Kasin Nanonotan Yo?

Agunggonaan kayo kasi ed impanbasa ed agano niran paway na Say Panag-Bantayan? Salien yo pan ebatan so onggendan a tepetepet:

• Diad antoran apatiran paraan ya uusaren na Kristianon Griegon Kasulatan so salitan “kongregasyon”?

Manunan uusaren itan pian tukoyen so interon grupo na saray alanaan a Kristiano (diad arum iran teksto et kaiba si Kristo). No maminsan et uusaren so “say kongregasyon na Dios” pian tukoyen so amin a Kristiano a nambilay ed sakey a panaon. Say komatlon kiyaplikaan na satan et pian tukoyen so amin a Kristiano ed sakey a pasen. Kaunoran, say termino so onaaplika ed saramay manugyop ed sakey a lokal a kongregasyon.​—4/15, pahina 21-3.

• Kapigan anampot so panagtawag ed saray Kristiano parad mangatatawen ya ilalo?

Anggapoy eksakton ebat na Biblia ed satan. Satan a panagtawag so ginmapo nen 33 C.E. tan nantultuloy ya anggad panaon tayo. Kayari taon 1935, niyapasakey so kimey a panaggaway babangatan ed panagtipon na baleg ya ulop. Balet, walaray abautismoan kayari 1935 a tinasian na masanton espiritu a diad tawen so ilalo ra, kanian, agtayo sirin makapangigeter na espisipikon petsa no kapigan kasi anampot itan a panagtawag. Saray tuan alanaan et aliwan mas dakel so masanton espiritu ra nen saray kaiba ran arum a karnero, nisay maniilalo iran idumay pangipasen ed sikara. Antokaman so ilalo ra, saray Kristiano so kaukolan a magmaliw a matoor tan mantultuloy a manumpal ed linawa na Dios.​—5/1, pahina 30-1.

• Sanen nansipan si Jefte, kasin sikatoy akaparaan a mangiyapay na marikit to ed Dios bilang sakey a bagat a poolan?

Andi. Say labay ya ibaga nen Jefte et iter to parad nikabkabiig a panaglingkor ed Dios imay onabet ed sikato, sakey ya uksoyan ed Mosaikon Ganggan. (1 Samuel 2:22) Pian nasumpal na marikit nen Jefte so sipan na ama to, sikatoy nantultuloy a nanlingkor ed tabernakulo. Baleg itan a sakripisyo lapud mankabaliksan itan a sikatoy aglan balot miasawa.​—5/15, pahina 9-10.

• Anto so agawaan na codex ed saray inmunan Kristiano?

Ompatnag a say manunan inusar na saray Kristiano anggad sanen mansampot lay inmunan siglo C.E. et say lukot. Diad ontumbok a siglo, nankokontraan iray manangiyalibansa na codex tan saray manangiyalibansa na lukot. Panisiaan na saray eksperto a say impangusar na saray Kristiano ed codex so baleg ya akatulong diad malaknab ya impangawat la ed satan.​—6/1, pahina 14-15.

• Anto so Kalendaryo na Gezer?

Satan so sakey a melag a baton-dena a naukitan. Aromog itan nen 1908 diad lugar a kawalaan na syudad a Gezer. Dakel so mangipapasen a ginawa itan na sakey ya ugaw a maneeskuela bilang kabiangan ed pampapasal to. Samay akasulat ditan et ipapasen a sakey a pinasimplin deskripsion nipaakar ed nanduruman kimey ed uma diad loob na sakey taon, ya onggapo ed panagtipon na ani a mipetekan ed baetan na Setyembre tan Oktubre, tan satan so manasaglawi ed nanduruman produkto tan kimkimey ed uma.​—6/15, pahina 8.

• Anto so kabaliksan na pankasalanan ed masanton espiritu?

Posible so pakapankasalanan ed masanton espiritu nen Jehova, sakey a kasalanan ya agnaperdona. (Mateo 12:31) Say Dios so mandetermina no kasin akagawa itayo na agnaperdonan kasalanan, tan sikato met so makapangekal ed espiritu to ed sikatayo. (Salmo 51:11) No paneermenan tayon maong so kasalanan ya agawa tayo, maseguron peteg itayon magbabawi tan agtayo sirin akapankasalanan ed espiritu.​—7/15, pahina 16-17.

• Akin ya intepet ni nen Arin Saul ed si David no siopa so akan anak ed sikato anta apilimogan to met la? (1 Samuel 16:22; 17:58)

Aglabat interesado si Saul ya amtaen so ngaran na ama nen David. Sanen anengneng nen Saul si David ed duman anggulo bilang toon walaan na baleg a pananisia tan pakpel diad impantalo to ed si Goliat, labay nen Saul ya amtaen no anton klasen ama so amabaleg ed sayan kalangweran. Nayarin nononoten nen Saul ya iyarum ed armada to si Jesse odino say arum nin kapamilyaan to.​—8/1, pahina 31.