“Manlikas Kayo ed Amin a Kaagapan”
“Manlikas Kayo ed Amin a Kaagapan”
“Say bilay na too andi ed karakel na saray bengatla a bebembenan to.”—LUCAS 12:15.
1, 2. (a) Anto so naiimano yon paniinteresan tan pampupursigian na totoo natan? (b) Panon itayon apektado ed ontan iran awawey?
KUARTA, kaykayarian, inkabantog, trabahon atagey so sueldo, pamilya—saraya so pigaran bengatla ya ipapasen na maslak a totoo a basiyan na itatalona odino garantiya parad maligen ya arapen. Sankaimano a say manunan paniinteresan tan pampupursigian na dakel a totoo diad saray mayaman tan mairap a bansa et say pakawalaan na materyal tan say iyasenso. Bangbalet, say interes da ed espiritual iran bengatla, no wala man bilang, so maples a naaandi.
2 Ontan so mismon impasakbay na Biblia, a kuan to: “Dia ed saray kaunoran ya agew onsabi so saray panaon a maatap. Ta saray totoo sikara naani so mangaro ed saray lamalaman da, maaro ra na pilak, . . . maaro ed saray likeliket, a lalo nen say dia ed Dios. A wala so nengneng da ya inkasanto, et ingen itapat da so pakayari na sayan inkasanto.” (2 Timoteo 3:1-5) Saray tuan Kristiano so naynay lan nadedesdes a mangalig ed ontan a kanonotan tan kabibilay na saratan a totoo a mabetbet dan nakakalimog. Anto so makatulong pian naresistian tayo so pansasagpot na mundo ‘a manmoldi ed sikatayo’?—Roma 12:2, The New Testament in Modern English, nen J. B. Phillips.
3. Anto so insimbawa nen Jesus a konsideraen tayo natan?
3 Si Jesu-Kristo, a “Nanggawa tan Manamayadyari na pananisia tayo,” so angiter ed sikatayo na mapuersa iran leksion ed sayan pamaakaran. (Hebreos 12:2) Aminsan, sanen sikatoy manpapaliwawa ed dakel a totoo pian ipalinew a maong ed sikara so pigaran pamaakaran ed tuan panagdayew, biglan sinmalet so sakey a laki, ya inkerew ton: “Managbangat, ibagam ed agik a yapagan to ak na tawir.” Inmebat si Jesus diad impangiter to na sakey a mapuersan simbawa parad saman a laki—tan ed amin ya onderengel. Sikatoy mabiskeg ya amasakbay sumpad kaagapan tan indanet to itan a simbawa panamegley na makatenyeg-kanonotan ya ilustrasyon. Nepeg tayon motekteken so imbaga nen Jesus ed saman ya inkagawa tan nengnengen no panon itayon nagunggonaan diad pangiyaplika ed satan diad mismon bilay tayo.—Lucas 12:13-21.
Aliwan Matukoy a Kerew
4. Akin ya aliwan matukoy so insalet na samay laki ed pampapaliwawa nen Jesus?
4 Antis a sinmalet imay laki, ipapaliwawa nen Jesus ed saray babangatan to tan ed arum so nipaakar ed ipaliis ed pansimpisimpitan, pagmaliw a makpel a mangipatua na pikakasakey ed Anak na too, tan no panon a nagamoran so tulong na masanton espiritu. (Lucas 12:1-12) Seguradon makanakana irayan pamaakaran a nakaukolan ya ipapuso na saray babangatan. Balet, kaleganan na sayan makapausisan paliwawa, biglan sinmalet so laki tan kinerew to’d si Jesus ya aregloen to so ompatnag a kolkolan na pamilya ra nipaakar ed materyal a kaykayarian da. Ingen, wala so importantin leksion a naaralan tayo ed sayan agawa.
