Panon Kan Nawalaan na Tuan Espiritualidad?

“SAY kaisipan na laman say patey; balet say kaisipan na espiritu say bilay tan kareenan,” so insulat nen apostol Pablo. (Roma 8:6) Ipapanengneng na saratan a salita na apostol a say pagmaliw a maespiritual et aliwan basta no antoy personal a panlabayan odino nalilikna na sakey. Diad tua, say pansumpalan na saya et bilay odino patey. Balet, panon a nibagan makaawat na “bilay tan kareenan” so maespiritual a too? Unong ed Biblia, say ontan a too et walay kareenan to natan ed inkasikato tan ed Dios, tan diad arapen et sikatoy regaloan na bilay ya andi-anggaan. (Roma 6:23; Filipos 4:7) Kampega et oniay inkuan nen Jesus: “Maliket iray mamibirbir na pankaukolan da’d maespiritu ran bengatla.”​—Mateo 5:3, Maung a Balita.

Say pamabasa yo ed sayan magasin et prueba la ya interesado kayo ed espiritual, tan dugay gagawaen yo. Balet, nandurumay panmoria na totoo nipaakar ed espiritualidad, kanian ompan nitepet yo: ‘Anto ta so tuan espiritualidad? Tan panon a nawalaan na ontan so sakey a too?’

Say “Kanonotan nen Kristo”

Nilikud ed impangipaimano nen apostol Pablo ed saray kakanaan tan gunggona na pagmaliw a manonot ed espiritual, dakel niray imbaga to nipaakar ed kabaliksan na tuan espiritualidad. Impaliwawa to ed saray Kristiano ed syudad na Corinto nensaman no anto so pandumaan na pisikal a too, salanti, toon tumbotumbok ed panlabayan na laman to, tan say espiritual a too, a mamapabli ed maespiritu iran bengatla. Insulat to: “Say too a gendat [odino pisikal a too] agto awaten so bengatla na espirituy Dios: ta kakulangkulangan ira ed sikato.” Diad biek a dapag, impaliwawa to a say espiritual a too et walaan na “kanonotan nen Kristo.”​—1 Corinto 2:14-16.

Pian nawalaan na “kanonotan nen Kristo,” kaukolan a mipara odino ‘mikasakey so kalakal tayo ed si Kristo Jesus.’ (Roma 15:5; Filipos 2:5) Diad arum a salita, say espiritual a too et mipara so panagnonot to ed si Jesus tan mangaalig ed saray ginawa To. (1 Pedro 2:21; 4:1) No lalon mipadpara ed kinen Kristo so kanonotan na sakey a too, mas mabiskeg so espiritualidad to tan mas posiblin nawalaan na “bilay tan kareenan.”​—Roma 13:14.

Panon a Naamtaan so Walad “Kanonotan nen Kristo”?

Pian nawalaan na kanonotan nen Kristo, unona et kaukolan tayon amtaen itan. Kanian, say unonan gawaen pian magmaliw a maespiritual et say pangamta ed panagnonot nen Jesus. Balet panon yon naamtaay walad nonot to, anta 2,000 taon lan anggapo diad dalin? Bueno, panon yo ta’n akabat iramay bantog nensaman ed bansa yo? Anganko et nambasa kayo na saray nipaakar ed sikara. Mipara ed satan, say importantin paraan pian naamtaan yoy walad nonot nen Kristo et say pambasa ed awaran nipaakar ed sikato.​—Juan 17:3.

Walay apatiran malinlinew a salaysay nipaakar ed si Jesus, tan saratan et saray Ebanghelyon insulat di Mateo, Marcos, Lucas, tan Juan. No basaen yon maong irayan salaysay, natebek yo so panagnonot to, nalilikna to, tan no anto so mamapakiwas ed sikato. Sano pansagpotan yon motekteken so nababasa yo nipaakar ed si Jesus, nilitrato yo ed nonot yo no anto so ugali to. Anggano ipapasen yon patumbok kayo la nen Kristo, natulongan kayo na onian panagbasa tan panagdalepdep pian ‘mantultuloy kayon ombaleg ed panangaro tan pakapikabat ed Katawan tan Manangilaban tayon Jesu-Kristo.’​—2 Pedro 3:18, Maung a Balita.

 Bilang pangiyaplika, aralen tayo pa iray pigaran seksion na Ebanghelyo pian nanengneng tayo no akin a maespiritual si Jesus. Insan yo tepetay inkasikayo no panon yon naalig so ehemplo to.​—Juan 13:15.

