Mananos Legan a Manaalagar ed Agew nen Jehova

“Ipatnag yo komon ed pananisia yo so . . . anos.”​—2 PEDRO 1:5, 6.

1, 2. Anto so panagsungdo, tan akin a kaukolan iya na saray Kristiano?

 ASINGSINGGER la so baleg ya agew nen Jehova. (Joel 1:15; Sofonias 1:14) Bilang Kristianos a determinadon mansiansian matoor ed Dios, taltalaranan tayo so panaon sano naalangon la so inkasoberano nen Jehova. Ingen, sikatayo so nipapaarap ni natan ed panaggula, panamalaw, panamasegsegang, tan ipapatey nisengeg ed pananisia tayo. (Mateo 5:10-12; 10:22; Apocalipsis 2:10) Lapud satan et kaukolan so panagsungdo, salanti, say pakapananos ed kairapan. Onia so ipapaseseg nen apostol Pedro ed sikatayo: “Ipatnag yo komon ed pananisia yo so. . . anos.” (2 Pedro 1:5, 6) Kaukolan tayo so panag-anos odino panagsungdo ta onia so inkuan nen Jesus: “Say misungdo ya angga ed kasampotan, sikato lanlamang so nilaban.”​—Mateo 24:13.

² Naeeksperiensya tayo met so pansakit, panermen lapud impatey na inad-aro tayo, tan arum niran subok. Manliket si Satanas no onkapuy so pananisia tayo! (Lucas 22:31, 32) Diad tulong nen Jehova, nasungdoan tayo so nanduruman subok. (1 Pedro 5:6-11) Imanoen tayo pa so pigaran tudtuan eksperiensya a mamapaneknek a makapananos itayo legan tayon aalagaren so agew nen Jehova tekep na pananisian ag-onleletey.

Ag-ira Naamper na Sakit

3, 4. Mangiter na alimbawa a mamaneknek a sarag tayon lingkoran si Jehova anggano walay sakit tayo.

³ Ag-itayo mamilagron tatambalen na Dios natan, balet iikdan to itayo na biskeg pian nasungdoan tayo so sakit tayo. (Salmo 41:1-3) Onia so inkuan nen Sharon: “Basta say amtak et naynay ko lan kaiba so wheelchair ko. Aliwan maliket so impanugaw ko ta nanlapu la’d nianak ak et wala lay sakit kon cerebral palsy.” Si Sharon so awalaan na ilalo lapud naaralan to so nipaakar ed si Jehova tan say sipan Ton ayadyarin bunigas. Anggaman sikatoy naiirapan a mansalita tan manakar, panliketan to so Makristianon ministeryo. Onia so imbaga to manga 15 taon lay apalabas: “Posiblin onloor ni bunigas ko, balet say mamibilay ed siak et say panagmatalek ko ed Dios tan say pisisiglaotan ko ed sikato. Malikeliket ak ta sakey ak ed saray totoo nen Jehova tan lawas to ak a susuportaan!”

⁴ Pinaseseg nen apostol Pablo iray Kristiano ed Tesalonica ya ‘ibalap da so apunaw ed puso.’ (1 Tesalonica 5:14) Say pirmin pakakadismaya so nayarin  pansengegan na depresyon. Nen 1993 et oniay insulat nen Sharon: “Lapud liknaen kon anggapo lan balot so gunggonak a manbibilay, . . . taloy taon ak ya a-depress. . . . Niligliwa tan pinabiskeg ak na saray mamatatken. . . . Panamegley na Say Panag-Bantayan et tinulongan ak nen Jehova a natalosan so nipaakar ed graben depresyon. On, talagan aasikasoen to itayo iran totoo to tan natatalosan to iray liknaan tayo.” (1 Pedro 5:6, 7) Si Sharon et siansia nin matoor a manlilingkor ed si Jehova legan ton aalagaren so baleg ya agew To.

5. Anto so walan paneknek a nasungdoan na saray Kristiano so pakakagonigon?

⁵ Saray arum a Kristiano so nagogonigon ed apalabas iran eksperiensya ra ed bilay. Alimbawa, si Harley a naimatonan to iray graben karamsakan na Guerra Mundial II et aliwliwa iray kugkugip to. Anta nanaugip et oneyag na: “Nengneng yo! Nitan la!” Nababangonan toy pinasyan panlilinget to. Anggaman ontan, nitunos to so bilay to ed panangigiya na Dios, tan diad inlabas na panaon et aliwa lan ontan kagrabe iray kugip to tan tinmalag la.

