Kasin ‘Mayaman Kayo Dia ed Dios’?

“Ontan so mantipon na kayamanan nipaakar ed sikato, et aliwa a mayaman dia ed Dios.”​—LUCAS 12:21.

1, 2. (a) Anto so mabulos a pansasakripisyoan a maong na totoo? (b) Anton kairapan tan kapeligroan so kipapaarapan na saray Kristiano?

 ABAYAG lan panaon a saray totoo ed dakel a pasen so mansasagpot tan mankikimey ya impasya lapud pursigido iran onyaman. Alimbawa, sanen adiskobre nen koma-19 a siglo a walay naromog a balitok ed Abalaten ya Aprika, Australia, Canada, tan Estados Unidos, saray totoo ed ararawin pasen so asagyat a manaynan ed anggan saray ayaman tan inad-aro ra pian makaromog labat na saray kayamanan, anggaman agda kabisado so lugar a laen da tan no maminsan et singa imposible ditan so manbilay. On, dakel a totoo so mabulos a mangarap na baleg a kapeligroan tan mansasakripisyo iran maong ta pian nagamoran da iray kayamanan a pirpirawat na puso ra.

² Anggaman ag-aktual a manaanap na kayamanan so maslak a totoo natan, kaukolan iran mankimey ya impasya pian walay pambilay da. Satan so nayarin mairap, makapakesaw, tan makapabelat nagkalautla diad sayan peles a sistema na bengabengatla. Main-inomay so pagmaliw a mapagpaga ed tagano, kawesen, tan siroman, a napapaulyanan la odino nalilingwanan ni ingen iray mas importantin bengatla. (Roma 14:17) Angiter si Jesus na ilustrasyon odino parabolo, a dugarugan aneskribe ed sayan tendensia na too. Naromog itan diad Lucas 12:16-21.

3. Isalaysay ed antikey so ilustrasyon nen Jesus a nabasa diad Lucas 12:16-21.

³ Sinalambit nen Jesus iyan ilustrasyon kayari ton impaliwawa a nakaukolan so panlikas odino panalwar ed amin a kaagapan, a detalyado tayon kinonsidera diad akaunan artikulo. Kayari na impamasakbay nen Jesus nipaakar ed kaagapan, sinalambit to so nipaakar ed mayaman a too ya ag-akontento ed saray kamalir to a napno na saray maong a bengatla ya atipon to, kanian inggeba  to iratan tan angipaalagey na mas baleg pian panginan to na dakel niran maong a bengatla. Sanen inkuan to’d dili to a sikatoy makapanpainawa la tan manliket la ed bilay, imbaga na Dios ed sikato a say bilay to so manampot tan amin ya atipon ton kayamanan et kayarianen na arum. Insan oniay impanampot nen Jesus ed ilustrasyon to: “Ontan so mantipon na kayamanan nipaakar ed sikato, et aliwa a mayaman dia ed Dios.” (Lucas 12:21) Anton leksion so naaralan tayo ed sayan parabolo? Panon tayon niyaplika iya diad mismon bilay tayo?

Sakey a Toon Walaan na Problema

4. Anto so nibaga tayo ed samay toon adeskribe diad ilustrasyon nen Jesus?

⁴ Maslak a totoo so mikabisado ed sayan ilustrasyon nen Jesus. Imanoen tayo a ginapoan to so salaysay diad impangibaga to labat na: “Say dalin na sakey a toon mayaman binmunga na dakel.” Ag-imbaga nen Jesus ya agamoran na sayan too iray kayamanan to panamegley na panagsaol odino makapuy a paraan. Diad arum a salita et agnibagan mauges iman a too. Diad tua, unong ed inkuan nen Jesus, makatunongan ya isipen a say too ya adeskribe diad parabolo et nankimey ya impasya. Anggan panon et nibagan sikato imay toon namplano tan nantipon parad arapen, a nayarin ninonot to so pankaabigan na pamilya to. Kanian, no diad minumundon panmoria, sikatoy sakey ya alimbawa na makulin too a seryoson anumpal ed saray obligasyon to.

