Tepetepet na Saray Manbabasa

Lapud say panagani et opisyal ya onggagapo sano amin a lalakin Israelita so onla’d Piesta na Andi-lebaduran Tinapay, siopara sirin so nan-ani na saray unonan bunga na sebada ya inawit ed santuaryo?

Oniay instruksion na Mosaikon Ganggan ed saray Israelita: “Mamitlo ed sakey taon a saray amin a lalaki ompatnag ira ed arap nen Jehova a Dios mo ed pasen a pilien to naani: dia ed piesta na andi-lebadura a tinapay, tan dia ed piesta na simsimba, tan dia ed piesta na tabernakulo.” (Deuteronomio 16:16) Nanlapula’d panaon nen Arin Solomon a nampatuloy, say pinili na Dios a pakagawaan na piesta et diad templo ed Jerusalem.

Say primero ed saratan a taloran piesta so agawa ed kasakbayan na primabera (spring), a tinawag a Piesta na Andi-lebaduran Tinapay. Pitoy agew itan a piesta, ya onggagapo kayari agew na panselebra na Paskua ed Nisan 14 a manpatuloy anggad Nisan 21. Diad komadua ya agew na piesta, Nisan 16, igagapo so primeron panagani ed taon unong ed sagradon kalendaryo. Diad satan ya agew et kaukolan a mangala so atagey a saserdote na sakey a berber odino “pungo na saray unaan a bunga” na sebada pian ‘iyandawes to ed arapan nen Jehova’ diad santuaryo. (Levitico 23:5-12) Lapud amin a lalaki so kaukolan a presente ed Piesta na Andi-lebaduran Tinapay, siopara sirin iramay nanani ed sayan iyaapay?

Say ganggan a panangiyapay ed si Jehova na saray unonan bunga na panag-ani legan na Piesta na Andi-lebaduran Tinapay et parad interon nasyon. Balet, agkakaukolanen a say kada indibidual so onggapon manani tan mangawit na saray unonan bunga diad santuaryo, noagta, saramay manangilaman labat na nasyon so manumpal ed satan a ganggan. Kanian, nagawaan so pan-ani ed saray sebada parad Piesta na Andi-lebaduran Tinapay diad pangibaki ed saramay apabtangan labat diad asingger ya uma na sebada. Nipaakar ed saya et oniay inkuan na Encyclopaedia Judaica: “No say sebada et matatken la, satan so anien manlapud kaliberliber na Jerusalem; balet, nayari met ya alaen itan ed inerman a pasen ed Israel. Satan so aanien na taloran lalaki, a kada sakey et walaan na palot tan buksot.” Insan say sakey berber a sebada so iter ed atagey a saserdote pian iyapay to ed si Jehova.

Say kakaukolanen a panangiyapay na saray unonan bunga so angiter ed saray Israelita na marakep a pankanawnawan pisalamatan so Dios lapud impamendisyon to ed dalin ontan met ed ani ra. (Deuteronomio 8:6-10) Balet, say mas importante et say seremonyal a panangiyapay so “sakey ya anino na saray penel na bengatla ya onsabi.” (Hebreos 10:1) Makatantanda ta si Jesu-Kristo so apaoli nen Nisan 16 na 33 C.E., say agew na panangiyapay ed saray unonan bunga ed si Jehova. Oniay insulat nen apostol Pablo nipaakar ed si Jesus: “Si Kristo pinaoli a binmilay ed saray inatey, a sikato so inmunan bunga na saray naugip. . . . Et balang sakey dia ed dilin bilang to: si Kristo so inmuna; insan saray kien nen Kristo ed isabi to.” (1 Corinto 15:20-23) Say sakey a berber na saray unonan bunga ya ipapaayag na atagey a saserdote ed imaton nen Jehova so angiyanino ed kikioli nen Jesu-Kristo, say sankaunaan a pinaoli ed saray inatey a pinagamoran na andi-anggaan a bilay. Diad ontan et inlukas nen Jesus so dalan pian nibulos so katooan ed kasalanan tan ipapatey.

[Picture Credit Line ed pahina 26]

© 2003 BiblePlaces.com