5. Diad samay kerew na laki, anto so apatnagan nipaakar ed sikato?
5 Nikuan a say “personalidad na too so mabetbet a napatnagan ed say nononoten to legan ya onderengel na sakey a sermon.” Legan ya ipapaliwawa nen Jesus iray seryoson espiritual a pamaakaran, nayarin iisipen na saman a laki no panon so pakagunggonaan to ed pinansyal. Agnisalaysay no kasin makatunongan so rason to ed panrereklamo to nipaakar ed tawir. Nayarin labay ton anamoten so autoridad nen Jesus a bibidbiren bilang makabat ya ukom ed gotgotan na totoo. (Isaias 11:3, 4; Mateo 22:16) Antokaman so rason to, ipapatnag na say impantepet to a walay problema ed sikato, salanti, anggapon balot so panamabli to ed espiritual iran bengatla. Agta maabig iyan rason pian usisaen tayoy inkasikatayo? Alimbawa, no peles na aral et main-inomay tayon naabuloyan so nonot tayo a manteyengteyeng odino iisipen tayo la no antoy gawaen tayo kayari aral. Aleg komon ya ontan, noagta nepeg itayon ontalineng tan isipen tayo iray paraan no panon tayon niyaplika ed dili tayo iray narerengelan tayo ta pian lalo itayon napaapit ed mangatatawen ya Ama tayo, si Jehova a Dios, tan ed saray kapananisiaan tayo.—Salmo 22:22; Marcos 4:24.
6. Akin ya agkinmiwas si Jesus unong ed kerew na samay laki?
6 Antokaman so motibo na laki pian kerewen so onman, agkinmiwas si Jesus unong ed satan. Imbes, oniay inkuan to ed sikato: “Too, siopa so nanggawa ed siak a mangukom ono mangapag ed sikayo?” (Lucas 12:14) Say tutukoyen nen Jesus ed satan et samay bengatlan kabkabisado la na totoo, ta unong ed Mosaikon Ganggan et saray ukom ed syudad so mandedesisyon ed ontan iran pamaakaran. (Deuteronomio 16:18-20; 21:15-17; Rut 4:1, 2) Balet, mas importante iran bengatla so nononoten nen Jesus—say pantasi ed katuaan na Panarian tan pangibangat ed totoo nipaakar ed linawa na Dios. (Juan 18:37) Kanian, imbes a nisuawi so nonot tayo ed kaslakan iran kapagaan na totoo, aligen tayo so alimbawa nen Jesus, ya usaren tayoy panaon tan biskeg tayo diad pangipulong ed maong a balita tan ‘panggawa na babangatan ed amin a nasyones.’—Mateo 24:14; 28:19.
Paliisan so Kaagapan
7. Lapud atebek nen Jesus so peteg a motibo na samay laki, anto so imbaga to?
7 Lapud natebek nen Jesus so walad akindalem na puso, amta to a wala ni mas seryoson nalalanor diad kerew na samay laki a mibali si Jesus ed personal a pamaakaran. Kanian, imbes ya ag-onabobon labat si Jesus, atebek to so peteg a motibo na saman a laki, tan inkuan to: “Nengnengen yo, et manlikas kayo ed amin a kaagapan: ta say bilay na too andi ed karakel na saray bengatla a bebembenan to.”—Lucas 12:15.
8. Anto so kaagapan, tan antoy nayarin pansumpalan na satan?
8 Say kaagapan et aliwa lambengat a pilalek a nawalaay kuarta odino pigara iran bengatla, a saraya et walaan met na suston usar tan gagala. Mankabaliksan itan na alablabas a pampilalek ed kayamanan odino kaykayarian, odino pampilalek ed kaykayarian na arum. Mankabaliksan met itan na agnapenek odino maagum a pantindek a nawalaan na saray bengatla, a nayarin saramay kayarian na arum, basta labat nawalaan na saratan, ya agto nononoten no talaga kasin nakaukolan to iratan odino antoy epekto na satan ed arum. Say maagap a too et akasentro so nonot tan kiwakiwas to ed say bengatlan pipirawaten to, a magmamaliw la itan a dios to. Nonoten ya impara nen apostol Pablo so maagum a too dia ed sakey a managtalintao, a saya et agmakatawir na Panarian na Dios.—Efeso 5:5; Colosas 3:5.
