Barzillai​—Sakey a Lakin Amta To Iray Limitasyon To

‘MAKAPABELAT ak labat ed sika.’ Onia so imbaga na 80-años lan masiken a si Barzillai ed si Arin David na Israel. Inkuan na Biblia a si Barzillai et “mayaman a maong,” lapud dakerakel so kaykayarian to. (2 Samuel 19:32, 35, MB) Si Barzillai et nanayam diad dalin na Galaad, sakey a mapalandey a lugar ed bukig na Ilog Jordan.​—2 Samuel 17:27; 19:31.

Anto iray kipapasen sanen imbaga itan nen Barzillai ed si David? Tan akin ya ontan so imbaga na sayan masiken?

Impanrebelde ed Ari

Napepeligro si David lapud sinamsam na anak ton Absalom so trono kayari na ‘impanakew to ed kapusoan na lalaki na Israel.’ Maseguron kabilen nen Absalom so siopaman a manmatoor ed ama to. Kanian tinmaynan ed Jerusalem si David tan saray lingkor to. (2 Samuel 15:6, 13, 14) Kasabi nen David diad Mahanaim, sakey a lugar ed bukig na Jordan, sikatoy tinulongan nen Barzillai.

Si Barzillai tan say duara nin lalaki, si Sobi tan Makir, so mabunlok ya angitarya na dakel a materyal a pankaukolan di David. Impatnag na sarayan taloran matoor a lalaki a natetebek da so mair-irap a kipapasen nen David tan saray sundalo to sanen oniay imbaga ra: “[Sikaray] narasan, tan naksawan, tan napgaan, dia ed kalawakan.” Ginawa ra so anggaay nayarian da pian nitarya ra ed si David tan saray sundalo to so amin a pankaukolan da a singa saray  pandukolan, trigo, sebada, arina, insanglil a bukebukel, habas, lentehas, dilo, mantikilya, karnero, tan arum nira.​—2 Samuel 17:27-29.

Mapeligro so ontulong ed si Arin David lapud say siopaman ya onsuporta ed sikato et seguradon dusaen nen Absalom. Kanian, makmakpel si Barzillai diad impanmatoor to ed si David.

Anguman so Kipapasen

Kayarin tuloy na satan, nanlalaban iray rebelden puersa nen Absalom tan saray sundalo nen David. Agawa itan diad katakelan na Efraim, a nayarin diad lugar na Mahanaim. Atalo so armada nen Absalom, tan agawa ‘diman ed saman ya agew so baleg ya impanpapateyan.’ Anggaman sinali nen Absalom so ontakas, sikatoy apatey lanlamang.​—2 Samuel 18:7-15.

Kanian pinmawil ed dati iray kipapasen, ya anggapo lay manasamsam na inkaari nen David ed Israel. Saray lingkor to et agla nanamot-amot. Sakey ni, sikara so akisalamatan a maong nen David tan nala ray respeto to lapud impanmatoor da ed sikato.

Sanen ompawil la ed Jerusalem si David, ‘si Barzillai a Galaadita so linmasur manlapud Rogelim, tan akibaliw ed Jordan ed ari, pian sikato so itulor to ed nibaliw na Jordan.’ Diad saman et oniay inyopresi nen David ed si Barzillai: “Mibaliw ka ed siak, tan taganoen ta ka ed siak ed Jerusalem.”​—2 Samuel 19:15, 31, 33.

Maseguron pisalsalamatan a maong nen David so impanulong ed sikato nen Barzillai. Tan ompatnag ya aliwa labat a materyal iran pankaukolan so labay ya itumang na ari ed si Barzillai, lapud agla itan nakaukolan na sayan mayaman a masiken. Nayarin labay nen David ya ikdan si Barzillai na posisyon ed palasyo lapud makapadinayew iran kalidad na sayan masiken. Seguradon sakey a kagalangan so pakawalaan nen Barzillai na permanentin posisyon diad palasyo lapud diad satan et napanggayagaan to iray pribilehyo na pagmaliw a sakey a kaaro na ari.