5. Anto so problema na samay too diad parabolo nen Jesus?

⁵ Antokaman so kipapasen, samay too diad parabolo so tinawag nen Jesus a mayaman, salanti, sikatoy dati lan walaan na dakel a materyal a kaykayarian. Balet, unong ed imbaga nen Jesus, saman a toon mayaman et walay problema to. Say dalin to so nambunga na dakdakel nen say inilaloan to, a sobsobra la ed nakaukolan to odino agto la nasabaan. Anto so nepeg komon a ginawa to?

6. Antoran dedesisyonan so kipapaarapan na dakel a lingkor na Dios natan?

⁶ Dakel so lingkor nen Jehova natan a wala met ed situasyon a mipadpara ed samay mayaman a too. Tua a panggugunaetan na saray Kristiano so magmaliw a matua, maseet, tan responsablin komikimey. (Colosas 3:22, 23) Empleyado man ira odino walay dilin negosyo ra, kaslakan et ontatalona ira, tan alay-abig so nagagawaan da. Sano naopresian ira ya iyatagey so posisyon da odino walay sinmabin balon oportunidad, kaukolan da so mandesisyon. Kasin awaten da iratan ya opresi pian naaruman so naaalmo ra? Ontan met, dakel so Tasin kalangweran a maabig so rekord da ed eskuelaan. Bilang resulta, nayarin makaawat ira na award odino magmaliw ya iskolar parad atagey ya edukasyon diad bantog ya unibersidad. Kasin awaten dan tampol iratan, unong a gagawaen na maslak a totoo?

7. Panon ya inarap na samay too ed parabolo nen Jesus so problema to?

⁷ Pawilen tayo pa imay ilustrasyon nen Jesus. Anto so ginawa na samay toon mayaman sanen nambunga na dakdakel so dalin to ya anggapo lay napanginan to ed saray ani to? Denesidi ton igeba iray datin kamalir to tan angipaalagey na mas baleg pian panginan to ed amayamay a trigo tan saray maong a bengatla. Satan a plano so ompatnag ya amaligen tan amenek ed sikato, ta oniay inisip to: “Kuan ko naani ed kamarerwak, Kamarerwa, dakel so saray kayamanan mo [“maong iran bengatla,” NW] ya inyatol nipaakar ed dakel a taon; manpainawa ka, mangan ka, oninum ka, manliket ka.”​—Lucas 12:19.

 Akin a “Makulangkulang”?

8. Anton importantin bengatla so nilingwanan na samay too ed parabolo nen Jesus?

⁸ Unong ya impabitar nen Jesus, say plano na samay toon mayaman so diad tua et ag-angiter ed sikato na peteg a seguridad. Anggaman ompatnag a praktikal itan, alingwanan to balet so importantin tuloy a bengatla, salanti, say linawa na Dios. Say nononoten to lambengat et say dili to, say pakainawaan to tan say pakapangan, pakainum, tan pakapanliket to. Inisip to a lapud sikatoy walaan na ‘dakel a maong iran bengatla’ et ‘dakel met iray taon to.’ Balet ta sikatoy alingolingo lapud aliwan ontan so agawa. Unong ya inkuan la nen Jesus, “say bilay na too andi ed karakel na saray bengatla a bebembenan to.” (Lucas 12:15) Diad saman a mismon labi, amin a bengatlan nansagpotan na saman a too so biglan naandi, ta oniay inkuan na Dios ed sikato: “Sika makulangkulang, natan a labi nakerew ed sika so kamarerwam; et saray bengatla ya intadiam, siopa naani makankayarian ed sikara?”​—Lucas 12:20.