9. Diad antoran paraan a napatnagan so kaagapan. Mangiter na pigaran alimbawa.
9 Makapainteres ta amasakbay si Jesus sumpad “amin a kaagapan.” On, dakel so nengneng na kaagapan. Nidatak so arum ed saratan diad unor a kabiangan na Samploran Ganggan, ya oniay nabasa: “Agmo iibegan so abung na kaparam a too, agmo iibegan so asawa na kaparam a too, odino say igaganggan to a laki, odino say igaganggan to a bii, odino say baka to, odino say asno to, odino antokaman a kayarian na kaparam a too.” (Exodo 20:17) Dakdakel ed Biblia iray alimbawa na saray indibidual ya akagawa na ambelat a kasalanan makasengeg ed nanduruman klase na kaagapan. Si Satanas so inmuna-unan angagum ed bengatlan kayarian na arum, salanti, say gloria, galang, tan autoridad a kien labat nen Jehova. (Apocalipsis 4:11) Si Eva so alablabas a nampilalek na kanepegan a mandesidin bukor, tan lapud sikatoy apalikdo ed sayan pamaakaran, say katooan so ginmapon anagmak na kasalanan tan ipapatey. (Genesis 3:4-7) Saray demonyo et datin anghel ya ag-akontento ed “sakop na kanepegan da, ingen tinaynan day panaayaman da” pian gawaen so bengatlan agda kanepegan. (Judas 6, Maung a Balita; Genesis 6:2) Nonoten pa met si Balaam, Akan, Gehazi, tan si Judas. Ag-ira nankontento ed kipapasen da ed bilay noagta inabuloyan dan say alablabas a pilalek ed materyal a kaykayarian so mamakiwas ed sikaran usaren ed lingon paraan so nimatalek ed sikara, a nansumpal ed inkaderal da.
10. Panon so nepeg a pansiansia tayon ‘akanengneng,’ unong ya insimbawa nen Jesus?
10 Agaylan matukotukoy a ginapoan nen Jesus so pasakbay to sumpad kaagapan panamegley na saray salitan “nengnengen yo”! Akin? Lapud main-inomay na totoo a nanengneng so arum bilang maagum odino maagap, balet ta mataltalag dan aksobien a sikaran mismo et ontan. Ingen, impabitar nen apostol Pablo a “say aro ed pilak sikato so sakey a lamot na saray amin a nengneng na mauges.” (1 Timoteo 6:9, 10) Impaliwawa nen babangatan a Santiago a sano say mauges a pilalek et “nanlukon la iyanak to so kasalanan.” (Santiago 1:15) Mitunosan ed simbawa nen Jesus, nepeg a mansiansia itayon ‘akanengneng,’ aliwan pian imanoen so arum no kasin sikaray maagum, noagta pian usisaen so inkasikatayo no antoy akasentroan na puso tayo, ta pian ‘makapanlikas itayo ed amin a kaagapan.’
Bilay a Daakan na Kaykayarian
11, 12. (a) Anto so impasakbay nen Jesus nipaakar ed kaagapan? (b) Akin a kaukolan tayon talinengen so pasakbay nen Jesus?
11 Wala ni sananey a rason no akin a nepeg itayon manlikas sumpad kaagapan. Imanoen pa so sinmublay ya imbaga nen Jesus: “Say bilay na too andi ed karakel na saray bengatla a bebembenan to.” (Lucas 12:15) Nepeg tayon pannonotan iyan maong nagkalautla diad sayan panaon a materyalistiko so maslak a totoo, tan ipapasen da a say bilay a maasenso et bilay a maliket tan matalona. Diad saratan a balikas, impabitar nen Jesus a say peteg a makabaliksan tan makapenek a bilay et ag-akadepende ed materyal a kaykayarian, anggan panon lan karakel iratan.
12 Balet, nayarin agmipakna so arum, ya ikakatunongan dan mas mainawa tan maliket so bilay no dakel so kaykayarian, tan sirin et mas makabaliksan. Kanian pampupursigian da iramay bengatlan pakagamoran da na amin a pipirawaten dan kagawaan odino gadyet. Parad sikara et manresulta itan ed maong a bilay. Balet lapud ontan so iisipen da, agda natetebek so labay ya ipabitar nen Jesus.
