“Naapag Lapud Lenguahe Balet Impankasakey na Aro”

Kililiktar. Kawayangan. Kilalaban. Abaybayag lan pipirawaten na totoo so nainawaan ed saray pakakadetdetan tan kapagaan. Balet, panon tayo kasin natalonaan iray problema ed bilay? Wala ni kasi paraan pian makaliktar? Et no wala, panon?

SARATAN a pamaakaran so siningbat diad nantutumbokan a taloy-agew a distrito iran kombension, ya inorganisa na saray Tasi nen Jehova, a ginmapo nen Mayo 2006. Say tema et “Asingger la so Kililiktar!”

Siamera ed sarayan kombension so inatendian na nilibon delegado a nanlalapud nanduruman bansa. Agawa iratan nen Hulyo tan Agosto 2006, diad Prague, a kabisera na Czech Republic; diad Bratislava, a kabisera na Slovakia; diad Chorzow tan Poznan, Poland; * tan diad limaran syudad ed Alemanya​—diad Dortmund, Frankfurt, Hamburg, Leipzig, tan Munich. Masulok a 313,000 so inmatendi ed sarayan kombension.

Anton awawey so apatnagan ed amin na sarayan kombension? Antoray komento na saray akaimaton ed sarayan kombension? Tan antoy liknaan na saramay akikombension?

Saray Preparasyon

Saray bisita tan Tasi ed lokal so malikeliket a nantalaran ed sarayan kombension ya amta ran magmaliw a makatantandan espiritual ya okasyon. Talagan baleg a kimey so pangiyuksoy na magenap iran pampundoan na saray delegado. Alimbawa, diad kombension ed Chorzow, saray Polakon Tasi so mabulos ya angilukas ed ayaman da parad ngalngali 13,000 a bisita a nanlalapud Mamabukig a Europa. Saray delegado et nanlalapud Armenya, Belarus, Estados Unidos, Estonia, Georgia, Kazakhstan, Kyrgyzstan, Latvia, Lithuania, Moldova, Russia, Tajikistan, Turkmenistan, Ukraine, tan Uzbekistan.

Kaukolan a manparaan la iray delegado parad pambiahe ra pigay bulan ni antis na kombension. Si Tatiana, a sigpot-panaon a managpulong a taga-Kamchatka, a sakey a peninsula ed Russia a walad amianen-bukig na Hapon, so nantipon la na gastosen to ed pambiahe to sakey taon ni antis na kombension. Kinaukolan toy manbiahe na manga 10,500 kilometro kaarawi. Unona, sikatoy nan-eroplano na limay oras, insan nan-tren na ngalngali taloy agew, tan diad kaunoran et nambiahe na 30 oras diad bus pian makasabi ed Chorzow.

Nilibo so namboluntaryon mankimey antis na kombension, a pinagmaliw dan matukoy a pasen a panagdayewan iray istadyum tan say kaliberliber na saratan. (Deuteronomio 23:14) Bilang sakey labat ya alimbawa, saray  Tasi ed mismon Leipzig et alay abig so agawaan da diad impanlinis ed istadyum, tan impromisa dan linisan lamet itan kayari na kombension. Bilang resulta, kinansela la na saray opisyal na istadyum so baleg a babayaran parad panlinis a kabiangan ed samay kontrata ed pan-abang.

Saray Imbitasyon

Saray kongregasyon ed sankamundoan so malaklaknab ya angipakabat ed saray Kombension ya “Asingger la so Kililiktar!” Saramay inmatendi ed saray espisyal a kombension so malikeliket ya akibiang ed panangiyanunsio. Diad samay agew antis na kombension, ag-ira tinmundan angibunog na saray imbitasyon angga ed lablabi la. Kasin walay maabig iran resulta na inkaseseg da?

Sakey a Polakon Tasi a manngaran na Bogdan so angimbita ed sakey a masiken a labalabay to komon so onatendi balet ta say pension to et kulang nin gastosen to a paonla ed Chorzow a 120 kilometro kaarawi. Nibanbana ed saman a walay bakantin yurongan ed bus a kinupado na kongregasyon. Oniay insalaysay nen Bogdan: “Imbaga mi ed sikato a nayarian toy mila ed sikami a libre no sikatoy makasabi ed pasen a pansipotan diad oras na 5:30 ed kabuasan.” Sikatoy inmabobon tan akaatendi ed kombension. Kayari na saman et sikatoy sinmulat ed saray agagi, a kuan to: “Kayari na inyatendik ed sayan kombension, determinado ak lan magmaliw a maong a too.”

Sakey a labi, diad Prague, sakey a lakin manaayam ed hotel a tinuloyan na saray delegadon nanlapud Britanya so angikuan ed saray akikombension a sikatoy akaatendi met ed saray sesyon diad saman ya agew. Anto kasi amakiwas ed sikato pian onatendi? Inkuan to a sikatoy aminsamplon akaawat na imbitasyon manlapud nanduruman Tasi diad saray karsada ed syudad, kanian sikatoy apakiwas ya onla! Masyadoy pandinayew to tan labay toy makaaral nin nagkalalo.​—1 Timoteo 2:3, 4.