Espiritualidad tan “say Bunga na Espiritu”

Inkuan na sakey ed saray nansulat na Ebanghelyo a si Lucas, a sanen abautismoan si Jesus et inkalbo ed sikato so masanton espiritu na Dios tan ‘apano na espiritu santo.’ (Lucas 3:21, 22; 4:1) Kanian, impurek met nen Jesus ed saray patumbok to ya importantin paigiya ira ed masanton “espiritu” odino aktibon puersa na Dios. (Genesis 1:2; Lucas 11:9-13) Akin et im-importante itan? Lapud mabiskeg a makauman ed kanonotan na too so espiritu na Dios, diad ontan et nialig toy kanonotan to ed si Kristo. (Roma 12:1, 2) Say masanton espiritu et pawalaen to ed too iray kalidad a singa say “aro, liket, deen, kasungdoan, kauyamoan, kaabigan, sisia, tayadno, dangka.” Sarayan kalidad, a diad Biblia et natatawag a “bunga na espiritu,” so pakapangibiigan ed tudtuan maespiritual a too. (Galacia 5:22, 23) Diad antikey, say maespiritual a too et samay paigigiya ed espiritu na Dios.

Diad interon impanministeryo nen Jesus et impanengneng ton wala so bunga na espiritu ed sikato. Sano midedeneng ed saramay totoon ipapasen na arum ya abebbeba, sankapatnagan ed sikato iray kalidad to ya aro, kauyamoan, tan kaabigan. (Mateo 9:36) Alimbawa, imano yo pa imay sakey ya agawa ya insulat nen apostol Juan. Oniay nabasa tayo: “Nen onlalabas [si Jesus], anengneng to so sakey a toon bulag nanlapud inkianak to.” Naimano met na saray babangatan nen Jesus imay laki, balet parad sikara et sikatoy makasalanan. Oniay intepet da: “Siopa so nankasalanan, sayan too, ono saray ateng to?” Sikatoy anengneng met na saray kakaabay to, balet parad sikara et sikatoy sakey a mipapayabol. “Aliwa ta a sikato ya’man so nanyurong ya akipabpayabol?” so kuan da. Balet, parad si Jesus, sikatoy sakey a toon mankaukolan na tulong. Kanian, sikatoy kinatongtong to tan pinaabig to.​—Juan 9:1-8.

Antoy naaralan tayo ed saya nipaakar ed kanonotan nen Kristo? Unona, agminelmelag nen Jesus iray pobri noag ingen et sikatoy mapangpangasi ed sikara. Komadua, sikatoy mabulon a tinmulong ed arum. Diad padesir yo, natutumbok yo kasi so ginawa nen Jesus? Mipara kasi ed si Jesus so panagtrato yo ed totoo, ya iiter yoy nakaukolan dan tulong ta pian ondakep so bilay tan arapen da? Odino say papaboran yo labat et saramay bantog a totoo balet ta ag-imimanoen iramay ordinaryo? No mipara ed si Jesus so kagagawa yo, talagan natutumbok yo so ehemplo to.​—Salmo 72:12-14.

Espiritualidad tan Pikakasi

Ipapanengneng na saray salaysay na Ebanghelyo a si Jesus et mabetbet a manpipikasi ed Dios. (Marcos 1:35; Lucas 5:16; 22:41) Sanen manmiministeryo diad dalin, inggana toy panaon a  manpikasi. Insulat nen babangatan a Mateo: “Sanen apasipot [nen Jesus] so katooan tinmatdang ed palandey a nampikasi a bukbukor to.” (Mateo 14:23) Lapud saratan a mareen a bekta ya impitongtong to ed Ama ton walad tawen, sikatoy apabiskeg. (Mateo 26:36-44) Ontan met natan, saray totoo a tuan maespiritual so manaanap na pankanawnawan makapitongtong ed Dios, ta amta ran saya so mamaelet na relasyon da ed Dios a nanggawa ed sikara tan manulong ed sikaran mas naalig so panagnonot nen Kristo.

Si Jesus so mabetbet a manpipikasi na andukey. (Juan 17:1-26) Singa bilang, antis ton nampili na 12 lalaki a magmaliw ya apostoles to, sikatoy “pinmaway ed palandey a manpikasi; et intuloy to a nansanlabi so akikasi ed Dios.” (Lucas 6:12) Anggaman agmet ibabaga a nakaukolay mansanlabin manpikasi, saramay tuan maespiritual so mangaalig ed ehemplo nen Jesus. Antis iran manggawa na saray ambelat a desisyon, talagan ipapanaon day manpikasi, a kekerewen day panangiwanwan na masanton espiritu pian saray napili da et mamaaligwas ed espiritualidad da.

