Kasin Mantultuloy Kan ‘Manakar Unong ed Espiritu’?

‘Manakar kayo unong ed espiritu pian agyo naunor iray kaalakan na laman.’​—GALACIA 5:16.

1. Antoy gawaen tayo pian naandi so kapagaan tayo ya ompan makapankasalanan itayo ed espiritu?

 WALAY paraan pian naandi so kapagaan tayo ya ompan makapankasalanan itayo ed masanton espiritu nen Jehova, salanti, say pangiyaplika ed imbaga nen apostol Pablo: ‘Manakar kayo unong ed espiritu pian agyo naunor iray kaalakan na laman.’ (Galacia 5:16) No paiwanwan itayo ed espiritu na Dios, ag-itayo nadaeg na agmanepeg iran pilalek na laman.​—Roma 8:2-10.

2, 3. No mantultuloy itayon manakar unong ed espiritu, antoray nagunggona tayo?

² Legan itayon mantutultuloy a ‘manaakar unong ed espiritu,’ pakiwasen itayo na sayan aktibon puersa nen Jehova ya ontulok ed sikato. Nipatnag tayo iray kalidad To diad ministeryo, kongregasyon, abung, tan ed inerman. Tan magmaliw a mapatpatnag ya iwawanwan na bungay espiritu so pidedeneng tayo ed kaasawaan tayo, ananak tayo, kaagian tayo, tan ed arum ni.

³ Say ‘panakar unong ed espiritu’ et ontulong met ed sikatayon makapaliis ed kasalanan. Ta no onkukurang ed sikatayo so masanton espiritu, seguradon ag-itayo makapanggawa na kasalanan ya agnaperdona. Balet, anto niray arum a nagunggona tayo no mantultuloy itayon manakar unong ed espiritu?

Mansiansian Maapit ed Dios tan ed Kristo

4, 5. Anto so magmaliw a panmoria tayo ed si Jesus no manaakar itayo unong ed espiritu?

⁴ Lapud panaakar tayo unong ed masanton espiritu, mansiasiansia itayon maapit ed Dios tan ed Anak to. Onia so inkuan nen Pablo ed saray mananisia ed Corinto nipaakar ed espiritual iran langkap: “Ipakabat ko ed sikayo [dati iran managtalintao], ta anggapo so too a mansalita dia ed espiritu na Dios a kuan to, Si Jesus naayew; tan anggapo so too a makapangibaga, Si Jesus sikato so Katawan, noag ingen dia ed espiritu santo.” (1 Corinto 12:1-3) Antokaman ya espiritun mamakiwas ed sakey a toon mangayew ed si Jesus et seguradon nanlapud si Satanas a Diablo. Balet bilang Kristianos a manaakar unong ed masanton espiritu, kombinsido itayo a pinaoli nen Jehova si Jesus tan ginawa Ton sankatagyan ed amin a palsa. (Filipos 2:5-11) Manisia itayo ed dondon bagat nen Jesu-Kristo tan bibidbiren tayon sikato so Katawan a tinuro na Dios a mangidaulo ed sikatayo.

⁵ Nen unonan siglo C.E., walaray mankuan a Kristiano ya ag-anisian si Jesus et linma dia a silalaman. (2 Juan 7-11) Sayan palson panmoria et inawat na arum kanian impulisay da so tuan bangat nipaakar ed si Jesus a Mesias. (Marcos 1:9-11; Juan 1:1, 14) Agtayo nagawa so ontan a panag-apostata no manakar itayo unong ed masanton espiritu. Balet, dia labat ed pansiansia tayon aliing ed espiritual a makapantultuloy itayon makagamor na agkanepegan a panangasi nen Jehova tan ‘makapanakar ed katuaan.’ (3 Juan 3, 4) Kanian, komon ta determinado itayon mangipulisay ed amin a nengneng na panag-apostata ta pian napansiansia tayo so malet a siglaotan ed mangatatawen ya Ama tayo.

