Say Salita nen Jehova et Mabilay

Saray Pabitar ed Libro na Ezequiel​—II

DISYEMBRE 609 B.C.E. ed saman. Ginapoan lay ari na Babilonia so unor a pangubkob to’d Jerusalem. Samay akadkaunan mensahe nen Ezequiel ed saramay akautibo ed Babilonia et nisentro ed sakey a tema: say inkagba tan inkaderal na inadaro ran syudad a Jerusalem. Balet natan, dinmuma so tema na saray propesiya to, nipaakar la itan ed kaderal na saray paganon nasyon a manliket ed desyang a sagmaken na totoo na Dios. Kalabas balet na 18 bulan, sano naderal la so Jerusalem, sananey lamet so magmaliw a tema to: say makapadin-dinayew a kipawil na tuan panagdayew.

Ipapasakbay na Ezequiel 25:1–48:35 so nagawa ed saray akapaliber a nasyon ed Israel tan say nipaakar ed kiliktar na saray totoo na Dios. * Saya so nauksoy unong ed tema tan impantutumbokan na saray inkagawa. Balet, say Ezequiel 29:17-20 et agnauksoy unong ed impantutumbokan na saray inkagawa, anggaman mitunosan nin siansia no nipaakar ed tema. Say libro na Ezequiel et kabiangan na impuyan a Kasulatan, kanian say mensahe na saya et “mabilay tan mabiskeg.”​—Hebreos 4:12.

‘SATAN A DALIN ET MAGMALIW A SINGA SAY PANAGTANAMANAN NA EDEN’

(Ezequiel 25:1–39:29)

Lapud nanenengneng la nen Jehova no antoy magmaliw a reaksion na Ammon, Moab, Edom, Philistia, Tiro, tan Sidon ed kageba na Jerusalem, ingganggan to si Ezequiel a manpropesiya sumpad sikara. Say Ehipto so nalimas met. ‘Si Faraon ya ari na Ehipto tan saray karaklan to’ so niyaliling ed kiew a sedro a pupoen na “kampilan na ari na Babilonia.”​—Ezequiel 31:2, 3, 12; 32:11, 12.

Manga anem bulan kayari na impaneral ed Jerusalem nen 607 B.C.E., walay tinmaynan odino takas a linma’d si Ezequiel a kuanto: “Say syudad akabil”! Diad saya et ‘aliwa lan emel’ ed saray adestiero so propeta. (Ezequiel 33:21, 22) Wala laray iyabawag ton propesiya nipaakar ed kipawil. Si Jehova so ‘mamaalagey naani ed sikara na sakey a pastol, say aripen [to] a David.’ (Ezequiel 34:23) Say Edom et mankibalatar, balet say dalin “nensaman” a Juda et magmaliw a “singa say panagtanamanan na Eden.” (Ezequiel 36:35) Insipan nen Jehova a protektaan to so nipawil a totoo to ed panangataki nen “Gog.”​—Ezequiel 38:2.

Makasulatan Iran Tepet a Naebatan:

29:8-12​—Kapigan imay 40 a taon ya impankibalatar na Ehipto? Kayari inkaderal na Jerusalem nen 607 B.C.E., siansian binmatik ed Ehipto iramay akera ed Juda anggano pinasakbayan lara nen propeta Jeremias. (Jeremias 24:1, 8-10; 42:7-22) Balet, agni ran siansia akaliktar ta nilusob met nen Nabucodonosor so Ehipto. Nayarin ginmapo diad satan ya impangubkob imay 40 taon ya impankibalatar na Ehipto. Anggaman anggapoy arum a reperensyan mamapaneknek ed sayan impaneral nilikud ed Biblia, matalek itayon agawa itan ta si Jehova so Mananumpal ed saray propesiya.​—Isaias 55:11.

29:18​—Panon a say “balang ulo ayangyang tan balang abala apongpong”? Talagan grabe tan makapabanal so impangubkob ed samay arawi’d dayat a syudad na Tiro, kanian ayangyangan iray sundalo nen Nabucodonosor lapud onkikiskis ed kauloan day sulong dan helmet tan saray takeb da et naukisan lapud impansasakbat da na ambebelat a materyales  ed panagpaalagey na saray tori tan padir.​—Ezequiel 26:7-12.