Makagunggonan Programa a Panangibangat ed Biblia

Siningbat ed sayan programa no panon so pangarap ed nanduruman problema. Impabitar na saray direktan simbawa ed Biblia no panon a naresolbe odino nasungdoan irayan problema.

Saray indibidual a mapagpaga lapud itatatken, maletey a bunigas, impatey na saray inad-aro, odino arum nin personal a problema so akaawat na panamaseseg manlapud Biblia ya amawala ed sikara na masnag ya ilalo ed bilay. (Salmo 72:12-14) Saray sanasawa tan atateng so sinimbawa na Biblia no panon iran nawalaan na maliket a panamaley tan no panon dan pabalegen so ananak da ed maaligwas a paraan. (Eclesiastes 4:12; Efeso 5:22, 25; Colosas 3:21) Saray Kristianon kalangweran, a dedesdesen na makapuy iran kalimog diad eskuelaan bangta makakaawat na makabat a simbawa manlapud Salitay Dios diad ayaman tan diad loob na kongregasyon, so akadngel na praktikal a simbawa no panon dan arapen iray pananesdes na saray kalimog da tan no panon dan ‘ibatikan iray ibibeg ya inuugaw.’​—2 Timoteo 2:22.

Sakey a Tuan Internasyonal ya Impanaagi

Saray Tasi nen Jehova so naynay a makakaawat na maabig a giya manlapud Kasulatan diad saray pandaragup da. (2 Timoteo  3:16) Balet ta sarayan kombension et espisyal, lapud nanduruman bansa so nanlapuan na saray inmaatendi. Amin irayan espisyal a kombension et walaan na pareparehon espiritual a programa ya impresenta ed dakel a lenguahe. Kada agew et nampaliwawa iray membro na Mananguley ya Ulop na saray Tasi nen Jehova, tan nagmaliw a lalon makapainteres so programa lapud saray report manlapud arum a bansa. Sarayan paliwawa tan report so impatalos pian nagunggonaan so nanduruman grupo na lenguahe ya inmatendi.

Saray delegado so malikeliket a makapikabat ed saray agagi ra ed espiritual a nanlapud arum a daldalin. “Aliwan problema so pandurumaan na lenguahe,” so kuan na sakey a delegado. “Imbes, satan so lalon amaliket ed okasyon. Nanduruma so kultura na saray sankaili, balet amin da so impankakasakey na parehon pananisia.” Diad kombension ed Munich, oniay komento na saray inmatendi: “Naapag lapud lenguahe balet impankasakey na aro.” Inerman so bansa ra tan antokaman so salita ra, alikna na saramay inmatendi a wala ra’d limog na tuan sankakaaro, a sanaagi ed espiritual.​—Zacarias 8:23.

Saray Balikas na Pisasalamat

Say kipapasen na panaon legan na saray kombension ed Poland so anubok ed awawey tan inkaanos na saray delegado. Nilikud ed mabetbet ya uran, ambetebetel met so temperatura, a manga 14 degrees Celsius. Oniay inkomento na sakey ya agin laki a nanlapud Estados Unidos: “Saman la so sankaaliwaan a panaon tan sankabetelan a temperatura a naeksperiensyak diad sakey a kombension, tan dagdaiset met so atalosan ko ed programa. Balet amin iratan so binawi na say makapadinayew ya internasyonal ya ulopan, say malikeliket ya awawey, tan say agnaparaan a panagparawes. Agkon balot nalingwanan iyan kombension!”

Say agbalot nalingwanan na saray Polakon akikombension et say impangiyanunsio ed kipaway na Insight on the Scriptures ed lenguahe ra, ya alay abig itan a tumang ed impan-anos da ed betel tan uran. Nanliketan met a maong so impangipaway ed balon libro a Live With Jehovah’s Day in Mind diad amin a Kombension ya “Asingger la so Kililiktar!”

Sayan kombension so agmet nalingwanan na dakel ed saray inmatendi lapud arum nin rason. Oniay nanonotan nen Kristina, ya agin taga-Czech a namboluntaryon man-asisti ed bus a niluganan na grupo na saray delegadon nanlapud biek a bansa: “Sanen manpapataniran kami la, siak so nilakap na sakey ya agin bii, tan inkuan to: ‘Naas-asikaso ak a maong! Inyawitan mo kami na naakan mi diad mismon yurongan mi tan pati danum ya inumen mi. Balbaleg a salamat ed masakripisyon panangarom.’” Say tutukoyen to et say impangitarya ed pangugtoan na saray delegadon nanlapud biek a bansa. Oniay insalaysay na sakey ya agin laki: “Sakey itan a kimey ya agmi ni naeksperiensya nensaman. Kinaukolan ed satan so pangibunog na ngalngalin 6,500 a pangugtoan kada agew. Talagan makapatenyeg-liknaan so pakanengneng ed agaylan karakel a namboluntaryo, a pati ugugaw, pian ontulong.”