6. Antoran kalidad so pawalaen na espiritu na Dios ed saramay manaakar unong ed satan?

⁶ Impilaktip nen Pablo ed saray “gawa na laman” a singa say pikakalugoran tan kaalakan na laman, so panamikewet ed pananisia tan say pan-apostata panamegley na ipawil ed panagtalintao. Balet oniay impaliwawa to: “Saray kien nen Kristo, impasak da la ed krus so laman a pati saray kakanaan na linawa’ra tan kaalakan na laman da. No manbilay itayo ya unong ed espiritu, manakar itayo met komon unong ed espiritu.” (Galacia 5: 19-21, 24, 25) Anto ta iran kalidad so pawalaen na aktibon puersa na Dios ed saramay manbibilay tan mankukurang unong ed espiritu? Onia so insulat nen Pablo: “Say bunga na espiritu sikato so aro, liket, deen, kasungdoan [odino anos], [“panangasi,” NW], kaabigan, sisia, tayadno, dangka.” (Galacia 5:22, 23) Pantongtongan tayo pa irayan bunga na espiritu.

“Manaaroan so Sakey tan Sakey”

7. Anto so aro, tan panon itan a nideskribe?

⁷ Say aro, a bunga na masanton espiritu, et kaslakan a mangilalanor ed pakalikna na baleg a lugor tan panangiyansakit ed arum, ya atekepan na maapit a siglaotan ed sikara. Ibabaga na Kasulatan a say ‘Dios et aro’ lapud satan a mismo so inkapersona to. Nipatnag so agaylan panangaro na Dios tan say Anak to ed katooan panamegley na dondon bagat nen Jesu-Kristo. (1 Juan 4:8; Juan 3:16; 15:13; Roma 5:8) Bilang papatumbok nen Jesus, sikatayoy nabidbiran ed aro tayo ed sakey tan sakey. (Juan 13:34, 35) Diad tua et niganggan ed sikatayon ‘aroen so sakey tan sakey.’ (1 Juan 3:23) Tan inkuan nen Pablo a say aro et manangitepel tan mapangasi. Agmasiblet, agmapasirayew, aliwan mabanday so kagagawa to, agto anapen so kien to. Agmapasnok, agmanbibilang na impakasakitan. Maliket ed katuaan, aliwan diad ag-onkatunongan. Say aro itepel, sisiaen, ilaloan tan sungdoan to so amin. Tan agbalot itan mangangga.​—1 Corinto 13:4-8.

8. Akin a nepeg tayon ipatnag so aro ed saray kapara tayon managdayew nen Jehova?

⁸ No abuloyan tayo so espiritu na Dios a mamawala ed sikatayo na aro, ompatnag itan ed pisisiglaotan tayo ed Dios tan ed kapara tayon too. (Mateo 22:37-39) Onia so insulat nen apostol Juan: “Say agmangaro mansiansia ed patey. Anggan siopa a mamusol ed agi to sikato so akapatey: tan amta yo a siopaman ya akapatey anggapo so bilay ya andi-angga a mansiansia ed sikato.” (1 Juan 3:14, 15) Diad Israel nensaman, say sakey ya akapatey et makabatik lambengat ed syudad a salimbengan no agto bubusolen so apatey to. (Deuteronomio 19:4, 11-13) No iwawanwan itayo na masanton espiritu, ipatnag tayo so aro ed Dios, ed saray kaagian, tan ed arum ni.

“Say Liket nen Jehova Sikato so Biskeg Yo”

9, 10. Anto so liket, tan antoray pigaran rason tayo pian manliket?

⁹ Say liket et kabaliksan toy pakalikna na baleg a gayaga. Si Jehova so “Dios a maliket.” (1 Timoteo 1:11, NW; Salmo 104:31) Panliketan na Anak to so panggawa na linawa na Ama to. (Salmo 40:8; Hebreos 10:7-9) Tan “say liket nen Jehova sikato so biskeg [tayo].”​—Nehemias 8:10.

¹⁰ Sano gagawaen tayo so linawa to anggan maniirap, maneermen, odino napapasegsegang itayo, napepenek itayo lapud liket ya ipapagamor na Dios. Talagan baleg a liket so itatarok ed sikatayo na “pikakabat ed Dios”! (Uliran 2:1-5) Say makapaliket a siglaotan tayo ed Dios et niletneg ed suston pikakabat, ontan met ed pananisia ed sikato tan ed dondon bagat nen Jesus. (1 Juan 2:1, 2) Say pagmaliw tayon kabiangan ed alenleneg a tuan sankamundoan ya impanaagi et sananey nin rason pian manliket. (Sofonias 3:9; Aggeo 2:7) Makapaliket met so ilalo tayon Panarian tan say pribilehyo tayon iyabawag so maong a balita. (Mateo 6:9, 10; 24:14) Ontan met ed say ilalo tayon makapambilay na andi anggaan. (Juan 17:3) Kanian nepeg labat a ‘mansayaksak’ itayo ta walaan itayo na oniaran alay abig ya ilalo.​—Deuteronomio 16:15.