Saray Leksion ed Sikatayo:

29:19, 20. Sanen tinmakas iray taga Tiro ed islan syudad da et imbabatik da met iray kayamanan da, kanian dagdaiset so alimas nen Arin Nabucodonosor ed Tiro. Si Nabucodonosor et malastog, makasarili, tan paganon manuley, ingen ta sikatoy tinumangan nen Jehova ed serbisyo to sanen inter To so Ehipto a ‘pinagka-upa na saray sundalo to.’ Agta nepeg tayon aligen so tuan Dios diad pambayar tayo na buis ed gobierno lapud saray serbisyo ra’d sikatayo? Ag-akadepende ed kondukta odino panguusaran da ed saray buis no kasin sikatayoy manbayar odino andi.​—Roma 13:4-7.

33:7-9. Say managbantay ed sayan panaon, salanti, saray alanaan a nakdaan, tan saray kakaiba ra, so nepeg ya agbalot ontutundan mangipulong ed maong a balita na Panarian tan mamasakbay ed saray totoo ya onsabi la so “baleg ya irap.”​—Mateo 24:21.

33:10-20. Say kililiktar tayo et akadepende ed iyarawi tayo ed mauges iran dalan tan itulok ed saray kakaukolanen na Dios. On, ta saray daladalan nen Jehova et petepeteg a “nampapara [“makatunongan,” NW].”

36:20, 21. Saray Israelita so atawag a “baley nen Jehova” a Dios, balet ag-ira nambilay unong ed satan, kanian apabanday da so ngaran to ed saray nasyon. Agtayon balot komon magmamaliw a managdayew nen Jehova diad ngaran lambengat.

36:25, 37, 38. Say espiritual a paraiso a panggagayagaan tayo natan et napno na “pulok nipaakar ed bagat [“pulok na saray masanto a totoo,” NW].” Kanian, nepeg tayon panggunaetan a pansiansiaen itan a malinis.

38:1-23. Talagan makapaligsay puso a naamtaan a si Jehova et iliktar to iray totoo to ed pangataki na Gog ed dalin na Magog! Say Gog so inngaran ed “prinsipe na sayan mundo,” si Satanas a Diablo, sanen sikatoy pinaekal ed tawen. Say dalin a Magog et tutukoyen to iyan planeta a nibantakan nen Satanas tan saray demonyo to.​—Juan 12:31; Apocalipsis 12:7-12.

“YAN MO SO PUSOM ED SARAY AMIN YA IPATNAG KO NAANI ED SIKA”

(Ezequiel 40:1–48:35)

Labin-apat lan taon so linmabas nanlapula’d inkagba na syudad a Jerusalem. (Ezequiel 40:1) Limamplo tan anem nin taon so palabasen na saramay adestiero. (Jeremias 29:10) Si Ezequiel et asingger lan man-50. Diad pasingawey et sikatoy niyakar ed dalin na Israel. Oniay nibaga ed sikato: “Anak na too, nengnengen na saray matam, tan denglen na saray layag mo, tan yan mo so pusom ed saray amin ya ipatnag ko naani ed sika.” (Ezequiel 40:2-4) Seguradon agaylay liket nen Ezequiel sanen nipasingawey ed sikato so sakey a balon templo!

Say engranden templo ya anengneng nen Ezequiel et walaay 6 wangalan, 30 a silir na dulang, Masanto, Kasantosan, kiew ya altar, tan altar a pangiyapayan na saray bagat a poolan. ‘Onaagus’ manlapud sayan templo so danum a  nagmaliw ya ilog. (Ezequiel 47:1) Nipasingawey met ed si Ezequiel iray apag a dalin na saray tribu​—say kada apag et pandukey, manlapud bukig a mamasagur, insan walad baetan na apag nen Juda tan Benjamin so teritorya a parad pananguley. Ditan so kawalaan na “santuaryo nen Jehova” tan “say syudad” a manngaran na si Jehova et Wadtan.​—Ezequiel 48:9, 10, 15, 35.