13. Anto so balansin panmoria nipaakar ed bilay tan kaykayarian?
13 Say indanet nen Jesus et aliwan no kasin maong odino mauges so pakawalaan na dakel a kayarian, noagta tinukoy to a say bilay na too et andi ed “saray bengatla a bebembenan to,” salanti, saray bengatla a wala la’d sikato. Nipaakar ed saya, amta tayon amin ya agmet talaga nakaukolan so dakdakel a kaykayarian ta pian nasustuni so bilay tayo. No walay daiset a tagano, kawesen, tan pan-ugipan, masarag la iratan. Sarayan bengatla et daakan ed saray mayayaman, bangta saray mairap-bilay et mantalikarkar kalamor pian makaromog na pankaukolan da. Balet, pareho ra lanlamang diad kaunoran sano manampot la so bilay da, ya amin a bengatla et naandi la. (Eclesiastes 9:5, 6) Kanian pian magmaliw a makabaliksan tan makagunggona so bilay na sakey a too, agnayari tan agnepeg ya akadependi lambengat itan ed saray bengatlan nagamoran odino nakayarian to. Nalinewan tayon maong iya sano usisaen tayo no anton klase na bilay so tutukoyen nen Jesus.
14. Anto so naaralan tayo ed salitan “bilay” a nausar diad salaysay na Biblia.
14 Sanen inkuan nen Jesus a “say bilay na too andi ed karakel na saray bengatla a bebembenan to,” say tutukoyen na salitan inusar dia parad “bilay” ed Ebanghelyo nen Lucas (zo·eʹ diad Griego) et aliwan say paraan odino estilo na kabibilay, noagta say mismon bilay, diad absoluton pantalos. * Say labay ya ibaga nen Jesus et mayaman man odino mairap itayo, mainawa man so bilay tayo odino sankaanap-sankakamot, agtayo kontrolado no kaunongan karukey so nayarin pambilay tayo odino agtayo amta no kasin mabilay itayo ni nabuas. Oniay inkuan nen Jesus diad Sermon to ed Palandey: “Siopa ta ed sikayo so, lapu ed kapagaan to makapangiyarum na sankasiko ed inalageyan to?” (Mateo 6:27) Impabitar na Biblia a si Jehova lambengat so “subol na bilay,” tan makayarin mangiter ed saray matoor ed sikato na “bilay a peteg,” odino “bilay ya andi-angga,” bilay a magnayon balangla ed tawen odino diad dalin.—Salmo 36:9; 1 Timoteo 6:12, 19.
15. Akin a dakel so manmamatalek ed materyal a kaykayarian?
15 Impabitar na saray salita nen Jesus a magmainomay a napikewet so panmoria na totoo ed bilay. Amin a totoo, mairap man odino mayaman, so ag-ayadyari tan pareparehoy pansumpalan da. Oniay imbaga nen Moises: “Pitomplo a taon so dukey na pambilay mi, odino nisengeg ed kaksilan walomplo a taon; et say kapangtaan da mansagpot ni tan manermen; ta sikato so napaso ed magano, tan ontekkiab kami la.” (Salmo 90:10; Job 14:1, 2; 1 Pedro 1:24) Lapud saya, saray totoo ya agmalabay a nawalaan na maabig a relasyon ed Dios so mabetbet a walaan na prinsipyon, “Mangan itayo tan oninum itayo, sirin ta nabuas ompatey itayo,” unong a tinukoy nen apostol Pablo. (1 Corinto 15:32) Tan lapud namomoria na arum a say bilay et maganggano tan andiay pakaseguroan, say paniilaloan da parad maligen tan lawas mainawan bilay et say materyal a kaykayarian. Nayarin iisipen da ya anggan panon et mas maligen so bilay da no walaan ira na nanengneng iran materyal a bengatla. Kanian, ag-ira ontutundan mansasagpot a mantipon na kayamanan tan kaykayarian, ya abaloan dan saratan et mamaligen tan mamaliket ed bilay da.—Salmo 49:6, 11, 12.
