Istorya na Bilay

Agnaparaan a Pribilehyo so Panlingkor ed si Jehova

Unong ed Salaysay nen Zerah Stigers

Say masiken kon abayag lan kaibak ed sigpot-panaon a ministeryo et inatey nen 1938. Kanian atilak ed siak so kapangiyanak tan say samploy taon ya anak mi. Labalabay ko ni mantultuloy a payunir, balet ta panon to la kasi? Iyistoryak nin magano ed sikayo so impanugaw ko, insan ko ipaliwawa no panon kon agawaan itan.

NEN Hulyo 27, 1907, sanen kapkapangiyanak ak ni labat diad Alabama, U.S.A., et inmalis so pamilya mi ed Georgia. Apatira kamin sanaagi. Agnambayag kayari na satan et inmalis kami lamet ed Tennessee insan diad bandad Tampa, Florida. Ditan ko abantayan iramay litraton binansagay tanol a “Photo-Drama of Creation,” nen 1916. Diad saman et onggagapo ni labat so industriya na pelikula, kanian panlikliketan la na amin so “Photo-Drama”!

Saray ateng ko et mahilig a manbasa na Say Panag-Bantayan tan arum niran babasaen nipaakar ed Biblia. Balet, si Tatay anggano labalabay ton basaen iratan, diad saman et agto ni tanto mililimog ed saray Estudyante na Biblia, unong a pananawag ed saray Tasi nen Jehova ed saman. Ingen ta si Nanay et regular to kamin ipipila ed aral. Diad tua, anggan sanen kaali-alis mi ni labat ed Niles, Michigan, et regular mi lan biabiahien so masulok a samploran milya panamegley na tren ta pian makapiaral kami diad South Bend, Indiana.

 Kasabi Hulyo 22, 1924 et nampabautismo ak bilang simbolo na dedikasyon ko ed si Jehova. Agnambayag kayari na satan, nanggaway paraan si Nanay ta pian magmaliw a colporteur, unong a pananawag ed saray sigpot-panaon a ministro na saray Tasi nen Jehova ed saman. Say ehemplo ra tan arum niran colporteur so amaseseg met ed siak ya mibiang ed satan a kimey.

Akalmo Ak na Kaibak

Nen 1925, legan kon onaatendi ed baleg a kombension ed Indianapolis, Indiana, et akabat ko si James Stigers, a taga Chicago. Naimanok a tampol so inkaseseg to’d panaglingkor ed si Jehova. Say panaayaman ko et manga 160 kilometro manlapud Chicago kanian agmi kalakalan nabisita so sakey tan sakey. Diad saman et saksakey ni so kongregasyon ed satan a baleg a syudad tan say panaaralan da et diad rerentaan a kuarto ed tagey. Mabetbet ak a susulatan nen James pian pabiskegen ak. Nankasal kami nen Disyembre 1926 tan kalabas na kulang a sakey taon et inyanak koy panguloan mi, si Eddie.

Agnambayag kayari na satan, ginmapo kami nen James a nampayunir. Sikami so nampayunir ed waloran estado, diad Michigan, Louisiana, Mississippi, South Dakota, Iowa, Nebraska, California, tan Illinois. Diad satan mi naeksperiensya so sankaliketan a taotaon na bilay mi. Balet ta anampot itan a liket sanen nansakit si James.

Balbaleg so gastos mi ed impansakit nen James kanian pinmawil kami ed Chicago nen 1936 pian miayam ed katulangan kon bii, a sakey met a Tasi. Diad samay unor iran bulan na impansakit nen James et nantrabaho ak ed sakey a restawran. Say anap ko labat ed sanagew et $1 tan malukon ak ed komaduan anak mi. Agkami papaulyanan na pinablik a katulangan ko a naerasan, tan agton balot mangawat na kuarta. Talagan mao-maong ed sikami.

Ngalngali duay taon a nansakit si James na encephalitis, inlarag na utek, insan inatey nen Hulyo 1938. Lapud satan a sakit et agto makamaneho, odino makapankabkaabungan, balet agton balot papalampasen iray pankanawnawa a makapampulong ed arum. Siak balet et intundak so sigpot-panaon a ministeryo pian natulongan ko so pamilya ed pinansyal. Dakdakel so apantrabahoan ko, saramay antirikey labat.

