Duaran “Milagro” ed Sakey a Kombension Diad Georgia

DIAD bansan Georgia nen 2006, walay ebenton agnalingwanan lapud duaran “milagro” ya agawa ditan. Diad loob na taloy agew, manlapud Hulyo 7 anggad 9, say “Asingger la so Kililiktar!” a Distriton Kombension na saray Tasi nen Jehova so agawa ed anemiran pasen ed interon bansa. Sakey iman a piesta ed espiritual a nanggayagaan na masulok a 17,000 ya inmatendi.

Nen Enero 2006, nansagpotan so impananap na matukoy a pankombensionan na nilibon totoo diad mismon syudad na Tbilisi, say kabisera na Georgia. Saray arum a kombension so kaukolan ya ikonekta panamegley na telepono.

Diad inlabas na pigaran taon et kalkalnan nipagamor so kawayangan ed panagdayew diad Georgia. Kanian, anggaman kasmak so panamasegsegang diad apalabas, agtinmundan nansagpot iray Tasi, a matalek iran makalmo na pankombensionan diad kabiseran syudad. Saray taga-Georgia et sipor lan makaaro tan maparawes. Anggaman ontan, agaylay panangidumaduma na arum iran opisyales nipaakar ed relihyon. Kasin manguman so kanonotan da tan abuloyan da la iray Tasi a man-abang na sakey a pasilidad?

Saray agagi a kabiangan ed Komite na Kombension so binmisita ed nanduruman istadyum tan angkabaleg iran pagalawan. Insipan na saray manedyer a pausar da iray pasilidad da balet ag-ira inmabuloy sanen tepeten la na agagi so petsa a nayarin abangan iratan. Kanian asurprisa so komite sanen say administrasyon na Tbilisi Philharmonic et inmabuloy ya abangan na saray Tasi nen Jehova so pasilidad da. Satan so walad sentro na syudad, a pakakagawaan na dakel ed saray sankaimportantian ya ebento.

Lapud apaseseg so komite ed maabig a resulta na impansagpot da, inggapo ran inyuksoy so kombension ed Tbilisi, ontan met iray kombension  ed arum a baley tan syudad ed interon bansa​—diad Tsnori, Kutaisi, Zugdidi, Kaspi, tan Gori. Dakel so kinimeyan pian nikonekta irayan amin a pankombensionan ed linya na telepono pian manbabansag a narengelan so programa. Akaparaan la so amin parad kombension. Balet, sakey simba labat la antis na kombension et biglan kinansela na administrasyon na Tbilisi Philharmonic so kontrata, tan anggapo so imbaga ran rason.

Say Unonan “Milagro”

Anto kasi gawaen na saray agagi anta maganggano lay kombension? Say alenleneg labat lan napankombensionan da et diad Marneuli, sakey ya alog a 40 kilometro kaarawi manlapud Tbilisi. Dakel laran kombension so agawa ditan diad lote na sakey a pamilyan Tasi nen Jehova, a datin maawang a tanamanan. Diad apalabas a samploran taon, ditan labat so napankombensionan na saray kongregasyon ed Tbilisi. Balet ta ditan met imay akaeksperiensyaan na saray Tasi nen Jehova na maruksan impangataki na grupo na totoo.

Agawa so sakey ed saratan ya inyataki nen Setyembre 16, 2000. Binarikadaan na saray pulis ed Marneuli so dalan pian agmakasabi ed pankombensionan iray Tasi. Insan sinmabi iray bus ya akaluganan na saray maton, ya inggaulo na nakal a pari na Ortodokso a si Vasili Mkalavishvili. Pinatunda daray kotsi tan bus a paonla’d kombension ed Marneuli, pinasoot dan pinaepas ed luganan so dakel a delegado, tan maruksa da ran pinepekpek, bangta saray arum et sinasamsaman da na kaykayarian, pati saray Biblia ra tan literatura na Biblia.