Magmaliw a Mikakareenan tan Maanos

11, 12. (a) Panon yon ukeran so deen? (b) Anto so nagawaan ed sikatayo na deen na Dios?

¹¹ Say deen, a sananey nin bunga na masanton espiritu, et kabaliksan toy kiwawala na kaligenan tan inkaandi kapagaan. Say mangatatawen ya Ama tayo et Dios na kareenan, tan onia so nipaseguro ed sikatayo: “Si Jehova bendisyonan to so totoo to na kareenan.” (Salmo 29:11; 1 Corinto 14:33) Onia so inkuan nen Jesus ed saray babangatan to: “Say kareenan so itila’ko ed sikayo; say kareenan ko iter ko ed sikayo.” (Juan 14:27) Panon itan ya ontulong ed saray papatumbok to?

¹² Say deen ya impagamor nen Jesus ed saray babangatan to et amaligen ed kapusoan da tan amawas ed saray kapagaan da. Sikaray nagkalautlan awalaan na kareenan sanen naawat da so insipan a masanton espiritu. (Juan 14:26) Natan et napanggagayagaan tayo so agnaparaan a “deen  na Dios” a mamapaligen ed nonot tan kapusoan tayo lapud onkukurang ed sikatayo so espiritu tan ipipikasi tayo itan. (Filipos 4:6, 7) Niarum ni, tutulongan itayo na espiritu nen Jehova a magmaliw a mapalna tan mikakareenan ed saray kaagian tayo tan ed arum ni.​—Roma 12:18; 1 Tesalonica 5:13.

13, 14. Anto so panag-anos, tan akin a nepeg tayon ipatnag itan?

¹³ Say anos et misiglaotan ed pikakareenan ta no walaan itayo na satan et nitepel tan nasungdoan tayo iray makapasulag tan kalilingoan tekep na paniilalon ondakep ni so situasyon. Say Dios et masungdo. (Roma 9:22-24) Impatnag met nen Jesus itan a kalidad. Tan nayari itayo met a nagunggonaan ed satan lapud oniay insulat nen Pablo: “Siak so akasian pian diad panamegley ko, bilang say manunan alimbawa, et nipatnag nen Kristo Jesus so amin a panag-anos to bilang ehemplo na gawaen to ed saramay mangagamil na pananisia ed sikato nipaakar ed bilay ya andi-anggaan.”​—1 Timoteo 1:16, NW.

¹⁴ Say panag-anos et ontulong ed sikatayon makapantepel sano walay akapansalita odino akapanggawa ed sikatayo na makapasakit. Onia so impaseseg nen Pablo ed saray kaparan Kristianos: “Masungdo kayo komon ed amin.” (1 Tesalonica 5:14) Lapud amin tayo et aliwan ayadyari tan nalilingo, seguradon labay tayon mapasensia iray totoo ed sikatayo, ya anosan da itayo sano nalingo tayo ed pidedeneng ed sikara. Kanian komon ta panggunaetan tayoy ‘mantepel na andukey a tekep na gayaga.’​—Colosas 1:9-12.

Ipatnag so Panangasi tan Kaabigan

15. Ukeran so panangasi, tan mamitla na pigaran ehemplo na satan.

¹⁵ Nipapatnag tayo so panangasi * sano ipapanengneng tayoy interes ed arum panamegley na makaaro tan makatulong iran balikas tan gawa. Mapangasi si Jehova, ontan met ed Anak to. (Roma 2:4; 2 Corinto 10:1) Iilaloan ya ipatnag na saray lingkor na Dios so panangasi. (Miqueas 6:8;  Colosas 3:12) Anggan saramay anggapoy personal a siglaotan da ed Dios et akapangipatnag na “sankaabigan a linawa.” (Gawa 27:3; 28:2) Kanian, segseguradon nipatnag tayo so panangasi no ‘manaakar itayo unong ed espiritu.’