Say anak min si Bobby et nianak nen Hulyo 30, 1938, waloy agew labat kayari naandi ed bilay so ama to. Si katulangan ko et ag-inmabuloy a say pananakan ko et diad lokal ya ospital. Say angiyakaran to ed siak et diad mas magmaong ya ospital tan inasikaso ak na mismon doktor to. Sikato ni ingen so nambayar. Talagan apresyaen kon tuloy iyan Makristianon aro ya impatnag to.

Akapawil Ak ed Sigpot-Panaon a Ministeryo

Akiamong kami ed katulangan ko anggad sanen masulok lan 2 taon nen Bobby tan diad saman et 12 taon met la nen Eddie. Anggano walay irap-irap to niray balon kipapasen ko, labalabay ko nin siansia so manlingkor ed si Jehova a sigpot-panaon. Nen aki-asembli kami ed Detroit, Michigan nen 1940, walay akabat kon sanasawan payunir ya amaseseg ed siak ya onla ed South Carolina pian manpayunir. Kanian analiw ak na kotsin Pontiac, modelo-1935, a manbili $150 tan namparaan ak ya onalis ditan. Nen 1941, sanen akibiang so Estados Unidos ed Guerra Mundial II, insan kami nampaabalaten na saray anak ko, tan nampayunir ak lamet.

 Kasabi mi ed South Carolina, say nila min unaan et diad Camden, insan diad Little River, insan diad Conway. Diad Conway et akasaliw ak na abung a luganan. Walay akabat kon mapangpangasin makanggaway gasolinaan ya inabuloyan to ak a miparada ed asingger ed puesto to, tan mikonekta ed gas tan kuryente ra, anggan mikasilyas ni ingen. Diad saraman a panaoy Guerra Mundial II et irarasyon so gas, balet agak makakala na satan. Kanian, angaliw ak na segunda manon bisekleta. Kasabi 1943, sanen singa imposible lan nitultuloy ko ni pampapayunir ko ta naupot lan amin so kuarta mi, siak so naimbitaan a man-espisyal payunir, kanian nanlapud saman et walay binulan a re-imbersmin a nanaawat ko a tinmulong ed saray gastos ko. Talagan naynay ak a tutulongan nen Jehova!

Diad saman et anggapoy arum a Tasi ed Conway, tan mair-irap mi na saray ana’ko so manpulong a siksikami labat. Kanian sinmulat ak pian onkerew na kaibak a man-espisyal payunir tan nen 1944 et sinmabi itan a bendisyon, si Edith Walker! Labin-anem taon kamin naniba ed pigaran asainmin. Makapaermen balet ta sikatoy nansakit, kanian pinmawil ed Ohio.

Agnalinglingwanan Iran Bendisyon

Amayamay so balibalin eksperiensyak diad saraman a taotaon. Say sakey ya agko nalingwanan et say 13 años a si Albertha, a taga Conway. Aasikasoen to so bai ton akarukol la tan say duaran agi to. Agustoan toray katuaan ya innabang ko ed sikato tan labay to met ya ibaga iratan ed arum. Tan talagan naaral to met a pablien so panagpayunir kanian sikatoy nampayunir kagraduar to ed haiskul nen 1950. Anggad natan a masulok lan 57 a taon so apalabas et sikatoy payunir ni!

Nen 1951, nibaki kamin agano nen Edith ed Rock Hill, South Carolina a ditan et dagdaiset so Tasi. Insan diad Elberton, Georgia, ed loob na taloy taon. Insan kami pinmawil ed South Carolina, tan nampirmi ak ditan manlapud 1954 anggad 1962. Diad Walhalla, walay aromog kon taga-baryo ya akulaw a bukbukor to la ed abung tan makapuy lay layag to. Say ngaran to et Nettie. No manaaral kami na Biblia, say gagawaen mi et basaen to ni so parapo ed publikasyon, insan ko ituro imay tepet parad parapo, insan to met ituro imay ebat ed parapo.

No walay agto natalosan, isusulat to’d papel, insan ko met isulat so ebat kayari na satan. Diad inlabas na saray panaon, talagan inmaralem so apresasyon nen Nettie ed katuaan ed Biblia kanian sikatoy ginmapon akiaral tan nampulong ed kabkaabungan. Anggapoy kaulop ton ontutuktok ed saray puerta balet ta agko aarawian, kaslakan lan wala ak labat ed kabaliw na karsada pian no bilang ta walay nakaukolan to et akaparaan ak.