Nilusob met na manga 60 totoo iramay wadman la’d pankombensionan ed Marneuli. Manga 40 Tasi so asugatan. Sakey ya agin laki so sinaksak ed pagew panamegley na kutsilyo. Inyaayag na saray arum ya inmataki iray antikey a paltog da a de-sabog, tan impalakapak da iratan ed tagey. Sakey ed sikara so angipatuyong na paltog to ed samay akanlote tan inaala ra so kuarta tan alahas to. Nilooban na sayan grupo so abung to, a walad asingger ed pankombensionan, tan tinatakew daray mablin kagawaan to. Kayari ran pinisit so amin a bintanay abung to, pinoolan daray literatura na Biblia tan saray yurongan ya ingganan usaren ed kombension. Sakey tan kapalduan tonilada na literatura so aderal. Imbes a patundaen na saray pulis a wadman iyan kaugsan sumpad saray Tasi, mas akibabali nira. *

Aliwa labat a say sesga na kaugsan so  problema na Komite na Kombension, noagta no panon da met a napasusto so 5,000 a totoo ed sakey a pasen a makakarga labat na manga 2,500. Panon da kasin naresolbe iyan problema ed ontan katikey a panaon? Ompatnag a milagro so agawa sanen saray akankayarian ed duaran kaabay a lote so inmasingger ed saray agagi tan inyopresi ran ipaabang so lote ra.

Nakaukolan so impasyan pankimey pian saratan a lote so nagawan matukoy a pankombensionan. Akaarum ni ed problema so tiempo, ta uran lan uran ed saman ya interon simba antis na kombension. Saraman a lote so ataneman na saray patatas, kanian kaukolan ya anien ni iratan. Unona, saray boluntaryo so nampauran pian manbeka na saray patatas. Insan inyaalis daray alar tan nanggawa ra na pabilyon pian agnapetangan tan agnauranan iray dumerengel. Dakel a yurongan so kinaukolan a gawaen, tan inkabit so kaaruman a sound system. Sanagew-sanlabin nankarpentero iray boluntaryo, ya arum so agla inmugip pian nasumpal da labat so amin a kaukolan a gawaen.

“Panon to no agla ontunday uran anggad leleg na kombension?” so sankanonot na amin. “Agkasi onkutep ed pitek iray onatendi?” Analiw iray dayami pian iyapis ed ambasan dalin. Ag-abayag et inmagew a siansia! Legan na taloy agew a kombension, balibali tan maliwliwawa so sinag na agew.

Marakerakep so kaliberliber ya asabian na saray inmatendi. Say deen ed saman a pasen et singano pasimar na balon mundo. Komportablen akayurong iray inmatendi, ya apaliberan ira na saray kiew ya igos tan arum nin kakiewan a manbubunga tan saray mais tan kamatis. Saray wakal na ubas so kinmanan arkos ed beneg na entablado. Legan na programa et narerengel so pankukaok na saray lalong tan pankutak na saray nganak legan ya aalaen iray iknol da. Wala niray arum a tanol a kaslakan a narerengelan ditan, balet singa labat iratan makapaliket a harana parad saray atentibon dumerengel ya ag-adisturbo ed pandedengel da ed alay-abig a programan nibase ed Biblia. Anggaman ontan, aliwan saraya labat so agnalingwanan ya agawgawa ed sayan kombension.

Say Komaduan “Milagro”

Diad pansampot lay sesyon ed kabuasan na Biernes, asurprisan maong iray inmatendi sanen sakey a membro na Mananguley ya Ulop na saray Tasi nen Jehova, si Geoffrey Jackson, so angiyanunsio ed kipaway na kompleton New World Translation of the Holy Scriptures ed  Georgian. * Dakel so akalua lapud agda itan inilaloan. Onia so malikeliket ya imbalikas na sakey a pamilya: “Misalsalamat kamin maong ed sayan milagro, sakey a milagro nen Jehova. Talagan baleg so impansagpot pian nagawaan itan ed antiktikey a panaon!”

