Tepetepet na Saray Manbabasa
Tepetepet na Saray Manbabasa
Akin a tinepetan ni nen Arin Saul si David na “Siopa so akan anak ed sika?” kayarin pinatey nen David si Goliat, anta antis na satan et sikatoy impatawag la nen Saul a manlingkor ed sikato?—1 Samuel 16:22; 17:58.
Say mainomay ya ebat et alingwanan la nen Saul no siopa si David lapud agangganoy impankabat da. Balet, maseguron aliwan satan so sengegan ta ipapanengneng na salaysay na 1 Samuel 16:18-23 a si David so impatawag a mismo nen Arin Saul tan sikatoy naaro ton maong, tan ginawa ton manag-awit na armas to. Kabkabat to sirin si David.
Walaray iskolar na Biblia a mangibabagan diad saginonor labat kuno inyarum iray 1 Samuel 17:12-31 tan 17:55–18:5 lapud anggapo iratan ed pigaran kopya na Griegon Septuagint, a sakey a patalos na Hebreon Kasulatan ya asumpal nen komaduan siglo B.C.E. Balet, aliwan makabat so pankonklusyon base lambengat ed saratan a kopya na patalos na Septuagint ta saratan a bersikulo et naromog met ed arum niran napanmatalkan a manuskrito na Hebreon Kasulatan. *
Mapatnag ya aliwa lambengat a say ngaray ama nen David so labay ya amtaen nen Saul sanen tinepetan to si Abner insan si David a mismo. Sanen anengneng nen Saul si David ed duman anggulo bilang toon walaan na baleg a pananisia tan pakpel diad impantalo to ed si Goliat, labay nen Saul ya amtaen no anton klasen ama so amabaleg ed sayan kalangweran. Nayarin nononoten nen Saul ya iyarum ed armada to so ama nen David a si Jesse odino say arum nin kapamilyaan to, lapud nayarin sikaray makpel tan masebeg met a singa si David.
Anggaman say inlaktip labat na 1 Samuel 17:58 et say antikey ya ebat nen David ya, “anak ak na aripen mo a Jesse a Bet-lehemita,” ipapabitar na katumbokan a kapitulo ya abayag niran nantongtong. Nipaakar ed saya et oniay inkuan nen C. F. Keil tan F. Delitzsch: “Mapatpatnag diad balikas ed [1 Samuel 18:1] a ‘sanen sinampotan to so impitongtong to ed si Saul’ ya akitongtong ni si Saul ed sikato nipaakar ed pamilya to, ta ipapabitar na saratan a salita a nambayag ni tongtongan da.”
Manlapud sayan amin et nibaga tayon aliwan say inkatoo nen David a mismo so labay nen Saul ya amtaen sanen intepet ton “Siopa so akan anak ed sika?” ta amta to la itan, noagta saray naekperiensya to ed bilay tan say nanlapuan ton pamilya.
[Paimano ed leksab]
^ par. 4 Nabasa ed pahina 855, Tomo 2 na Insight on the Scriptures, ya impalapag na saray Tasi nen Jehova, iray paneknek a talagan kabiangan iray bersikulon anggapo ed Septuagint.
[Litrato ed pahina 31]
Akin ya intepet nen Saul ed David no siopay akan anak ed sikato?