Kapaabebaan tan Pagmaliw a Realistiko

Oniay inyebat nen Barzillai ed imbitasyon nen Arin David: “Panon ta karakel so saray agew na saray taon na pambilay ko, pian mitatdang ak ed ari ed Jerusalem? Mantaon ak ed sayan agew na walomplo: napambiig ko ta so maong tan mauges? Nayarian na aripen mo a tawayan no anto so kanen ko odino anto so inumen ko? Nayarian ko ta ni a denglen so boses na mankankanta a laki tan mankankanta a bii?” (2 Samuel 19:34, 35) Kanian, marespeton ag-inawat nen Barzillai so imbitasyon tan say alay abig a pribilehyo. Akin ey?

Say sakey a rason no akin ya ontan so desisyon nen Barzillai et sikatoy maedad la kanian wala laray agto nagawaan. Nayarin inisip nen Barzillai a sikatoy agla manbayag. (Salmo 90:10) Ginawa ton amin so nayarian to ta pian nasuportaan si David, balet amta to met iray limitasyon to lapud inkamasiken to la. Agninonot nen Barzillai so pakawalaan na impluensya tan inkabantog, noagta say ninonot to et no anton talaga so nasarag to nin gawaen. Aliwan singa si Absalom a maambisyon, si Barzillai so makabat ya angipatnag na kapaabebaan.​—Uliran 11:2.

Say sakey nin rason no akin ya onman so desisyon nen Barzillai et agto labay a makasbel iray limitasyon to ed kimey na ari a tinuro na Dios. Oniay imbaga nen Barzillai: ‘Makapabelat ak labat ed sika, kagalang kon ari.’ (2 Samuel 19:35, MB) Anggaman sinuportaan to nin siansia si David, maseguron ninonot nen Barzillai a mas nagawaan na sakey a walad kaksilan so ipapabtang na ari. Oniay imbaga  nen Barzillai, a nayarin say tutukoyen to et say anak to: “Nia, si aripen mo a Camaam; sikato komon so mibasil ed katawan ko ya ari; et gawaen mo ed sikato so isipen mo a maong.” Imbes a naopendi si David, inawat to so insuheri na masiken. Diad tua, sakbay ya ombaliw si David diad Jordan, ‘inangoban to si Barzillai, tan sikato so benendisyonan to.’​—2 Samuel 19:37-39.

Nakaukolan so Pagmaliw a Balanse

Ipapabitar na salaysay nipaakar ed si Barzillai a nakaukolan so pagmaliw a balanse. Diad sakey a dapag, agtayo nepeg ya ipulisay so sakey a pribilehyo ed serbisyo odino paliisan so pandampot ed satan lapud mas labay tayo so bilay ya anggapoy aasikasoen a responsabilidad odino iisipen tayo ya agtayo nasarag so manakbat na responsabilidad. Napanoan na Dios so antokaman a kakulangan tayo daput no manmatalek itayo ed biskeg tan kakabatan ya ipagamor to.​—Filipos 4:13; Santiago 4:17; 1 Pedro 4:11.

Diad biek a dapag, nepeg tayon bidbiren iray limitasyon tayo. Alimbawa, say sakey a Kristiano et nayarin okupado lan maong ed espiritual iran kimey to. Namomoria to a no awaten to so kaaruman niran pribilehyo, ompano napaulyanan to so Makasulatan a responsabilidad ton legpeten so pamilya to. Diad onian kipapasen, agta kapaabebaan tan inkamakatunongan ed biang to so agto ni pangawat ed kaaruman iran pribilehyo?​—Filipos 4:5; 1 Timoteo 5:8.

Alay abig so alimbawa nen Barzillai, tan nepeg tayon dalepdepen itan. Sikato so matoor, makpel, mabunlok, tan mapaabeba. Balet say manuna ed amin et determinado si Barzillai a mangiyuna ed panlabayan na Dios.​—Mateo 6:33.

[Mapa ed pahina 15]

(Parad aktual a format, nengnengen so publikasyon)

Say 80-años a si Barzillai so nambiahe na arawrawi pian nipatnubang to si David

GALAAD

Rogelim

Succoth

Mahanaim

Ilog Jordan

Gilgal

Jerico

Jerusalem

EFRAIM

[Litrato ed pahina 13]

Akin ya ag-inawat nen Barzillai so imbitasyon nen David?