6. Panon ya inarap na sakey a Kristiano so problema to ed emosyon?

⁶ Walay sakey a Kristianon say sakit to et bipolar disorder, a no maminsan et malikeliket, no maminsan et maer-ermen. Kanian nanairapan a maong a manpulong ed kabkaabungan. Balet, agto tinmunda ta amta ton satan so mankabaliksan na bilay parad sikato tan ed saramay mangawat. (1 Timoteo 4:16) No maminsan, panirapan to so anggan say pan-doorbell labat, balet inkuan to: “Ag-abayag, sarag ko lan kontrolen iray emosyon ko, makakar ak la’d onsublay ya abung, tan salien ko lamet so mitongtong. Diad tuloytuloy ya impibiang ko ed ministeryo, anggan panon et apansiansiak so biskeg ko ed espiritual.” Sakey met ya angat so pipiaral, balet kombinsido iyan agin laki a makanakana so pililimog ed saray kapananisiaan. Kanian nanggunaetan to so magmaliw a presente.​—Hebreos 10:24, 25.

7. Anggaman natatakot iray arum a mansalita ed publiko odino miaral, panon dan ipapanengneng so panagsungdo ra?

⁷ Arum a Kristiano so walaan na phobia, salanti, walaray antakotakot dan kipapasen odino bengatla. Singa bilang, nayarin antakot iran mansalita ed publiko odino anggan miaral ni ingen. Isipen pa labat so irap na saraya a mankomento ed saray aral odino manpaliwawa diad Teokratikon Eskuelaan Parad Ministeryo! Ingen ta mansusungdo ira, tan aapresyaen tayon maong so iyaatendi tan pibibiang da.

8. Anto so nagkalautlan epektibo pian natalonaan so pakakairapan ed emosyon?

⁸ Nayarin makatulong ed sakey a too so magenap a pampainawa tan ugip pian nasungdoan to iray pakakairapan to ed emosyon. Ompan makatulong met so pampadoktor. Anggaman ontan, say nagkalautlan epektibo et say panmatalek ed Dios panamegley na pampikasi ed sikato. “Paawit mo ed Jehova so awit mo, et sikato bembenan to ka,” so kuan na Salmo 55:22. “Agton balot paulyan so matunong a natentenyeg.” No ontan sirin, “manmatale’ka ed Jehova ed simoon a pusom.”​—Uliran 3:5, 6.

Pansungdo no Naandi ed Bilay so Inadaro

9-11. (a) Anto so makatulong ed sikatayo pian nasungdoan so paneermen sano walay inad-aro tayon naandi ed bilay? (b) Panon a makatulong ed sikatayo so ehemplo nen Ana pian nasungdoan so paneermen?

⁹ Sano naandi ed bilay so sakey a membro na pamilya, manresulta itan ed pirmin ermen. Ninangisan nen Abraham so impatey na inad-aro ton asawa a si Sara. (Genesis 23:2) Anggan say ayadyarin toon si Jesus et “nannangis” met sanen inatey so kaaro ton si Lazaro. (Juan 11:35) Kanian natural labat so panermen no ompatey so inad-aro tayo. Anggaman ontan, amta na saray Kristiano a walay kikioli. (Gawa 24:15) Kanian, ag-ira “onermen, unong na singa saray arum, ya anggapo so ilalo ra.”​—1 Tesalonica 4:13.

¹⁰ Panon tayon natalonaan so paneermen? Nayarin makatulong iyan ilustrasyon. Kaslakan lan ag-itayo tanto maneermen no walay kaaro tayon nambiahe, ta amta tayon sikatoy napinengnengan tayo lamet kapawil to. No ontan met so pangipasen tayo ed impatey na sakey a matoor a Kristiano, nayarin ag-itayo tanto manermen lapud amta tayon sikatoy seguradon napaoli.​—Eclesiastes 7:1.