16. Antoray pigaran kipapasen a nepeg a mamakiwas ed sikatayon mangipatnag na panangasi?

¹⁶ Nipatnag tayo nin siansia so panangasi anggan sano akapasnok itayo lapud makatunongan a rason. Alimbawa, sano walay akapansalita ed sikatayo na ansakit odino agto naasikaso so kakikiwas to. “Onsanok kayo, ingen ta agkayo mankakasalanan” so inkuan nen Pablo. “Agkomon onselek so agew a sipapasnok kayo ni. Tan agyo palongkitan so Diablo. . . . Manaanosan kayo ed sakey tan sakey, mapangasi, manpeperdonaan so sakey tan sakey, a singa met say Dios pinerdona to kayo ed Kristo.” (Efeso 4:26, 27, 32) Nagkalautlan nepeg a pangipatnagan na panangasi iramay manasagmak na kairapan. Komusta balet no agmangiter na Makasulatan a simbawa so sakey a matatken lapu labat ta agto labay a nasakitan so liknaan na sakey a mabitabitar ya onaarawi la ed kurang a ‘maabig, maptek tan matua’? No ontan et agto mangipapatnag na panangasi.​—Efeso 5:9.

17, 18. Panon a naukeran so kaabigan, tan anto so nepeg a gawaen na satan ed bilay tayo?

¹⁷ Say kaabigan odino kamaongan et alay abig a kalidad tan atagey a moral. Say Dios so naspot ed kaabigan. (Salmo 25:8; Zacarias 9:17) Si Jesus et napno na alay abig iran kalidad tan walaan na atagey a moral. Ingen ta agto labay ya awaten so titulon “Maong” sanen sikatoy tinawag a “Maong a Managbangat,” maseguron lapud bibidbiren ton say Dios so sankasuperyoran no nipaakar ed kaabigan. (Marcos 10:17, 18)

¹⁸ Lapud atawir a kasalanan et naaamper so pakayari tayon manggawa na kaabigan. (Roma 5:12) Anggaman kuan, nipatnag tayo iyan kalidad no ipikasi tayo ed Dios a ‘bangatan to itayo na maong a panangisisip.’ (Salmo 119:66) Oniay inkuan nen Pablo ed saray kapananisiaan ed Roma: “Siak met mailalo ak ed sikayo, agagik, a sikayo met napno kayo na kaabigan, napno kayo ed amin a kakabatan.” (Roma 15:14) Say sakey a manangasikaso a Kristiano et nepeg a “maaro ed maabig.” (Tito 1:7, 8) No iwanwan itayo na espiritu na Dios, nakabkabat itayo ed kaabigan tayo, tan ‘nonoten itayo nen [Jehova] ed maong a ginawa tayo.’​—Nehemias 5:19; 13:31.

“Pananisian Aliwan Kunwari”

19. Unong ed Hebreos 11:1, anto so kabaliksan na pananisia?

¹⁹ Say pananisia, a bunga met na espiritu et say “agpanduaruwa ed saray bengatla ya iilaloan, say [“makakombinsin ebidensya,” paimano’d leksab, NW] ed saray bengatla ya agni anengneng.” (Hebreos 11:1) No walay pananisia tayo, kombinsido itayon seguradon nasumpal so amin ya insipan nen Jehova. Say pananisia et mabisbiskeg kanian nibagan singa itan kabiskeg na makakombinsin ebidensya na saray bengatlan agnanengneng. Alimbawa, kombinsido itayon walay Manamalsa lapud saray bengatlan ginawa to. Ontan so pananisian nipatnag tayo no mantultuloy tayon manakar unong ed espiritu.

20. Anto imay kasalanan ‘a sankainomayan a manliktob ed sikatayo,’ tan panon tayo itan a napaliisan tan saray gawa na laman?

 ²⁰ Say kaandi pananisia so ‘kasalanan a sankainomayan a manliktob ed sikatayo.’ (Hebreos 12:1) Nepeg itayon sigpot a paiwanwan ed espiritu na Dios pian napaliisan tayo iray gawa na laman, materyalismo, tan palson bangat a makaderal ed pananisia tayo. (Colosas 2:8; 1 Timoteo 6:9, 10; 2 Timoteo 4:3-5) Pawalaen na espiritu na Dios ed saray lingkor nen Jehova natan so pananisian mipara ed pananisia na saramay tasi antis na panaon na Kristiano tan say arum nin akarekord ed Biblia. (Hebreos 11:2-40) Tan say mismon ‘pananisia tayon aliwan kunwari’ et nayarin mamabiskeg met ed pananisia na arum.​—1 Timoteo 1:5; Hebreos 13:7.