Onia so imbaga na sakey ya agin bii a taga-Tsalendjikha a dinmengel ed programa panamegley na telepono: “Agko amta no panon kon ibalikas so liket ya aliknak sanen naawat mi so kompleton Biblia. Misalamat ak ed sikayo lapud sayan matalonan taloy agew a kombension. Talagan sakey iyan makatantandan ebento.” Walay pamilya ed sakey a kongregasyon ed mamasagur a Georgia, ya onketeg la’d Andeket a Dayat, so angikuan: “Nensaman et saksakey labat so Biblia ed pamilya mi, balet natan et sansakey kami lan apat na kopya na New World Translation. Kada sakey ed sikami so personal lan makapanaral na Biblia.”

Anggaman ontan, walaray agmarakep ya agawa ya ag-amta na saray inmatendi. Singa bilang, anggano say kompleton New World Translation et naimprinta tan asakbay lan nipawit ed Georgia parad kombension, ag-inmabuloy iray opisyal na Customs Department ya iloob itan a kargamento ed Georgia. Saray agagi so inmapela ed Opisina na Ombudsman. Sanen antis labat lan onggapoy agew na distriton kombension ya akagaway paraan so ombudsman pian naabuloyan so kipaway na saray Biblia. Wala ni ingen so imbaki to ya onla ed kombension ed Marneuli pian mangalay kopya na balon Biblia parad opisina ra.

Maliket a Panangabrasa Unong ed Kustombre ed Georgia

Say distriton kombension ed Marneuli so makatantandan okasyon parad saray Tasi nen Jehova diad Georgia lapud sananey nin rason. Kabiangan ed programa so sakey a membro na Mananguley ya Ulop na saray Tasi nen Jehova. Amin iramay inmatendi so malikeliket tan sinansakey ya angabrasa ed sikato unong ed kustombre ra. Kaukolan a manalagey si Brother Jackson tan ibano toray agagi antis na kombension, legan na intermisyon, tan kayari programa, balet sikato so maliket a nanggawa ed satan.

Nensaman, nen 1903, diad impanampot na sakey a kombension, oniay inkomento na sakey ya agin laki: “Agkon balot isalat iray naawat ko manlapud sayan kombension ed sanlibon dolyar, anggano pobpobri ak a too.” Kayari na masulok a sakey siglo ed saginonor, ontan met a mismo so alikna na saray Tasi ya inmatendi ed makatantanda iran kombension ya agawa nen tiagew na 2006 diad Georgia.

[Saray paimano ed leksab]

[Kahon ed Pahina 19]

Say “Daiset” so Dinmakel

Tinmua ed Georgia iray akasulat ed Isaias 60:22: “Say daiset magmaliw naani a sanlibo, et say melag magmaliw naani a mabiskeg a nasyon: Siak, si Jehova, sikato naani gawaen ko a magano ed panaon to.” Diad kulang labat a 20 taon et dinmakel so bilang na saray manangipalapag na Panarian diad Georgia, manlapud kulang a 100 a nagmaliw a manga 16,000. Sarayan maseseg a ministro na Salitay Dios so mangikokondukta na ngalngali 8,000 iran panangiyaral na Biblia kada simba​—sakey ya alay-abig a posibilidad na idaak ni diad Georgia.

[Diagram/Saray mapa ed pahina 16]

(Parad aktual a format, nengnengen so publikasyon)

RUSSIAN FEDERATION

GEORGIA

⇨ Zugdidi

⇨ Kutaisi

Marneuli ⇨ Gori

⇨ Kaspi

⇨ Tsnori

TBILISI

TURKEY

ARMENIA

AZERBAIJAN

[Credit Line]

Globo: Imbase ed NASA/Visible Earth imagery

[Litrato ed pahina 16]

Estatua ed Tbilisi

[Saray litrato ed pahina 17]

Say kombension ed Marneuli et inkonekta ed limara nin pasen panamegley na saray “mobile phone”

[Saray litrato ed pahina 18]

Malikeliket iray delegado ed inkipaway na kompleton “New World Translation” ed Georgian