¹¹ Say sigpot a panmatalek ed “Dios na ami’ ligliwa”  so ontulong ed sikatayon nasungdoan so paneermen tayo. (2 Corinto 1:3, 4) Makatulong met so pandalepdep ed ginawa nen Ana, a sakey a balo nen inmunan siglo. Sikato so abalo kayari labat na pitoy taon ya impanamong dan sanasawa. Balet, diad edad ton 84 et sikatoy siansia nin mangisasaklang na sagradon panaglingkor ed si Jehova diad templo. (Lucas 2:36-38) Say impangitalaga to ed bilay to ed panaglingkor et seguradon akatulong ed sikato pian natalonaan toy pirmin ermen tan inkabegtebegtew. Ontan met, say regular a pibiang ed Makristiano iran aktibidad, a singa say panangipulong ed Panarian, so makatulong ed sikatayo pian nasungdoan so paneermen tayo ed inkaandi na inadaro.

Pangarap ed Nanduruman Subok

12. Anton subok nipaakar ed bilay na pamilya so susungdoan na arum a Kristiano?

¹² Kaukolan a sungdoan na arum a Kristiano iray subok a misiglaotan ed bilay na pamilya. Singa bilang, no akikalugoran so asawa na sakey, talagan grabe iray epekto na satan! Nayarin agla makaugip tan akis lan akis imay asawan atraidor lapud impakabigla tan inkaermen to. Nayarin mair-irap to lan gawaen so anggan saray simpli labat a kimey, a magmainomay toy nalingo odino magmaliw lan palpalaran. Nayarin say atraidor ya asawa et agla makapangan, onebeng la, tan aliwliwa lan naynay so liknaan to. Ompano panirapan to met lay pibiang ed Makristiano iran aktibidad. Tan seguradon naapektoan a maong iray anak!

13, 14. (a) Anto so akapasesegan yo ed samay pikakasi nen Solomon sanen indedika so templo? (b) Akin ya onkerew itayo na masanton espiritu panamegley na pikakasi?

¹³ No makakaeksperiensya itayo na ontan iran subok, itarya nen Jehova so tulong a nakaukolan tayo. (Salmo 94:19) Dedengelen na Dios iray pikakasi na totoo to, a singa nipabitar diad samay pikakasi nen Arin Solomon sanen indedika so templo nen Jehova. Onia so impikasi nen Solomon ed Dios: “Anggan anto a pikakasi tan kerew a gawaen na siopa a too, odino amin a baley mo ya Israel, a naamtaan na balang too so panerya ed dili a puso to, tan yuna’to so saray lima to ya arap ed saya ya abung: Sirin ondengel ka ed tawen a pasen ya ayaman mo, tan paandien mo, tan gawaen mo, tan tumangan mo so balang too unong ed saray amin a dalan to, a say puso to antam; (ta sika lambengat, antam so saray puso na saray amin ya anak na saray totoo); Pian takotan da ka ed saray amin ya agew a manbilay ira dia ed dalin ya initer mo ed saray atateng mi.”​—1 Arari 8:38-40.

 ¹⁴ Nagkalautlan makatulong so pantultuloy ya ikerew na masanton espiritu panamegley na pikakasi. (Mateo 7:7-11) Kabiangan ed saray bunga na espiritu so liket tan deen. (Galacia 5:22, 23) Seguradon nainawaan tayo sano ebatan na Ama tayo ed tawen iray pikakasi tayo, say paneermen tayo et nasalatan na liket, tan say pakakagonigon et magmaliw lan deen!

15. Antoran teksto so makatulong ed sikatayo pian nabawasan so kapagaan tayo?

¹⁵ Natural labat a napagaan itayo sano nadedetdetan itayon maong. Balet, anggan panon et nayarin nabawasan itan a kapapagaan tayo no nodnonoten tayo irayan imbaga nen Jesus: “Agkayo mapaga’d panagbila’yo no anto so kanen yo, ono anto so inumen yo; agyo met kapagaay laman yo, no anto so ikawes yo. . . . Ingen anapen yo nin unona so panarian, tan say inkatunong [na Dios]; et amin iraya a bengatla niarum ira ed sikayo.” (Mateo 6:25, 33, 34) Papasesegen itayo nen apostol Pedro ya ‘imatalek tayo ed Dios so amin a kapagaan tayo; ta sikato asikasoen to itayo.’ (1 Pedro 5:6, 7) Tua, manepeg labat a pansagpotan so panolbar ed sakey a problema. Balet, no ginawa tayo lan amin so nayarian tayo, agla makatulong so pampaga, noag ingen, say pampikasi. “Ipiam ed Jehova so dalan mo; manmatalek ka met ed sikato: et sikato igawa to,” so inkanta na salmista.​—Salmo 37:5.