9. Akin a tinawag a makulangkulang imay too diad parabolo?

⁹ Konsideraen tayo pa so sankaimportantian a punto ed ilustrasyon nen Jesus. Tinawag na Dios imay laki bilang makulangkulang. Impaliwawa na Exegetical Dictionary of the New Testament a saramay inusar a Griegon salita et “naynay a mankabaliksay kulang na pakatalos.” Imbaga na satan a diad sayan parabolo, say Dios so nirepresenta ya angusar ed satan a salita pian ipabitar so “kaapaan na saray plano na mayaman parad arapen.” Say salita so agmanutukoy ed sakey ya aliwan mautek, noagta diad “sakey ya agto labay so manmatalek ed Dios.” Say impaneskribe nen Jesus ed mayaman a too so mangipapanonot ed samay imbaga to ed saray Kristiano ed kongregasyon na Laodicea, Asia Minor nen inmunan-siglo: “Sika kuan mo, Siak mayaman ak, tan akala ak na kaykayamanan, tan anggapo so kaukolan ko a bengatla; tan agmo kabat a sika sakey ka a pakaskasi tan makibot tan duka tan bulag tan labos-lakseb.”​—Apocalipsis 3:17.

10. Akin a say pakawalaan na ‘dakel a kayamanan’ et aliwan garantiya ed pakawalaan na “dakel a taon”?

¹⁰ Nepeg a nodnonoten tayon maong iyan leksion. Posible kasin magmaliw itayon singa samay too diad parabolo, a mankimey itayon impasya pian naseguro tayon ‘ondakel iray kayamanan tayo’ balet ta napaulyan la so bengatlan nakaukolan pian nawalaan na “dakel a taon” diad arapen? (Juan 3:16; 17:3) Oniay ibabaga na Biblia: “Saray kayamanan andi-kakanaan da ed agew na sanok,” tan “say manmatalek ed saray kayamanan to napelag.” (Uliran 11:4, 28) Kanian, onia so unor ya insimbawa nen Jesus diad parabolo: “Ontan so mantipon na kayamanan nipaakar ed sikato, et aliwa a mayaman dia ed Dios.”​—Lucas 12:21.

11. Akin a nibagan maapa no say sakey et manilalo odino mananap na kaligenan diad materyal a kaykayarian?

¹¹ Sanen inkuan nen Jesus ya “ontan,” ipapabitar to a say agawa ed samay toon mayaman diad ilustrasyon et nagawa met ed saraman so mangisesentro ed bilay da, salanti, say ilalo tan kaligenan da, diad materyal a kaykayarian. Say lingo et aliwan diad ‘pantipon na sakey a too na kayamanan parad inkasikato,’ noagta diad agto pagmaliw a ‘mayaman dia ed Dios.’ Mipadpara ed satan so impasakbay nen babangatan a Santiago ya oniay insulat to: “Balap natan, sikayo a mankuan, Saya ya agew odino nabuas onla kami ed ontan a baley, tan manayam kami’d man a sakey taon, et mansaliw tan mantagilako kami et manubo kami: Anta agyo amta so onsabi nabuas.” Anto komon so nepeg dan gawaen? “Kanian  nepeg yo ya ibaga, No yabuloy na Katawan, manbilay kami, et gawaen mi so saya odino satan.” (Santiago 4:13-15) Anggan panon lay inkayaman odino kinarakel na kaykayarian na sakey a too, amin iratan et andi-kakanaan no sikatoy aliwan mayaman dia ed Dios. Anto ta so kabaliksan na pagmaliw a mayaman dia ed Dios?

Magmaliw Kayon Mayaman Dia ed Dios

12. Antoy nepeg tayon gawaen pian magmaliw itayon mayaman dia ed Dios?

¹² Diad samay imbaga nen Jesus, nipabitar so pandumaan na say pagmaliw a mayaman dia ed Dios tan say pantipon na sakey a too na materyal a kaykayamanan parad inkasikato. Kanian, inkuan nen Jesus a say nepeg a manunan pampagaan tayo et aliwan say pantipon na materyal a kaykayamanan odino panliket ed saray walad sikatayo. Imbes, nepeg tayon usaren iratan diad paraan a mamaaligwas, odino mamaelet na relasyon tayo ed si Jehova. No ontan so gawaen tayo, seguradon magmaliw itayon mayaman dia ed Dios. Akin? Lapud ontan so pakagamoran tayo na dakel a bendisyon to. Ibabaga ed sikatayo na Biblia: “Say bendisyon nen Jehova makapayaman; tan agmangarum na ermen.”​—Uliran 10:22.