Legan kon walad Walhalla et aderal so daan lan luganan ko. Bangnen kien et walay manlalako na luganan a manbili na $100, anggapoy kuartak balet. Kanian, nilak so sakey a kaagian a negosyante, tan pinautang to ak na $100. Agnambayag, walay naawat kon agko iilaloan a sulat manlapud yugtan ko, ya inkuan ton asukayan na saray agagik a wala manayay daiset a kuarta na inatey lan tatay mi, diad bangko. Nantongtongan da no antoy gawaen ed satan tan nampapaknaan dan ipawit iman ed siak. Say kantidad to et kateng-kateng a $100!

Say Impanpayunir Ko Kaiba Iray Anako

Sanen ugugaw ni ra di Eddie tan Bobby, kaibak iran naynay a manpupulong ed kabkaabungan. Nensaman, agni tanto problema na totoo  so panagdruga tan inka-imoral, aliwan singa natan. Pinansiansia min simpli so bilay mi tan akasentro kami ed panagpulong a kimey kanian apaliisan miray dakel a probleman kipapaarapan na atateng natan ed panamabaleg da ed ananak da pian manlingkor ed si Jehova.

Naneskuela si Eddie diad Camden anggad komawalon grado to, insan la nampayunir. Saniba kamin nampayunir ed pigaran taon. Insan to nampilalekan so manlingkor ed sankamundoan a hedkuarter na saray Tasi nen Jehova diad Brooklyn, New York, tan nanlingkor ditan manlapud 1947 anggad 1957. Nen 1958, inkasal to si Albertha, samay datin iyaaralan ko, tan nampayunir iran dua. Makapaliket ta nen 2004 et sankakaklase kami ed Pioneer Service School!

Nanonotan ko ni imay agew nensaman sanen nadngel kon impikasi ed si Jehova na melag nin anakon Bobby ya makala ak komon na magenap a gas parad kotsik diad ontan et regular kon napawil iray iyaaralan ko. Sipor lan inaro nen Bobby so ministeryo tan sikatoy nampayunir ed pigaran taon. Makapaermen balet ta wala met so aliwan maliket ya agawa ed pamilya to. Nen 1970, kalabas labat na 22 bulan ya impiasawa to et inatey so akulaw to ed impananak to, pati say lason ya inyanak to. Naynay kamin walad dikingan na sakey tan sakey nen Bobby tan maap-apit so ulopan mi.

Payunir Ak ni!

Nen 1962, niasain ak ed kaplesan a kongregasyon ko diad Lumberton, North Carolina, tan anggad natan a 45 taon lay linmabas et wadia ak ni. Siak so manmamaneho na luganan ko anggad sanen mantaon ak na 84. Natan balet et wala lay manasamar ed siak a pamilya a Tasi ya asingger ed panaayaman ko pian awiten da ak ed aral tan ed panagpulong.

Walay walker tan wheelchair ko, balet ta agko kaukolan ya usaren iratan ta makaakar ak nin bukor. Misalsalamat ak ed si Jehova ta inikdan to ak na kasil na laman, salambengat ta diad sayay agano ni et kinmapuy lay matak. Agkon balot liliwatan so aral likud labat no talagan grabe lay sakit ko tan manlilingkor ak ni bilang sakey ya infirm a regular payunir.

Lapud ayarian koy nampayunir ed masulok a 70 taon, talagan nibagak a si Jehova et lawas to ak a tutulongan. * Amtak ya aliwa ak a marundunong a too odino mapmaples a mankimey, balet amta nen Jehova no antoray nagawaan tan agko nagawaan. Misalsalamat ak ta iimanoen toy panggugugnaet ko, tan inusar to ak.

Parad siak et importante a lingkoran tayo si Jehova ed anggaan na nayarian tayo ta utang tayo ed sikato so amin. Anggad nayarian ni laman ko, say labay ko et mansiansia ak a payunir. Talagan alay abig iyan pribilehyo! Say pikakasik et usaren to ak komon nen Jehova ed andi anggaan.

[Paimano ed leksab]

[Litrato ed pahina 13]

Ayan luganan so inusar min sanasawa nen nan-colporteur kami

[Litrato ed pahina 14]

Kaibak iray anako nen 1941

[Litrato ed pahina 15]

Kaibak si Eddie tan Bobby diad agano ni