16, 17. (a) Akin ya ag-sigpot a naandi iray kapagaan tayo? (b) Anto so niwala ed sikatayo no iyaplika tayo so Filipos 4:6, 7?

¹⁶ Onia so insulat nen Pablo: “Agkayo mapaga ed antokaman; noag dia ed ganagana lapu ed pikakasi tan pikekerew a tekep na pisasalamat nipakabat komon ed Dios so saray kerew yo. Tan say deen na Dios, a talonaan ton amin a pakatalos, bantayan to so kapusoan yo tan saray nonot yo ed Kristo Jesus.” (Filipos 4:6, 7) Siempre, bilang ilalak nen Adan et ag-sigpot a naandi so kapagaan tayo ta agtayo lanti ayadyari. (Roma 5:12) Saray Jeteo ya asawa nen Esau et “panpagpagaan” na matakot-ed-Dios ya atateng to a di Isaac tan Rebeca. (Genesis 26:34, 35) Parad saray Kristiano a singa di Timoteo tan Trofimo, nayarin lapuan na kapagaan so pansakit. (1 Timoteo 5:23; 2 Timoteo 4:20) Nampagaan met nen Pablo so nipaakar ed saray kapananisiaan to. (2 Corinto 11:28) Balet, say ‘Dumerengel na pikakasi’ et lawas akaparaan ya ontulong ed saramay mangaaro ed sikato.​—Salmo 65:2.

¹⁷ Legan tayon aalagaren so agew nen Jehova, suportaan tan ligliwaen itayo na “Dios na kareenan.” (Filipos 4:9) Si Jehova et “mapangasi tan mapaaro,” tan sikato so ‘maong tan akaparaan a mamerdona,’ tan ‘sankanonot to a sapok itayo.’ (Exodo 34:6; Salmo 86:5; 103:13, 14) Kanian ‘ipakabat tayo ed Dios iray kerew tayo,’ ta mamawala iya ed sikatayo na “deen na Dios,” say inkakalmada ya agbalot natalosan na too.

18. Unong a nikuan ed Job 42:5, panon a posible tayon “nanengneng” so Dios?

¹⁸ No naebatan iray pikakasi tayo, amta tayon wala ed sikatayo so Dios. Sanen asungdoan nen Job iray subsubok ed sikato, oniay nikuan to: “Nadngel ko so nipaakar ed sika [Jehova] lapu ed panamegley na pakadngel na layag; balet natan say matak nanengneng to ka.” (Job 42:5) Diad tulong na mata na pakatalos, pananisia, tan pisasalamat, namorekdek tayo so pidedeneng na Dios ed sikatayo tan sikatoy nagkalalo tayon “nanengneng.” Seguradon makapangiter na kaligenan na puso tan nonot so ontan a maapit a siglaotan!

19. Antoy nagawa no ‘imatalek tayo ed si Jehova so amin a kapagaan tayo’?

¹⁹ No ‘imatalek tayo ed si Jehova so amin a kapagaan tayo,’ nasungdoan tayo iray subok tekep na kalmadon liknaan a manalimbeng ed puso tan isip tayo. Diad utel na piguratibon puso tayo et naeksperiensya tayo so kibulos manlapud gonigon, takot, tan sesga. Ag-itayo la napagaan tan ondeen lay nonot tayo.

20, 21. (a) Panon a pinaneknekan na eksperiensya nen Esteban a posible so pansiansian kalmado anggaman napapasegsegang? (b) Mangisalaysay na modernon ehemplo na inkakalmado sano susungdoan iray subok.