13. Panon a “makapayaman” so bendisyon nen Jehova?

¹³ Sano bebendisyonan nen Jehova iray totoo to, naynay a say iiter to ed sikara et sankaabigan. (Santiago 1:17) Alimbawa, sanen inikdan nen Jehova na panayaman iray Israelita, sakey itan a “dalin a manag-agus so gatas tan dilo.” Anggaman ontan met so impaneskribe ed dalin na Ehipto, nilikud ed arum ni, say dalin ya inter nen Jehova ed saray Israelita et midumaan lapud sakey a makanakanan rason. Sakey itan a “dalin a pampilalekan nen Jehova a Dios mo,” so kuan nen Moises ed saray Israelita. Diad arum a panangibaga et onaligwas ira lapud si Jehova so mangasikaso ed sikara. Sanen nansiansian matoor iray Israelita ed si Jehova, benendisyonan to ra na daakan tan say kabibilay da so sankapatnagan a mas maabig nen say amin a nasyon ed kaliberliber da. On, say bendisyon nen Jehova so “makapayaman”!​—Numeros 16:13; Deuteronomio 4:5-8; 11:8-15.

14. Anto so panggagayagaan na saramay mayaman dia ed Dios?

¹⁴ Say balikas a “mayaman dia ed Dios” so impatalos met a “mayaman diad imaton na Dios” (Today’s English Version) odino “mayaman diad arap na Dios.” (Maung a Balita) Saramay mayaman ed materyal et kaslakan a mapaga ed no panon so pangipasen ed sikara na arum a totoo. Mabetbet a napatnagan itan ed paraan na kabibilay da. Labay dan pandinayewen so totoo panamegley na say tutukoyen na Biblia a “maapan gloria na bilay,” odino mapangtan kabibilay na sakey. (1 Juan 2:16) Balet, saramay mayaman dia ed Dios et panggagayagaan da so panangabobon, pabor, tan abalbaleg a panangasi to tan maapit so pisisiglaotan da ed sikato. Lapud mabmabli ra ed imaton na Dios, seguradon maliket tan maligen so liknaan da, a mas ni nen say niiter na materyal a kaykayamanan. (Isaias 40:11) Kanian say sakey nin itepet et, Anto so nepeg tayon gawaen ta pian magmaliw itayon mayaman ed imaton na Dios?

Mayaman ed Imaton na Dios

15. Anto so nepeg tayon gawaen pian magmaliw itayon mayaman dia ed Dios?

¹⁵ Diad ilustrasyon nen Jesus, samay too et namplano tan nankuli pian payamanen so inkasikato lambengat, kanian sikatoy tinawag a makulangkulang. Sirin, pian magmaliw itayon mayaman dia ed Dios, nepeg itayon mankuli tan sigpot a mibiang ed saray kimey ya ipapasen na Dios a peteg a makanakana tan makagunggona. Sakey ed saraya imay ingganggan nen Jesus:  “Onla kayo sirin, tan manggawa kayo na saray babangatan ed amin a nasyones.” (Mateo 28:19) No say pangusaran tayoy panaon, biskeg, tan saray talento tayo et diad pangipulong ed Panarian tan panggaway-babangatan, aliwan diad pamaaligwas ed dilin bilay tayo, singa itayo manpupuonan. Saramay manggagawa la na ontan et dakel so nagugunggona ra ed espiritual, unong a papaneknekan na onggendan iran eksperiensya.​—Uliran 19:17.

16, 17. Antoran eksperiensya so mangipapabitar a say sakey et magmaliw a mayaman ed imaton na Dios diad paraan na panagbilay to?