Diad saray pikakasi nen Jesus, napatnagan so sensiridad to a kaukolan tayon aligen sano manpipikasi. Imanoen pa so inkuan nen Lucas nipaakar ed impanpikasi nen Jesus antis na impatey to. “Sanen manpapanabos akikasi na lalo a marmarlang; et say linge’to singa angkakabaleg a tedter na dala a sinmaklayat angga ed dalin.” (Lucas 22:44) Dati lan impapuso so panagpikasi nen Jesus, balet diad saman ya inkagawa, a sankagrabian a subok so dadalanen to, sikatoy nampikasi a “lalo a marmarlang,” tan naebatan so pikakasi to. (Hebreos 5:7) Saray totoo a tuan maespiritual so mangaalig ed ehemplo nen Jesus. Sano nasusubok iran maong, “lalo a marmarlang” so panagpikasi ra ed Dios parad masanton espiritu, giya, tan suporta to.

Lapud malinew a si Jesus et talagan mapikasi, agla pankelawan no akin a sikatoy labay ya aligen na saray babangatan to. Kanian, oniay kerew da ed sikato: “Katawan, ibangat mo kami a mikasi.” (Lucas 11:1) Ontan met natan, saramay tuan maespiritu tan paigigiya ed masanton espiritu na Dios so mangaalig ed ehemplo nen Jesus diad panagpikasi ra ed Dios. On, say tuan espiritualidad tan pikakasi et mankonektaan.

Espiritualidad tan Panangipulong ed Maong a Balita

Diad Ebanghelyo nen Marcos, wadtan so salaysay nipaakar ed impamaabig nen Jesus ed amayamay a mansasakit, anggaman aralem lay labi. Kasabi palbangon, sanen manpipikasi a bukor, sikatoy nila na saray apostol to tan inkuan da a dakel so totoon manaanap ed sikato, anganko et labay day manpatambal. Balet, oniay inkuan nen Jesus: “Onla itayo ed anggan iner a pasen ed saray ontumbok a balbaley, pian manpulong ak met diman.” Insan to impaliwawa no akin: “Ta linma ak dia lapu ed sayan getma.” (Marcos 1:32-38; Lucas 4:43) Anggaman importante ed si Jesus so pamaabig ed totoo, say manunan misyon to et say pangipulong ed maong a balita na Panarian na Dios.​—Marcos 1:14, 15.

Diad sayan panaon, siansia nin say panangipulong ed Panarian na Dios so napangibiigan ed saramay walaan na kanonotan nen Kristo. Parad saramay malabay a magmaliw a papatumbok nen Jesus, oniay ingganggan to: “Onla kayo sirin, tan manggawa kayo na saray babangatan  ed amin a nasyones, . . . ya ibangat yo ra’n mangunor na amin a bengabengatla ya ingganggan ko ed sikayo.” (Mateo 28:19, 20) Niarum ni et oniay impasakbay to: “Saya ya ebanghelyo na panarian nipulong naani ed sankamundoan ya onkanan pamintuaan ed saray amin a nasyones; et saman la onsabi anggaan.” (Mateo 24:14) Lapud ipapanengneng na Salita na Dios a nasusumpal so panagpulong diad tulong na masanton espiritu, say pangiba ed satan a kimey et pakapangibiigan na tuan espiritualidad.​—Gawa 1:8.

Say kaukolan pian nipulong so mensahe na Panarian ed interon dalin et say nankakasakey a pansagpot na minilyon a totoo. (Juan 17:20, 21) Saramay mimila ed sayan kimey et kaukolan ya aliwa labat lan maespiritual noagta talagan organisado met ed interon dalin. Kasin nibiig yo iramay totoon manutumbok ed ginawa nen Kristo tan mangipupulong ed maong a balita na Panarian diad interon mundo?

Komustay Nagagawaan Mo?

Siempre, wala niray arum ya aspekton pakapangibiigan ed too a tuan maespiritual, balet komustay nagagawaan mo ed sarayay kapkapanbasam? Pian naamtaan, tepetan moy inkasika: ‘Kasin regular kon babasaen so Salita na Dios, say Biblia, tan momotekteken ko so abasak? Kasin napapatnagan ed kabibilay ko so bunga na espiritu? Kasin mapikasi ak? Kasin labalabay kon kaiba iramay totoon mangipupulong ed maong a balita na Panarian na Dios ed sankamundoan?’

Nanengneng mo so kinaaralem na espiritualidad mo no matuan usisaen moy inkasika. Onkiwas ka la natan pian nawalaan ka na “bilay tan kareenan.”​—Roma 8:6; Mateo 7:13, 14; 2 Pedro 1:5-11.

[Kahon/Saray litrato ed pahina 7]

PAKAPANGIBIIGAN ED TOON MAESPIRITUAL

◆ Mangaaro ed Salita na Dios

◆ Napatnagan ed sikato so bunga na espiritu

◆ Regular tan impapuso a manpipikasi ed Dios

◆ Ibabaga to ed arum so nipaakar ed maong a balita na Panarian

[Litrato ed pahina 5]

Natulongan kayo na Biblia a naamtaan so walad “kanonotan nen Kristo”