²⁰ Impatnag na babangatan ya Esteban so inkakalmado legan ton susungdoan so pirmin subok ed pananisia to. Antis ton inter so unor a pantasi to, amin a wadman ed Sanhedrin et “apatnag da so lupa to a singa lupa na sakey ya anghel.” (Gawa 6:15) Kalmado so lupa to, a singa sakey ya anghel  a mensahero na Dios. Kayari nen Esteban ya inwalwal so kasalanan na saray ukom ed impamatey da ed si Jesus, sikara so ‘sinmanok, tan manngayet iray ngipen da ed sikato.’ Balet, si Esteban, “a napno na espiritu santo, tinmangay a maligen ed tawen, et anengneng to so gloria na Dios, tan si Jesus a manalalagey ed kawanan na Dios.” Lapud apabiskeg si Esteban ed saman a pasingawey, sikato so nanmatoor anggad ipapatey. (Gawa 7:52-60) Anggaman agla mangipapasingawey ed sikatayo so Dios natan, papagamoran to itayo na inkakalmado sano napapasegsegang itayo.

²¹ Konsideraen pa labat so liknaan na saray Kristiano ya impapatey na saray Nazi legan na Guerra Mundial II. Sakey ed saratan so angisalaysay na naeksperiensya to ed korte: “Nibasa la so sentensian patey. Dinmengel ak, insan kayarik a nibalikas iray salitan ‘Manmatoor ka anggad ipapatey,’ tan arum nin pigaran salita na Katawan tayo, asumpal so usay. Balet paulyan yo la. Ta walaan ak na kareenan, say inkakalmado ya agyon balot naisip!” Onia met so insulat na sakey a malangwer nin Kristiano ed atateng to sanen magano da lan putotan na ulo: “Ngalngali la palbangon. Wala ni panaon kon manguman na desisyon. Balet, nagawaan ko ni kasi manliket ed sayan mundo kayarik ya ibeneg so Katawan tayo? Andin balot! Ingen, natan et ipapasegurok ed sikayo a maliket tan mareen kon taynan iyan mundo.” Andi-duaruwan susuportaan nen Jehova iray matoor a lingkor to.

Makapansungdo Kayo!

22, 23. Anto so seguradon nagamoran yo diad panaanos yo legan yon aalagaren so agew nen Jehova?

²² Nayarin agyo naeeksperiensya iray subok ya akonsidera tayo. Ingen, duga si Job, a sakey a matakot ed Dios, sanen inkuan ton: “Say too a nianak ed bii, daiset so saray agew to, tan napno ed gonigon.” (Job 14:1) Nayarin sakey kayon ateng a manggugunaet a mangigiya ed ananak yo unong ed Biblia. Kaukolan dan sungdoan iray subok ed eskuelaan, balet seguradon malikeliket kayo sano mapekder iran ontalindeg parad si Jehova tan say matunong iran prinsipyo to! Posible met a naeeksperiensya yo so kairapan tan pananukso diad pantratrabahoan yo. Anggaman ontan, nasungdoan yo iraya tan say arum niran situasyon lapud ‘si Jehova et agew-agew ya ililibitan to kayo na awit yo’​—Salmo 68:19.

²³ Nayarin ipasen yon ordinaryo kayo labat a too, balet tandaan yo ya agbalot nalingwanan nen Jehova so gawa yo tan say aro ya ipapanengneng yo ed masanton ngaran to. (Hebreos 6:10) Diad tulong to et nasungdoan yo iray subok ed pananisia yo. Kanian, itultuloy yon ipilaktip ed saray pikakasi tan plano yo so panggawa na linawa na Dios. Diad satan et seguradon bendisyonan tan suportaan kayo nen Jehova ed panaanos yo legan yon aalagaren so agew to.

Panon Yon Ebatan?

• Akin a kaukolan na saray Kristiano so mansungdo?

• Anto so makatulong ed sikatayon nasungdoan so sakit tan ermen?

• Panon a makatulong ed sikatayo so pikakasi pian nasungdoan iray subok?

• Akin a posible so pakapansungdo legan ya aalagaren tayo so agew nen Jehova?

[Tepetepet Parad Panagaral]

[Litrato ed pahina 29]

Say panmatalek ed si Jehova so ontulong ed sikatayon nasungdoan so paneermen

[Litrato ed pahina 31]

Say pikakasin nanlapud puso so ontulong ed sikatayon nasungdoan iray subok ed pananisia tayo