Magmaliw a Matayadno tan Madangka

21, 22. Panon a naukeran so tayadno, tan akin a nepeg tayon ipatnag itan?

²¹ Say tayadno et kabaliksan toy pagmaliw a mapalna tan mauyamo. Say sakey a kalidad na Dios et inkamapalna. Amta tayo iya ta si Jesus, a naspot a pakanengnengan na inkapersona nen Jehova et mauyamon too. (Mateo 11:28-30; Juan 1:18; 5:19) Kanian, anto sirin so iilaloan ed saray lingkor na Dios?

²² Bilang Kristianos, sikatayoy iilaloan a ‘mangipanengneng na kauyamoan ed amin a totoo.’ (Tito 3:2) Nipatnag tayo so tayadno ed pampupulong tayo. Saramay kualipikado ed espiritual so nasisimbawa ya ipetek da so sakey a nankasalanan a Kristiano “ed espiritu na tayadno.” (Galacia 6:1) Makatulong itayon amin ed kiwala na pankakasakey tan deen ed limog tayo iran Kristiano diad pangipatnag tayo na “kaabebaan na linawa tan kauyamoan.” (Efeso 4:1-3) Nipatnag tayo so tayadno no mantultuloy itayon manakar unong ed espiritu tan mandangka.

23, 24. Anto so dangka, tan panon itan ya ontulong ed sikatayo?

²³ No mandangka itayo, naasikaso tayo so panagnonot, panagsalita, tan kakikiwas tayo. Si Jehova et ‘abayag ton pinokpokan so inkasikato’ ed saramay taga-Babilonian aneral ed Jerusalem. (Isaias 42:14) Intilak na Anak to so “panuliranan” tayo diad impandangka to sanen sikatoy manasagmak na irap. Tan si apostol Pedro et sinimbawa to iray kaparan Kristianos a ‘tekepan day bembey-linawa so pikakabat da.’​—1 Pedro 2:21-23; 2 Pedro 1:5-8.

²⁴ Saray Kristianon mamatatken et iilaloan a magmaliw a madangka. (Tito 1:7, 8) Diad tua, amin ya iwawanwan na masanton espiritu et makapandangka kanian sarag dan paliisan so imoralidad, mabanday a panagsalita, odino antokaman a manresulta ed agpanangabobon nen Jehova. No abuloyan tayoy espiritu na Dios a mamawala ed sikatayo na dangka, nalikas itan na arum ed panagsalita tan kondukta tayo.

Mantultuloy a Manakar Unong ed Espiritu

25, 26. Say panakar unong ed espiritu so walaan na anton epekto ed saray napipidenengan tayo, tan ed say ilalo tayo ed arapen?

²⁵ No manakar itayo unong ed espiritu, magmaliw itayon maseseg a manangiyabawag na Panarian. (Gawa 18:24-26) Labalabay itayon nakaulop na saray totoo, nagkalautla na saramay mangaaro ed Dios. Lapud igigiya itayo na masanton espiritu, magmaliw itayo met a makapabiskeg ed saray kapara tayon managdayew nen Jehova. (Filipos 2:1-4) Agta ontan so labay na amin a Kristianos?

²⁶ Diad sayan mundon uuleyan nen Satanas, aliwan mainomay so panakar unong ed espiritu. (1 Juan 5:19) Balet minilyon so makapanggagawa ed satan. No sigpot-puso itayon manmatalek ed si Jehova, napanggayagaan tayo so bilay natan tan makapanakar itayo lawas ed matunong a dalan na say maaron Manangitarya na masanton espiritu.​—Salmo 128:1; Uliran 3:5, 6.

[Paimano ed leksab]

Anto so Ebat Yo?

• No ‘manakar itayo unong ed espiritu,’ anto so pagmaliwan na siglaotan tayo ed Dios tan ed Anak to?

• Antoran kalidad so manutugyop ed saray bunga na espiritu?

• Antoray pigaran paraan na panangipatnag ed bunga na masanton espiritu na Dios?

• Say panakar unong ed espiritu so walaan na anton epekto ed bilay tayo natan tan ed ilalo tayo ed arapen?

[Tepetepet Parad Panagaral]

[Litrato ed pahina 23]

Pabulaslasen na masanton espiritu nen Jehova so aro ed saray kapananisian tayo

[Litrato ed pahina 24]

Ipatnag so panangasi panamegley na makatulong iran balikas tan gawa