¹⁶ Imanoen pa so kipapasen na sakey a Kristianon laki diad sakey a bansa ed Asia. Balbaleg so sueldo to bilang manag-apiger na kompyuter. Balet, say trabaho to et manguupot ed amin lawarin panaon to, a liknaen ton sikatoy linmetey ed espiritual. Diad kaunoran, imbes a panggunaetan toy mantultuloy ya ontalona ed trabaho to, sikatoy inmekal tan nannegosyo la bilang managgawa tan managlakoy sorbetes diad karsada pian mas malaem so panaon ton mangasikaso ed espiritual iran pankaukolan to tan saray responsabilidad to. Sikatoy inelek-elekan na saray datin katrabahoan to, balet anto kasi so nansumpalan? “Diad tua et mas maong so anap ko natan nen say sanen manaapiger ak ni na kompyuter,” kuan to. “Mas maliket ak natan lapud agak la nadedetdetan tan manaaburido, aliwan singa nen wala ak ni’d samay datin trabahok. Tan say sankaimportantian et lalon apaapit ak ed si Jehova.” Lapud pananguman a ginawa na sayan Kristiano, sikatoy akapanlingkor bilang payunir, tan sikatoy manlilingkor la natan ed sangan opisina na saray Tasi nen Jehova ed bansa ra. Talagan say bendisyon nen Jehova et “makapayaman.”

¹⁷ Imanoen so sananey nin alimbawa na sakey a biin binmaleg ed sakey a pamilya a mamapablin maong ed edukasyon. Sikatoy akapanaral diad saray unibersidad ed Mexico, Pransya, Switzerland tan marakdakep so oportunidad a manatalaran ed sikato. “Siak so tinmalona; akagamor ak na respeto tan naopresian ak na marakep a posisyon,” so kuan to, “balet ta agko nalilikna so tuan liket tan peteg ya inkapnek.” Diad saginonor et naaralan to so nipaakar ed si Jehova. Oniay inkuan to: “Legan na iyaaligwas ko ed espiritual, say pilalek kon mamaliket ed si Jehova tan mangipawil na daiset manlapud saray iiter to’d siak so akatulong pian malinew kon nanengneng so karera a nepeg kon gegemtanen, salanti, say panlingkor ed sikato a sigpot-panaon.” Sikatoy inmekal ed trabaho to tan agnambayag et abautismoan. Diad apalabas a 20 a taon et sikatoy malikeliket a nanlingkor bilang regular payunir. “Iisipen na arum a pinirdik labat iray talentok,” kuan to, “balet ta agda niburi a malikeliket ak, tan pandinayewan da so pangiyaaplikak ed saray prinsipyo na Biblia ed bilay ko. Inagew-agew ak a manpipikasi ed si Jehova a tulongan to ak a magmaliw a mapaabeba ta pian nagamoran ko so panangabobon to.”

18. Singa si Pablo, panon itayon magmaliw a mayaman dia ed Dios?

¹⁸ Si Saulo, a nagmaliw ya apostol Pablo, et marakdakep so karera a manatalaran ed sikato. Ingen, oniay insulat to ed saginonor: “Ibilang ko ra so ami’ bengatla ya onlereg nipaakar ed ontan la a karlangan na pikakabat ed Kristo Jesus a Katawan ko.” (Filipos 3:7, 8) Parad si Pablo, saray kayamanan ya agamoran to panamegley nen Kristo et mabmablin tuloy nen say antokaman a niyopresi na mundo. Ontan met, no italirak tayo so antokaman iran sinisiblet ya ambisyon tan manbilay itayon walaan na debosyon ed Dios, napanggayagaan tayo met so bilay a mayaman ed arap na Dios. Oniay ipapaseguro ed sikatayo na Salitay Dios: “Say tumang na kauyamoan tan say takot ed Jehova sikato so saray kayamanan, tan dayew, tan bilay.”​—Uliran 22:4.

Kasin Nipaliwawa Yo?

• Anto so problema na samay too ed ilustrasyon nen Jesus?

• Akin a tinawag a makulangkulang imay too diad parabolo?

• Antoy kabaliksan na pagmaliw a mayaman dia ed Dios?

• Panon itayon magmaliw a mayaman dia ed Dios?

[Tepetepet Parad Panagaral]

[Litrato ed pahina 26]

Akin a tinawag a makulangkulang imay toon mayaman?

[Litrato ed pahina 27]

Panon a talagan makapasubok iray pankanawnawan onasenso?

[Litrato ed pahina 28, 29]

“Say bendisyon nen Jehova makapayaman”