Makasulatan Iran Tepet a Naebatan:

40:3–47:12​—Anto so irerepresenta na templo a nipasingawey? Diad tua, sayan abalbaleg a templo ya anengneng nen Ezequiel et agbalot nipaalagey. Ililitrato na saya so espiritual a templo na Dios, say mipadpara ed sakey a templo ya uksoyan to parad puron panagdayew natan. (Ezequiel 40:2; Miqueas 4:1; Hebreos 8:2; 9:23, 24) Satan a pasingawey nipaakar ed templo et asumpal diad “saray kaunoran ya agew,” sanen say inkasaserdote et adalisay. (2 Timoteo 3:1; Ezequiel 44:10-16; Malaquias 3:1-3) Balet walaan itan na kaunoran a kasumpalan dia ed Paraiso. Panamegley na satan a pasingawey et nisipan ed saray adestieron Judio a say puron panagdayew et nipawil ed dalin da tan say kada pamilyan Judio et nawalaay tawir a dalin.

40:3–43:17​—Anto so kabaliksan na samay impanukat ed templo? Tanda itan a seguradon nasumpal so gagala nen Jehova nipaakar ed puron panagdayew.

43:2-4, 7, 9​—Anto iramay “bangkay na saray arari ra” a nepeg ya ekalen ed templo? Mapatnag a say tutukoyen a bangkay et saray idolo. Say templo na Dios et dinutak na saray manuley ed Jerusalem tan saray totoo ditan diad impandadayew da ed saray idolo, kanian singa da ra ginawan arari ra.

43:13-20​—Anto so isisimbolo na samay altar ya anengneng nen Ezequiel ed pasingawey? Saman a simbolikon altar et irerepresenta to so linawa na Dios nipaakar ed dondon bagat nen Jesu-Kristo. Lapud sayan probisyon et niyabawag a matunong iray alanaan tan say “baleg ya ulop” so walaan na malinis a talindeg ed imaton na Dios. (Apocalipsis 7:9-14; Roma 5:1, 2) Satan seguro so rason no akin ya andian imay pasingawey a templo na “imbobo a dayat,” salanti, samay abalbaleg a kargaan na danum ya urasan na saray saserdote, ya aliwan singa samay templo nen Solomon.​—1 Arari 7:23-26.

44:10-16​—Siopa so irerepresenta na saserdoten klase? Irerepresenta na satan so grupo na saray alanaan a Kristiano ed panaon tayo. Sikaray agogolan nen 1918 sanen yinmurong si Jehova “a singa say manlinis tan manggugol” ed espiritual a templo to. (Malaquias 3:1-5) Saramay malinis odino nagbabawi et napansiansia ra so nikadkaduman pribilehyo ra. Insan manlapu la’d satan, kaukolan dan panggunaetan so mansiansian ‘andi mantsa ed mundo,’ diad ontan et magmaliw iran ehemplo ed “baleg ya ulop,” ya inrepresenta na saray tribun aliwan parad inkasaserdote.​—Santiago 1:27; Apocalipsis 7:9, 10.

45:1; 47:13–48:29​—Anto so irerepresenta na say “dalin” tan say impangapag-apag ed satan? Irerepresenta na dalin so laknab na teritorya a nepeg a panggawaan na saray totoo na Dios ed kimey da. Inerman so kawalaan na sakey a managdayew nen Jehova, sikatoy walad dalin a nipawil, daput no itatandoro to so tuan panagdayew. Say unor a kasumpalan na say pangapag-apag ed dalin et diad balon mundo sano  balang matoor a too et nawalaan la na tawir a pasen to.​—Isaias 65:17, 21.

45:7, 16​—Anto so irerepresenta na say pankokontribusyon na saray totoo parad saray saserdote tan prinsipe? Diad espiritual a templo, saya so manunan manutukoy ed espiritual a suporta, salanti, say pangiboluntaryo na tulong tan panangipatnag na makooperan awawey.