Oniay inkuan na sakey ya agin bii a nambiahe manlapud Ukraine pian mikombension diad Chorzow: “Atenyeg a maong so liknaan mi ed panangaro, panangasikaso, tan inkamabunlok ya impatnag na saray kapananisiaan tayo. Agmi amta no panon min ibalikas so pisasalamat mi.” Oniay insulat met na waloy-taon a si Annika a taga-Finland diad sangan opisina na saray Tasi nen Jehova ed Poland: “Marakdakep a maong so kombension nen say iisipen ko. Alay abig a talaga so magmaliw a kabiangan na organisasyon nen Jehova, lapud nawalaan ka na kakaaro ed interon mundo!”​—Salmo 133:1.

Saray Komento na Saray Akaimaton

Sakbay na saray kombension, inyarunsa so pangipasyar ed arum ed saray delegado. Diad  probinsya na Bavaria, sinmamar iray bisita diad saray Kingdom Hall, tan sikaray inabrasa na saray Tasi diman. Nandinayew a maong so sakey ya aliwan-Tasin tour guide na grupo ed sayan panaaroan na sanaagi. Oniay imbaga na sakey a delegado: “Sanen wala kami la’d bus a papawil ed hotel mi, imbaga na tour guide a nidumaruma kami ed arum a grupon impasyar to. Desente kuno iray sulong mi, tan amin so akikoopera ed saramay mangidadaulo ed grupo. Anggapo so manaayew tan aliwan magulo. Pankelkelawan to no panon ya akapankakaaron maong a tampol iramay datin agsankakabat.”

Oniay insalaysay met na sakey ya agin laki a namboluntaryo ed News Service Department diad kombension ed Prague: “Nen kabuasan na Simba, binmisita ed sikami so hepe na saray pulis ya intalagan manbantay diad kombension. Naimano to a marendeen so kaliberliber tan inkuan to ya anggapo lay kaukolan ton gawaen. Imbaga to met a walaray residente ed kaliberliber a nantetepet no anto iyan klase na programa. Sanen inkuan ton saray Tasi nen Jehova, ag-aliketan so maslak ed sikara, balet ta oniay imbaga na pulis ed sikara: ‘No naaligan labat komon na totoo so inkadisiplinado na saray Tasi nen Jehova, anggan kapaldua labat, agla nakaukolan so pulis.’”

Dakel so Akaliktar La!

Say Salita na Dios, say Biblia, so pinagkataytay ed baetan na saray kultura, a mamapawalay deen tan pankakasakey ed limog na saray Kristiano. (Roma 14:19; Efeso 4:22-24; Filipos 4:7) Tua iya ed saray espisyal a kombension ya “Asingger la so Kililiktar!” Saray Tasi nen Jehova so niliktar la ed dakel iran problema a mamapairap ed mundo. Anggapo la ed limog da iray pigaran pamproproblemaan na sosyedad, a singa say panagbusol, panagduksa, tan panaglabi ed rasa, tan tatalaranan day panaon sano naandi la ed interon mundo iratan a problema.

Saramay inmatendi ed sarayan kombension so akaeksperiensyan mismo na pankakasakey ed limog na saray Tasi a nanlalapud nanduruman bansa tan kultura. Lalon apatnagan iya sanen manampot la iray kombension. Amin so mantitipak, manlalakapan iray balon sankakaaro, tan sikaray manpapalitrato. (1 Corinto 1:10; 1 Pedro 2:17) Lapud malikeliket tan kombinsido iray delegado ya asingger lay pakaliktar da ed amin a problema tan kapagaan, pinmawil ira ed saray ayaman tan kongregasyon da a lalon determinado ya ombenben a malet ed “salita na bilay” a kien na Dios.​—Filipos 2:15, 16.

[Paimano ed Leksab]

[Kahon/Litrato ed pahina 10]

Duamplo tan Anem a Lenguahe a Walaan na Saksakey a Programa

Diad sayan amin a siameran kombension, say programa so impresenta ed lokal a lenguahe. Diad saray kombension ed Alemanya, imparungtal iray paliwawa ed 18 niran lenguahe. Diad Dortmund et impresenta iray paliwawa diad Arabe, Español, Farsi, Portuges, tan Ruso; diad Frankfurt et Ingles, Pranses, tan Serbiano/Kroasyano; diad Hamburg et Danes, Sueko, Tamil, tan UIandes; diad Leipzig et Intsik, Polako, tan Turko; tan diad Munich et Griego, Italyano, tan German Sign Language. Diad kombension ed Prague, amin a paliwawa so impresenta ed Czech, Ingles, tan Ruso. Diad Bratislava, imparungtal so programa ed Eslovak, Hungaryo, Ingles, tan Slovakian Sign Language. Diad Chorzow, inusar iray lenguahen Polako, Ruso, Ukranio, tan Polish Sign Language. Diad Poznan et inusar so Pinis tan Polako.

Ami-amin et duamplo tan anem a lenguahe! Tua a saray akikombension et naapag lapud lenguahe, balet impankakasakey ira na panaaroan da.

[Litrato ed pahina 9]

Malikeliket iray delegadon Kroasyano diad Frankfurt sanen naawat da so “New World Translation” ed mismon lenguahe ra