Say Pananisia na Sakey ya Ina so Analona ed Trahedya

“No babasaen yo iyan sulat, agko sirin nilabas so operasyon ko tan agtakayo la nakaiba.”

ONTAN so gapo na sulat na sakey a Kristianon ina, si Carmen, ed taloran anak ton mamarikit a manedad na 25, 19, tan 16. Aliwan matalona so impan-opera ed sikato, tan makapaermen ta sikatoy inatey.

Talagan ansakisakit ed liknaan so pakataynan ed taloran ananak a walad ontan a makapasinagem a kipapasen. Balet, lapud mabiskeg a pananisia na sayan ina ed si Jehova tan ed saray sipan To, atalonaan to so trahedya tan sikatoy awalaan na mareen a nonot. Sankapatnagan iratan diad makapatenyeg a sulat to. Imanoen so inkuan to ed ananak to.

“Unona ed amin, labay kon ibaga ed sikayo ya inad-aro takayon maong. . . . Sikayo lay sankamaongan ya ananak parad sakey ya ina, tan papablien takayon maong.

“Labalabay takayo ni komon a nakaiba anggad balon mundo ya insipan na Dios . . . , balet lapud ta agmet posibli, impikasik la ed sikato a tulongan to kayon makapanmatoor, a singa gagawaen yo la. Dakel lan subok so dinalan tayo, tan ag-itayon balot pinaulyanan nen Jehova . . . Kanian mantultuloy kayon manmatalek ed panangigiya to panamegley na organisasyon to, tan mantultuloy yon suportaan so kongregasyon tan saray mamatatken. Manpulong kayon naynay, tan aro yo so amin ya agagi.

“Temporaryo labat so pakapansisian tayo. . . . Perdonaen yo ak ed amin a lingok tan diad amin a panaon ya agtakayo atalosan odino agko nibalikas ya inad-aro takayon maong. . . . Amtak a walay pankaukolan na kada sakey ed sikayo, tan mas amta itan nen Jehova, tan itarya to so amin a nakaukolan yo tan tumangan to kayo lapud pansusungdo yo.”

“Iteen yo so kanonotan yo ed kalat yo, salanti, say bilay ed balon mundo, tan panggunaetan yo so makaloob diman. Komon ta bendisyonan tan pabiskegen kayo nen Jehova ta pian makapanmatoor kayo anggad kasampotan. . . . Agkayo maneermen, pinabpablik iran ana’ko. Inad-aro ta kayo!”

Kapiganman et nayarin onsabi so trahedya ed siopaman. Insulat nen Arin Solomon nensaman a say “panaon tan ag-ilaloan a nagawa et onsabi ed amin.” (Eclesiastes 9:11, NW) Balet, saramay mabiskeg so pananisia ra ed Dios so makapanseguro met, a singa si apostol Pablo, ya oniay inkuan to: “Sisiaen ko a peteg, ya anggan say patey, anggan say bilay, . . . anggan siopa a pinalsa, agda itayo nisian ed aro na Dios, a wala ed Kristo Jesus a Katawan tayo.”​—Roma 8:38, 39; Hebreos 6:10.