47:1-5​—Anto so ililitrato na say danum ed samay ilog ed pasingawey nen Ezequiel? Ililitrato na satan iray espiritual a probisyon nen Jehova parad bilay, laktip lay dondon bagat nen Kristo Jesus tan say kakabatan na Dios a naromog ed Biblia. (Jeremias 2:13; Juan 4:7-26; Efeso 5:25-27) Kalkalnan onaaralem so ilog pian nasustuni iray dakdakel ya onaarum a mangaawat ed tuan panagdayew. (Isaias 60:22) Say danum na bilay ya iyaagus na sayan ilog so magmaliw a sankaksilan sano Milenyo, tan nilaktip diad danum na satan so kaaruman niran pakatalos manlapud “saray libro” a nalukasan.​—Apocalipsis 20:12; 22:1, 2.

47:12​—Anto so irerepresenta na saray mabungan kiew? Ililitrato na saratan a kiew iray espiritual a probisyon na Dios pian nipawil so katooan ed inkayadyari.

48:15-19, 30-35​—Anto so irerepresenta na samay syudad ed pasingawey nen Ezequiel? Samay “syudad” et walad dalin a “karaklan [“aliwan masanto,” NW],” kanian maseguron irerepresenta na satan so sakey a bengatlan mangaraldalin. Ompatnag a say irerepresenta na satan et say panguley ed dalin a mangunggona ed saramay magmaliw a kabiangan ed matunong a “dalin a balo.” (2 Pedro 3:13) Walay wangalan na satan ed nantupag, a mangipapabitar a lukas itan. Saray manangasikaso ed totoo na Dios so nepeg met a mainomay ya asinggeran.

Saray Leksion ed Sikatayo:

40:14, 16, 22, 26. Ipapabitar na saray kiew a palma ya akaukit ed padir na loloobay templo a saramay maptek labat ed moral so palooben. (Salmo 92:12) Ipupurek na saya ed sikatayo ya awaten labat nen Jehova so panagdayew tayo no maptek itayo.

44:23. Misalsalamat itayon maong ed saray serbisyon itatarya na saserdoten klase ed panaon tayo! Say “matoor tan makabat ya aripen” so mangidadaulo ed panangitarya na nipanpanaon iran espiritual a tagano ya ontutulong ed sikatayon natebek so pandumaan na marutak tan malinis ed imaton nen Jehova.​—Mateo 24:45.

47:9, 11. Diad panaon tayo et makapakelaw a manatambal ed katooan so pikakabat, a kabiangan ed saramay irerepresenta na simbolikon danum. Kapagno inumen da itan, sikaray nabilay ed espiritual. (Juan 17:3) Balet, saramay agmangawat ed sayan danum a pakagamoray bilay et ‘niiter ed asin,’ salanti, permanentin naderal. Kanian im-importante a ‘gawaen tayoy anggaay nayarian tayo ya usaren ed dugan paraan so salitan katuaan’!​—2 Timoteo 2:15, NW.

“Pasantosen Ko Naani so Baleg a Ngaran Ko”

Sanen inekal na tuan Dios so unor ya ari ed poli nen David, pinaulyan to nin onlabas so andukey a panaon sakbay ya onsabi so “akankanepegan.” Balet, agto nilingwanan so sipan to ed si David. (Ezequiel 21:27; 2 Samuel 7:11-16) Diad propesiya nen Ezequiel et atukoy so nipaakar ed “aripen ko a David” a magmaliw a “pastol” tan “ari.” (Ezequiel 34:23, 24; 37:22, 24, 25) Anggapo lay arum a tutukoyen na saya noag si Jesu-Kristo a manuuley la ed Panarian. (Apocalipsis 11:15) ‘Pasantosen [nen Jehova] so baleg a ngaran to’ panamegley na Mesianikon Panarian.​—Ezequiel 36:23.

Asingsingger lan naderal so amin a mamapabanday ed masanton ngaran na Dios. Balet saramay mamapasanto ed satan a ngaran diad pandadayew da ed si Jehova ed paraan ya aabobonan to et makaawat na andi-anggaan a bilay. Kanian, samboten tayon inumen iray danum na bilay a daakan ya onaagus natan tan gawaen tayon sentro na bilay tayo so tuan panagdayew.

[Paimano ed leksab]

[Litrato ed pahina 9]

Say engranden templo ed pasingawey nen Ezequiel

[Litrato ed pahina 10]

Anto so irerepresenta na samay ilog na bilay ed pasingawey nen Ezequiel?

[Credit Line]

Pictorial Archive (Near Eastern History) Est.