haub, A.; Schamp, R.; Pozzobon, L.; Toevs, S. (7) Howitt, S.; Kitamura, U.; Newton, D.; Haub, J.; Sites, J.; Thomas, D. (8) Sobomehin, L.; Matkovich, J.; Fusano, B.; Winn, J.; Schamp, J.; Andersen, D.; Dobrowolski, J. (9) Fiedler, P.; Bell, E.; Beasley, B.; Smith, B.; Bertaud, P.; Gasson, M.