Sakey a Maligen ya Arapen
16. Anto so ag-akabasiyan na tuan makagunggonan bilay?
16 Tua a no maong so panagbilay tayo, salanti, walaay daakan a tagano, kawesen, siroman, tan arum niran pankaukolan, mas mainawa itayo odino mas naasikaso tayon maong so bunigas tayo, a diad ontan et ondukey na daiset so bilay tayo. Balet, peteg kasin mas makabaliksan tan mas maligen so ontan a bilay? Say tuan makagunggonan bilay et agnibase ed karukey na pambilay na sakey odino ed karakel na materyal a walad sikato. Impabitar nen apostol Pablo so kapeligroan na alablabas a panagmatalek ed saratan a bengatla. Oniay insulat to ed si Timoteo: “Bilin mo’ray mamayaman ed sayan mundo ya ag-ira mapasirayew, tan ag-ira manmatalek ed agmansiansian kayamanan, noag ingen manmatalek ira’d Dios a mangiiter a mabunbunlok ed sikatayo na amin a bengatlan panliketan tayo.”—1 Timoteo 6:17, Maung a Balita.
17, 18. (a) Sioparay maabig ya ehemplo a nepeg tayon aligen nipaakar ed dugan panmoria ed materyal a kaykayarian? (b) Anto so parabolo nen Jesus a konsideraen tayo ed onsublay ya artikulo?
17 Aliwan makabat so panmatalek na sakey diad saray kayamanan lapud saratan et “agmansiansia.” Say patriarkan si Job et mayamyaman, balet sanen biglan asabian na trahedya, sikatoy ag-atulongan na kayamanan to lapud naandin tampol iratan. Say mabiskeg a relasyon to ed Dios so amasiansia ed bilay to diad amin a subok tan kairapan ya asagmak to. (Job 1:1, 3, 20-22) Ontan met si Abraham, ya agto inabuloyan so dakel a kayamanan to a mangamper ed sikaton mangawat ed mairap a pagagawa nen Jehova ed sikato, tan sikatoy abendisyonan a magmaliw ya “ama na amayamay a nasyon.” (Genesis 12:1, 4; 17:4-6) Sikara tan say arum niran ehemplo so nepeg tayon aligen. Malangwer man odino matatken, nakaukolan tayon usisaen so inkasikatayo pian nanengneng no anto so talagan importante ed bilay tayo tan no anto so paniilaloan tayo.—Efeso 5:10; Filipos 1:10.
18 Say antikey a paliwawa nen Jesus nipaakar ed kaagapan tan ed manepeg a panmoria ed bilay so talagan makabkabaliksan tan makaibangat. Balet, wala ni so kaaruman a bilin nen Jesus, tan intuloy ton insalaysay so sakey a makatenyeg-kanonotan a parabolo, odino ilustrasyon, nipaakar ed makulangkulang a mayaman a too. Panon ya onaplika ed bilay tayo natan itan ya ilustrasyon, tan anto so naaralan tayo ed satan? Ebatan iratan na onsublay ya artikulo.
[Paimano ed leksab]
^ par. 14 Say sananey nin Griegon salita ya impatalos a “bilay” et biʹos, a saya so nanlapuan na Ingles iran salita a “biography” tan “biology.” Unong ed Vine’s Expository Dictionary of Old and New Testament Words, say tutukoyen na biʹos et “say karukey odino kabayag na pambilay,” “say paraan na kabibilay,” tan “say panusustuni ed bilay.”
Anto so Ebat Yo?
• Anto so naaralan tayo ed ag-inkiwas nen Jesus ed kerew na sakey a lakin kaiba ed saray onderengel ed sikato?
• Akin a nepeg itayon manalwar sumpad kaagapan, tan panon tayon nagawaan itan?
• Akin a say bilay et agmandependi ed materyal a kaykayarian?
• Anto so basiyan na peteg a makagunggona tan maligen a bilay?
[Tepetepet Parad Panagaral]
[Litrato ed pahina 23]
Akin ya agkinmiwas si Jesus ed kerew na sakey a laki?
[Litrato ed pahina 23]
Mansumpal ed kadederal so kaagapan
[Saray litrato ed pahina 25]
Panon ya impatnag nen Abraham so dugan panmoria ed materyal a kaykayarian?